Me Sinai Na Nomudou Marau
Mai vei Jean B. Bingham
Peresitedi Raraba ni iSoqosoqo ni Veivukei
Sai Jisu Karisito na ivurevure ni veivakabulai, vakacegu, kei na tubu tawamudu.
Kemuni na taciqu kei na ganequ, sa ka marautaki dina na mai tiko kei kemuni. Ka sai koya oqori na veika au via vosa kina vei kemuni na mataka nikua—na vakasinaiti ena marau.
E dua nai ulu ni itukutuku e kaya vaoqo, “Yavalata na matanitu [kei na] vuravura na leqa tubukoso.”1 Mai na cagilaba kei na ualuvu ki na dravuisiga kei na mamaca balavu, mai na kama ni veikau kei na uneune ki na ivalu kei na mate ca, e vaka ni sa “yavavala ko vuravura taucoko.”2
E milioni vakamilioni na tamata sa sega na nodra vale, ka sega ni wili rawa na bula sa vakacacani mai na veika dredre oqo. Na veisaqasaqa ena matavuvale kei na itikotiko vakakina na veiqalisominiwai ni rere, lomalomarua, kei na nanamaki sega ni yaco e lomada sa biuti keda tu ena veilecayaki. Sa dredre kina ni da vakila na reki e vakavuvulitaka o Liai ni sa inaki ni bula.3 Eda dau vakataroga kece, “Meu gole tu kivei? Niu sa malumu tu … ?”4 Eda na taroga, evei meu kune marau kina ena dredre ni bula oqo?
Sa rui rawarawa beka na kena isau, ia sa vakadinadinataki na kena dina me tekivu sara mai na gauna nei Atama. Na reki tudei ena kunei ga ena noda vakanamata vua na iVakabula ko Jisu Karisito, ka bulataki na kosipeli e vakaraitaka ka vakavuvulitaka o Koya. Na levu ni noda vulica, vakabauti koya, ka vakatotomuri Jisu Karisito, na levu ni noda kila ni sai Koya na ivurevure ni veivakabulai, vakacegu, kei na tubu tawamudu. E sureti keda yadua o Koya me da lako yani Vua,5 e dua na veisureti sa vakamacalataka o Peresitedi Henry B. Eyring ni “veisureti bibi duadua e rawa ni ciqoma e dua.”6
Mo Vulici Jisu Karisito
Me da lako mai vakacava Vua? Ena Epereli sa oti, erau a vakayaloqaqataki keda o Peresitedi Russell M. Nelson kei Elder M. Russell Ballard me da vulica “Se Bula Tiko Na Karisito”7 me tiki ni noda vuli me baleta na iVakabula. E vuqa era sa ciqoma na bolebole ka ra sa vakalougatataki. Ena dua na gauna se qai oti, a solia e dua noqu itokani vinaka vei iratou na luvena uabula na ilavelave ni itukutuku oya kei na iyaloyalo vakosipeli me vakamacalataka na malanivosa yadua. A vakauqeti iratou na luvena me ratou vukei ira na makubuna me ra kila ka rawa ni cavuqaqataka. Ena dua na gauna e muri, qai wasea noqu itokani e dua na vidio kei makubuna yalewa yabaki tolu ni cavuqaqataka tiko ena dela ni samila ena gugumatua kei na qaqarauni. Au qai raica kevaka e rawa ni cakava e dua na yabaki tolu, ena rawa talega o au!
Niu vulica na bula kei na ivakavuvulli nei Jisu Karisito ena vakanamata kei na yalodina meu cavuqaqataka “Se Bula Tiko Na Karisito” sa levu cake na noqu vakavinavinaka kei na loloma vua na iVakabula. Na iyatuvosa yadua ni itukutuku vakauqeti oya e koto kina e dua na ivunau ka sa vakavinakataka na noqu kila na Nona itavi vakalou kei na nona cakacaka e vuravura.Na ka au sa vulica ka vakila ena gauna ni vuli kei na vakanananu oqo sa vakadeitaka ni o Jisu dina na “rarama, na vunibula, kei na inuinui ni vuravura.”8 Na ivolanikalou makawa kei na nodra vosa na parofita ni gauna oqo e volai se tukuni me vakacaucautaki kina o Koya e vakadinadinataka ni “Nona ivakarau e salatu ki na bula marau ena bula oqo kei na bula tawamudu ena vuravura sa bera mai.”9
Vakabauti Jisu Karisito
Ni ko vulica na bula kei na ivakavuvuli nei Jisu Karisito ena vuqa na sala, ena vakalevutaki na nomu vakabauti Koya. Ena yaco mo kila ni lomani kemuni yadudua o Koya ka kilai kemuni vakavinaka sara. Ni sa yabaki 33 ena Nona bula vakayago, a biliraki, vakacacani, viakana vakayago, viagunu, kei na oca;10 galili; vakalolomataki ena vosa kei na iroba; qai tinia, na mate ena veivakararawataki e ligadra na tamata ivalavala ca.11 Ena Were mai Kecisemani kei na kauveilatai mai Kalivari, a vakila o Koya na noda mosi, vakararawataki, veitemaki, tauvimate, kei na malumalumu kece sara.12
Se cava ga eda sa sotava, sai Koya na ivurevure ni noda vakabulai. O kemuni sa sotava oti na ivalavala cava ga ni veivakalolomataki, na yali veivakacacani, na mate veitauvi se rarawa veivakaleqai, na veibeitaki vakailasu, na veivakacacani vakaca, se na vakacaca vakayalo, na veika kece oqo e rawa ni vakataucokotaki mai vua na Dauveivueti ni vuravura. Ia, ena sega ni curu yani o Koya ke sega ni sureti. Sa dodonu me da lako mai Vua ka vakatarai Koya me cakava Nona cakamana.
