iVakadinadina Veivakaukauwataki ni Kalou: Na iVola i Momani

Mai vei Tad R. Callister

Peresitedi Raraba ni Matawilivola ni Sigatabu

E sa ivakadinadina veivakaukauwataki ni Kalou baleta na ilesilesi vakalou i Jisu Karisito, na veikacivi vakaparofita i Josefa Simici, kei na taucoko ni dina ni Lotu oqo.

Na iVola i Momani e sega walega ni vatuivakadei ni noda Lotu, ka e rawa talega ni yaco me vatuivakadei ni noda ivakadinadina ka ena tauri keda matua ena gauna eda sotava kina na veivakatovolei se vakatataro tawakilai. Na ivola oqo edua na ivakabi ena ivakarau bibi ni dinaka sivita na isoqoni kece vakabibi ni nodra ile na’ dauvakaucaca. Baleta na cava? Baleta kevaka e dina, ia o Josefa Simici e a parofita ni oqo na Lotu i Jisu Karisito vakalesui mai, veitalia na ile vakaitukutuku makawa se na vei ile e veisaqasaqa kaya. Oqo na vuna, era maleleta na dauvakaucaca mera saga me kua ni ciqomani iVola i Momani, ia na veivakalatilati era sotava e tawavorati rawa baleta ni ivola oqo e dina.

Ai matai, mera vakamacalataka na dauvakaucaca se e bulia vakacava o Josefa Simici, edua na gonetagane yabaki 23 dau teitei ka vuli vakavo, edua na ivola ka baleta na drau na yaca kei na vanua duidui, kei na vakamatailailai ni vei italanoa kei na veika e yaco. O koya oqo, e levu na dauvakaucaca era vakatura ni okoya edua na daubulika vuku ka vakararavi ena vuqa na ivola kei na vei ivurevure tale eso me bulia kina na lewe ni itukutuku makawa niiVola i Momani. Ia e veibasai ki na nodra ile, ni sega ni duabulu na ivakadinadina me kaya ni a raici Josefa kei na dua na vei ivurevure beitaki oqori ni bera ni tekivu na vakavakadewa.

Kevaka mada ga e dina na ile oqo, e sega ni veirauti ena vutugu me vakamacalataka na itekitekivu ni iVola i Momani. E dodonu me dua e sauma na taro: E rawa vakacava vei Joseph me wilika kece na vei ivurevure oqo, wasea tani na kena e tawayaga, taura na veitikina vereverea e dodonu se ko cei a tiko evei ena vanua kei na gauna cava, ka qai wiligusutaka ena nanuma taucoko? Baleta ni o Josefa ea vakavakadewa, ka sega nona itukutuku volai. E ka dina, ni a vakananuma lesu o Ema na watina: “E sega vei koya na veika sa volai se ivola me wiliwili mai kina. … Kevaka me a tu vei koya edua na ka vaka koya, ke a sega ni rawa ni vunitaka vei au.”¹

Sa rawa gona kina vakacava vei Josefa me cakava na cakacaka uasivi oqo ena wiligusutaki ni ivola taba 500-vakacaca-na-drauna ka sega na ivakamacala volai? Me cakava rawa oqori, e sega walega ni dua okoya na daubulika vuku ia a tu talega vua na nanuma vakaitaba ka vakaitamera sara. Ia kevaka e dina oqo, na cava era sega ni vakaraitaka kina na dauvakaucaca na taledi totoka oqo?

Ia eso tale na ka. Na vei ile oqo e tukuna ga na lewe ni itukutuku makawa ni ivola. Na veika bibi e se vo tu: e rawa vakacava vei Josefa me vola edua na ivola ka vakilai kina na Yalo Tabu, ka kauta mai vei okoya na vei ivakavuvuli titobu, ka vuqa vei ira e vakamatatataka se veisaqasaqa kei na vakabauta vaKarisito ni nona gauna?

Me kena ivakaraitaki, na iVola i Momani e vakatavulica, ka veibasai kei na levu ni vakabauta vaKarisito, ni Lutu nei Atama e a ikalawa vinaka ni toso ki liu. E vakatakila na veiyalayalati e vakayacori ena papitaiso kei na veivosa ni masu ni sakaramede, ka sega vei rau oqo e vakatavulici ena iVola Tabu.

Me ikuri, ena taroga beka edua, E kauta mai vei o Josefa na raiyawa kaukauwa ni baleta na Veisorovaki i Karisito, e a sega walega ni rawa ni savai keda ia e vakavinakataki keda talega? E kauta mai vei okoya na ivunau veivakidroataki ni vakabauta ena Alama 32? Se na ivunau nei Penijamini na Tui ena Veisorovaki ni iVakabula, okoya na ivunau uasivi duadua beka ena ulutaga oqo ena ivolanikalou kece? Se na italanoa vakatautauvata ni vu-ni-olive kei na kena vereverea kei na vutuniyau ni kena ivakavuvuli? Ni’u wilika na italanoa vakatautauvata oqo, au na mapetaka me’u muria kina na kena medremedreya. Me da vakabauta li ni o Josefa Simici e a wiligusutaka ga na vei ivunau oqo mai na buradelana ka sega bau na kena ivakamacala volai?

