ការស្វែងរក និង ការធ្វើជាមិត្តដ៏ពិត
យុវវ័យមកពីទីក្រុង អុកហ្វើត ប្រទេសអង់គ្លេស បានចែកចាយយោបល់ពួកគេអំពីមិត្តភាពពិតប្រាកដ ។
រចនារូបភាពដោយ អេនឌ្រូ ប៊ូស្លី
ចេញមកពីមិត្តភក្តិល្អបំផុតដែលអ្នកមានតាំងពីអ្នកអាយុ ៥ ឆ្នាំរហូតដល់សិស្សថ្មីដែលអ្នកបានជួបគ្នានៅក្នុងថ្នាក់គណិតវិទ្យា នោះវាសំខាន់ដើម្បីមានកល្យាណមិត្ត ។ ហើយដូចមានចែងនៅក្នុងកូនសៀវភៅ ដើម្បីកម្លាំងនៃយុវជន ៖ « មនុស្សគ្រប់រូបត្រូវការកល្យាណមិត្ត និងមិត្តល្អ ។ ពួកគេនឹងក្លាយទៅជាកម្លាំងមួយដ៏រឹងមាំ និង ពរជ័យដល់អ្នក » ( [ ឆ្នាំ ២០១១ ] ទំព័រ ១៦ ) ។
ប៉ុន្ដែតើអ្នកស្វែងរក ហើយរក្សាកល្យាណមិត្តបានយ៉ាងដូចម្តេច ?
យើងបានសួរយុវវ័យនៅក្នុងប្រទេសអង់គ្លេសអំពីអត្ថន័យនៃមិត្តភាពពិតប្រាកដសម្រាប់ពួកគេ ។ សូមពិនិត្យមើលរឿងមួយចំនួនរបស់ពួកគេអំពីមិត្តដ៏ពិតរបស់ពួកគេ និងរបៀបដែលមិត្តភក្តិទាំងនោះបានពង្រឹងពួកគេ ។ អ្នកអាចរកឃើញថា មិត្តភក្ដិផ្ទាល់របស់អ្នកគឺជាកម្លាំងដ៏អស្ចារ្យដល់អ្នកផងដែរ ។
តើមានចំណុចអ្វីខ្លះដែលធ្វើឲ្យមនុស្សម្នាក់ក្លាយជាកល្យាណមិត្ត ?
អើរ៉ុន អិម ៖ ខ្ញុំគិតថា អ្នកគួរតែរំភើបក្នុងការជួបមិត្តភក្តិរបស់អ្នក ។ អ្នកគប្បីខ្វល់ខ្វាយពីពួកគេ ហើយអ្នកគប្បីដឹងថា ពួកគេខ្វល់ខ្វាយអំពីអ្នក ។ អ្នកអាចទទួលអារម្មណ៍សុខស្រួលពេលនៅជិតពួកគេ ។ អ្នកនឹងគ្មានអារម្មណ៍ថា អ្នកត្រូវតែធ្វើទង្វើដូចនរណាម្នាក់ផ្សេងទៀត នៅពេលអ្នកនៅជាមួយពួកគេ ។
ឡេតុន អេច ៖ មិត្តជាបុគ្គលម្នាក់ដែលគាំទ្រ និង លួងលោមអ្នក ។
ម៉ាឌី អេច ៖ ជាម្នាក់ដែលអ្នកទុកចិត្ត ។
រ៉ាជែល ភី ៖ ខ្ញុំគិតថា អ្វីៗជាច្រើនដែលធ្វើឲ្យបុគ្គលម្នាក់ក្លាយជាកល្យាណមិត្តនោះគឺ ការមាននរណាម្នាក់ដែលស្មោះស្ម័គ្រនឹងអ្នក គាំទ្រអ្នក ។
អិមម៉ា អេហ្វ ៖ កល្យាណមិត្តរបស់ខ្ញុំតែងតែនៅជាមួយខ្ញុំ ហើយជួយដល់ខ្ញុំ ។ ពេលខ្ញុំចេញពីវិទ្យាល័យផ្លាស់ទៅរៀនសាលានៅផ្ទះ នាងបានចាប់ផ្តើមផ្ញើសារមកខ្ញុំ ។ នាងបានសួរថា « តើឯងសុខសប្បាយដែរឬទេ ? យើងគួរតែទៅដើរលេងជាមួយគ្នា » ។ ហើយខ្ញុំពិតជាគ្មានមិត្តភក្តិច្រើនឡើយនៅគ្រានោះ ដូច្នោះហើយយើងបានក្លាយជាកល្យាណមិត្តនឹងគ្នា ។ នាងតែងតែដឹងជានិច្ច នៅពេលខ្ញុំមានអារម្មណ៍កើតទុក្ខ ។ ខ្ញុំពុំដឹងថាត្រូវដោះស្រាយរបៀបណាទេ ប៉ុន្តែនាងដឹងពីរបៀបដោះស្រាយវាជានិច្ច ។
តើមិត្តភក្តិរបស់អ្នកគាំទ្រអ្នកតាមរបៀបណាខ្លះ ?
