Fesili & Tali

“Pe faapefea ona ou tali atu i fesili a a’u uo e uiga i le malumalu pe afai e le tele so’u lava iloa i ai?”

E faigata ona e talanoa e uiga i se mea e te le malamalama i ai, ma e tele mea e le mafai ona tatou malamalama i ai e uiga i le malumalu seiiloga e mafai ona tatou o i ai i tatou lava iina. O fafo o le malumalu tatou te faaeteete ai i auala tatou te talanoaina ai sauniga aua e paia ia sauniga. Ae peitai, e mafai lava ona tatou talanoa e uiga i faamanuiaga ma faamoemoega o le malumalu. E mafai ona tatou ta’u atu i a tatou uo e faapea, o totonu o le malumalu, e aoao ai tagata o le au paia i upumoni e faavavau, maua sauniga paia mo i latou lava, ma fai nei sauniga e fai ma sui o o latou tuaa ma isi o e ua maliliu.

O le tele o mea e te iloa e uiga i malumalu, o le lelei foi lena o lou saunia e tali atu i fesili a au uo. Ina ia aoao atili, talanoa i ou matua po o taitai o le Ekalesia. E mafai foi e oe ma au uo ona faitau i le lomiga faapitoa o le Liahona e uiga i malumalu (Oketopa 2010) ma maua ia tali i le Mormon.org i lalo o “Temples” i Fesili e Fesiligia Soo.

E mafai foi ona e faasoa atu ou lagona e uiga i le malumalu. Afai sa e alu i le malumalu e fai papatisoga pe sa e i ai i lotoa o le malumalu, e mafai ona e ta’u atu i au uo e uiga i le lagona o le toafilemu sa e lagonaina a o e i ai iina.

Afai e fesili au uo pe aisea e le tatalaina ai le malumalu i tagata uma, e mafai ona e faamatala atu i ai, ona o galuega paia o loo faia ai i totonu o le malumalu, e na o i latou lava ua saunia faaleagaga ma i ai se pepa faataga aoga o le malumalu e mafai ona ulu i ai. A o le’i faapaiaina ia malumalu fou, o se faletatala e mafai ai e tagata o le alalafaga ona maimoa taamilo i le malumalu ma aoao atili ai e uiga i ai. Ae a maea ona faapaiaina le malumalu, soo se tasi lava e mafai ona maimoa taamilo i lotoa. Ae afai e mafai, ia valaaulia lau uo i se fale tatala a le malumalu pe e te lua asiasi atu foi i lotoa o le malumalu.

Ia Agavaa mo le Malumalu

Ou te ta’uina i a’u uo lea faatusa o le malumalu ia te a’u: o le fiafia, malosiaga, ma aiga e faavavau. Ou te faamatala atu i ai le auala e tumau ai i le agavaa. Afai e mafai ona latou iloa ou te ola i lo’u olaga faatasi ai ma le malumalu o se tasi o a’u sini e sili ona taua, o le a latou lagona le mana o le malumalu. E mafai e tagata uma ona vaai i le matagofie o le pito i fafo o le malumalu, ae o lo’u ola ai i le auala sa’o, e mafai ai ona ou faaali atu i a’u uo le faamoemoe ma le fiafia lea e aumai e le alu i totonu o le malumalu.

Emma R., 18 tausaga, Iuta, ISA

Ia Valaaulia Au Uo e Aoao Atili

Ta’u i au uo mea uma e te iloa—pau le mea ia talafeagai. Ta’u i ai tatou te le talanoaina ia nisi o mea e uiga i le malumalu ona e paia. Afai latou te fesiligia se mea e te le iloaina, ta’u sao i ai e te le iloaina. Ma afai latou te fiailoa atili, ia valaaulia i latou i le lotu ma ta’u i ai e faamanuia e le Atua i latou o e tausia Ana poloaiga i le malamalama atili faaleagaga. Tatou te talitonu i le aoaoina o mea faaleagaga e ala i le laina ma lea laina, mataupu ma lea mataupu.

Carmela B., 18 tausaga, Filipaina

Tatalo mo le Agaga e Musuia Lau Tali

Ina ia tali i fesili a a’u uo, e muamua ona ou tatalo i le Tama Faalelagi i sa’u tala e fai atu. Atonu e manaomia ai se tele o le onosai, ae e aoga lava le faatalitali mo le Agaga e musuia oe i le mea e fai atu. Lona lua, alu i le lotu ma i le papatisoga i le malumalu ia maua atili mai ai le malamalama faaleagaga. A fesili mai la’u uo i ni fesili e uiga i le malumalu, ou te fai i ai o papatisoga e fai mo o tatou tuaa ua maliliu o e e le’i maua se avanoa e avea ai ma ni isi o le talalelei a o soifua i latou. Ma i le lagi ua latou maua ai le avanoa e filifili ai e talia pe teena le sauniga.

