“Au na Solia Vei Iko e Dua na Cakacaka”

Mai vei Elder John C. Pingree Jr.

Ena Vitusagavulu

Sa vakaibalebale na noda itavi yadua meda tosoya kina na cakacaka ni Kalou.

Na Kalou, a vakaraitaka vei Mosese, “Au na solia vei iko e dua na cakacaka” (Mosese1:6). O sa bau vakasamataka mada ni Kalou ena solia vei iko e dua na cakacaka? Sa vakarautaka beka na veika bibi vei iko o Koya—vakatabakidua vei iko—mo rawata? Au vakadinadinataka ni kena isau na “io!”

A sucu ka susugi cake o Girish Ghimire ena matanitu o Nepali. Ni se cauravou gone, a vuli mai Jaina, ka vakatakila vua e dua na itokani ni kalasi na kosipeli i Jisu Karisito. Yaco na gauna, a mai cakacakataka nona tauri vola ena Brigham Young Univesiti ka sota kei koya me na laki watina. Rau a vakaitikotiko sara ena bucabuca mai Salt Lake ka susuga e rua na gone mai Nepali.

Oti e vica na yabaki, ni ra sa tokitaki e sivia na 1,500 na isenivalu mai na keba e Nepali ki Utah,¹ a vakauqeti o Girish me veivuke. Ni kila vakavinaka tu na kena vosa kei na kena itovo, a dua kina na daunivakadewa, qasenivuli, ka dauveituberi. Ni ra sa mai tiko ena itikotiko raraba, eso na isenivalu ni Nepali era sa vinakata na kosipeli. A tauyavutaki kina e dua na tabana vaka-Nepali, ka laki kena peresitedi ni tabana e muri o Girish. A vakaitavi talega ena kena vakadewataki na iVola i Momani vaka-Nepali.

E rawa beka ni o raica ni sa vakarautaki ka vakayagataki Girish na Tamada Vakalomalagi?

Sa na Solia mai na Kalou na noda Dui Cakacaka

Taciqu kei na ganequ, ena solia mai na Kalou vei keda yadua na cakacaka bibi. Ni vosa vei ira na marama, ka vakavulica na dina sa baleta na tamata kece, e vakavulica o Peresitedi Spencer W. Kimball: “Bera ni da gole mai eke, a soli vei [keda] na ilesilesi eso. … Dina ni da sega ni nanuma rawa na kena matata, oqo e sega ni veisautaka na dina lagilagi ni ka eda sa vakadonuya mai.”² Sa qai dua na dina e veivakaturagataki! Sa solia mai na Tamada Vakalomalagi na matata kei na bibi ni cakacaka me daru na rawata (raica na Efeso 2:10).

Era sega ni maroroi tu na itavi vakalou oqo vei ira na vica wale ia vei keda kece—tagane se yalewa, kawatamata cava, vanua cava, levu ni ilavo, itutu vakalewenivanua, se veikacivi ni Lotu. Sa bibi na noda dui itavi meda tosoya kina na cakacaka ni Kalou (raica na Mosese 1:39).

Eso eda na taroga ni rawa beka vua na Tamada Vakalomalagi me vakayagataki keda me bibi na noda cau. Ia mo nanuma, sa dau vakayagataki ira na tamata wale o Koya me vakayacora kina na veika cecere sara (raica na 1 Korinica 1:27–28; V&V 35:13; 124:1). “[Meda] vakayacora ga,” ni sa “tu vei [keda] na kaukauwa” ka “vakayacora na veika dodonu eso” (V&V 58:27–28).³

Peresitedi Russell M. Nelson

E vakamacalataka o Peresitedi Russell M. Nelson: “Sa vakasamataki iko vakalevu cake na Turaga mai na kena o vakasamataka tu baleti iko. O sa maroroi ka taqomaki baleta na gauna kei na vanua oqo. …

E gadrevi iko na Turaga mo veisautaka na vuravura. Ni ko sa ciqoma ka muria na Lomana baleti iko, o na raica ni ko sa cakava na veika dredre sara!”⁴

Meda sa qai kila vinaka vakacava ka kitaka na cakacaka ni Kalou e solia me noda? Meu wasea mada e va na ivakavuvuli ena veivukei.

