Soqoni ni iKarua kei na iKatolu ni Sigatabu

Ena ikarua kei na ikatolu ni Sigatabu ni veivula, Na kuoramu ni Matabete i Melekiseteki kei na Soqosoqo ni Veivukei era vulica na ivakavuvuli ni parofita bula, apositolo, kei ira na iliuliu ni Lotu tale eso mai na koniferedi raraba eda se qai vakayacora oti. E rawa ni veiwaseitaki na itukutuku cava ga mai na koniferedi raraba se qai vakayacori oti.

Ena vuqa na gauna, na peresitedi ni kuoramu, iliuliu ni lawalawa, se na peresitedi ni Soqosoqo ni Veivukei e digitaka e dua na itukutuku ni koniferedi me vulici ka yavutaki ena gagadre ni lewenilotu, ena rawa ni soli vakasama talega na bisopi se na peresitedi ni iteki. O ira na iliuliu era rawa ni digitaka e dua na itukutuku ka semati ki nai ulutaga veivosakitaki ena matabose ni soqoni ni matai-ni Siga Tabu, se era rawa ni digia e dua tale na itukutuku me yavutaki mai na veivakauqeti ni Yalo. O ira na iliuliu kei na qasenivuli e dodonu me kunea na sala me vakayaloqaqataki ira na lewenilotu me ra wilika taumada na itukutuku digitaki ka vakavakarau me ra mai wasea na vakasama eso. Na vakaturi ni itaviqaravi ni vuli e ra, ka vakatau ena ivakavuvuli ena Veivakavulici ena Sala ni iVakabula, rawa ni vakaitavitaki ira na lewenilotu ena vuli mai na itukutuku ni koniferedi raraba.

Sharon Eubank, “Waqara Na Nomu Cina”

Kerei ira na leweni nomu kuoramu se Soqosoqo ni Veivukei me ra vakasamataka mada e sa vakauqeti vakacava na nodra bula mai vua e dua na yalewa ivalavala dodonu ka yalodina. Vakasamataka mo sureta e vica na lewenilotu me ra wasea na sala cava e vakaraitaka kina na marama oqo ena dua se sivia na ivakarau ni yalewa ivalavala dodonu ka tuvai koto ena itukutuku nei Sister Eubank. Na cava eda vulica mai vei Sister Eubank me baleta na sala eda rawa ni yaco me “dua na kaukauwa levu ena veika ruarua oqo vakaiwiliwili kei na tubu vakayalo ena Lotu ena iotioti ni gauna.”?

Neill F. Marriott, “Tu Vata kei na Kalou ka Vakavinakataka na Kacila”

Na itukutuku oqo e rawa ni vukei ira na lewenilotu ka ra nanuma ni ra sa tawase tani mai vua na Tamada Vakalomalagi se mai vei ira era wavoliti ira. Na cava ena vukei ira o vakavulica me ra kila vakavinaka na cava na kacila? E rawa mo kauta mai eso na iyaloyalo ni veimataqali kacila. E vakamacalataka vakacava o Sister Marriott na kacila? Na cava e rawa ni vuni ni kacila ni noda veimaliwai kei na Kalou kei ira na tani? Sureti ira na lewenilotu me ra vakasaqara na itukutuku nei Sister Marriott me baleta na vakatutu me baleta na veika eda rawa ni cakava meda vakavinakataka kina na kacila ena noda bula. Solia vei ira na lewenilotu eso na gauna me ra vola kina na veika e vakauqeti ira kina na Yalo me ra toro voleka vua na Kalou kei ira na tani.

Joy D. Jones, “Yavubula Tawa Yalani”

Na veivakalougatataki cava e drodrova yani na noda bula ni da sa kila na keda ituvaki vakalou? Me isau ni taro oqo, o ira na lewe ni nomu kuoramu se na iSoqosoqo ni Veivukei era rawa ni railesuva vata na italanoa kei Mariama, Renu, kei Taiana mai na itukutuku nei Sister Jones. Na ivakasala cava e solia o Sister Jones vei keda me vukei keda meda “nanuma ka ciqoma kina na noda ivakatakilakila vakalou”? Sureti ira na lewenilotu me ra kunea ka veivosakitaka e dua na tikini vola tabu se dua na malanivosa ena itukutuku nei Sister Jones me vukei ira me ra kila vakavinaka na kedra bibi dina vua na Kalou. Sureti ira me ra wasea e dua na tiki ni ivolanikalou se na vosacavuti kei na dua e gadreva e dua na ivakananumi ni nona yaga vakalou.

