O Meaalofa E Le Mafai Ona E Afifiia

Saunia e Elyse Alexandria Holmes

I le vaitau o le Kerisimasi e masani ona tatou tulimatai atu i le tuuina atu o meaalofa ia i latou tatou te alolofa i ai. Ae ia manatua o nisi o nei meaalofa silisili o meaalofa ia e le mafai ona e afifiia. O nisi nei o meaalofa e lemafaagaloina e mafai ona e tuuina atu i ou matua.

Auauna atu

O le tasi o meaalofa silisili e mafai ona e tuuina atu o le auauna atu. O le a matuai fiafia i ai ou matua.

Tapena le fale.
Ofo atu e vaai tamaiti.
Faatulaga ma tapena le laulau.
Gasese le meaai o le afiafi mo lou aiga.
Faamama ipu pe salu le fola o le fale.
Fesoasoani i sou tei i ana meaaoga.
E faalagolago i le tau o le atunuu o loo e nofo ai, sua ese le auala savali pe vele le togalaau.

Taimi o le Aiga

E tusa lava pe pisi au fuafuaga faatulagaina, ia faaavanoa se taimi mo lou aiga. O lou i ai o le a lagolagoina ai ou matua, ma o le a la faafetai atu ia te oe mo au taumafaiga.

Auai i afiafi faaleaiga (e aunoa ma le tau faamanatu atu e uiga i ai).
Taaalo ma nai ou tei.
Ia i ai i le taimi tonu mo taumafataga i le afiafi a le aiga.
Talanoa ma faalogo atu i tagata o le aiga.
Auai i tatalo faaleaiga ma le faitauina o tusitusiga paia.
Faaalu se taimi ma lou aiga nai lo na o au uo, pe valaaulia au uo i gaoioiga faaleaiga (i le faatagaga a ou matua).

Tautinoga

Ia faailoa atu i ou matua ua e faia se tautinoga i se mea taua. O le auala sili e faailoa atu ai lou tautino o le amata nei ma faaauau ai lava.

Saunia e fai se misiona (mo alii talavou). Amata nei i le faaputuina o se tupe mo le misiona pe a mafai.
Suesue i aso uma i tusitusiga paia.
Sefe se vaega o au tupe maua.
Alu i le aoga e aunoa ma le faitio ma fai au meaaoga i le taimi e tatau ai.
Auai i le seminare. Afai e te auai i le seminare i le taeao, ia e ala lava oe i luga.
Sauni mo le faaipoipoga i le malumalu. Fai se lisi o uiga taua e te suea i se toalua i le lumanai ona atiina ae lea o na uiga ia te oe lava.

Amio po o uiga faaalia

O le a talisapaia e ou matua o se uiga faaalia lelei ia i laua ma isi tagata o lou aiga.

Ia i ai se uiga lelei.
Aua e te vaavaai masei i ou matua po o nai ou tei.
Ia fai se masani o le fai atu faafetai, e oo lava i mea laiti.
Tusi se tusi faafetai i ou matua mo mea uma ua la faia mo oe.
Faalelei ni feteenaiga ma ou matua po o nai ou tei e aunoa ma le ita po o ni finauga.
Faitau moni ou—faamanuiaga. Fatu se lisi o mea ua mafai ona e faia ona o le lagolago a ou matua, ma faasoa atu lena lisi ia i laua.