ហានណា ភី ៖ ខ្ញុំមានមិត្តភក្តិដែលបានមកមើលការសម្តែងរបស់ខ្ញុំ កាលខ្ញុំនៅក្នុងក្រុមចម្រៀង ។
អែនឌ្រូ អេស ៖ មិត្តរបស់ខ្ញុំបានជួយខ្ញុំឲ្យពូកែលេងបាល់ទាត់ ។
ប៊ែលឡា អេហ្វ ៖ សម្រាប់ថ្នាក់រៀនអំពីសាសនា យើងបានធ្វើដំណើរទៅសាលាប្រជុំរបស់សាសនាចក្រ ហើយអ្នកផ្សព្វផ្សាយសាសនាទាំងអស់នៅទីនោះ ។ វាសប្បាយណាស់ ។ ខ្ញុំក៏គិតផងដែរថា វាគឺជារបៀបដ៏ល្អមួយដើម្បីជ្រើសរើសកល្យាណមិត្តរបស់ខ្ញុំថាជាមនុស្សដែលមានចរិកលក្ខណៈបែបណា ដោយសារអ្នកអាចប្រាប់ថា គាត់ជាមនុស្សដែលពិតជាគោរពដល់ជំនឿរបស់មនុស្សដទៃ ។ ពួកគេនិយាយពាក្យដូចជា « អូ៎ អញ្ចឹងឯងពុំជេរទេឬ ? » ហើយពួកគេនឹងនិយាយថា « យល់ព្រម ខ្ញុំនឹងមិនជេរ ហើយប្រើពាក្យសម្តីមិនល្អបែបនេះ ពេលនៅជិតឯងទេ » ។ យើងបានពិភាក្សាគ្នាអំពីរបៀបដែលយើងមិនផឹកកាហ្វេ និងអ្វីៗផ្សេងទៀត ហើយពួកគេនិយាយថា « យល់ព្រម យើងពុំត្រូវទៅហាងកាហ្វេឡើយ » ។ ពួកគេទាំងអស់គ្នាពិតជាមានការគោរពគ្នាណាស់ ។
អិមម៉ា ប៊ី ៖ មិត្តភក្ដិរបស់ខ្ញុំបាននិយាយដោយបើកចំហអំពីសាសនារបស់ខ្ញុំ ហើយនិយាយពាក្យដូចជា « ឯងដឹងទេ ខ្ញុំពុំចាំបាច់ជឿដូចជាឯងជឿឡើយ ប៉ុន្តែខ្ញុំមានចិត្តទូលាយមិនប្រកែប្រកាន់ទេ ដូច្នេះខ្ញុំអាចដឹងអ្វីដែលឯងដឹង និងអ្វីដែលឯងជឿ ដូច្នេះខ្ញុំអាចជួយឯងឲ្យបន្តរឹងមាំ » ។
ខាកវីន ប៊ី ៖ តាំងពីខ្ញុំប្តូរទីលំនៅមក ខ្ញុំពុំសូវស្គាល់នរណាម្នាក់នៅសាលារៀនឡើយ ។ ដូច្នេះមនុស្សទាំងអស់ដែលខ្ញុំស្គាល់គឺនៅព្រះវិហារ ។ ពេលយើងទាំងអស់នៅក្នុងសកម្មភាពយុវវ័យ ពួកគេមានចិត្តល្អនឹងខ្ញុំណាស់ ។
អិមម៉ា អេហ្វ ៖ ពេលខ្ញុំប្តូរមករស់នៅទីនេះដំបូង ខ្ញុំគ្មានមិត្តភក្តិជាពួកអិល. ឌី. អេស. ច្រើនឡើយ ដោយសារនៅក្នុងវួដរបស់យើងពុំសូវមានយុវនារីច្រើនទេ ។ ខ្ញុំបានរាប់អានមិត្តម្នាក់នៅក្នុងការប្រជុំយុវវ័យពួកអិល. ឌី. អេស. ហើយការណ៍នោះបានផ្លាស់ប្តូរខ្ញុំទាំងស្រុងសម្រាប់សកម្មភាពនានា នាពេលខាងមុខទៀត ។ ហើយនាងបានណែនាំខ្ញុំឲ្យស្គាល់មិត្តភក្តិរបស់នាង ទីបំផុតខ្ញុំមានមិត្តភក្តិជាពួក អិល.ឌី.អេស. ដែលយកចិត្តទុកដាក់នឹងខ្ញុំ ។
តើអ្នកបង្កើតមិត្តភាពដោយរបៀបណា ?