Veibasai kei na itinitini vakaoqori, na mawe ni liga ni Kalou e robota taucoko na iVola i Momani, ka vakadinadinataki ena kena ivakavuvuli dina vakaturaga, vakabibi na kena ivunau ni Veisorovaki i Jisu Karisito.

Kevaka e sega ni parofita o Josefa, ia me rawa kina ni vakaibalebale na veika oqo kei na vuqa tale na ivakavuvuli raiyawa, o ira na dauvakaucaca me ra tutaka na ile ni okoya edua talega na kenadau ena vulika vakalotu. Ia kevaka e vakakina, edua ena taroga beka, Na cava na vuna ni o Josefa duadua ga ena loma ni 1,800 na yabaki a muria na matanitu nei Karisito ka qai biuta vata edua na ivola vakasakiti ka ni ivakavuvuli ka vakamatatataka na ivunau? Baleta ni a ivakatakila, sega ni vuku, oya na ivurevure ni ivola oqo.

Ia vakaevei keda kaya ni o Josefa e a dua na daubulika ka kenadau ena vulika vakalotu, kei na nona nanuma vakaitaba—na vei italedi ga oqo e sega ni vakatakilai koya me dua e kilaka vaka dauvola ivola. O koya gona, me vakamacalataka na itekitekivu ni iVola i Momani, o ira na dauvakaucaca me ra tukuna talega ni o Josefa e a dua na dauvola ivola vakasakiti ena yabaki 23. Ia ke sega, e rawa vakacava ni talia vata okoya na vuqa na yaca, veivanua, kei na veika e a yaco kina ki na dua na ka e lomavata ka taucoko ka sega kina na duidui? E vola vakacava okoya na matailalai ni veivaluvaluti, tuvana na ivunau momona, ka toqa na vei malanivosa ka vakabibitaki, vakananumi, wasei, ka vakabiri ena vei idola ni katoniwaililiwa vei ira e milioni na tamata, me vaka, “Ni ko ni sa qarava tiko na nomuni Kalou ena gauna ko ni qaravi ira tiko kina na wekamuni” (Mosaia 2:17 se “Sa sucu na tamata, me rawata na marau” (2 Nifai 2:25). Oqo na vei itukutuku ka vakauto—na vei itukutuku e bula ka icegu ka veivakauqeti. Kevaka eda kaya ni o Josefa Simici ena yabaki 23 e a tu vua na kila maqosa ka rawa kina ni vola na cakacaka ivakananumi oqo ena dua ga na ilavelave taumada ena loma ni 65 vakacaca na siga ni cakacaka e sa rui veisaqasaqa kei na veikadina ni bula.

O Peresitedi Russell M. Nelson, edua na dauvola ivola vuku ka qaseta na cakacaka, e a vakaraitaka ni tu vua e sivia na 40 na ilavelave tabaki tale ni dua na itavi vosa mai na koniferedi raraba se qai oti. Me da vakabauta li oqo ni o Josefa Simici, vakataki koya, e a wiligusutaka na iVola i Momani taucoko ena dua ga na ilavelave taumada ka levu ga na veiveisau lalai vakatuvai ni vosa ka qai vakayacori e muri?

Na wati Josefa, o Ema, e a vakadeitaka na dredre ni cakacaka vaka koya: “O Josefa Simici [ni se itabagone tagane] e sega ni rawa ni volavola se wiligusutaka edua na ivola volai vakamatau ka-matata; sa qai yawa sara na wiligusutaka edua na ivola me vaka na iVola i Momani.”²

E kena itinitini, kevaka mada ga edua e ciqoma na vei ile kece oqori, se vakacava na kena veilecayaki, e vo tale edua na itatao me ra sotava na dauvakaucaca. O Josefa e a tukuna ni iVola i Momani e a volai tu ena peleti koula. Na itukutuku oqo e a kauta mai na veivakacacani tawa loloma ena nona gauna—ni “ko ira kece” era kila ni vei itukutuku makawa edau volai ena papirusi se kuli ni manumanu, me yacova e vica na yabaki ka tarava, sa qai kune kina na peleti kaukamea ka tu kina na ivolavolai makawa. Me ikuri, o ira na dauvakaucaca era tukuna ni vakayagataki ni simede, me vaka e vakamacalataki ena iVola i Momani, e sega sara ni yacova na nodra kila vakacakacaka o ira na kai Amerika taumada—yacova ni qai kune na veivale simede e Amerika makawa. E rawa vakacava me ra vakasotara vata na veika oqo kei na veika kunei vou ka tautauvata o ira na dauvakaucaca? O Josefa, mo kila, e bau dua talega e dau rairai kila vinaka sara. E ka ni kidroa, ena loma ni veika e saqati koya, saqata na vei kilaka vaka vakadidike ka vakavuli, e qai donu na nona rairai kila ka ra cala kece na kena vo.

