Seia Tatou Toe Feiloai
Aveolela, Va I Fafo, ma le Fiafia o le Talalelei
Mai se faatalanoaga o le Alaata Mamona. Ina ia faafofoga i le faatalanoaga atoa i le Faaperetania, alu i le mormonchannel.org/conversations/27.
O le a mea a Aveolela e fai i le va i fafo? E anoanoai pe afai o fai i latou ma sui o le fiafia o le talalelei.
O nai tausaga ua mavae, a o avea i ma’ua ma Elder M. Russell Ballard ma Pulega Aoao faufautua i le Matagaluega o le Va i Fafo a le Ekalesia, sa ma iloaina ai e masani ona faafesootai e ala o faasalalauga ia tagata e le o ni tagata o le Ekalesia e fesili i ai e uiga i le Ekalesia. O le manaomia ai o se suiga, sa amata ona ma asiasi atu ma Elder Ballard, i lalo o le faatonuga a le Au Peresitene Sili, e asiasi atu i au pule faatonutonu o nusipepa iloga, faasoa atu le savali e faapea, i le avea ai ma ni tagata o le Au Paia o Aso e Gata Ai, tatou te le faaituau i se vaega faaupufai. Tatou te le fai itu e faatatau i ni sui po o ni vaega faaupufai. Ae peitai, tatou te mananao e avea ma tagata e faamatalaina o tatou lava faatuatuaga. Sa matou ta’u atu ia i latou, “matou te mananao ia outou o mai ia i matou pe afai o le a outou talanoaina o matou talitonuga.”
Sa matuai taliaina lelei mai na asiasiga, ma sa ma iloa ai sa i ai se aafiaga o le tatou talosaga. Ma o lenei ua tatou maua i ala o faasalalauga se malamalamaaga e sili atu ona lelei e uiga i le Au Paia o Aso e Gata Ai. Ua aveesea ai ni faamatalaga faafaailoga ua leva, ma ua tatou vaai i isi tagata ua latou iloa o i tatou o ni tagata lelei o e o loo taumafai e uia le olaga mai se itu aoaoina ma le atamai. Ua tatou matauina foi se manatu o fafo atu o le Ekalesia e faapea e le tutusa tagata uma o le Au Paia o Aso e Gata Ai; o o tatou tagata e matuai eseese lava le tasi mai le isi i ni auala lelei ma le tulaga ese.
Faatasi ai ma le suia o nei uiga faaalia, o se taimi matagofie lenei e avea ai ma se tagata o le Ekalesia ma mo tagata ia faaali atu ai lagona ma tali fesili mai a latou uo ma tuaoi e uiga i o tatou talitonuga. A tatou faia lena mea, e leai se mea e sili atu le taua nai lo le tatou lagonaina o le olioli ma tatou fiafia i le talalelei a Iesu Keriso. Ua tatou iloa o le taunuuga taua lava o le, ua tatou iloa o ai Iesu Keriso, ma ua tatou maua le avanoa o le i ai o se Tama agalelei i le Lagi e faamanuia mai i tatou.
O le mea malie ua ou iloa, o o tatou au paia faamisiona e sili ona lelei, o i latou ia o e faaaoga le avanoa o le faasoa atu o le talalelei, e masani lava o tagata ia e fiafia. A o avea au ma Faatonu Sili o le Matagaluega o Faifeautalai, sa faafuasei ona matou matauina ni papatisoga i Farani. O le matou fiafia tele, sa matou mafaufau ai i pogai [o le maua o papatisoga], ma sa feololo ni pogai. Peitai o le tasi o pogai autu lava o se tuafafine o le sa alu e faigaluega i le taeao o le Aso Gafua ma talanoa e uiga i Aveolela. A uma le Sapati, na te faamatalaina atu—ma le olioli tele ma le fiafia—i ana uo faigaluega e uiga i lona aafiaga i le aoaoina o fanau laiti i le aso na mavae atu. E le’i umi, ae le mafai e ana paaga ona faatali mo lona talanoa atu e uiga i Aveolela. Ma o le a le mea na faia e lena mea? O se vaega lenei o tagata sa nonofo ma atugaluga tutusa e pei foi ona tatou maua i lo tatou lalolagi ma le lumanai, ae na faafuasei lava, ona i ai se tagata sa le gata ina fiafia ae sa fiafia e uiga i tamaiti—o e o faatusa o le lumanai. Sa mautinoa lava le alofa o lenei tuafafine i le Faaola, ma sa faapea ona susulu atu lena alofa. Sa fia iloa atili e ana paaga i le galuega nisi mea.
Afai tatou te olioli i mea ua tatou maua, afai tatou te lagona le olioli ma faailoa atu, tatou te lagona le fiafia atili. Tatou faia le mea e finagalo le Alii tatou te faia, e avea i tatou ma tagata lelei atu, ma e ala i fegalegaleaiga, o i latou e siomia i tatou—o a tatou fanau ma uo ma tuaoi—e fiafia atili foi. O le ki lava o le fiafia. A o tatou faasoa atu le fiafia o le talalelei, ua tatou ausia le mea e finagalo le Alii ia tatou ausia.