សំឡេងពួកបរិសុទ្ធថ្ងៃចុងក្រោយ
ការសម្អាតព្រះវិហារ និង ការបង្រៀនដំណឹងល្អ
រចនារូបភាពដោយ អេលែន ហ្គានស៍
នៅរសៀលថ្ងៃសៅរ៍មួយ ខ្ញុំបានត្រៀមខ្លួនជាស្រេចទៅឆ្នេរសមុទ្រ ជាមួយគ្រួសាររបស់ខ្ញុំ ។ ពួកគេបានធ្វើដំណើរពីទីក្រុង អាម៉ាស្សូណាស មកទីក្រុង ឡា ហ្គៀរ៉ា ដើម្បីសម្រាកលំហែពីរបីថ្ងៃជាមួយខ្ញុំ ។ ព្រះអាទិត្យរះចិញ្ចែងចិញ្ចាច ខ្យល់ជំនោរសមុទ្រមានសភាពល្អប្រពៃ ហើយខ្ញុំមានចិត្តរីករាយដោយឃើញក្តីរំភើបរបស់បងប្អូនស្រីរបស់ខ្ញុំ ។
នៅពេលយើងធ្វើដំណើរតាមផ្លូវ ខ្ញុំបានចាំថា ខ្ញុំទទួលខុសត្រូវសម្អាតអគារព្រះវិហារនៅថ្ងៃនោះ ។ ឥឡូវខ្ញុំត្រូវធ្វើការសម្រេចចិត្ត ៖ តើខ្ញុំត្រូវបំពេញការទទួលខុសត្រូវរបស់ខ្ញុំ ឬខ្ញុំបន្តទៅឆ្នេរសមុទ្រ ជាមួយគ្រួសាររបស់ខ្ញុំ ? ខ្ញុំបានសម្រេចចិត្តពិភាក្សារឿងនោះជាមួយម្តាយ និង បងប្អូនស្រីរបស់ខ្ញុំ ។ ពួកគាត់ពុំធ្លាប់ទៅព្រះវិហារ អិល.ឌី.អេស ឡើយ ប៉ុន្តែពួកគេមានចិត្តត្រេកអរយ៉ាងខ្លាំងដើម្បីជួយសម្អាតខ្ញុំ ដរាបណាយើងទៅឆ្នេរសមុទ្រភ្លាមបន្ទាប់ពីយើងសម្អាតព្រះវិហាររួច ។
ពេលយើងចូលទៅក្នុងអគារព្រះវិហារ ខ្ញុំបានពន្យល់អំពីកិច្ចការដែលត្រូវធ្វើ និង របៀបដែលត្រូវធ្វើវា ។ អ្វីដែលពួកយើងគិតនោះគឺថា វាជាការសម្អាតតែមួយភ្លែតនោះ បានក្លាយទៅជាការចំណាយពេលបួនម៉ោង ដោយសារពួកគេចាប់អារម្មណ៍ជាខ្លាំង ! ខ្ញុំបានបង្ហាញបន្ទប់នីមួយដល់គ្រួសារខ្ញុំ បង្ហាញរូបគំនូរ និង អាងជ្រមុជទឹក ។ ដួងចិត្តរបស់ខ្ញុំពោរពេញដោយក្តីអំណរដ៏ធំ ។ ខ្ញុំស្ទើរតែពុំជឿសោះថា គ្រួសារខ្ញុំជួយខ្ញុំធ្វើកិច្ចការដែលសំខាន់បំផុតសម្រាប់ខ្ញុំ ។ អំឡុងពេលពួកយើងនៅទីនោះ ថាលីអា និង ហ្គីណេស្កា បងប្អូនស្រីវ័យជំទង់របស់ខ្ញុំ បានរៀនទំនុកតម្កើងមួយចំនួន ហើយបានសួរខ្ញុំអំពីសាសនាចក្រ ។
ថ្ងៃអាទិត្យមួយគ្រួសារខ្ញុំបានចូលរួមព្រះវិហារជាលើកដំបូង ។ ពួកគាត់ត្រូវបានស្វាគមន៍យ៉ាងកក់ក្តៅនៅក្នុងវួដ ។ យុវនារីបានស្វាគមន៍បងប្អូនស្រីរបស់ខ្ញុំ ។ ស៊ិស្ទើរ អ្នកផ្សព្វផ្សាយសាសនា បានជួបពួកគេ ហើយណាត់ជួបពួកគេនៅថ្ងៃបន្ទាប់ ។ យើងបានធ្វើរាត្រីជួបជុំក្រុមគ្រួសារ ហើយខ្ញុំបានបង្រៀនពួកគេអំពីរបៀបអធិស្ឋាន ។ យើងអធិស្ឋានជាមួយគ្នាជាញឹកញាប់ ។ យើងក៏បានស្តាប់ទំនុកតម្កើង ហើយមើលវីដេអូរបស់សាសនាចក្រ ។
ពីមុនពេលគ្រួសារខ្ញុំត្រឡប់ទៅផ្ទះវិញ ខ្ញុំបានយកបងប្អូនស្រីរបស់ខ្ញុំទៅ ខារ៉ាខាស ដើម្បីមើលព្រះវិហារបរិសុទ្ធ និង បរិវេណព្រះវិហារបរិសុទ្ធ ។ ខ្ញុំបានថ្លែងទីបន្ទាល់ខ្ញុំអំពីពរជ័យនៃព្រះវិហារបរិសុទ្ធ ហើយបានលើកទឹកចិត្តពួកគេឲ្យស្វែងរកសាសនាចក្រ ពេលពួកគេត្រឡប់ទៅទីក្រុង អាម៉ាស្សូណាស់វិញ ។
ពេលពួកគេចាកចេញទៅផ្ទះវិញ ខ្ញុំបានទាក់ទងទៅអ្នកផ្សព្វផ្សាយសាសនានៅក្នុងតំបន់របស់ពួកគេ ។ អ្នកផ្សព្វផ្សាយសាសនា និង សមាជិកនៃក្រុមប្រឹក្សាវួដ បានជួបគ្រួសាររបស់ខ្ញុំ ហើយជួយពួកគេឆ្ពោះទៅរកការប្រែចិត្តជឿ ។ បងប្អូនស្រីរបស់ខ្ញុំបានអធិស្ឋានជាញឹកញាប់ សូមឲ្យឪពុករបស់ពួកយើងអនុញ្ញាតឲ្យពួកគេជ្រមុជទឹក ។
ខ្ញុំបានធ្វើដំណើរទៅទីក្រុង អាម៉ាស្សូណាស់ ដោយអំណរគុណ និង ក្តីរីករាយដ៏មហិមា ដើម្បីជ្រមុជទឹក ថាលីអានិង ហ្គីណេស្កា ។ ពន្លឺនៅក្នុងកែវភ្នែករបស់ពួកគេបានឆ្លុះបញ្ចាំងអំពីសេចក្តីសង្ឃឹម និង អំណរគុណពួកគេចំពោះព្រះវរបិតាសួគ៌ ក្នុងការដឹកនាំពួកគេមកកាន់ដំណឹងល្អ ។ តាមរយៈការបំពេញការចាត់តាំងឲ្យសម្អាតព្រះវិហារ នោះគ្រួសាររបស់ខ្ញុំបានជិតស្និទ្ធនឹងគ្នាខ្លាំងឡើង និងត្រូវបានពង្រឹង ។ ខ្ញុំនឹងពុំភ្លេចបទពិសោធន៍នេះឡើយ ហើយខ្ញុំដឹងថាបងប្អូនស្រីរបស់ខ្ញុំក៏ដូចគ្នាផងដែរ ។