Tu Vata kei na Kalou ka Vakavinakataka na Kacila
Mai vei Neill F. Marriott
iKarua ni Daunivakasala ena Mataveiliutaki Raraba ni Goneyalewa
E sa tu vei Karisito na kaukauwa me kauti keda mai ena veitokani ni loloma kei na Tamada ka vakakina kei ira na tani.
E gadrevi meda vakatitobutaka tiko ga na noda kila kei na talairawarawa vua na Tamada Vakalomalagi. Na noda veiwekani kei Koya e tawamudu. Eda sa Luvena lomani, ka na sega ni veisau o ya. Eda na cakacakataka vakacava na Nona veisureti meda toro voleka Vua ka marautaka na veivakalougatataki e gadreva tu me solia mai ena bula oqo kei na vuravura e tarava?
A kaya na Turaga ki Isireli makawa ka kaya vei keda, “Io, kau sa lomani iko ena loloma sa sega ni mudu: o koya oqo au sa vakadedetaka kina na loloma vei iko.”1 E kaya vei keda na Tamada, “Ia ko na tu vei au, kau na tu vei iko; o koya mo lako kina vata kei au”?2 Eda nuitaki Koya beka meda tikoga kei Koya ka taubale vata kei Koya?
Eda tiko e vuravura meda tubu ka vuli, na tubu kei na vuli bibi ena lako mai ena noda semati keda vua na Tamada Vakalomalagi kei Jisu Karisito. Ena noda veimaliwai yalodina vata kei Rau sa yaco mai kina na kila-ka, loloma, kei na igu cecere ni veiqaravi vei ira na tamata.
“Eda sa vauci vakailesilesi meda vulica na ka kece sa vakatakila mai na Kalou baleti koya.”3 Meda kila vinaka ni Kalou na Tamana a dusimaka na Luvena, o Jisu Karisito, me bulia na vuravura meda tubu kina, sa solia kina na Tamada Vakalomalagi na Luvena me sauma na ivakaro ni lewa ni noda vakabulai, kei na kaukauwa ni matabete nei Tamana kei na Lotu dina ni Luvena kei na kena cakacaka vakalotu vakadonui sa vakalesuimai me vakalougatataki keda. O rawa ni vakila na titobu ni loloma sa curuma tiko na Nodrau vakavakarau oqo meda reki ka tubu? E gadrevi meda kila na ituvatuva ni veivakabulai nei Tamada Vakalomalagi o ya meda muria na lawa kei na cakacaka vakalotu ni kosipeli ka rawata na bula tawamudu ka yaco meda vaka na Kalou.4 Oqo na marau dina ka tawayalani sa solia mai na Tamada Vakalomalagi. Sa sega tale ni dua na marau dina ka tawayalani.
Sa rawa ni dreti keda tani na noda ibolebole mai na sala ni bula marau oqo. Ena rawa ni yali na noda nuitaka tiko na Kalou ke muataki keda tani na veivakatovolei meda kakua ni masu.
E vakamasuti keda na vosa oqo meda vakasama donu mada:
Eso na ka e yaga; eso na ka e sega.
E vica na ka e cava vinaka, ia e vuqa e sega.5
Kemuni na taciqu, na cava e bibi vei iko?” Na cava ena balavu na kena talei vei iko?” Na yaga ni yavunilewa bibi e cava vua na Tamada o ya meda vuli mai vei Koya, yalomalumalumu, ka tubu noda talairawarawa Vua ena veika eda sotava i vuravura. E gadreva meda veisautaka noda kocokoco ki na veiqaravi kei na rere ki na vakabauta. Na yaga bibi oqo ena vakatovolei keda ki na lomada e loma.
Ia oqo, ni da sa vakaiyalayala ga, sa kerei keda na Tamada meda loloma ni sa dredre sara meda veilomani, meda veiqaravi ni takiveiyaga na veiqaravi, meda veivosoti ena gauna e dredre kina e yaloda. Me Caka Vakacava? Me da cakava vakacava? Eda kerea vakaidina na veivuke ni Tamada Vakalomalagi, ena yaca ni Luvena, ka cakacaka ena Nona sala ka sega ni vakamuri lomada ena dokadoka.