Ena dua na siga totoka ena vulaitubutubu au dolava tu na katuba meu ceguva eso na cagi bulabula. A vuka yani i loma e dua na manumanu lailai ena katuba tadola ka qai kila ni sega ni o koya qo na vanua e vinakata me tiko kina. A veivukayaki vakatotolo ena rumu, ka coqa vakavica na iloilo ni katubaleka ena nona via dro. Au tovolea meu vakasarati koya yani ki katuba, ia ena rere e vuka tani tale yani. Qai la’ki ro ena ilatilati ni katubaleka ena ceguoca ni veilecayaki. Au taura e dua na itataviraki ka dodoka yani na muana ki na vanua e ro toka kina na manumanu. Niu biuta toka na ulu ni tataviraki voleka ki yavana, a butu mai vakatovotovo na manumanu ki na ulu ni tataviraki. Vakamalua, vakamalua sara, au taubale yani ki na katuba tadola, ka taura toka vakadua na itataviraki. Niu yaco ga yani ki katuba, a vuka yani vakatotolo ki na bula galala na manumanu.
Me vaka na manumanu oya, ena so na gauna eda dau rere na veivakabauti baleta ni da sega ni kila na taucoko ni nona loloma na Kalou kei na nona gagadre me vukei keda. Ia ni da vulica na ituvatuva ni Tamada Vakalomalagi kei na veiqaravi nei Jisu Karisito, eda na kila ni Nodrau inaki duadua ga na noda marau kei na tubu tawamudu.13 Erau marau me rau vukei keda ni da kerea, vakasaqara, ka tukituki.14 Ni da cakacakataka na vakabauta ka dolavi keda ena yalomalumalumu ki na Nodrau isau ni kerekere, eda sa galala mai na leqaleqa ni noda lecaika kei na vakilakila, ka rawa ni vakaraitaki vei keda na sala ki liu.
Ko Jisu Karisito talega na ivurevure ni vakacegu. Sa sureti keda o Koya me da “ravi ki na Ligana qaqa”15 ka yalataka na “vakacegu … sa uasivia na ka kecega e kilai rawa,”16 e dua na vakanananu e yaco mai ni sa “vosa ni veivakacegui ki na yaloi keimami”17 na yalona se cava ga na bolebole e wavoliti keimami. Se ra dredre vakatamata yadua, leqa vakamatavuvale, se tiko yavavala vakaitikotiko, ena yaco mai na vakacegu ni da vakabauta ni tu Vua na Luvena e Duabau Ga na Kalou na kaukauwa me vakamaravutaka na yalo e mosi tu.
A vakararavi o Snježana Podvinski, e dua vei ira na lewe vica wale na Yalododonu mai Karlovac, Croatia, vua na iVakabula ena gauna eratou mate veitaravi kina ena loma ga ni ono na vula ni yabaki sa oti na watina kei rau ruarua nona itubutubu. Ni bikai tu ena rarawa, ia tudei tu nona vakadinadinataka ni tawamudu na matavuvale, a vakayagataka kece nona ilavo maroroi me lako ki na valetabu mai Switzerland, ka lako me vauci kina vua na watina kei rau nona itubutubu. A wasea o koya ni veisiga oya ena valetabu sa ilutua ni nona bula. Ena vuku ni nona ivakadinadina tudei baleti Jisu Karisito kei na Nona Veisorovaki, sa vakila na vakacegu ka sotava na veivakabulai ka sa ivakaukauwa talega vei ira era wavoliti koya.
