Sa Faamanatuina le Soifua o Peresitene Monson i se Po o Pesepesega, Musika, ma Saafiafiga
I se sauniga faamanatu maoae sa faamamalu ai le aso soifua lona 85 o Peresitene Thomas S. Monson, e tusa ma le 20,000 tagata sa faatumulia le Maota Autu mo Konafesi i le aso 17 o Aokuso, 2012, mo se po o musika, o faamatalaga, ma saafiafiga i se polokalama na faaautuina “O Aso Auro: O Se Faamanatuga o le Soifua.”
O le suifefiloi na aofia ai musika ma savali o nisi o ata o le Broadway e fiafia i ai Peresitene Monson, ma isi pese musuia i le faamanatuga o lona aso soifua lona 85, lea na atoa i le aso 21 o Aokuso.
Sa saoaluma i le aofia ia Peresitene Monson ma lona faletua o Frances Johnson Monson, ma lo latou aiga.
Sa faamatala e Peresitene Henry B. Eyring, Fesoasoani Muamua i le Au Peresitene Sili, lona molimauina o se saafiafiga ia Peresitene Monson i se “auala maotua i le toafa o Arisona” lea na tu ai Peresitene Monson e faatalofa i se ulugalii ma le la fanau laiti, ae i’u ane ua onosai e faatalofa i le anoanoai o isi na lolofi ane.
Na saunoa Peresitene Eyring na ia molimauina Peresitene Monson o “fai ma sui o le Alii e asiasi atu i tagata,” e masani lava e aofia ai tamaiti, i le salafa o le lalolagi. “E le gata ina tuu atu i e sa ia feiloai i ai se taimi auro, ae faapena foi ia i tatou o ē sa vaai i ai o tupu,” na ia saunoa ai. “Ua le toe pei a’u o le mea sa i ai muamua, e faapena foi i tagata na i ai, aua o le lagonaina o lena alofa, ua suia ai i tatou.”
Na faamalo atu foi Peresitene Dieter F. Uchtdorf, Fesoasoani Lua i le Au Peresitene Sili, ia Peresitene Monson “i se soifuaga e tumu i aso auro. … Peresitene Monson, o oe o se uo ua aumaia le malamalama i le pogisa, ma o oe foi o le perofeta a le Atua mo o tatou taimi. Matou te alolofa ma lagolagoina oe. Matou te tatalo mo oe,” na ia saunoa ai.
E toatele isi taitai o le Ekalesia, taitai faaletapuaiga, ma taitai faalemalo, faapea foi uo ua tausagā, sa saafi ia Peresitene Monson e ala i ni vitio sa mua’i pueina. Sa aloaia foi o ia mo le tele o tausaga sa aofia ai i le Sikauti.
Sa aofia i le polokalama taimi na toe ta’ua ai e Peresitene Monson ia upu a se tusitala ma se tusisolo Sikotilani o James Barrie, o le na tusia, “E tuuina mai e le Atua ia i tatou manatunatuga, ina ia tatou manatua ai taimi a o tatou talavou, pe a oo ina tatou matutua” (Tagai Laurence J. Peter, comp., Peter’s Quotations: Ideas for Our Time (1977), 335).
“O le po nei ua ou taulimaina ai se aofaiga tele o manatua,” na saunoa ai Peresitene Monson.
Sa toetoe o se pale laualuga, aua sa teuteuina le Maota Autu mo Konafesi i le fiaselau o rosa samasama, o se faatusa o aso “auro” o lona soifua.
“O Aso Auro: O Se Faamanatuga o le Soifua” na toe tepa faamama’i ai i tua i le soifuaga o Peresitene Monson—a o tamaitiiti, faaipoipo, tautua faamiliteli, ma le auaunaga i le Ekalesia—e ala i musika ma pese.
Ata na pueina e Debra Gehris