Raicamatua na Tamata

iMatai, Raicamatua na tamata. E rawa meda muria na Karisito ni sa, “lako voli ka daucaka vinaka” (Cakacaka 10:38; raica talega na 2 Nifai 26:24).

Niu sa lesu mai ena kaulotu, au a divalesu na inaki ni veisiga au a marautaka. Sa matata, ni sa gadrevi meu maroroya na noqu veiyalayalati, meu vuli, vakamatavuvale, ka rawata na noqu bula. Ia au vakasamataka ke tiko eso tale na ka, se taleitaki cake, e gadreva na Turaga meu na cakava. Niu sa vakasama vakatitobu ena vica na vula, au a raica na tikina oqo: “Me vaka dou sa gadreva, dou sa na idewadewa ni veika yaga e vuqa ena itabatamata oqo” (V&V 11:8). A vukei au na Yalo meu kila vinaka ni inaki taumada ni ilesilesi vakalou o ya me vakalougatataki ira na tamata me “idewadewa ni veika yaga e vuqa.”

Eda na yacova na gauna ni vakatulewa ena noda bula—na cava me vulici, na cakacaka cava meda cakava, se vanua meda tiko kina—ena vakasama ni nodra vukei na tamata.

E dua na matavuvale a toki ki na dua na siti vou. Ratou a sega ni vasaqara e dua na vale ena dua na itikotiko rawati koya, ka vakauqeti me ratou lako i tiko ena vanua e leqa tu vakalevu ena veika raraba kei na ilavo. Toso na yabaki, sa cakacaka vei iratou na Turaga me ra tokoni e vuqa na tamata yadua ka tarai cake nodra tabanalevu kei na iteki.

E dua na vuniwai a cakava tikoga vakadodonu na nona itavi ia a vakila ni sa dusimaki me solia dua na siga ena veimacawa me vakarautaka na veiqaravi sega ni saumi vei ira e sega na nodra inisua ni bula. Baleta ga ni rau a guta na veiwatini oqo me rau veivakalougatataki, a vakarautaka na Turaga na sala me rau vukea e drau na tauvimate vakaleqai tu, ni rau qarava tiko nodrau vuvale levu.

Kunea ka Taracake na iSolisoli Vakayalo

iKarua, kunea ka taracake na isolisoli vakayalo. Sa solia vei keda na Tamada Vakalomalagi na isolisoli oqo me vukea meda kila, cakava, ka marautaka na cakacaka sa solia mai.

Eso vei keda ena taroga, “E tiko beka e dua na noqu isolisoli?” Na kena isau tale na io! “Sa vuqa tu na isolisoli ki na tamata yadua [kei na yalewa] mai vua na Yalo ni Kalou … io me dui yaga vei ira” (V&V 46:11–12; vakamatatataki).⁵ E vica na isolisoli vakayalo era sa volai tu ena ivolanikalou (raica na 1 Korinica 12:1–11, 31; Moronai 10:8–18; V&V 46:8–26), ia e vuqa tale tu.⁶ Eso na kena ivakaraitaki ena oka kina na yalololoma, vakaraitaki ni inuinui, veiwekani vinaka kei na tamata, tuvatuvanaki mana, vosa se volavola veivakauqeti, veivakavulici matata, kei na cakacaka kaukauwa.

Eda na kila vakacava na noda isolisoli? Meda raica na noda veivakalougatataki vakapeteriaki, kerei ira era kilai keda vinaka, ka raica vakai keda na veika cava eda kenadau kina ka marautaka. Vakabibi, ni rawa meda kerea na Kalou (raica na Jemesa 1:5; V&V 112:10). E kila na noda isolisoli, ni a solia ga mai o Koya (raica na V&V 46:26).

Ni da sa kunea na noda isolisoli, sa noda ilesilesi meda tara cake (raica na Maciu 25:14–30). O Jisu Vakaikoya “sa tubu cake tiko ena nona iukuuku, ka rawata na loloma e vakaikuritaki, io me yacova ni sa rawata na nona iukuuku taucoko” (V&V 93:13).