Dieter F. Uchtdorf, “Tolu na Marama Veitacini”

E dua na sala me ra rawa ni railesuva na itukutuku nei Peresitedi Uchtdorf sa i koya ena wasei ira na kuoramu kei na iSoqosoqo ni Veivukei ki na veilawalawa lalai. Sa rawa mo lesia na ilawalawa yadua me ra wilika e dua vei ira na italanoa ni marama ena itukutuku nei Peresitedi Uchtdorf. E rawa ni ra vola kina dua vei iratou na veitacini yalewa edua na ivola, na ilawalawa yadua, ka vakasokumuna na nona ivakasala ka ra veiwaseitaka vata na veika era vola vata kei na dua tale na ilawalawa. Na cava e rawa ni da cakava me vakalevucake na noda vakataka na ikatolu ni marama? Me da cakava vakacava me noda kuoramu se na iSoqosoqo ni Veivukei e dua na “vuvale taqomaki” me baleti ira era sasaga bula tiko?

Dieter F. Uchtdorf, “Na Gagadre i Vale”

E rawa vakacava mo vukei ira o vakavulica me ra kila na sala e vakayagataka ira kina na Kalou me vakalougatataki ira na tani? Sa rawa mo sureti ira me ra railesuva na iwasewase ni itukutuku nei Peresitedi Uchtdorf ka kena ulutaga na “Kalou na vakayagataki iko,” ka vakasaqara na yalayala a caka vei ira era segata me ra veiqaravi ena matanitu ni Kalou se cava ga na nodra malumalumu. Na wiliki ni itukutuku oqo ena rawa talega ni ra vakananumi kina na lewenilotu na veika era sa sotava, era rawa ni wasea, ni vakayagataki ira kina na Kalou me vakalougatataki ira na tani—se na gauna a vakayagataki ira na tani o Koya me vakalougatataki ira. Solia vei ira na lewenilotu na gauna me ra vakasamataka vakatitobu na veika era sa vakauqeti me ra cakava ena vuku ni veivosaki oqo.

Bonnie L. Oscarson, “Na Gagadre sa tu e Matada”

E dua na sala me tekivu kina e dua na veivosaki me baleta na itukutuku nei Sister Oscarson sai koya me solia vei ira na tamata kecega e dua na tiki ni pepa ka volai toka e cake “O cei e gadrevi au nikua?”. Era rawa ni taura e vica na miniti o ira na lewe ni nomu ni Soqosoqo ni Veivukei se kuoramu ka vakanananu titobu ena kena volai na isau ni taro oqo. Sa rawa talega ni ra vakasaqara na itukutuku nei Sisita Oscarson ena vakasama me baleta na sala e rawa ni ra qarava kina na yaca ni tamata tiko ena nodra drauniveva—se vakuria na yaca me vaka e vakauqeti kina. E vica beka ga e rawa ni wasea na veika era sa vulica.

Dallin H. Oaks, “Na Yavu kei na iVakaro”

Era na cakacakataka vakacava na leweni nomu kuoramu, ilawalawa, se Soqosoqo ni Veivukei na veisureti nei Elder Oaks me “vakavulici [kei na] bula mai na” ivakaro ni matavuvale, e vale, ena itikotiko raraba, kei na Lotu? Sureti ira me ra veiwaseitaka vakai ira na veivakasama. E rawa talega ni vukei ira me ra vakasaqara na itukutuku me baleta eso na itukutuku vakaivunau mai na ivakaro ni matavuvale. Sa vukei keda vakacava na itukutuku oqo me da vakanamata kina “bolebole e lako curuma tiko na matavuvale”? iTukutuku ni iwasewase IV nei Elder Oaks e umani tu kina eso na ivakaraitaki ni veitukutuku vakaoqo.