វីល្លាម អេស ៖ ពេលមានមនុស្សម្នាក់និយាយថា សួស្តី ហើយអ្នកនឹងចាប់ផ្តើមនិយាយជាមួយគ្នាពេលនោះអ្នកក្លាយជាមិត្តភក្តិនឹងគ្នាហើយ ។
ជេម ភី ៖ សម្រាប់ខ្ញុំ ខ្ញុំមានមិត្តភក្តិរាប់អានតាមរយៈសកម្មភាពនានា ។ ដូចជាពេល ខ្ញុំបានទៅប្រទេសអាមេរិកនៅវិស្សមកាលមួយ ខ្ញុំបានទៅជំរំលេងបាល់ទាត់នៅសាកលវិទ្យាល័យ ព្រិកហាំ យ៉ង់ ហើយខ្ញុំពុំស្គាល់នរណាម្នាក់នៅទីនោះឡើយ ។ ហើយនៅពេលចុងបញ្ចប់នាថ្ងៃដំបូងនោះ ពួកគេគ្រប់គ្នាបានស្គាល់ឈ្មោះខ្ញុំរួចទៅហើយ ។ ដូច្នេះខ្ញុំគ្រាន់តែធ្វើសកម្មភាព ហើយទៅបរិភោគអាហារថ្ងៃត្រង់ ឬ ជួយគ្នាទៅវិញទៅមក ។
សេត អេច ៖ ចំណាប់អារម្មណ៍ដូចគ្នា — អ្នកចាប់អារម្មណ៍លើរឿងដូចគ្នាដូចនរណាម្នាក់ទៀត ។ អំឡុងពេលអនុវត្តកិច្ចការទាំងនោះជាមួយគ្នា នោះគឺជារបៀបដែលអ្នកចាប់ផ្តើមកសាងមិត្តភាពហើយ ។
តើមានអ្វីខ្លះដែលធ្វើឲ្យមិត្តភាពពិតប្រាកដ ខុសពីប្រជាប្រិយភាព ?
សេត អេច ៖ មិត្តភាពគឺជារឿងឯកជន ចំណែកឯប្រជាប្រិយភាពវិញមិនមែនជារឿងឯកជនទេ ។ នៅសាលារៀនរបស់យើង យើងចូលចិត្តបែងចែកមនុស្សជាក្រុម « មនុស្សមានប្រជាប្រិយភាព » ដោយផ្អែកទៅលើសមត្ថភាពលេងកីឡារបស់ពួកគេ ឬ ប្រហែលជាសម្រាប់ប្រុសៗវិញ ផ្អែកទៅលើថា តើគេមានមិត្តស្រីច្រើនប៉ុណ្ណា ។ ប៉ុន្តែខ្ញុំគិតថា អ្នកអាចមានមិត្តភាពល្អៗជាច្រើន ។ ដូច្នេះប្រសិនបើអ្នកមានសណ្តានចិត្តល្អ នោះអ្នកប្រហែលជាមានប្រជាប្រិយភាពផងដែរ ។ ខ្ញុំគិតថា អ្នកដែលបន្តមានប្រជាប្រិយភាពយូរអង្វែងគឺជាប្រភេទមនុស្សដែលធ្វើជាកល្យាណមិត្ត ។
អិមម៉ា ប៊ី ៖ ខ្ញុំគិតថា វាគឺជារបៀបដែលអ្នកប្រព្រឹត្តចំពោះអ្នកដទៃទៀត ព្រោះថាខ្ញុំស្គាល់មនុស្សមានប្រជាប្រិយភាពជាច្រើនដែលពិតជាមានឫកពាក្រអើតក្រទោម ហើយពួកគេពុំធ្វើជាមិត្តល្អនឹងមនុស្សជាច្រើនឡើយ ។ ប៉ុន្តែខ្ញុំក៏ស្គាល់មនុស្សមានប្រជាប្រិយភាពជាច្រើនដែលមានចិត្តល្អដល់មនុស្សគ្រប់គ្នា ។ ខ្ញុំគិតថានោះជាចរិតលក្ខណៈមួយខុសគ្នាយ៉ាងខ្លាំង ។ ខ្ញុំគិតថា វាគឺជាអាកប្បកិរិយាដែលអ្នកមានវិញទេតើ ។ អ្នកពុំអាចគិតថាមនុស្សផ្សេងទៀតអន់ជាងអ្នកឡើយ — ដោយសារពួកគេពុំមែនជាមនុស្សអន់ឡើយ ។
