Elder Patrick Kearon

Mataveiliutaki ni Vitusagavulu

Ena gauna a se veiqaravi tiko kina vaka-Peresitedi ena iWasewase ko Iurope, a vakadinadinataka o Elder Patrick Kearon na nodra drotaki bula mai e rua na milioni na isenivalu mai na veivaluvaluti ka yaco tiko mai na Tokalau e Loma mera laki maroroi ka taqomaki mai Iurope. “Ena gauna au raica kina na irairai ni matadra ka rogoca na nodra italanoa, ena veika vakadomobula ratou drovaka kei na nodratou itosotoso rerevaki ni kune vakacegu, au na sega ni tautauvata tale,” a kaya. “E sa veivakauqeti dina meda vakadinadinataka na veika era sa solia mai vakailoloma na lewe ni Lotu e vuravura raraba me vukei ira na tamata yadua kei na matavuvale oqo ka ra sa vakayalia e levu sara na ka.”

O Elder Kearon, ka a tokoni me dua na Vakaitutu Raraba ena 3 ni Epereli, 2010, a kacivi ki na Mataveiliutaki ni Vitusagavulu ena 1 ni Okosita, 2017.

E a sucu o Elder Kearon e Carlisle, Cumberland, e Igiladi, ena Julai ni 1961, vei rau o Paddy kei Patricia Kearon. Ena gauna a veiqaravi tiko kina o tamana ena Mataivalu e Macawa ni Peritania, e a vuli mai na Tokalau e Loma vata kei Igiladi o Elder Kearon.

Ni a vakataroga tiko na Lotu, e a raica sara e dua na tikina mai na ivolanikalou ena Vola i Momani ka tukuni kina, “Sa sucu na tamata me rawata na marau” (2 Nifai 2:25). “E voqa tikoga e daligaqu na tiki ni ivolanikalou oqori,” a kaya o Elder Kearon. “Mai vei ira au a sotava, au a raica na sala ka rawa me cokonaki sara kina vakavinaka na noda bula ena noda muria na nona ivakasala na iVakabula meda reki tikoga.” A lewena na Lotu ena Yakavi ni bera na Siganisucu ni 1987.

E a sotavi Jennifer Carole Hulme ena gauna e a vuli tiko kina e Igiladi ena Univesiti na Brigham Young. Rau a vakamau ena Valetabu e Oakland California ena 1991 ka vakaitikotiko mai Igiladi me yacova nona kacivi ena 2010. Erau nodra itubutubu e lewe va na gone.

A vakaitikotiko ka cakacaka mai Igiladi, Saudi Arabia, kei Amerika ena vica vata na kabani lelevu, oka kina na tabana ni bula, kakana, veilakoyaki, kei na lori, ka dua ga na nona kabani veivakasalataki ni veitaratara. Na nona vakaitavi ena matanitu kei na vanua e oka kina na nona veiqaravi ena matabose ni veivukei, koronivuli, kabani levu, kei na koliji.

Sa veiqaravi oti o Elder Kearon ena vicavata na veikacivi ni Lotu, oka kina na vunivola ivukevuke ni tabanalevu, peresitedi ni Cauravou ena tabanalevu, daunivakasala ena matabisopi, peresitedi ni tabana, peresitedi ni iteki, kei na Vitusagavulu ni iWasewase.