D. Todd Christofferson, “Na Madrai Ni Bula Ka Lako Sobu Mai Lomalagi”

Oqo e so na taro ni Soqosoqo ni Veivukei se na lewe ni kuoramu ena vakasamataka tu beka ni ra railesuva na itukutuku nei Elder Christofferson: Na cava na bula savasava? E da vakasaqara vakacava na bula savasava? Na vakaivotavota ena sakaramede ena vukei keda vakacava ena noda sasaga? Na lewenilotu e rawa ni ra wasea na vosa mai na itukutuku nei Elder Christofferson me veivuke ena kena saumi na taro oqo. Eda na veivuke vakacava me vakai “ira na wekada Yalododonu” ena noda sasaga me da savasava cake?

Jeffrey R. Holland, “O Koya mo Dou Qai Vinaka Sara—Vakaoti”

Eso vei ira o vakavulica era nanuma ni sega ni veiraurau na nodra bula ena gauna ni kena bulataki tiko na ivakavuvuli ni iVakabula. Na cava e vakavulica o Elder Holland ni rawa ni vakacegui ka vakayaloqaqataki ira era rairai vakanananu beka tu vakaoqo? Sa rawa mo sureti ira na lewe ni Soqosoqo ni Veivukei se kuoramu me ra vakasaqara e dua na ka ena itukutuku oqo e rawa ni ra wasea vata kei na dua era sasaga dredre tiko me ra vakila ni ra sa “vinaka sara.” Se era na rawa ni kunea e dua na ka ena na itukutuku e vakauqeti ira me ra vakila kina na “na loloma kei na qoroqoro me baleta na [Karisito] kei na gagadre cecere meda vakataki koya.”

Gary E. Stevenson, “Na Butoleka Vakayalo”

Sa bau dua na nomu kuoramu se o ira na lewe ni iSoqosoqo ni Veivukei e sotava e dua na butoleka? Kevaka e vakakina, e rawa ni o sureta e dua vei ira mera vakamacalataka na vosa vakatautauvata e wasea kina o Elder Stevenson me baleta e dua na “butoleka vakayalo.” Na veivakataotaki cava e rawa ni “sabaya na rabailevu, iserau, kei na katakata ni rarama i Jisu Karisito kei na nona kosipeli”? E rawa vakacava ni vagolei keda tani na sala ni vakauitukutuku raraba me mai “na totoka, katakata, kei na rarama Vakalomalagi ni kosipeli”? Eda daramaka beka vakacava na “matailoilo vakosipeli” me taqomaki keda mai na mataboko vakayalo? Na cava e vakavulica vei keda ena vosa vakatautauvata nei Elder Stevenson me baleta na maroroya tiko na noda rai vakosipeli?

Quentin L. Cook, “Na Noda Veisiga Tawamudu”

Na itukutuku nei Elder Cook e vakananumi vei keda na bibi ni noda dau segata me da yalomalua ena vuqa na sala. E dua na sala me ra veivosakitaka na ka e vakavulica o ya me ra wasei ira na lewenilotu ki na rua na ilawalawa. Kerea e dua na ilawalawa me ra raica na vakatutu ena itukutuku nei Elder Cook me rawa ni vukea na noda vakatorocaketaka na yalomalumalumu, kei na ikarua ni ilawalawa me ra vakasaqara na sala eso na tamata e vakaraitaka na viavialevu. Sureta na ilawalawa yadua me ra wasea na nodra ivakamacala kei na ilawalawa ka dua. E rawa talega ni wasea o ira na lewenilotu na sala eso era vakaraitaka kina vakalevu cake na “yalomalumalumu ni veisiga” ena nodra bula ka vakasamataka, ena vukei ira vakacava na yalomalumalumu me ra vakavakarau ki na sota kei na Kalou.

Ronald A. Rasband, “iTuvatuva Vakalou”

Me vakauqeta na veivosaki me baleta na itukutuku nei Elder Rasband, e rawa ni ra veivuke me ra sureti ira na lewe vica me ra kauta mai e dua na ivakarau ni culacula, e dua na ituvatuva matailalai vakamatai, se e dua na iwalewale ni vakarautaki kakana se na vosa me baleta na cava e veivuke sara kina vakalevu na veika oqo. Na ivakaraitaki se na ivakavuvuli cava mai na itukutuku nei Elder Rasband e vakauqeti ira na lewenilotu me ra kila na inaki ni Kalou me baleta na nodra bula? E rairai o ira na lewe ni kalasi e rawa wasea veika era sa sotava ena veika era sa raica ni sa dusimaka tiko na Turaga na nodra bula. Na cava era sa cakava me vakaraitaka vua na Kalou ni ra “vakamareqeta” nona veidusimaki? Na cava na vuna e bibi kina me da kila na loma ni Kalou ena nona “lewa vakalou”?

