O Koya mo Dou Qai Vinaka Sara—Vakaoti

Mai vei Elder Jeffrey R. Holland

Ena Kuoramu ni iApositolo Le Tinikarua

Kevaka eda vosota rawa, sa na oti ka taucoko na noda vakavinakataki ena dua na vanua tawamudu.

Era a volai na ivolanikalou me vakalougatataki ka vakauqeti keda, ka ra sa cakava vakaidina o ya. Eda vakavinavinakataki lomalagi ena veiwase kei na tikini vola yadua sa soli vei keda. Ia o sa bau siqema mada ena veigauna eso ni na basika e dua na malanivosa ka vakananumi keda ni da sa luluqa tiko vakalailai? Me ivakaraitaki, na Vunau ena Ulunivanua sa tekivutaki ena veivakalougatataki cecere dakoba ka malumu eso, ia ena veitikina ka tarava, sa tukuni vei keda—mai na veika tale eso—sega walega me kua na veivakamatei ia me kakua mada ga ni da cudru. Sa tukuni vei keda sega walega me kua na veibutakoci ia me kakua mada ga ni tiko na vakanananu tawasavasava. Kivei ira na kerea tu, sa dodonu meda solia na noda icurucuru ka qai solia talega na noda itutuvi. Sa dodonu meda lomani ira na noda meca, vosavinaka vei ira sa rulaki keda, ka caka vinaka vei ira sa cati keda.¹

Kevaka eda sa wilika oti me yaco ga eke sa dodonu meda kila ni da na sega ni tauca na maka vinaka eso ena noda itukutuku ni ripote ni kosipeli, na iotioti ni vunau ena senidodo sa dodonu me vakacavara na itavi: “O koya mo dou qai vinaka sara, me vaka sa vinaka sara na Tamamudou … mai lomalagi.”² Ena icava ni vakaro o ya, eda sa via gole lesu ki na idavodavo ka tutuvi dromu sara. Na takete eso vakasilesitieli o ya sa vaka me yawaki keda tu. Ia ena sega ni solia vakaidina vei keda na Turaga e dua na ivunau e kila tu ni da sega ni rawa ni muria. Da raica mada na vanua e kauti keda kina na ituvaki dredre oqo.

Au rogoca e vuqa ena Lotu ka sotavi dredre voli ena ka oqo: “Au sa sega sara ga ni vinaka rawa.” “Au sa luluqa sara ga.” “Au na sega ni vinaka cake.” Au rogoca oqo mai vei ira na itabagone. Au rogoca mai vei ira na daukaulotu. Au rogoca mai vei ira na saumaki vou. Au rogoca mai vei ira na lewenilotu makawa. Sa dikeva e dua na marama Yalododonu Edaidai yalomatua, o Sister Darla Isackson, ni sa rawata rawa o Setani me cakava na veiyalayalati kei na ivunau me vaka era sa ka vakatevoro ka veivakaduiduitaki. Ki na so e sa vukica o koya na inaki kei na veivakauqeti ni kosipeli ki na sevaki koya vakaikoya kei na vakatubu-leqa.³

Na ka au tukuna oqo e sega sara ni cakitaka se vakalailaitaka e dua na ivunau e sa solia vei keda na Kalou. Au sa vakadinata na Nona vinaka vakaoti, kau sa kila eda sa Luvena vakayalo ena igu vakalou meda sa vakataki Koya. Au kila talega ni, vaka na luve ni Kalou, sa sega ni dodonu meda vakacacani se rulaki keda, sa vaka na noda mokulaki keda sa na vakavuna meda sa tamata e vinakata na Kalou me yaco meda vakakina. Sega! Ena lomasoli meda veivutuni kei na gagadre ni yalododonu vakaikuritaki ena lomada, au nuitaka ni da na sasagataka meda vakavinakataki keda ena sala ka na sega ni okata na tauvi mate vuce e loma, yalolailai voli se vakacacani ni noda yalovakacegu. O ya e sega ni ka e vinakata na Turaga kivei ira na gone ena Lalai se dua tale ka lagata vakaidina, “I’m trying to be like Jesus.”⁴

Me tuvalaki donu na ka oqo, au sa vakananumi keda taucoko ni da sa bula ena dua na vuravura veilecayaki ka da sa tamata veilecayaki tu ena gauna oqo. Eda sa tiko ena matanitu vakatelesitieli tekivutaki ena t, sega ni s. Me vaka sa vakatavulica o Peresitedi Russell M. Nelson, ena bula vakayago oqo e se “tu vakawawa.” na vinaka vakaoti.⁵