Lydia P., 13 tausaga, Florida, ISA

Valaaulia Au Uo e Feiloai i Faifeautalai

A fesili mai a’u uo e uiga i le malumalu, ou te fai i ai o le maota o le Alii, lea e mafai ona tatou faia sauniga faapitoa tatou te latalata atu ai i lo tatou Tama Faalelagi ma mafai ai ona tatou toe foi atu ia te Ia. Ou te fesili foi i a’u uo pe latou te mananao e feiloai i faifeautalai e aoao atili ai. Afai latou te fai mai e leai, ou te tusia i lalo a latou fesili ma ou fesili ai a’u lava i faifeautalai. Ona ou faailoa atu lea i a’u uo mea na ou iloaina. O lenei faiga ou te aoao atili ai foi a’u e uiga i le malumalu.

Kimmie H., 13 tausaga, Montana, ISA

Faaali Atu Ata o Malumalu

Ou te fiafia e faitau i tusi e faaali mai ai malumalu mai le lalolagi atoa. Ina ua i i ai sa’u uo sa fesili mai e uiga i malumalu, sa ou iloaina sa le lava la’u faamatalaga e fesoasoani ai ia te ia ia malamalama. O lea sa ou aumaia ai a’u tusi e uiga i malumalu ma faaali atu ia te ia le mea e ta’u o le malumalu, o faamoemoega o le malumalu, ma lo tatou faafetai ua tatou asiasi atu i le malumalu. Sa ou filifili e valaaulia o ia i le lotu i le Aso Sa, lea e mafai ai e faifeautalai ma faiaoga o le Aoga Sa ona fesoasoani ia te ia e aoao atili ai.

Jessica A., 18 tausaga, Initonesia

Talanoa i Ou Matua

Saili mo tali. Faitau tusitusiga paia ma fesili i faiaoga o le Aoga Sa. O fesili e mafai ona taliina i taimi uma lava; pau lava lau mea e fai o le saili. Tatalo e uiga i ai! A i ai ni a’u fesili e uiga i le malumalu, ou te fesili i o’u matua. E faigofie ona ou talanoa i ai ma e naunau foi e fesoasoani mai.

Bryson B., 18 tausaga, Iuta, ISA

Alu i le Malumalu

Afai tatou te taumafai e o atu soo i le malumalu pe a mafai, e mafai ona lelei atili la tatou fesootaiga ma lo tatou Tama Faalelagi. O le uiga o lena mea, e mafai ona tatou tatalo atu ia te Ia e uiga i fesili a o tatou uo. Afai e le tele ni mea tatou te iloa e uiga i le malumalu, o lona uiga e tatau ona tatou suesue atili. O taimi taitasi ae tatou te le’i o atu i le malumalu, ia suesue ma tatalo e uiga i mea e tatau ona e mafaufau i ai a o e i ai i le malumalu. Ona mafai lea ona tatou taliina fesili e pei o le “O le a le lagona e te maua i le malumalu?”

Sara T., 14 tausaga, Idaho, ISA

O tali ua faamoemoe e mo se fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

E Paia i le Alii

“O le malumalu o se nofoaga o le matagofie, o se nofoaga o faaaliga, o se nofoaga o le filemu. O le maota lenei o le Alii. E paia i le Alii. E tatau foi ona paia ia i tatou.”

Peresitene Howard W. Hunter (1907–95), “The Great Symbol of Our Membership,” Liahona, Nov. 1994, 6.

O Le Isi Fesili

“E mafai faapefea ona ou teteeina faaosoosoga?”

Ia oo atu i le aso 15 o Ianuari, 2013 ua auina mai lau tali, i le liahona.lds.org, i le i-meli i le [e-mail], pe meli mai i le:

Liahona, Questions & Answers 1/13

50 E. North Temple St., Rm.2420

Salt Lake City, UT 84150-0024, USA

E ono faapupuuina tali mo le uumi po o le manino.

O le faamatalaga ma le faatagaga o loo i lalo e tatau ona aofia mai i lau i-meli po o le tusi: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e itiiti ifo i le 18 ou tausaga, o le faatagaga tusitusia a ou matua (e talia foi le i-meli) e lolomiina ai lau tali ma lou ata.