Russell M. Nelson, “Na iVola i Momani: Ena Vakaevei Beka Na Nomu Bula Kevaka e Sega?”

E sureti ira na lewenilotu o Peresitedi Nelson mera vakasamataka mada e tolu na taro: (1) “Ena vakaevei na nomu bula ke sega na iVola i Momani?” (2) “Na cava beka o na sega ni kila?” (3) “Na cava ena sega vei iko?” Sureti ira na lewe ni nomu kuoramu, ilawalawa, se iSoqosoqo ni Veivukei me ra tugana na veitaro oqo ka wasea na iwalewale era na sauma kina. Na cava era raica ena itukutuku oqo ka na vakauqeti ira mera vakamareqeta cake na iVola i Momani mai na “daimani se na rupi”?

Dale G. Renlund, “Na Matabete kei na Kaukauwa ni Veisorovaki ni iVakabula”

E rawa vakacava ni o vukei ira na lewe ni nomu kuoramu se Soqosoqo ni Veivukei me ra kila vinaka na sala ena veivuke na matabete me ra vakayagataka na veivakalougatataki ni Veisorovaki ni iVakabula? Rawa ni o vola na rua na iulutaga oqo ena vava ni volavola: “Na cava eda gadreva kina na Veisorovaki i Jisu Karisito” kei na “Na sala e ‘kauta’ mai kina vei keda na matabete na veivakalougatataki ni veisorovaki.” Mo qai sureti ira na lewenilotu me ra vakasaqara ena itukutuku nei Elder Renlund, na malanivosa me ra vola ena ruku ni ulutaga yadua. E rawa vakacava kina matabete kei na kena cakacaka vakalotu me vukea na kena vakataucokotaka na inaki ni Tamada Vakalomalagi me baleti ira na luvena?

Dieter F. Uchtdorf, “Waqawaqa ni Rarama Vakalomalagi”

Sureti ira me ra vakasaqara ena itukutuku nei Peresitedi Uchtdorf ka raica ni rawa ni tara vakacava na nodra bula na kena tiko se yali na rarama vakalou. Sa rawa mo sureti ira na lewenilotu me ra vulica eso na ivolanikalou e vakayagataka o Peresitedi Uchtdorf ka vakatakila na dina e semati ki na rarama vakayalo. Na cava e vakavulica vei keda na ivakatakarakara me baleta na butoleka me baleta na itavi ni galala ni digidigi ni vakasaqarai tiko na rarama vakayalo? Na cava e rawa ni da cakava me ra wasea na rarama vakalou nei Jisu Karisito vei ira na tani, vakabibi vei ira na noda matavuvale kei na “ira na noda itabagone, era sa vakasaqara tiko na rarama”?

Henry B. Eyring, “Na Turaga sa Liutaka Tiko na Nona Lotu”

Sureti ira na lewe ni nomu kuoramu se o ira na lewe ni iSoqosoqo ni Veivukei me ra wasea na veika era sa sotava ena veika era gadreva me ra vakatorocaketaka na nodra vakabauta na nodra ilesilesi se dua tale na ilesilesi ni dua e gole mai vana Kalou. Era cakacakataka beka vakacava na nodra vakabauta? Era mai vulica vakacava ni veikacivi sa mai vua na Kalou? Sureti ira na lewenilotu me ra vakasaqara na itukutuku nei Peresitedi Eyring ka vakatakila na dina a vulica o koya mai na veika a sotava ka na rawa ni vukei keda na veivakabauta ka vosota vata kei keda kei ira tale eso sa kaciva na Turaga.

