Veika Vakasakiti mai nai Ka 187 ni Koniferedi Raraba Vakayabaki
Me vakalougatataka na Kalou noda parofita lomani;
Me bula vinaka ka vakacegu qaqa
Na yalona cecere.
Nona vosa sa kaukauwa sara
Ena yalo o sa vakalougatataka
Me digidigi ena dodonu
Na tikina e vinaka cake.
(“God Bless Our Prophet Dear,” Serenilotu, naba 24, lagati ena soqoni ena mataka ni Vakarauwai)
Sa sivia oqo e 50 na yabaki, ni sa tiki tu ni koniferedi raraba na itukutuku veivakauqeti nei Peresitedi Thomas S. Monson ka ivakadinadina kaukauwa i Jisu Karisito. Ia ena vuku ni malumalumu ena tauvimate, sa kilai levu na nodrau yali mai na koniferedi o Peresitedi Monson kei Elder Robert D. Hales ena Kuoramu ni iApositolo Le Tinikarua.
Rau sega ni tiko, ia a sega ni guilecavi.
E dina ga ni sarasara tiko o Peresitedi Monson mai vale ka a takali yani ena vakacegu e valenibula o Elder Hales ni vakarau na iotioti ni soqoni, rau a sega walega ni da nanumi rau ena masu, ia a vakilai talega na nodrau veivakauqeti ena vosa kece sara.
E vuqa na vosa era cavuta vakavica na malanivosa nei Peresitedi Monson, oka kina o Peresitedi Russell M. Nelson (raica na tabana e 60), ka a vakamatatataka na veisureti nei Peresitedi Monson “meda vulica ena masumasu na iVola i Momani ena veisiga.”1
A wasea o Elder Neil L. Andersen, na iotioti ni vosa (raica na tabana e 122), ni sa vakavakarau tiko ki na koniferedi o Elder Hales ia sa sega ni rawa me laki tukuna: “Ni da digitaka meda vakabauta, eda sa tu vakarau meda tu ena mata ni Kalou,” a vola o Elder Hales. E dina sara, a digitaka o Elder Hales me vakabauta.
A sega ni tiko, ia a sega ga ni yali, rau a sega ni tu ena itutu ni vunau o Peresitedi Monson kei Elder Hales, ia rau a vakaitavi vakabibi me vakaibalebale cake na koniferedi vei ira e vuqa.
Keimami sa masulaki kemuni tikoga, na neimami parofita lomani,
Ni Kalou ena vakacegui kemuni ena qaqa;
Ni laurai e matamuni na balavu ni yabaki,
Sa rarama tikoga mai na yalomuni oqo,
Sa rarama tikoga mai na yalomuni oqo,
(“We Ever Pray for Thee,” Serenilotu, naba 23, a lagati ena soqoni raraba ni matabete)