អ៊ីសាក ភី ៖ ខ្ញុំគិតថា ប្រសិនបើអ្នកមានកល្យាណមិត្ត នោះពួកគេនឹងធ្វើជាមិត្តអ្នក ទោះបីមនុស្សផ្សេងទៀតគិតបែបណាអំពីអ្នកក្តី ។ នោះជាអ្វីដែលអ្នកត្រូវធ្វើនៅពេលអ្នកក្លាយជាមិត្តនឹងគ្នា ។
ហ្គ្រេ អេស ៖ មិត្តភក្តិគឺស្មោះត្រង់នឹងគ្នា ហើយទុកចិត្តគ្នា ។
តើមានអ្វីខ្លះ ដែលអ្នកបានរៀនពីកល្យាណមិត្ត ?
អើរ៉ុន អិម ៖ ចូរស្មោះត្រង់នឹងខ្លួនឯង ។ អ្នកពុំអាចមានមិត្តដ៏ពិតឡើយ ពេលអ្នកពុំស្មោះត្រង់ចំពោះខ្លួនឯងនោះ ។ ប្រសិនបើពួកគេពុំចូលចិត្តបទដ្ឋានរបស់អ្នក នោះពួកគេពុំមែនជាមិត្តរបស់អ្នក ហើយពុំជួយអ្នកឡើយ ។
អ៊ីសាក ភី ៖ សូមស្ដាប់អ្វីដែលពួកគេនិយាយ ។ ប្រសិនបើពួកគេនិយាយ សូមកុំព្រងើយកន្តើយនឹងអ្វីដែលពួកគេនិយាយឡើយ ។ សូមផ្តោតចិត្តទុកដាក់លើពួកគេ ហើយគាំទ្រពួកគេ ។
អិមម៉ា ប៊ី ៖ អ្វីមួយដែលកល្យាណមិត្តធ្វើនោះគឺអញ្ជើញអ្នកឲ្យធ្វើអ្វីមួយ ។ សូម្បីតែការសួរសុខទុក្ខគ្នា ។ ការសួរសំណួរអំពីរឿងតិចតួចផងដែរ ។ រឿងតិចតួចមួយចំនួនគឺជារឿងសំខាន់ណាស់ ។
ជេម ភី ៖ អ្នកក៏អាចធ្វើជាមនុស្សម្នាក់ដែលបើកដួងចិត្ត អញ្ជើញមនុស្សឲ្យចូលក្នុងក្រុមមិត្តរបស់អ្នក ហើយជួបមិត្តភក្តិផ្សេងៗទៀត ។ អ្នកនៅតែធ្វើជាកល្យាណមិត្តដដែល ។
មិត្តដ៏ពិត …
ហ្គ្រេ អេស ៖ មិត្តដ៏ពិតគឺជាមនុស្សម្នាក់ដែលយល់ពីអ្នក ។
អែនឌ្រូ អេស ៖ មិត្តដ៏ពិតគឺជាមនុស្សម្នាក់ដែលអ្នកអាចពឹងពាក់បានជានិច្ច ។
ជេម ភី ៖ ខ្ញុំគិតថា ពួកគេជាមនុស្សដែលមានការយល់ចិត្តគ្នា ។
ឡេតុន អេច ៖ អ្នកអាចមានទំនុកចិត្តក្នុងខ្លួនអ្នកពេលនៅជិតពួកគេ ។
ខាលវីន ប៊ី ៖ មិត្តដ៏ពិតចេះគាំទ្រគ្នា ។