ការតមអាហារសម្រាប់ជំនួយនៅកន្លែងធ្វើការ

ខាឡូស អាល់ប៊ើតូ ភៀម ខ្វដ្រូ ប៉ុនតា ប៉ូរ៉ា ប្រេស៊ីល

បន្ទាប់ពីបម្រើបេសកកម្មដោយស្មោះត្រង់នៅក្នុងបេសកកម្មម៉ូស្សាំប៊ីកមក ខ្ញុំបានត្រឡប់ទៅផ្ទះវិញ ហើយដូចជាអ្នកត្រឡប់មកពីបេសកកម្មវិញផ្សេងទៀតផងដែរ ខ្ញុំបានផ្តោតលើការសិក្សា និងការងារវិញភ្លាមៗ ។

ខ្ញុំរស់នៅប្រទេសប្រេស៊ីលនៅក្នុងទីក្រុងមួយ ដែលមានព្រំប្រទល់ជាប់ប្រទេសប៉ារ៉ាហ្គាយ ហើយធ្វើការនាំចេញផលិតផលសម្រាប់ទីផ្សារដ៏ធំមួយនៅផ្នែកមួយនៃប្រទេសប៉ារ៉ាហ្គាយ ។ ពរជ័យនៃការរៀនភាសាអង់គ្លេសនៅក្នុងបេសកកម្ម បានជួយខ្ញុំឲ្យទទួល បានមុខនាទីនេះ ។ អំឡុងពេលនោះ ខ្ញុំបានរៀបការ ហើយមានកូនស្រីម្នាក់ ។

នៅពេលវិបត្តិហិរញ្ញវត្ថុនៅក្នុងប្រទេសប្រេស៊ីលបានឈានដល់ការធ្វើឲ្យរូបិយប័ណ្ណក្នុងប្រទេសប្រេស៊ីលធ្លាក់ចុះ នោះការងាររបស់ខ្ញុំត្រូវបានប៉ះពាល់យ៉ាងខ្លាំង ។ វាធ្វើឲ្យការលក់ផលិតផលដែលខ្ញុំបាននាំចេញជាទៀងទាត់នោះមានការថយចុះ ។ លុះដល់ចុងខែកុម្ភៈនាឆ្នាំបន្ទាប់នោះ ខ្ញុំគ្មានសល់កិច្ចការអ្វីដែលត្រូវធ្វើឡើយ ។ ការបាត់បង់ការងាររបស់ខ្ញុំគឺជារឿងដែលចៀសមិនរួច ដូចជាសហការីផ្សេងទៀតផងដែរ ។ ខ្ញុំចាប់ផ្តើមមានការបារម្ភអំពីការផ្គត់ផ្គង់ដល់ភរិយា និងកូនស្រីតូចរបស់ខ្ញុំ ។ ខ្ញុំបានចាប់ផ្តើមស្វែងរកការងារមួយផ្សេងទៀត ។

ខ្ញុំបានពិភាក្សាជាមួយភរិយាខ្ញុំអំពីស្ថានភាពនោះ ។ នាងបានផ្តល់យោបល់ថា យើងត្រូវតមអាហារ ។ អំឡុងពេលយើងតមអាហារ ភាពសុខសាន្តបានមានក្នុងដួងចិត្តយើង ហើយយើងមានអារម្មណ៍ថា អ្វីៗគ្រប់យ៉ាងនឹងដំណើរការល្អ ទោះបីជាខ្ញុំពុំអាចគិតឃើញថាវានឹងដំណើរការដោយរបៀបណាក្តី ។

ថ្ងៃស្អែកឡើងនៅកន្លែងការងារ អ្នកគ្រប់គ្រងរបស់ខ្ញុំបានហៅខ្ញុំឲ្យទៅជួបគាត់ ។ ខ្ញុំបានគិតថាពេលវេលាដ៏អពមង្គលបានមកដល់ហើយ — គឺខ្ញុំប្រហែលជាបាត់បង់ការងារហើយ ។ ខ្ញុំបានភ្ញាក់ផ្អើល ពេលអ្នកគ្រប់គ្រងរបស់ខ្ញុំបានប្រាប់ខ្ញុំថា គាត់មានយោបល់មួយ ។ ដោយសារខ្ញុំមានសមត្ថភាពផ្នែកភាសាអង់គ្លេស គាត់បានដាក់ស្នើថាឲ្យ ខ្ញុំបកប្រែឯកសារច្បាប់ដែលជាធម្មតាយើងប្រគល់ឲ្យ មេធាវីរៀបចំបកប្រែ ។ គាត់បានប្រាប់ខ្ញុំថា ប្រសិនបើខ្ញុំមានជោគជ័យក្នុងការធ្វើការបកប្រែនេះ នោះខ្ញុំនឹងទទួលបានមុខងារនេះ ហើយជាលទ្ធផលខ្ញុំនឹងអាចបន្តធ្វើការនៅក្នុងនាយកដ្ឋាននោះ ។ ខ្ញុំបានចាប់ផ្តើមបកប្រែឯកសារទាំងនោះភ្លាម ។ នៅពេលខ្ញុំបានបង្ហាញភាពជោគជ័យនៃការបកប្រែដល់អ្នកគ្រប់គ្រងរបស់ខ្ញុំ គាត់មានការរំភើបយ៉ាងខ្លាំង ! ខ្ញុំមានក្តីរំភើបផងដែរ ដោយសារខ្ញុំអាចមានការងារធ្វើបន្តទៀត ។

នៅពេលខ្ញុំទៅទទួលមូលប្បទានបត្ររបស់ខ្ញុំ ដែលវាអាចជាប្រាក់ខែចុងក្រោយរបស់ខ្ញុំ នោះខ្ញុំមានការភ្ញាក់ផ្អើលណាស់ ដោយឃើញថាប្រាក់ខែរបស់ខ្ញុំបានកើនឡើង ។ ខ្ញុំរំជួលចិត្តណាស់ ហើយខ្ញុំមានអំណរគុណចំពោះព្រះវរបិតាសួគ៌របស់យើង ។ តាមរយៈបទពិសោធន៍នេះ ខ្ញុំដឹងថាការតមអាហារបានបើកបង្អួចទាំងឡាយនៃស្ថានសួគ៌ ។