Meda Veilomani me Vaka sa Lomani Keda O Koya

Mai vei Elder José L. Alonso

Ena Vitusagavulu

Kau sa kila ni mai na noda qaravi ka vosoti ira na tani ena loloma dina, sa rawa ni da vakabulai ka ciqoma na kaukauwa meda ulabaleta na noda dui bolebole.

Donuya na iOtioti ni Vakayakavi, a solia na iVakabula e dua na ivunau vou kivei ira na Nona tisaipeli, ka kaya:

“E dua na ivunau vou au sa solia vei kemudou; mo dou veilomani; me vaka kau sa lomani kemudou, mo dou veilomani talega vakakina.

“A ka oqo era na kila kina na tamata kecega ni dou sa noqu tisaipeli, kevaka dou sa veilomani.”¹

A soli kivei ira na tisaipeli ni iVakabula e dua na ivunau vou me ra cakava e dua na ka levu cake, cecere, ka vakalou cake. Nai vunau kei na veisureti vou oqo e sa vakalekalekataki ena malanivosa bibi oqo “me vaka kau sa lomani kemudou.”

Na Loloma e Cakacakataki; na Loloma na Veiqaravi

“Na loloma sai koya na vakilai ni solibula, kauwai, kei na veivinakati bibi. Na ivakaraitaki ni loloma levu duadua ni Kalou kivei ira na Luvena e sa kune ena Veisorovaki vakalou i Jisu Karisito.”² “Ni sa lomani ira na kai vuravura vakaoqo na Kalou,” a vola ko Joni “me solia kina na Luvena e duabau ga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu.”³ “Noda lomana na Kalou kei na kainomu sa nodra ivakaraitaki tudei na tisaipeli i Jisu Karisito.”⁴

Ena vica na yabaki sa oti, ni se yabaki va na makubui keirau tagane o Jose, e a qito voli kei na watiqu. Ni rau a veidredrevaki ka veilasamaki voli, a taroga na makubui keirau, “Bubu, o lomani au li?”

A sauma o koya, “Io, Jose, au lomani iko.”

Qai mani tarogi buna tale vakadua: “O kila vakacava ni o lomani au?”

A vakamacalataka vua o buna na veika e vakila e lomana ka tukuna vua na ka taucoko e sa cakava ka tu vakarau me cakava ena vukuna.

E muri a tarogi Jose na watiqu ena taro vataga, oka kina na veivakatarogi laulau oqo: “O kila vakacava ni o lomani au?”

Ena kena isau tawacala ka rakorako, a kaya o koya, “Au lomani iko baleta niu vakila ena loma ni utoqu.” Na ivakarau ni loloma nei Jose vei buna ena siga o ya ka vakatalegakina ena veigauna sa vakaraitaka na loloma ka cokoti vata na cakacaka kei na veika e vakilai e titobu.

A vakatavulica na Tui o Penijamini, “Ia au sa tukuna vei kemuni na veika oqo mo ni yalomatua kina; mo ni kila ko ni sa qaravi koya tiko na nomuni Kalou, ena nomuni qaravi ira tiko na wekamuni.”⁵

Ena levu ni leqa sotavi tu e vuravura nikua ena ituvaki duidui eso, na vakau ni dua na itukutuku ni emoji lasa se tabaki ni dua na itaba totoka ena vosa “Au lomani iko” e sa vinaka ka yaga. Ia na ka me cakava e vuqa vei keda o ya me biu tu mai na noda iyaya vakalivaliva tuberi ka, vukei ira era sotava tu na leqa ena ligada kei na yavada. Na loloma e sega ni veiqaravi sa vaka na vakabauta e sga ni cakacakataki; sa mate kadina.

Na Loloma sai koya na Veivosoti

Na loloma tudei i Karisito, ka sa loloma cecere,⁶ e sega walega ni uqeti keda meda cakacaka ka vakarautaka na veiqaravi ia me tiko talega na kaukauwa meda veivosoti, veitalia na ituvaki cava ga. Meu wasea mada kei kemuni na ka au a sotakaya ka sa curuma ka veisautaka na noqu bula. O Ted kei Sharon, na itubutubu nei Cooper, e sa vakatarai au meu wasea na ka a yaco ki na nodratou matavuvale sivia e ciwa na yabaki sa oti. Au na tukuna na ka a sotavi mai na yasana nei Ted, na tamai Cooper:

Na 21 ni Okosita, 2008, sai matai ni siga ni vuli, ka ratou wawa toka ena ikelekele ni basi me ratou vodo o Ivan, Garrett, kei Logan, na tuakai Cooper. O Cooper, ka sa yabaki va, a vodoka tu na nona basikeli; a taubale ga na watiqu, o Sharon.

A toka ena tai kadua ni gaunisala na watiqu ka yalovi Cooper me takoso. Ena gauna vata o ya, a vuki vakamalua ki nai mawi e dua na motoka ka mani coqai Cooper.

Au ciqoma e dua na qiri ena talevoni mai vua e dua keitou veitikivi vale ka tukuna ni sa laucoqa o Cooper. Au a draiva totolo sobu ki na ikelekele ni basi meu raici koya. A davo tu o Cooper ena veikarasi, sasaga dredre voli me cegu, ia e sega na mavoa e laurai rawa.