E dua na cauravou a droini me tutaki kina na yavubula vakalotu. Au taleitaka duadua na iyaloyalo ni iVakabula, e dua talega e lili tiko mai vale. A taracake o tacida oqo na isolisoli ni droini e tiko vua. Ni cakacaka mai vua, a vakauqeti ira eso na Tamada Vakalomalagi me ra taracake nodra bula vakatisaipeli.

Eso na gauna eda nanuma ni sega tu ni dua na noda isolisoli bibi. Dua na siga a kerea e dua na goneyalewa luluqa, “Turaga, na cava beka na noqu ilesilesi vakalou?” A sauma mai o Koya, “Raici ira na kena vo.” Oya na isolisoli vakayalo! Sa kune reki ni raici ira eso era dau guilecavi tu, ka sa cakacaka mai vua na Kalou me vakalougatataka e vuqa na tamata. Eso na noda isolisoli vakayalo eda na sega beka ni kilai ena ivatagede kei vuravura, ia era sa ka bibi vua na Kalou kei na Nona cakacaka.⁷

Vakayagataka na Veika Dredre

iKatolu, vakayagataka na veika dredre. Nida vakatovolei ena vukea meda kunea ka vakavakarau ki na cakacaka sa solia mai na Tamada Vakalomalagi. A vakamacalataka o Alama, “Ena levu ni veivakararawataki, na Turaga … sa lesi au meu iyaya ni cakacaka e ligana” (Mosaia 23:10).⁸ Me vaka na iVakabula, sa cakava na Nona solibula veisorovaki me vukei keda (raica na Alama 7:11–12), ka rawa meda vakayagataka na kila-ka e tadu mai na veika dredre meda laveta, vaqaqacotaka, ka vakalougatataki ira na tamata.

Ni sake oti mai e dua na iliuliu vinaka ni tabana ni ivurevure vakatamata, a wilika na nona veivakalougatataki vakapeteriaki ka vakauqeti sara me tekivutaka e dua na kabani me vukea nodra vakacakacakataki na tamata vuku. (A vukei au talega meu kune cakacaka ni oti mai na kaulotu vakamatavuvale.) A vakayagataka na Turaga na nona vakatovolei me ikakalawa mera vakalougatataki na tamata, ka solia vua e dua na cakacaka e vakaibalebale cake.

A sucumate na luvedrau e dua na veiwatini gone. Ena kavoro ni yalo, rau a vakananuma na luvedrau ka veivakasalataki ka veitokoni ena iyaya mera tokoni na itubutubu era a sotava talega na ka vata oqo. A cakacaka na Turaga vei rau na veiwatini oqo baleta na nodrau kila na yalo vakaoqo, e tarai cake ena dredre.

Vakararavi vua na Kalou

Kena ikava, vakararavi vua na Kalou. Ni da kerei Koya ena vakabauta ena yalodina, ena vakatakila mai na noda ilesilesi vakalou.⁹ Ni da sa kunea, ena vukei keda o Koya meda na cakava rawa na ilesilesi. “Ni sa tu e mata[na] na ka kecega” (V&V 38:2; raica talega Eparama 2:8), ena kena gauna donu, Ena dolava o Koya na katuva e veiganiti vei keda (raica na iVakatakila 3:8). A tala mai na Luvena, o Jisu Karisito, me rawa ni da vakararavi Vua ena kaukauwa e uasivia noda igu vakatamata (raica na Filipai 4:13; Alama 26:12).

Dua na tacida, a kauwai ki na vakatulewa ni matanitu, a vakauqeti me tu ena veidigidigi ni matanitu. Dina ga ni malumalumu na vunau vakapolitiki, a vakabauta ga ka soqona vata na ivurevure eso me tu. E muri, a sega ni qaqa ia a vakila ni sa solia vua na Turaga na veidusimaki kei na kaukauwa me laveta cake na veika bibi baleta na lewenivanua.

A lomataro voli e dua na tina, ka susugi ira tiko na gonelalai era tuvaki malumalumu, ena rawa beka me sotava na gagadre ni nona matavuvale. Dina ga ni dredre sara, e vakila na vakaukauwataki ni Turaga me cakava rawa na nona ilesilesi bibi.