Na vakabauti Jisu Karisito e kauta vakalevu cake mai na isoisoli mai na veivakabulai kei na vakacegu walega. Me vaka e wasea o Peresitedi Henry B. Eyring, “Au sa vakavinavinakataka tiko na vuqa na sala sa sikovi au mai kina na Turaga kei na Dauveivakacegui niu gadreva na vakacegu. Ia na Tamada Vakalomalagi e sega walega ni kauwai ena noda tiko vakacegu, ia vakalevu cake ena noda toro cake vakalomalagi.”18
Ena vuku ni Veisorovaki i Jisu Karisito, ka okati kina na isolisoli ni veivueti kei na tucaketale, sa rawa kina me da veivutuni, veisau, ka tubu tawamudu. Ena vuku ni kaukauwa sa solia vei keda o Koya ni da sa talairawarawa, sa rawa kina ni da yaco me levu cake mai na kena eda rawata vakataki keda ga. Eda na sega beka ni kila vakavinaka sara se rawa vakacava, ia o keda yadua eda sa vakila na levu cake ni vakabauti Jisu Karisito eda sa rawata talega e dua na kila cecere ena keda ivakatakilakila vakalou kei na inaki, ka vakavuna me da vakayacora na digidigi e sala vata kei na kila oqori.
E dina ni na tovolea ko vuravura me vakadavori keda ki na itagede ni “manumanu walega,”19 noda kila ni Tamada na Kalou e vakadeitaki keda ni tu na keda inaki vakalou kei na yalayala vakatui. E dina ni tukuna vei keda o vuravura ni vakaiyalayala walega na bula oqo, noda kila ni sa rawata vei keda na Luvena e Duabau ga na Kalou me da vueti ka vakaturi cake tale mai na mate sa solia vei keda na inuinui ki na tubu tawamudu.
Vakatotomuri Jisu Karisito
Ni da vulica e levu na ka me baleti Jisu Karisito, eda sa tara cake tiko Vua na vakabauta cecere cake ka da vinakata me da muria Nona ivakaraitaki. Sa yaco me noda gagadre cecere duadua na muria Nona ivakaro. E tagica na yaloda me da vukei ira na tani era rarawa tu, me vakataki Koya, ka da vinakata me ra vakila na vakacegu kei na marau eda sa kunea.
Na cava sa rui mana kina noda tovolea me da cakava me vaka a cakava o Koya? Baleta ni da cakacakataka noda vakabauta, ena vakadinadinataka na Yalo Tabu na dina tawamudu.20 E vakaroti ira Nona tisaipeli ko Jisu me ra muria Nona ivakaro baleta ni kila o koya ni da muria Nona ivakarau, sa na tekivu me da vakila na reki, ia ni da tikoga ena Nona sala, eda na rawata na taucoko ni reki. E vakamacalataka o Koya “Au sa vosataka na veika oqo vei kemudou, meu sa marau tikoga ena vukumudou, ka me sinai na nomudou marau.”21
Sa tarai cake li noda ivakadinadina ena yavu vatu i Jisu Karisito kei na Nona kosipeli? Ni sa liwavi keda na cava ni bula eda vaqara kusarawa beka e dua na iwalewale volai se posi ena initaneti me da vukei? Ni da solia na gauna me da tara cake ka vaqaqacotaka noda kila ka kei na ivakadinadina kei Jisu Karisito ena yaga sara vakalevu ena gauna ni vakatovolei kei na meca. Wiliki e veisiga ni ivolanikalou ka vakananumi vakatitobu nodra vosa na parofita bula, vakaitavi ena masu yadua vakaibalebale, vakaivotavota ena kauwai dina ena sakaramede e veimacawa; veiqaravi me vaka na iVakabula—na itaviqaravi rawarawa eso oqo sa yaco me vatu e tara cake kina na bula marau.
Na cava e kauta mai vei iko na reki? Na matadra na nomuni daulomani ni oti e dua na siga ni veiqaravi? Na vakacegu ni sa oti vakavinaka e dua na cakacaka? Na serau ni matana e dua ni o vukea na nona icolacola? Na qaqa ni dua na sere e lauta vakatitobu na yalomu? Nona lululu e dua na itokani voleka? Taura mada e dua na gauna mo vakananuma lesu kina nomu veivakalougatataki, qai vaqara na sala mo wasea. Ni o dodoliga tiko yani mo veiqaravi ka veilaveti vei ira na tacimu kei na ganemu ena loma ni nomu itikotiko se e vuravura raraba oqo ka sa sinai tu ena tiko yavavala, o na vakila na vakacegu cecere kei na veivakabulai kei na tubu.
Lako mai Vua. Au vakadinadinataka ni o vakaliuca na nomu bula vei Jisu Karisito, o na kunea na reki ena nomu ituvaki, se vakacava ga. Io, “o Koya, e Dua ga,”22 na kena isau. Vaqara na gauna ka taura na gauna mo kilai Jisu Karisito ena nomu vuli vagumatua, tara na vakabauta cecere cake ki Vua, ka segata mo yaco mo vakataki Koya vakalevu cake tikoga. Ni da vakayacora vakakina, eda na yavalati talega me da kaya, vata kei Laynie lailai, “Me vakavinavinakataki na Kalou ena isolisoli sega ni vakatauvatani rawa ni Luvena vakalou.”23 Ena yaca savasava ka tabu i Jisu Karisito, emeni.