Au raica rawa noqu dokadoka ena vosa i Peresitedi Ezra Taft Benson baleta na savati ni lewa e loma.6 Au raitayalotaki au meu dua na joke ni wai. Meu kauta tani vakacava na duka ni dokadoka mai na noqu joke? Na vakasaurarataki keda meda yalomalumalumu ka muataki keda meda loloma, e sega ni dina, laladidi, ka sega ni rawa. Na noda ca kei na caka cala e bulia e dua na kacila—se laqa—ena keda tadrua kei na mataniwai ni loloma taucoko, na Tamada Vakalomalagi.
Na veisorovaki duadua ga ni iVakabula ena savata na noda ivalavala ca ka sogota na laqa o ya.
Eda vinakata meda solegi ena liga loloma veidusimaki i Tamada Vakalomalagi, eda sa vakaliuca kina na Lomana ka kerea na Karisito ena yalomalua ni na sova mai na wai veisavati ki na noda joke. Taumada ena rawa ni turu yadua mai, ia ni da vakasaqara, ka kerea, ka talairawarawa, ena vakalevutaki mai. Eda na tekivu vakasinaiti ena wai-bula oqo, ka ubi ena Nona loloma, eda rawa ni sova na joke ni yaloda ka wasea na veika e tawa tu kina vei ira na tani era karamaca tu me ra vakabulai, inuinui, ka karoni. Ni sa savasava na noda lewa e loma, sa na vakabulai na noda veiwekani vakatamata.
Ena gadrevi meda sorova noda ituvatuva vakatamata meda vale ni ituvatuva tawamudu ni Kalou. E vosa na iVakabula ena vukui Tamana, e vakamasuta meda “toro voleka mai vei au kau na qai toro voleka yani vei kemudou.”7 Na toro voleka vua na Kalou sai koya noda vulica Nona dina ena ivolanikalou, muria nodra ivakasala na parofita; ka saga meda kilai Koya vakataucoko sara.
Eda sa kila vinaka beka ni sa tu vei Karisito na kaukauwa me veitokanitaki keda ena loloma kei na Tamada ka vakakina vakai keda? Sa rawa Vua, ena kaukauwa ni Yalo Tabu, me solia vei keda na veivakararamataki ena veiwekani.
A kaya vei au e dua na qasenivuli ni Matawilivola ni Siga Tabu nona sotava e dua na ka qaqa ena nona kalasi ni cauravou yabaki 11. E dua au na vakatoka me o Jimmy e dau vakaduiduile tu ga ena kalasi. Dua na Siga Tabu, a vakauqeti o qasenivuli me biuta mada na lesoni ka tukana na vuna e lomani Jimmy kina. A tukuna na nona vakavinavinaka ka vakabauta na cauravou lailai oqo. A qai kerea na kalasi o qasenivuli me ra kaya e dua na ka era taleitaka me baleti Jimmy. Ni ra tukuna mai vakayadudua na kalasi, na vuna era taleitaki Jimmy kina, sa cuva sobu o cauravou ka tuturu na wai ni matana. Sa mai tara cake o qasenivuli kei na kalasi e dua na isema ki na galili ni yaloi Jimmy. Na loloma, e vakaraitaki ena yalodina, sa inuinui kei na yavunilewa vei ira na tamata. Au vakatoka oqo me “vakavinakataka na kacila.”
Noda bula mai na vuravura taumada daulomani, e tuvai meda mai taleitaka na loloma dina, ka cava vinaka ena vuravura oqo. Eda sa lesi vakalou meda mai loloma ka lomani, ka yaco na loloma titobu ni da sa duabau kei na Kalou. E sureti keda na iVola i Momani meda “veivakaduavatataki mada kei [na Kalou] ena vuku ni veisorovaki i Karisito.”8
E tukuna o Aisea baleti ira era bulataka ena yalodina na lawa ni lolo ka yaco me ra sa vakawataka e dua na “dauvakavinakataka na kacila. Sai ira oqo, a yalataka o Aisea, era na “tara tale na veikoro sa lala makawa.”9 Ena sala vata ga, a vakavinakataka na iVakabula na kacila ena keda tadrua kei Tamada Vakalomalagi. Mai na Nona solibula veisorovaki cecere, sa dolava vei keda na loloma cecere kaukauwa ni Kalou, ka rawa meda vakavinakataka na “veikoro sa lala makawa” ni noda bula. Na vakamavotaki ni veiyawaki ni yaloda vakai keda, ena gadrevi kina na loloma nei Tamada, vata kei na sorovi ni noda veigauna ni kocokoco kei na rere.