A Domo ni Vakaro

Ena gauna vata oqori e vukei keda na Kalou meda cakava rawa noda ilesilesi vakalou, ka cakacaka o vunimeca me vakatao ka vagolei keda tani mai na bula e vakainaki.

Na ivalavala ca sa rairai veivakataotaki levu duadua, vakamocera na noda kidava na Yalo Tabu ka vakalatia noda rawata na kaukauwa vakayalo. Me vakayacori na cakacaka sa solia mai na Tamada Vakalomalagi, e dodonu meda saga na savasava (raica na 3 Nifai 8:1). Eda sa bula tiko beka ena sala me cakacaka kina na Kalou maivei keda.

Sa vakasaqara talega o Setani me vagolei keda tani ena ka cacawale. A vunauca na Turaga e dua na iliuliu ni Lotu taumada,“Raica sa gole vakalevu cake tiko na nomu vakanananu ki na veika ni vuravura mai na veika e baleti au … kei na ilesilesi ko sa kacivi kina” (V&V 30:2). Eda sa vakaogai keda tu beka ena veika ni vuravura ka da sa vagolei tani mai na noda ilesilesi vakalou?

Me ikuri, sa vakayalolailaitaki keda o Setani ena yalo lomaleqa. E cakava na noda cakacaka me dredre sara se veicavilaki. Ia, meda sa nuitaka ga na Kalou! E lomani keda. E vinakata meda rawa-ka. Ia “sa liutaki [keda]; ena tiko vata kei [keda], ko koya ena sega ni weletaki [keda]” (Vakarua 31:8; raica talega na Same 32:8; Vakaibalebale 3:5–6; Maciu 19:26; V&V 78:18).

Ena dau vakauqeti keda o Setani meda raica ni tawayaga na noda cakacaka mai na kena a soli vei ira eso. Sa ka bibi na ilesilesi yadua mai vua na Kalou, ka da na kune reki ni da “vakalagilagia ga na veika sa vakarota vei [keda] na Turaga” (Alama 29:9).

Ni cakacaka maivei keda na Kalou, ena temaki keda o vunimeca meda qoroi ena kena rawati. Ia, sa rawa meda yalomalumu vakataka na iVakabula ena noda sega ni vakacaucautaki ia meda vakalagilagia ga na Tamada (raica na Maciu 5:16; Mosese 4:2). Ni saga e dua na dauvola itukutuku me vakacaucautaki o Mother Teresa ena nona ilesilesi ni qaravi ira na dravudravua, a kaya kina: “E cakacaka ni [Kalou]. Au sa vaka e dua … na peni e Ligana. … E nona vakasama. E volavola o Koya. E sega ni dua na ka na peni. Ena vakatarai ga na peni me vakayagataki.”¹⁰

iTinitini

Taciqu kei na ganequ lomani, au sureti keda yadua meda “soli [keda] ga vua na Kalou … me caka kina na ka e dodonu” (Roma 6:13). Ni da soli keda eda sa tukuna tiko Vua ni da gadreva meda vakayagataki, vakasaqara Nona veidusimaki, ka rawata Nona kaukauwa.

Sa kena ivakarau, meda rai ga vei Jisu Karisito, na noda ivakaraitaki uasivi duadua. Ena bula taumada, a taroga na Tamada Vakalomalagi, “Ko cei meu tala?”

A sauma o Jisu, “Koi au oqo mo ni talai au” (Eparaama 3:27; raica talega na Aisea 6:8).

A ciqoma o Jisu Karisito, me sa vakarau, ka cakava na Nona ilesilesi sa tabaki oti tu me noda iVakabula ka Dauveivueti. A cakava na lewa nei Tamana (raica na Joni 5:30; 6:38; 3 Nifai 27:13) ka vakacavara na Nona ilesilesi vakalou.

Ni da muria na ivakaraitaki i Karisito ka kilai yaloda ni da soli keda vua na Kalou, au vakadinadinataka ni na vakayagataki keda talega me tosoi kina na Nona cakacaka ka vakalougatataki na tamata. Ena yacai Jisu Karisito, emeni.

iDusidusi

1. Raica na Refugee Processing Center, “Admissions and Arrivals,” ireports.wrapsnet.org/Interactive-Reporting.

2. Spencer W. Kimball, “The Role of Righteous Women,” Ensign, Nov. 1979, 102.

3. A vakayaloqaqataka o Peresitedi Gordon B. Hinckley: “Vakabauti iko vakai iko. Vakabauta na kemu ituvaki mo na cakava … na veika cecere. … O dua na luve ni Kalou, e tawamudu na nomu gugumatua” (Nodra iVakavuvuli na Peresitedi ni Lotu: Gordon B. Hinckley 2016], 77).

