ថ្ងៃអាទិត្យ ជាថ្ងៃសម្រាប់កិច្ចការជាច្រើនទៀត
អ្នកនិពន្ធរស់នៅក្នុងទីក្រុង អិល វីវ ប្រទេស អ៊ុយក្រែន ។
យើងបានឃើញថា ការអញ្ជើញនីកូឡាយ ឲ្យរស់នៅតាមគោលការណ៍នៃដំណឹងល្អ មានប្រសិទ្ធភាពជាងការគ្រាន់តែប្រាប់គាត់អំពីគោលការណ៍ទាំងនោះ ។
រចនារូបភាពដោយ ស៊ីម៉ុន ស្ស៊ីន
ជាច្រើនឆ្នាំកន្លងទៅ អំឡុងពេលធ្វើការជាអ្នកលក់ដូរតាមចិញ្ចើមផ្លូវ នៅក្នុងទីក្រុងតូចមួយនៃប្រទេសប៉ូឡូញ ខ្ញុំបានជួបបុរសម្នាក់ឈ្មោះ នីកូឡាយ ស្សាវ៉េកូ ។ យើងបានដឹងថា យើងទាំងពីរនាក់មកពីទីក្រុងឆើនីហ្គូវ ប្រទេសអ៊ុយក្រែន ហើយយើងបានក្លាយជាមិត្តភក្តិនឹងគ្នាភ្លាម ។
ក្រោយមក ខ្ញុំបានដឹងថានីកូឡាយ គ្មានកន្លែងស្នាក់នៅឡើយ ដូច្នេះភរិយាខ្ញុំ និង ខ្ញុំបានអញ្ជើញគាត់ឲ្យស្នាក់នៅជាមួយពួកយើង ។ ផ្ទះរបស់យើងពុំមានភាពកក់ក្តៅ ឬ មានផាសុកភាពប៉ុន្មាននោះទេ ប៉ុន្តែយើងនៅមានសល់បន្ទប់មួយ ។ គាត់បានទទួលយកការអញ្ជើញនោះដោយអំណរគុណ ហើយស្នាក់នៅជាមួយយើងមួយរយៈ ។ គាត់បានចាប់ផ្តើមមើលឃើញរបៀបដែលយើងបានរស់នៅ ។
ពុំធ្វើការនៅថ្ងៃអាទិត្យឬ ?
យើងជាអ្នកលក់ដូរទំនិញប្រើប្រាស់ក្នុងផ្ទះ ដូចជាអ្នកលក់ដូរភាគច្រើនដែរ យើងត្រូវធ្វើការច្រើនម៉ោង ហើយខំធ្វើការដើម្បីមានប្រាក់គ្រប់គ្រាន់ចិញ្ចឹមជីវិត ។ ប៉ុន្តែយើងពុំធ្វើការដូចមនុស្សដទៃទេ ភរិយាខ្ញុំ និង ខ្ញុំពុំធ្វើការនៅថ្ងៃអាទិត្យឡើយ ។ ថ្ងៃមួយនីកូឡាយបានសួរយើងអំពីមូលហេតុនោះ ។ ហេតុអ្វីយើងមិនធ្វើការ ហើយរកលុយពេញមួយថ្ងៃនោះ ?
ខ្ញុំបានប្រាប់គាត់ថា « ថ្ងៃអាទិត្យពុំមែនបង្កើតមក ដើម្បីធ្វើការ ឬ រកលុយនោះទេ ។ ថ្ងៃអាទិត្យត្រូវបានបង្កើតឡើងសម្រាប់គោលបំណងមួយផ្សេងទៀត » ។
គាត់បានសួរថា « តើអ្នកអាចមានប្រាក់គ្រប់គ្រាន់បង់ថ្លៃអាហារ និង ថ្លៃជួលផ្ទះបានយ៉ាងដូចម្តេច ប្រសិនបើអ្នកពុំធ្វើការប្រាំពីរថ្ងៃក្នុងមួយសប្តាហ៍នោះ ? »
ដើម្បីឆ្លើយសំណួររបស់គាត់ យើងបានអញ្ជើញគាត់ឲ្យមកថ្វាយបង្គំជាមួយពួកយើង ។ នោះគឺជាបទពិសោធន៍លើកដំបូងរបស់គាត់ ដែលបានឮអំពីសាសនាចក្រ ហើយគាត់មិនទាន់ទទួលយកការអញ្ជើញនោះភ្លាមៗទេ ។ គាត់នៅតែគិតថា ពួកយើងចម្លែកខ្លាំងបំផុត ដែលជ្រើសរើសយកការប្រជុំជាជាងទៅរកប្រាក់ចំណួល ។ ប៉ុន្តែចាប់តាំងពីពេលនោះមក យើងបាននិយាយជាមួយគាត់ជាញឹកញាប់ អំពីជំនឿរបស់ពួកយើង ហើយដោយសន្សឹមៗ គាត់បានចាប់អារម្មណ៍នឹងដំណឹងល្អខ្លាំងឡើងៗ ។
ចូរសាកល្បង អ្នកនឹងឃើញលទ្ធផល