Au vakabauta ni sega ni nakita o Jisu na Nona vunau ena ulutaga oqo me dua na ituki vakavosa me tukilaki keda voli ena noda malumalumu. Sega, au vakabauta a nakita o Koya me dua na ivakananumi se o cei na Kalou na Tamada Vakalomalagi kei na ka eda rawa ni rawata vata kei Koya ena bula tawamudu. Se cava ga, au vakavinavinaka ni kila ni veitalia na noqu malumalumu, na Kalou sa vinaka sara—ni o Koya e sa, me ivakaraitaki, rawa ni lomani ira na Nona meca, baleta ni vakavuqa, mai na noda sa “tamata vakavuravura”⁶ eso na gauna daru sa meca o ya. Au sa vakavinavinaka ni rawa vua na Kalou me vakalougatataki ira na vakalialiai Koya baleta, ni sega ni vinakati se nakiti me caka vakakina, eda sa vakalialiai Koya taucoko ena so na gauna. Au vakavinavinaka ni sa dau vakaraitaka na loloma veivueti na Kalou ka dua na dautataro baleta niu sa gadreva na loloma veivueti ka sa gadreva o vuravura na vakacegu. Sa dina sara, na veika rakorako eda tukuna me baleta na Tamada eda tukuna talega me baleta na Luvena Duabau Ga sa Vakatubura, ka a bula ka mate ki na savasava vakaoti vataga.

Au kusarawa ni kaya ena raici ni rawaka ni Tamada kei na Luvena mai na noda druka e sega saraga ni solia vei keda e dua na ivakarau lailai ni veivakadonui me baleta na bula tawavakaivakarau se vakalolovirataki ni noda ituvaki. Sega, mai na ivakatekivu na kosipeli sa “vakavinakataki kina ko ira sa lotu, … meda yaco … meda … sa ivakarau ni tamata dina, era sa sinai sara kei Karisito.”⁷ Au sa vakatututaka ga ni dua na inaki ni ivolanikalou se ivunau o ya me rawa ni vakananumi keda ena kena vakaitamera vakaidina “na ivakarau sa sinai sara kei Karisito”⁸ ka vakauqeti keda ena loloma kei na vakacaucau levu cake me baleti Koya kei na gagadre e levu cake meda vakataki Koya.

“Io dou lako mai vei Karisito, ka mo dou vakataucokotaki vua … ,” a vakamasuta o Moronai. “Lomana na Kalou ena nomudou igu, vakasama, kei na nomudou kaukauwa kecega, … ia na nona loloma soliwale dou sa vakataucokotaki ena vukui Karisito.”⁹ Na noda inuinui dua bau ga meda yacova na vinaka taucoko dina sai koya na kena ciqomi vakailoloma mai lomalagi—e sega ni rawa ni da “cakacakataka meda rawata”. Ia, na loloma soli wale uasivi ni Lewetolu va-Kalou e sega walega ni vakabulai keda mai na rarawa kei na ivalavala ca kei na mate ia sa vakabulai keda talega mai na noda dui veivakuwai cikecike.

Meu vakayagataka mada e dua na vosa vakatautauvata ni iVakabula meu tukuna oqo ena dua tani na iwalewale. A dinautaka e dua na dauveiqaravi vua na nona tui ni rauta e 10,000 na taledi. Ena rogoci ni vakamamasu yalomalua ka mosimosi ni dauveiqaravi, “a luvuci na turaga ni dauveiqaravi o ya ena yalololoma, ka … vosota … na dinau.” Ia na dauveiqaravi vata ga o ya a sega ni rawa ni vosota e dua na itokani dauveiqaravi ka dinautaka vua e 100 na peni. Ni rogoci oqo, sa vunauca na tamata a vosota na tui, “E sega beka ni kilikili kei iko mo yalovinaka vua na nomui tokani, me vaka kau a yalovinaka vei iko?”¹⁰

E tiko eso na duidui ni vakasama vei ira na tamata vuli me baleta na vakabibitaki ni ilavo ka tukuni eke, ia me fikataki vakarawarawa, ke sa, kaya mada, $100 ena noda gauna oqo na dinau e 100 na peni lailai ka tawavosoti ia na 10,000 na taledi dinautaki ka vosoti vakarawarawa sa rawa ni yacova na $1 billion—se levu cake!

Vaka e dua na dinau vakatamata, o ya sa dua na iwiliwili vakaitamera—sa tawayacova na noda vakasama. (E sega ni rawa ni dua e rawa ni vakasara oqori na levu ni volivoli e cakava!) Ia, me baleta na ibalebale ni vosa vakatautauvata oqo, e sa dodonu me kakua ni kilai matata; e sa dodonu me sega ni yacova na noda igu me vakasamataki, sega ni tukuni ni sa sega ni yacova na noda igu meda sauma. O ya baleta ni oqo sa sega ni italanoa ni rua na dauveiqaravi ka veiba voli ena Veiyalayalati Vou. E sa italanoa me baleti keda, na matavuvale vakatamata lutu—na daudinau vakayago, daucakacala, ka kaivesu kecega. Eda sa daudinau taucoko, ka sa itotogi meda bala taucoko ki valeniveivesu. Eda na tiko voli ekea kevaka e sega na loloma soli wale ni noda Tui, ka sa sereki keda vagalala baleta ni lomani keda o Koya ka sa “luvuci ena yalololoma kivei keda.”¹¹