4. Russell M. Nelson, Accomplishing the Impossible: What God Does, What We Can Do (2015), 147.

5. A kaya o Peresitedi Dieter F. Uchtdorf:

   “E raica rawa na Tamada Vakalomalagi na ka eda rawa vakaidina ni yacova. E kila o Koya na veika e baleti keda ka da sega tu ni kila o ikeda vakaikeda. Ena noda gauna ni bula e vakauqeti keda o Koya meda vakayacora na inaki ni noda a buli. …

   “Ia meda sa nakinaki meda muria na iVakabula ka cakacaka vagumatua meda yacova meda vaka na tamata eda a buli meda vaka. Ka bibi duadua, mo ni vakarorogo ka talairawarawa ki na veivakauqeti ni Yalo Tabu. Ni da vakayacora vaka kina, ena vakaraitaka vei keda na Tamada Vakalomalagi na veika eda se bera tu ni kila me baleti keda. Ena vakacaudreva o Koya na sala e liu ka tadolava na matada meda raica na veitaledi eda sega tu ni kila se nanuma eda taukena” (“Me Baleta na Veivutuni kei na iNaki,” Liaona, Nove. 2012, 22, 23).

6. E vakamacalataka o Elder Bruce R. McConkie: “Era sa sega ni wili rawa na isolisoli vakayalo ka tawamudu na kena veimataqali. Na kena era volai tu ena vosa sa vakatakilai mai era sa ivakaraitaki ga ni sovaraki tawayalani mai ni loloma soliwale vakalou sa solia mai na Kalou dauloloma vei ira era lomana ka qaravi koya” (A New Witness for the Articles of Faith [1985], 371).

7. E vakamacalataka o Elder Marvin J. Ashton:

   “Tauri vakararaba, meu tukuna mada e vica na isolisoli e dau sega tu ni raici se kilai ia era sa ka bibi. Eso oqo e rairai nomu isolisoli—na isolisoli e sega tu ni raici ia era sa ka dina ka iyaulevu.

   “Meda taleva mada eso na isolisoli sega ni kilai vakalevu: na isolisoli ni kerekere; na isolisoli ni vakarorogo; na isolisoli ni rogoca rawa ka vakayagataka na domo lailai rogo vinaka; na isolisoli ni rawa ni tagi; na isolisoli ni sega ni via veileti; na isolisoli ni lomavata; na solisoli ni sega ni via vosa wale tikoga; na isolisoli ni vakasaqara na ka savasava; na isolisoli ni sega ni vakalelewa; na isolisoli ni rai vua na Kalou me dusimaki; na isolisoli me dua na tisaipeli; na isolisoli ni karoni ira na tamata; na isolisoli me rawa ni vakasama vakatitobu; na isolisoli me cabo masu; na isolisoli me cavuta na ivakadinadina; kei na isolisoli me ciqoma na Yalo Tabu” (“There Are Many Gifts,” Ensign, Nov. 1987, 20)

8. A vakasalataka talega o Paula, “[Na Kalou] sa vakacegui keitou ena neitou rarawa kecega, me keitou vakacegui ira rawa era sa rarawa ena dua na ka, ena veivakacegui keitou sa vakacegui kina mai vua na Kalou” (2 Korinica 1:4).

9. E vakamacalataka o Richard G. Scott: “Sa tiko na ituvatuva dina ni Kalou ki na nomu bula. Ena vakatakila mai vakatikina na ituvatuva o ya kivei iko ni ko vakasaqara ena vakabauta kei na talairawarawa vakaivakarau” (“How to Live Well amid Increasing Evil,” Liaona, Me 2004, 102).

10. Mother Theresa, ena Edward W. Desmond, “Interview with Mother Teresa: A Pencil in the Hand of God,” Time, Dec. 4, 1989, time.com.