Ni oti kece na veika e tukuni ka caka, ke dua e lomatarotaro se rawa vakacava vua edua me vakabauta na veitukutuku beitaki kei na kaukauwa oqo, ka vakatututaki mai vei ira na dauvakaucaca, ka tuvani vakailoa me veirawai ni o Josefa e vola na iVola i Momani ka vakauqeta na veivakaisini vakasetani. Ia e rawa ni vakaibalebale vakacava na ka oqo? Ena kena saqata vakadodonu na itukutuku oqori, na ivola oqo esa vakauqeta e milioni me ra kua ni ciqomi Setani ka bulataka ga na bula vaKarisito.

Ke dua beka ena digitaka me vakabauta na nodra nanuma na dauvakaucaca, oqori, vei au, e sa icavacava-mate vaka vakasama ka vakayalo. Me vakabauti na ka oqori, me’u na ciqoma vakayadudua veitaravi na vei vakatutu tawa vakadinadinataki oqori. Me ikuri, me’u kua ni rokova na nodratou ivakadinadina kece sara na ivakadinadina le tinikadua,³ dina ga ni ratou dina yadua tu ki na nodratou ivakadinadina ka yacova na ivakataotioti; me’u na kua ni ciqoma na ivakavuvuli vakalou ka vakasinaita tu na vei itaba ni ivola tabu oqo ena kena veidina vakalomalagi; me’u na vakanadakuya na dina ni lewevuqa, oka kina o au, ka sa toro voleka vua na Kalou ena wiliki ni ivola oqo mai na dua tale, ka levu duadua, me’una cakitaka na veivakadeitaki ni vakasolokakana ni Yalo Tabu. Oqo ena veisaqasaqa kei na veika kece au kila tu ni dina.

Edua na noqu itokani vinaka e a biuta na Lotu ena dua na gauna. E a qai volavola wale tikoga mai vei au me baleta nona lesu mai: “Ena itekivu, au vinakata me vakadinadinataki vei au vaka itukutuku makawa, vaka itukutuku vakavuravura, vakavosa. ka vakaitovo na iVola i Momani. Ia na gauna au veisautaka kina na noqu rai vagumatua ki na ka e vakatavulica me baleta na kosipeli i Jisu Karisito kei na Nona cakacaka ni veivakabulai, sa tekivu me’u rawata na ivakadinadina ni kena dina. Ena dua na siga ni’u wilika tiko na iVola i Momani ena noqu rumu, au cegu ka tekiduru ka cabora edua na masu ka vakila vakamatata ni vakasolokakanataka ki na Yaloqu na Tamada Vakalomalagi ni dina taucoko na Lotu kei naiVola i Momani.Na noqu 3.5-na yabaki ni gauna ni dauvakatatarolesu ki na Lotu e tuberi au lesu mai vakataucoko ka vakaidina ki na kena dina.”

Ke dua ena taura na gauna me wilika ena yalomalua ka vakasamataka na iVola i Momani, me vaka na noqu itokani, ka vakatudaliga ki na vuanikau kamica ni Yalo Tabu, ena yaco dina me rawata okoya na ivakadinadina e gadrevi.

Na iVola i Momani edua na isolisoli cecere ni Kalou kivei keda. E sa iseleiwau ka isasabai ruarua—ka vakatala na vosa ni Kalou ki na ivalu me valataka na yalo e dodonu ka veiqaravime dauveitaqomaki liu ni ka e dina. Oi keda na Yalododonu, e sega walega ni noda itavi kei na dodonu me da taqomaka na iVola i Momani ia ka taura na gauna me da valataka—vunautaka ena kena kaukauwa na ivakavuvuli vakalou wasea na ivakadinadina ni kenaulu ni ivakadinadina i Jisu Karisito kei Nona ilesilesi vakalou.

Au solia na noqu ivakadinadina bibi ni iVola i Momani e a vakadewataki ena isolisoli kei na kaukauwa ni Kalou. E sa ivakadinadina veivakaukauwataki ni Kalou baleta na ilesilesi vakalou i Jisu Karisito, na veikacivi vakaparofita i Josefa Simici, kei na taucoko ni dina ni Lotu oqo. Me yaco me vatuivakadei ni noda ivakadinadina, ka me na tukuni me baleti keda, me vakataki ira na Leimanaiti saumaki mai, era “sega ni lutu tani tale” (Alama 23:6). Ena yaca i Jisu Karisito, emeni.