Sa vakayagataka o Jisu eke e dua na ivakarau tawakinoci rawa baleta na Nona Veisorovaki e sa dua na isolisoli tawakinoci rawa ka soli ena isau e tawakilai rawa. O ya, e vaka vei au, sa tiki ni balebale ni ka e vakadreta tiko o Jisu meda vinaka sara kina. Eda na sega ni rawa ni vakaraitaka beka oqo na vinaka vakaoti ni 10,000 na taledi sa rawata na Tamada kei na Luvena, ia sa segani ka levu vei Rau me kerei meda sa bula vakalou cake ena veika lalai, meda vosa ka cakava, loloma ka veivosoti, veivutuni ka vakavinakataka na ivakatabutubutu ni vinaka vakaoti e 100 na peni, ka sa matata tu ni rawa ni da cakava.

Kemuni na taciqu kei na ganequ, vakavo ga o Jisu, sa sega na ivakarau kasura ena ilakolako vakavuravura eda saga voli oqo, ka ni da se bula tu meda sa sasagataka na veivakavinakataki momona ka sega ni vesuki ena mataqali tovo era vakatoka na dauvakadidike na “veivakasavasavataki gaga.”¹² Sa dodonu meda levea na ka e namaki emuri o ya baleti keda, ira na tani, ka meu kuria, ira sa kacivi me ra veiqaravi ena Lotu—sai keda kece o ya kivei ira na Yalododonu Edaidai, ni da sa kacivi taucoko meda veiqaravi ena dua na vanua.

Ena ituvaki o ya, a vola e dua na itukutuku o Leo Tolstoy me baleta e dua na italatala ka a vakasewasewani mai na dua na nona ivavakoso ena nona sega ni bula rakorako voli vakaikoya, ka tinia na vakalelewa ni ivakavuvuli e vakatavulica na italatala cala oqo sa dodonu talega me cala.

Me isau ki na vakalelewa o ya, sa kaya na italatala: “Raica na noqu bula ena gauna oqo ka vakatauvatana ki na kena eliu. Ko na raica niu sa tovolea tiko meu bulataka sara na dina au vunautaka.” Ni sega ni bulataka tu na ivakarau momona e vakatavulica, sa vakadinadinataka na italatala ni sa cala. Sa tagi o koya:

“Ravuti au, [ke o vinakata,] au sa cakava oqo vakaiau, ia [kakua] ni ravuta … na sala au muria. …Kevaka au sa kila na sala ivale [ia] sa lako voli kina vaka na mateni, e sa dua li na sala dodonu sara baleta ga niu sa tarabe voli ena veiyasana?

“… Kakua ni kailavaka ena marau, ‘Raici koya mada! … O ya o koya sa qasi voli ena vanua suasua!’ Sega, kakua ni yalolevu, ia solia … na nomu veivuke [vua e dua ka saga voli me lakova na sala lesu tale kivua na Kalou.]”¹³

Kemuni na taciqu kei na ganequ, eda sa sasagataka taucoko na bula va-Karisito levu cake mai na noda rawaka wasoma ni bula voli. Kevaka eda vakadinata ya ena yalodina, ka saga voli meda vinaka cake, eda sa sega ni dauveivakaisini; eda sa tamata ga. Meda sa kua ni vakatara na noda cala vakayago, kei na malumalumu dina ni tamata maucokona sara mada ga e wavoliti keda, me vakacalai keda mai na dina ni kosipeli se nuinui ni noda icavacava se na rawati ni bula vakalou dina. Kevaka eda vosota rawa, sa na oti ka taucoko na noda vakavinakataki ena dua na vanua tawamudu—sai koya na vinaka vakaoti ena Veiyalayalati Vou¹⁴

Au vakadinadinataka na icavacava vakasakiti o ya, ka vakavuna na Veisorovaki ni Turaga o Jisu Karisito, ka tomana tu “mai na iloloma soli wale ki na iloloma soli wale”¹⁵ me yacova na Nona tawamate rawa¹⁶ Sa ciqoma o Koya na taucoko vinaka sara ni lagilagi vakasilesitieli.¹⁷ Au vakadinadinataka ni veiauwa taucoko, e sa dodoka voli o Koya kivei keda, ena liga lauvako, na iloloma soli wale vata ga o ya, ka tautauri voli kivei keda ka vakauqeti keda me yacova ni da sa yaco bula ivale ki na veikidavaki ni iTubutubu Vakalomalagi. Me baleta na gauna totoka o ya, au sa sasaga tikoga, se mani baleca tu. Me baleta na isolisoli totoka o ya, au sa vakavinavinaka tikoga, se mani tawayaga tu. Au cakava oqo ena yaca saraga ni Vinaka Vakaoti vakaikoya, o Koya ka sega tu ni baleca se tawayaga ia sa lomani keda taucoko da vakakina, o koya na Turaga o Jisu Karisito, emeni.