Au tekiduru sobu e yasai Cooper ka kaya na veika veivakayaloqaqataki me vaka “Ena daumaka ga. Tautauri toka.” Ena gauna vata o ya a basika vata kei na watina o Nathan, na noqu iliuliu ni lawalawa ni bete levu. A vakatututaka o watina me keirau solia vei Cooper e dua na veivakalougatataki vakamatabete. Keirau a vakataqara na ligai keirau ena ului Cooper. Au sa sega ni nanuma na ka au a kaya ena veivakalougatataki, ia au kila vakamatata tu na nodra tiko wavoliti keitou eso tale, kau sa kila ena gauna o ya ni sa na kau tani na bula nei Cooper.

A vukataki o Cooper ki na valenibula ena dua na waqavuka lailai, ia a mani yaco vakakina me kau tani nona bula. Au vakila ni a tukana tiko vei au na Tamada Vakalomalagi ni sa mai cava na noqu ilesilesi vakavuravura ka sa tiko o Cooper e Ligana.

Keitou a mani tiko kei kei Cooper ena valenibula. Era a vakarautaki koya na cakacaka ekea me rawa ni keitou tauri koya ka vakamoce ka taura tale eso na gauna me keitou tiko vata kei koya, tauri koya voli, me vaka na neitou gagadre.

Ena golegole lesu ki vale, keirau a veiraici kei watiqu ka luvuci voli ka sa tekivu veitalanoataka na tagane ka a draivataka tiko na motoka. Keirau sa sega ni kilai koya, dina ga ni tiko ena sala ka veitikivi toka mai liu ka sa tiko ena loma ni neitou yalava ni tabanalevu.

Na siga katarava sa dredre saraga vei keitou ni keitou a luvuci vakataucoko tu ena rarawa. Au a tekiduru ka masuta edua na masu ena yaloqu taucoko au sa qai bau cabora. Au a kerea na Tamada Vakalomalagi ena yaca ni noqu iVakabula me kauta tani namosi ni lomaqu. A vakayacora o Koya.

E muri ena siga o ya a vakarautaka vei keirau e dua na daunivakasala ena neitou mataveiliutaki ni iteki na veisotari kei na cauravou—na draiva ni motoka—kei na nona itubutubu ena itikotiko nei daunivakasala. Au a waraka toka vata kei Sharon na tagane kei na nona itubutubu me basika. Ni sa tadola na katuba, keitou a veisotari enai matai ni gauna. A vakasolokakana ki daligaqu o noqu bisopi, “Gole ki vua.” Keirau a mokoti koya kei Sharon ena dua na veimoko levu vakailawalawa. Keitou a tagi vata me dua na gauna balavu sara. Keirau tukuna vua keirau sa kila ni ka a yaco sa ivakatakilakila ni dua na vakacalaka.

E a veivakurabuitaki vei Sharon kei au, na veika keirau a vakila ruarua, ka se vaka tu ga kina. Ena loloma ni Kalou, sa rawa kina me keirau muria na sala levu, na sala vata ga, na sala duadua ga, ka lomana na cauravou vinaka oqo.

Keirau sa mai veivolekati sara kei koya kei na nona matavuvale ena veiyabaki veitaravi. E sa wasea o koya na nona veigauna divi talei sara vata kei keirau. Keirau a gole vata kei koya ki na valetabu ena nona vakavakarau me laki kaulotu.⁷

Sa kila deivaki tu o Ted ni sa lomani keda na Tamada Vakalomalagi. Sa kila o koya ni kena rawa na veivosoti, ka me vakuwai koya ena sala o ya, e sa ka kamikamica me vaka nomu sa vosoti. Na kamikamica oqo e basika mai ena kena muri na ivakaraitaki ni noda Daunivakaraitaki levu duadua. Ena iVola i Momani, a cauraka o Alama me baleta na iVakabula: “Ia ena lako yani ko koya, ena vakila na mosi kei na veivakararawataki kei na veivakatovolei kecega; ia sa yaco na veika oqo me vakayacori kina na vosa sa tukuni ni na colata ko koya na nodra mosi kei na nodra tauvimate na nona tamata.”⁸

Kemuni na taciqu kei na ganequ, sa dua dina na italanoa totoka ni loloma dina kei na veivosoti. Sa vakakina o keda, ni rawata na reki kei na bula marau ni da qaravi ka vosoti ira na tani. Dau kaya wasoma o Georgy, dua tale na makubui keirau tagane, “Mataqali matavuvale vakacava o kedatou?” Ka qai sauma, “E datou sa matavuvale mamarau!”

Sa vakasalataki keda o Perersitedi Thomas S. Monson, ni kaya, “Meda sa dikeva na noda bula ka navuca meda muria na ivakaraitaki ni iVakabula ena noda dau lomavinaka, loloma, ka dausoli-ka.”⁹

Au kila ni sa lomani keda na Tamada Vakalomalagi kei na Luvena, o Jisu Karisito, ka rau sa lomasoli ni vukei keda meda sasaga ni da sa veilomani me vaka e Rau sa lomani keda. Kau sa kila ni mai na noda qaravi ka vosoti ira na tani ena loloma dina, sa rawa ni da vakabulai ka ciqoma na kaukauwa meda ulabaleta na noda dui bolebole. Kau sa cavuta oqo ena yaca i Jisu Karisito, emeni.