Dua na bogi guilecavi dredre, keirau a veiba vakapolitiki kei na dua na wekaqu. A vakadiloya vakamatailalai vakaukauwa na noqu nanuma, ka vakacalai au ni ra rogoca tu na leweni matavuvale. Au a vakalialiai ka lecaika—ka rairai dina beka. Ena bogi niu sa tekiduru meu masu, a totolo sara meu kaya vei Tamada Vakalomalagi na dredre nei wekaqu oqo! Au a vosabalavu sara. Au a mani cegu ena vosa kudrukudru, ka sa nona gauna na Yalo Tabu me vosa mai, baleta, au a kurabui, niu sa kaya, “O vinakata beka meu lomani koya.” Lomani koya? E tomani na noqu masu, kau kaya vakaoqo, “Meu lomani koya vakacava? Au sega ni vakabauta niu taleitaki koya. E kaukauwa na yaloqu; ka sa rarawa na lomaqu. Au na sega ni cakava rawa.”
Ia ena veivuke ni Yalo, a yaco mai e dua na vakasama vou kau kaya, “Ia o ni lomani koya, Tamaqu Vakalomalagi. E rawa mo ni solia vakalailai vei au na Nomuni loloma vua—meu lomani koya talega?” Sa malumu mai na lomaqu kaukauwa, ka sa tekivu me veisau na lomaqu, ka sa tekivu me duatani mai noqu raici ira mai na tamata oqo. Sa tekivu meu raica na nona vakamareqeti e raica na Tamada Vakalomalagi. A vola o Aisea, “Sa vauca kina ko Jiova na nodra mavoa na nona tamata, ka vakabula na we ni kedra kuita.”10
Toso na gauna sa kamica sara na tasogo ni laqa. Ia, ke sega ni ciqoma mada ga na veisau ni yaloqu, au sa vulica ni na vukei keda na Tamada Vakalomalagi meda lomani ira eda nanuma ni ra sega ni lomani rawa, kevaka eda kerea na Nona veivuke. Na Veisorovaki ni iVakabula sa idewadewa tudei ni loloma mai vua na Tamada Vakalomalagi. E dodonu meda ciqoma ka tu ena loloma oqo me rawa ni da lomana na tamata kece.
Ni da solia na yaloda vei Tamada kei na Luvena, eda sa veisautaka na noda vuravura—dina ke sega ni veisau na veika sa voliti keda tu. Eda voleka vua na Tamada Vakalomalagi ka vakila na vinaka ni Nona ciqoma noda sasaga meda tisaipeli dina i Karisito. Ena tubu na noda kila, yalonuidei, kei na vakabauta.
E tukuna o Momani meda masuta na loloma oqo ena kaukauwa kece ni yaloda ka na soli mai vei keda mai na kena ivurevure—na Tamada Vakalomalagi.11 Sa qai rawa kina meda sa dauvakavinakataka na kacila ni noda veimaliwai vakatamata.
Sa kauti keda mai na loloma tawayalani nei Tamada, meda lesu ki na Nona lagilagi kei na reki. Sa solia mai na Luvena Lomani Duabau, o Jisu Karisito, me vakavinakataka na kacila ena keda tadrua kei Koya. Na veivinakati tale kei Tamada Vakalomalagi sa gacagaca vinaka ni loloma kei na inaki tawamudu. Meda sa semati keda yani Vua meda vulica na ka e dina, meda loloma vakataki Koya ka tubu meda na vakataki Koya. Au vakadinadinataka ni noda veiwekani yalodina kei Tamada Vakalomalagi kei na iVakabula e yaga tawamudu vei Rau kei keda. Ena yacai Jisu Karisito, emeni.