Soqoni ni iKava ni Sigatabu
Ena ikava ni Sigatabu ni veivula, era veitalanoataka na veikuoramu, ilawalawa, kei na Soqosoqo ni Veivukei e dua na iulutaga e digitaki mai na Mataveiliutaki Taumada kei na Kuoramu ni iApositolo Le Tinikarua. Na iulutaga eso oqo era na vakavoui tiko ena vei koniferedi raraba. Na iulutaga me yacova na koniferedi raraba ka tarava, na Siga ni Vakacecegu. Era rawa ni digidigi mai na ivakavuvuli kei na itaviqaravi ka vakaturi tiko e ra, na qasenivuli kei na liuliu, wakia vata e vica vei ira, se tauyavutaka ga na nodra me vakatau mai na nodra gagadre na lewenilotu.
Na Siga ni Vakacecegu me siga ni vakananumi kina na veika e cakava vei keda na Kalou.
Mai na veigauna sa oti, esa semata vata e vuqa na cakacaka cecere kei na Siga ni Vakacecegu. Na veicakacaka cecere eso oqo e wili kina na Veibuli (raica na iVakatekivu 2:1–3), na nodra lako voli na Isireli mai Ijipita (raica na Nai Vakarua 5:15), kei na Tucake tale ni iVakabula (raica na Joni 20:1–19; Cakacaka 20:7). Sureti ira na leweni lotu me ra taleva lesu na veitikina oqo ka veitalanoataka ena vukei keda vakacava na noda vakananuma na veika e yaco oqo meda rokova na Siga ni Vakacecegu. Na cava eso na cakacaka cecere e sa cakava vei keda na Kalou? Ena rawa vakacava meda nanuma na veika oqo ena Siga ni Vakacecegu? Ena vanua e veiganiti kina, sureti ira na lewenilotu me ra veitalanoataka na taro vakaoqo ena nodra matavuvale.
Na Turaga ni Siga ni Vakacecegu o Jisu Karisito.
Na Siga ni Vakacecegu e vakatokai talega me nona siga na Turaga (raica na Vakatakila 1:10). Na cava na vuna e vakatokai me Turaga ni Siga ni Vakacecegu o Jisu Karisito? (raica na Maciu 12:8). Taleva vata e vica na tikina ena vakauqeti ira na lewenilotu me ra vakasamataka kina na sala me vakataudonutaki na nodra Siga ni Vakacecegu kei na veika era sotava vei Jisu Karisito (me ivakaraitaki, Ilamani 5:12; Ica 12:41; Moronai 10:32; V&V 6:36–37). Na tikina cava tale eso era rawa ni wasea na lewenilotu me vukei ira me vakataudonutaki vei Karisito na Siga ni Vakacecegu? Na takete cava eda rawa ni tuva me vukei keda meda vakanamata vua na iVakabula ena Siga ni Vakacecegu?
Sa noda ivakaraitaki ni rokovi ni Siga ni Vakacecegu o Jisu Karisito.
Ena gauna ni Nona veiqaravi ena bula oqo, e vakayagataka na madigi na iVakabula me vakavulica na veika me baleta na Siga ni Vakacecegu. Kerei ira na lewenilotu me ra wilika na itukutuku eso oqo ka vola e dua na ituvatuva ni veika e vakayacora o Jisu ena Siga ni Vakacecegu kei na ivakavuvuli e vakatavulica o Koya: Luke 6:1–11; 13:11–17; Joni 5:1–20; 9:1–16. Na cava eso tale na ivakavuvuli me baleta na Siga ni Vakacecegu eda vulica mai na veitikina oqo? Lako Yani 20:8–11; 31:12–18; Aisea 58:13–14; kei na V&V 59:9–19. Sureti ira na lewenilotu me ra wasea na veika era rawa ni cakava me vakamuria na ivakaraitaki ni iVakabula.
Raica talega na Russell M. Nelson, “Me Ka e Rekitaki na Siga ni Vakacecegu,” Ensign se Liaona, Me 2015, 129–32.
Na Siga ni Vakacecegu e siga ni sokalou.
Vola na vosa sokalou ena papanivolavola ka tarogi ira na leweni kalasi me ra vola eso na vosa e semati kina. Ka cakava e tolu na iyatu tuvai sobu na vosa se bera ni yaco, na gauna e yaco tiko kina, kei na yaco oti ena iyatu tuvai sobu e cake sara. Na cava eda rawa ni cakava, ni se bera, sa yaco tiko, kei na gauna e yaco oti kina na lotu me sokalou vua na Tuarga ena Nona siga vakatabui? Era rawa ni wilika vata na leweni kalasi na Mosaia 18:17–29 kei na Moronai 6 me vakavure vakasama. Sureti ira na lewenilotu me ra vakasamataka vakatitobu na nodra itovo kei na veika era vakayacora ena Siga ni Vakacecegu e vukei ira ena nodra sokalou vua na Turaga ena siga oya (raica na Lako Yani 31:16–17). Na cava eda rawa ni cakava me vakavinakataki na veika eda sotava ena noda sokalou kei na noda vuvale kei ira na leweni tabanalevu ena gauna ni soqoni ni Lotu?
Noda vakaivotavota ena sakaramede e vakatarai keda me tiko kei keda na Yalo ena veigauna kece.
Vola na taro eso oqo ena papa: E vakayarayarataka vakacava na nomu bula na sakaramede? Me sauma na taro oqo, sureti ira na lewenilotu me ra cakacaka vata vakaveisa me digia ka veitalanoataka e dua na malani vosa mai na masu ni sakaramede ena Vunau kei na Veiyalayalati 20:77, 79 kei na ivakasala ena Vunau kei na Veiyalayalati 59:9. Solia kina isa yadua me vakasaqara na ivolanikalou e vukei ira me ra kila vinaka na malanivosa ka veitalanoataka na sala ena saumi kina na taro e tiko ena papanivolavola. Ena rawa talega ni o sureti ira na leweni kalasi me ra digia na serenilout ni sakaramede taleitaki ka lagata vata.
Raica talega na Cheryl A. Esplin, “Na Sakaramede—na Vakavoui ni Yalo,” Ensign, se Liaona, Nove. 2014, 12–14.
Na Siga ni Vakacecegu e siga me veiqaravi vei ira na tani.
Na cava eda rawa ni vulica me baleta na veiqaravi vei ira na tani ena Siga ni Vakacecegu ena sala e veiqaravi kina na iVakabula ka vakalougatataki ira era wavoliti Koya? Vakauqeti ira na lewenilotu me ra taleva lesu ka veitalanoataka na Maciu 9:10–13; Luke 19:1–9; Joni 11:32–46; 13:1–5, 12–17; kei na 3 Nifai 17:5–10. Kerei ira na lewenilotu me ra vakasamataka na ivolanikalou eso oqo ena nodra vakasamataka ena rawa vakacava me ra veiqaravi ena Siga ni Vakacecegu. Me ivakaraitaki, e rawa ni ra qaravi ira na leweni vuvale, dolele yani vei ira na tamata yadua kei na matavuvale era veituberi kina vaka dausiko vuvale se qasenivuli ni veisiko, me ra cakava na cakacaka ni tuva kawa, sikova na tauvi mate, se wasea na kosipeli. E rawa talega ni ra tuva vata ena bose vakamatavuvale o ira na lewenilotu na sala me ra veiqaravi kina vei ira na tani ena Siga ni Vakacecegu.