Sa Latou Saunoa Mai ia i Matou
Kerisimasi i totonu Ia te Oe
Mai le “O Se Kerisimasi Misiona,” Church News, 17 Tes., 2011, 10.
Tumau i lou faatuatua. Vaai mo le lelei i ou tulaga. Fai se galuega agalelei mo se tasi. Saili le Keriso e leai ni afifi ma ni mea feilafi.
Ou te matea e manatua e tagata uma lana uluai Kerisimasi na aluese mai ai ma lona aiga. O le mafuaaga o le aluese mai atonu ona o le misiona po o le tautua i le militeli, olaga faatagata aoga, po o le galuega. Po o le a lava le mafuaaga, o lena uluai Kerisimasi ua e aluese mai ai o se manatuaga ootia mo i tatou uma. Ia i latou o e ua o ese mai aiga i le Kerisimasi, po o e ua o ese mai i le aiga i lenei tausaga, ou te ofo alofa atu e ala i o’u manatuaga faapena.
I lo’u tulaga o la’u auaunaga o se faifeautalai. Mo le 19 tausaga sa ou fiafia ai i Kerisimasi na siomia e aiga ma uo. Ou te matea i lo’u manatu faapito faaletalavou ou te le’i mafaufauina lava e faaaluina lo’u Kerisimasi i se isi lava ala.
Ma, a o fotuai mai le vaitau o le Kerisimasi o le 1960, sa ou iu ane i le isi afa o le lalolagi ma aluese mai na mea uma. Sa le’i atoa le tolu o masina talu ona ou i ai i Egelani ma, i le aso muamua o Tesema, sa feau mai ai a’u i le ofisa o le misiona ma te feiloai ma Elder Eldon Smith, na faatoa taunuu mai mai Champion, Alberta, Kanata—o la’u uluai soa laitiiti lea. Sa auina atu i maua e tatala le galuega faafaifeautalai i le aai e le taliaina ni suiga o Guildford, i le itumalo o Surrey, o se eria e le’i i ai muamua ni faifeautalai o le Au Paia o Aso e Gata Ai ma, i lo ma iloa, sa na o le toatasi le tagata o le au paia sa lafi ai i se mea o totonu o ona tuaoi. Sa ma talavou, leai se poto masani, ma sina lofituina, ae ma te le’i lotovaivai ai.
Sa ma lesitala i le ofisa o leoleo, fai fetuunaiga mo le fale ma te faamautu ai, ma, o le taimi muamua sa le mafai ona ma maua le tagata e toatasi o le Ekalesia, ma lafo i maua i le mea e tasi sa ma iloa ona fai—o le tu’itu’i i faitotoa. Sa ma tuitui i faitotoa i le taeao, sa ma tuitui i faitotoa i le aoauli, sa ma tuitui i faitotoa i le afiafi, sa ma tuitui i faitotoa i le po. Sa vili atu a ma uila i na auala i le mea pe a o le Tesema aupito timuga lea i le talafaasolopito o Peretania—ia o le mea lena sa foliga ai ia i maua. Sa ma susū i le taeao, sa ma susu i le aoauli, sa ma susu i le afiafi, ma sa ma susu i le po, ae sa ma tuitui pea i faitotoa. Ma sa toetoe lava a leai se isi na ma mauaina.
Sa faapena ai lava seia oo i le Vaeluaga o le Kerisimasi, ae ua tau le mananao foi tagata e faalogo i ni faifeautalai e toalua “mai ni kolone.” O lena afiafi, i le vaivai ae na tuuto, sa ma foi atu ai i le ma potu mautotogi e tasi ma fai se ma lotu o le Kerisimasi. Sa ma usuina se pese o le Kerisimasi ona fai lea o se tatalo amata. Sa ma faitau mai tusitusiga paia ma faalogologo i se lipine na faaautuina O Le Tala Moni o le Kerisimasi. Ona ma usuina lea o se isi viiga o le vaitau, ma fai se tatalo faaiu, ma ma o loa e momoe. Sa matuai o ma vaivai lava mo le faia o ni miti e uiga i siva palamusuka i o ma mafaufau.
I le taeao o le Kerisimasi sa ma tausisia pea ia fuafuaga faatulagaina o suesuega i le taeao ma tatalaina ia afifi e lua pe tolu na maua mai i le taimi o le siitaga. Ona ma o lea e tuitui faitotoa. Sa ma tuitui i le taeao, sa ma tuitui i le aoauli, sa ma tuitui i le afiafi, ma sa ma tuitui i le po. Ma te le’i maua foi se isi o i latou.
Mo se Kerisimasi le manaia faapena—e manino lava o le Kerisimasi aupito le fiafia lea o soo se Kerisimasi na ou maua pe talu mai—e ta’u mai ai se mea e faapea o na aso faapitoa ia Tesema o le 1960 e tumau pea i lo’u fatu (i le mavae ai o le silia ma le 50 tausaga!) o se tasi o Kerisimasi aupito matagofie na ou maua. Ou te manatu ona o le taimi muamua i lo’u olaga, na ou malamalama ai i le Kerisimasi nai lo na o le fiafia ai. Ou te manatu mo le taimi muamua i soo se auala taua moni, sa ou maua le aano o le fanau mai ma le soifuaga o Keriso—Lana savali ma Lana misiona ma Lana taulaga mo isi.
Sa tatau ona ou faia lena fesootaiga i se tausaga na muamua atu, ae ou te lei faia—e le’i malosi tele. Ae o lena Kerisimasi i Egelani—o se tagata 19 tausaga sa maalili, susu ma sa fai sina lofituina—na ou “malamalama ai.” E mafai ona ou faapea moni atu ona o la’u misiona, o le Kerisimasi, e pei foi o le tele o isi vaega o le talalelei, ua sili atu ona anoa ia te a’u i tausaga uma talu mai lena aafiaga.
I lenei Kerisimasi e momoli atu ou alofaaga i faifeautalai uma, alii ma tamaitai uma i le militeli, i tamaiti aoga uma, ma tagata faigaluega uma ma tagata malaga uma o e o le a le i ai “i le aiga mo le Kerisimasi,”1 e pei ona fai mai le pese o le Kerisimasi. Tumau i lou faatuatua. Vaai mo mea lelei i lou tulaga. Fai se mea lelei mo se tasi. Saili Keriso e leai ni pepa e afifi ai ma feilafi. O le a e maua lena mea e ui lava i le tele o tulaga e i fafo atu, o le Kerisimasi—e pei lava o le malo o le Atua—e i “totonu ia te oe” (Luka 17:21).
Ata na tusia e Paul Mann