នីកូឡាយបានឃើញពួកយើងរស់នៅតាមអ្វី ដែលពួកយើងបានដឹងថាពិត ។ គាត់បានឃើញពរជ័យ ដែលកើតឡើងក្នុងជីវិតរបស់យើង ។ ប្រាកដណាស់ វាលំបាកដើម្បីរកប្រាក់គ្រប់គ្រាន់ចិញ្ចឹមជីវិត ប៉ុន្តែយើងដឹងថាវាជារឿងត្រឹមត្រូវ ដើម្បីរក្សាថ្ងៃឈប់សម្រាកឲ្យបរិសុទ្ធ ។ ព្រះអម្ចាស់បានប្រទានពរដល់យើង ។ យើងមានប្រាក់គ្រប់គ្រាន់ ដើម្បីចំណាយលើអ្វីដែលយើងត្រូវការជានិច្ច ។ ការណ៍នេះបានពង្រឹងទីបន្ទាល់របស់យើងអំពីគោលការណ៍នេះ ហើយបានជួយយើងឲ្យធ្វើជាសាក្សីដ៏ប្រសើរដល់នីកូឡាយ ។ យើងមានការជឿជាក់ដើម្បីអញ្ជើញគាត់ថា « ចូរសាកល្បង អ្នកនឹងឃើញលទ្ធផល ! » ។
ថ្ងៃអាទិត្យមួយ គាត់បានឈប់សម្រាក ។
គាត់មិនទៅធ្វើការទេ គាត់បានមកព្រះវិហារជាមួយពួកយើង ។ គាត់ពុំបានគិតថា វាអាចទៅរួចដើម្បីធ្វើការតែប្រាំមួយថ្ងៃក្នុងមួយសប្តាហ៍ ប៉ុន្តែដោយសារសេចក្តីសង្ឃឹម និង ពរជ័យដែលគាត់បានឃើញនៅក្នុងជីវិតរបស់ពួកយើង នោះគាត់បានសាកល្បងធ្វើវា ។
នៅសប្តាហ៍នោះ ពេលគាត់រាប់លុយរបស់គាត់ គាត់មានក្តីភ្ញាក់ផ្អើល ។ គាត់រកលុយបានច្រើននៅសប្តាហ៍នោះ ជាងសប្តាហ៍ដូចសព្វមួយដងដែលគាត់ធ្វើការប្រាំពីរថ្ងៃក្នុងមួយសប្តាហ៍ !
ចូរសាកល្បងថ្វាយដង្វាយមួយភាគក្នុងដប់ផងដែរ
រឿងដូចគ្នានោះបានកើតឡើងផងដែរ នៅពេលយើងនិយាយជាមួយគាត់អំពីដង្វាយមួយភាគក្នុងដប់ ។ ដំបូង នីកូឡាយពុំអាចយល់ពីរបៀបដែលយើងអាចលះបង់ ១០ ភាគរយនៃប្រាក់ចំណូលរបស់យើងឡើយ ។
គាត់និយាយថា « ខ្ញុំនឹងគ្មានប្រាក់គ្រប់គ្រាន់ ដើម្បីធ្វើបែបនោះឡើយ ! »
យើងគ្រាន់តែញាក់ស្មាដាក់គាត់ ។ « ប្រសិនបើអ្នកសាកល្បង នោះអ្នកនឹងឃើញលទ្ធផល » ។
គាត់មានចិត្តសង្ស័យ ប៉ុន្តែក្រោយមកគាត់បានចាប់ផ្តើមញញឹម ។ គាត់បានថ្លែងថា « អញ្ចឹងវាដូចជាការមិនធ្វើការនៅថ្ងៃអាទិត្យដែរ ។ ប្រសិនបើអ្នកថ្វាយដង្វាយមួយភាគក្នុងដប់ នោះអ្នកនឹងមានប្រាក់គ្រប់គ្រាន់សម្រាប់ខ្លួនអ្នក និង អ្វីដែលអ្នកត្រូវការ » ។
នោះគឺជាវិវរណៈដ៏អស្ចារ្យដល់នីកូឡាយ ។ គាត់បានរៀនដោយខ្លួនគាត់ថា ប្រសិនបើយើងធ្វើតាមបទបញ្ញត្តិរបស់ព្រះ នោះព្រះនឹងប្រទានពរដល់យើង ហើយអ្វីៗគ្រប់យ៉ាងនឹងកើតជាប្រយោជន៍ដល់យើង ។
នៅពេលនីកូឡាយបានត្រឡប់ទៅផ្ទះគាត់វិញនៅទីក្រុងឆើនីហ្គូវ គាត់បានអញ្ជើញអ្នកផ្សព្វផ្សាយសាសនាទៅបង្រៀនគាត់ និងគ្រួសារគាត់ ។ មិនយូរប៉ុន្មានក្រោយមក គាត់ និងគ្រួសារបានចូលរួមសាសនាចក្រផងដែរ ។ ក្រោយមក នីកូឡាយបានបម្រើជាប្រធានសាខា ហើយកូនស្រីរបស់គាត់បានបម្រើបេសកកម្មនៅប្រទេសរុស្សី ។
យើងចូលចិត្តនិយាយជាមួយនីកូឡាយអំពីសាសនាចក្រ ប៉ុន្តែទីបំផុត ការអញ្ជើញ គាត់ឲ្យរស់នៅតាមគោលការណ៍នៃដំណឹងល្អ មានប្រសិទ្ធភាពជាងការគ្រាន់តែប្រាប់គាត់អំពីគោលការណ៍ទាំងនោះ ។ គាត់ និង គ្រួសារគាត់បានកើនទីបន្ទាល់ ហើយផ្លាស់ប្តូរជីវិតរបស់ពួកគេ ដោយសារពួកគេបានជ្រើសរើសរស់នៅតាមសេចក្តីពិតនៃដំណឹងល្អ ។