Jean B. Bingham, “Me Sinai Na Nomudou Marau”

Na itukutuku nei Sister Bingham e rawa ni vukei ira na lewe ni nomuni iSoqosoqo ni Veivukei se na kuoramu me ra kila vakavinaka na sala me ra kunea kina na marau, se cava ga na veika dredre ni bula, me vaka ni da lako mai vei Karisito. E dua na sala me veivosakitaka kina na nona itukutuku me droinitaka e dua na sala ena vava ni volavola e muataki keda kina vosa na marau. Sureti ira e vica na lewenilotu me ra vola ena sala e dua na vakatutu mai na itukutuku nei Sister Bingham e veimuataki ki na marau dina. Vakayaloqaqataki ira na lewenilotu me ra vakasamataka na sala eso era rawa ni cakacakataka kina na ivakasala nei Sister Bingham. Sureti ira na lewenilotu me ra wasea na nodra vakasama.

David A. Bednar, “Sivia na Veiyalayalati levu Sara ka Talei”

Me vukei ira na lewe ni nomu Soqosoqo ni Veivukei se kuoramu me ra veitalanoataka na itukutuku nei Elder Bednar, sa rawa mo biuta na iyaloyalo eso ena vava ni volavola me matataka na siga ni Vakacecegu, na valetabu, kei na noda itikotiko. Sureti ira na lewenilotu me ra wilika na veisemati ni iwasewase ni itukutuku nei Elder Bednar ka vola ena vava ni volavola na Siga ni Vakacecegu, na valetabu, kei na noda itikotiko ena vukei keda vakacava na vakanamata ki na yalayala ni Kalou vei keda. Ena noda bula na veika cava e rawa ni dreta tani noda vakasama mai vei ira na yalayala oqo? Na ikalawa cava meda na taura me vakadeitaka ni da sa nanumi ira?

Henry B. Eyring, “Kakua ni Rerevaka na Cakavinaka”

iTukutuku nei Peresitedi Eyring ena rawa ni vukei ira o vakavulica me kunea na yaloqaqa kei na vakabauta me ra kitaka na ka vinaka e vuravura. Sa rawa mo sureta e vica na lewenilotu me ra vakalekalekataka na nodra ivakaraitaki na tamata yalodina e wasea o Peresitedi Eyring. Na cava era vakavulica vei keda na ivakaraitaki eso oqo me baleta na sala me qaravi ira kina na tani? Na cava era vakatura na ivakaraitaki oqo me baleta na sala eda rawa ni veiqaravi me vaka e dua na kuoramu se Soqosoqo ni Veivukei?

E dua tale na sala me ra veivosakitaka kina na itukutuku oqo sai koya me ra railesuva na veivakalougatataki e raica o Peresitedi Eyring ena nona vakamuria na ivakasala nei Peresitedi Thomas S. Monson me vulica na iVola i Momani. Na veivakalougatataki cava eda sa bau raica ena noda vulica tiko na iVola i Momani?

M. Russell Ballard, “E Tomani Tiko na Sala!”

Me tekivu e dua na veivosaki me baleta na itukutuku nei Elder Ballard, e rawa mo sureta e dua na tamata me wasea e dua na sala e muria ia e kunea i muri ni ra muria tiko na sala cala. E semati vakacava na ivakaraitaki vakaoqo ki na noda torocake ena noda “sala” lesu tale vua na Tamada Vakalomalagi? Era rawa ni qai vaqara na lewenilotu na ivakasala kei na ivakaro ka solia o Elder Ballard ka rawa ni vukei keda meda kila kevaka e sa mua donu tiko na noda bula. Solia vei ira na lewenilotu na gauna me ra vakasamataka vakatitobu na nodra dui gaunisala ka veivosakitaka na sala eso e rawa ni da veivuke ka vakayaloqaqataki ira na tani ena nodra “sala” lesu tale vua na Tamada Vakalomalagi.

Neil L. Andersen, “Na domo ni Turaga”

E rairai o ira na lewe ni nomu ni Soqosoqo ni Veivukei se kuoramu era rawa ni wasea e dua na ka e sotava ka vakila vakabibi ka vakaibalebale kina vei ira e dua na itukutuku ni koniferedi raraba. Na cava e vakaibalebale kina na veitukutuku oqo? Na cava e vakatavulica o Elder Andersen me baleta na bibi ni itukutuku ni koniferedi raraba kei na kena igu ni kena vakarautaki? E rawa vakacava ena kila-ka oqo me na vakusakusataki keda kina vulica ka rogoca na vosa oqo? Navuca mo cakava e dua na ituvatuva ni veisureti mai na koniferedi sa oti. Na cava eda sa cakava meda cakacakataka kina na veisureti oqo?