2017
Era Veiqaravi na Parofita, kei na iApositolo e Vuravura Raraba
November 2017

Era Veiqaravi na Parofita, kei na iApositolo e Vuravura Raraba

Era sa kacivi na parofita kei na iapositolo mera “ivakadinadina digitaki ni yacai Karisito ki vuravura raraba” (V&V 107:23). Oqo eso na nodra itaviqaravi vakatekivu mai na koniferedi raraba ni Epereli.

A marautaka vakanomodi o Peresitedi Thomas S. Monson na nona yabaki 90 e Utah, AMERIKA, ena 21 ni Okosita. A tokaruataka na vosa vakanuinui vinaka taumada, o ya ni loloma vinaka duadua ena rawa me taura o ya mera vakasaqara na tamata “e dua sa sasaga bula tiko se tauvimate tiko se galili ka cakava e dua na ka vei ira.”

Mai Hamilton, e Niu Siladi, a vakatabuya o Peresitedi Henry B. Eyring na vale vakacakacaka ena Temple View, a itikotiko taumada ni Church College e Niu Siladi. Ni oti na Cagilaba o Irma, a sikovi Puerto Rico, Saint Thomas, kei ira na volodia ni Lotu era veivuke tiko ena kena samaki o Florida, AMERIKA.

A veisiko yani o Peresitedi Dieter F. Uchtdorf ki Texas, AMERIKA, ka raici ira na timi ni Yalododonu Edaidai mai Houston era cakacaka vata kei ira nodra neiba ni oti ga na Cagilaba o Harvey, ka kaya ni ivakarau ni “veivuke ena kena au rawata rawa” sa nodra ivakarau ni bula na Yalododonu Edaidai e vuravura taucoko.

A lolomataka o Peresitedi Russell M. Nelson ki na kovana mai Nebraska, AMERIKA, e dua na ivola ni tuva kawa, ka sikovi ira sara na iliuliu kei na daukaulotu mai New York, AMERIKA, ka kaya vei ira na gonevuli ni inisitute mai Utah ni iVola Tabu sa “sinai tu ena parofisai baleta … na Vakalesuimai.”

Ni sikovi ira oti na lewenilotu mai Japani kei Korea, a kaya kina o Elder Dallin H. Oaks, “Na Turaga sa dau nanumi ira na Luvena. E kila vinaka tu na nodra veisiga kei na leqa ka lomasoli yani ena Nona loloma.” Ena dua na Veivosaki e Matanavotu mai Korea, a sauma kina na nodra vakatataro na itabagone. A laki sotava kina na minisita e nona ilesilesi na 2020 Tokyo Olympics. Ena kerekere nei peresitedi mai Peru, a laki ciqoma o Elder Oaks na vakavinavinaka nei peresitedi ena vuku ni veivuke ni Lotu ki na ualuvu.

Mai Utah, a vakayaloqaqataki ira na itabagone qase cake o Elder Ballard mera rokova na Siga ni Vakacecegu ni “sa dua na gauna totoka ka lagilagi” ka mera vulica na ivakavuvuli bibi kei na vunau ni Lotu. A kaya vei ira na cakacaka e valetabu ni valetabu era sa tara ena gauna oqo era na vakayagataki talega ena Mileniumi. Ena veitokani kei Elder Ronald A. Rasband, a sikovi Texas me vakayaloqaqataki ira na volodia era samaka tiko na vakacaca ni cagilaba kei na ualuvu.

A ciqoma o Elder Robert D. Hales na iCocovi ni 2017 Pioneers of Progress President’s Award mai na dua na isoqosoqo ni itikotiko raraba e Utah. “Ni gadrevi na veivukei vakatamata yadua, veilaveti cake, ka veivaqaqacotaki vakai keda yadua sa ivakarau cecere sara, ni dua na painia,” a kaya.

Mai Rusia kei Ukraine, a vakavulica kina o Elder Jeffrey R. Holland ni bula oqo sa dodonu me tiko kina na vakatovolei, ia na kosipeli sa vakarautaka na rai, inuinui, kei na veivakayaloqaqataki. Ena iKarua ni Koniferedi e Windsor Baleta na Vakacacani ni Lotu mai Igiladi, a kaya ni vakabauta a vukea e vuqa mera cariba lesu mai na ituvaki ni isenivalu ka laki cau sara vei ira na tamata. Ni oti na koniferedi, a soli vakasala vei ira na lewe ni Lotu, peresitedi ni kaulotu, kei ira na daukaulotu mai Potukali kei Sipen.

A sikova o Elder David A. Bednar e tolu na matanitu ena Ra Kei Aferika a sega mada ni sikova e dua na iApositolo: Senegal, a cabora kina na masu ni veivakatabui; Guinea; kei Mali. A sota talega kei ira na lewenilotu mai Nigeria kei Ghana. Ena dua na lotu e vuravura raraba e caka tiko mai North Carolina, AMERIKA, a vakayaloqaqataki ira na itabagone qase mera sa “dua na isema kaukamea” ena sinucodo tawamudu ni matavuvale.

A sotavi ira na lewenilotu kei na daukaulotu o Elder Quentin L. Cook mai Taiwan, Hong Kong, India, kei Thailand, ka raica “ni o ira na lewenilotu era sa maqusataka tiko na Lotu, vakatabakidua e valetabu kei na cakacaka ni kaulotu.” Mai New Jersey, AMERIKA, a vosa ena Semina ni Seymour Institute baleta na Galala Vakalotu. “E dodonu meda tomana tiko noda sasaga ki liu kei na ka bibi me vakalevutaki kina na bula savasava ka taqomaki na matavuvale,” a kaya. Mai California, AMERIKA, a vakayaloqaqataki ira na lewe ni isoqosoqo vakalawa mera tudei tiko ena vakabauta ka me raurau na nodra bula ka taqomaka na galala vakalotu.

Mai Ecuador kei Colombia, a vakavulica kina o Elder D. Todd Christofferson ni vakabauta na Tucaketale i Karisito ena veivakacegui ka tokoni keda. Mai India, a ciqoma na World Peace Prize ena vuku ni Lotu ka solia yani na ilavelave ni iVola i Momani vaka-Nepali vei peresitedi kei ivukevukei ni peresitedi kei Nepal vakakina ki na Tabana mai Kathmandu.

Ni bera ni yaco na cagilaba kei na ualuvu, a veisiko yani o Elder Neil L. Andersen ki Puerto Rico, Haiti, kei na Dominican Republic, ka laki vosa baleta na bula rawati koya, vuli, ka vakavakarau me ciqomi na veivakalougatataki ni valetabu. Ena LDS Family Education Night e Arizona State University mai Arizona, AMERIKA, a vakayaloqaqataki ira na Yalododonu Edaidai mera “dolava na noda katuba, ka rokova na nodra vakabauta na tamata, [ka] vulica na ka e baleti ira.” A tauyavutaka o Elder Andersen nai ka 100 ni iteki e Filipaini ka vakatabuya na vale vakalevutaki ni vuli kaulotu mai Manila.

Mai Sauca Aferika kei na Democratic Republic o Congo, a raica o Elder Ronald A. Rasband ni veiqaravi ni tolu na valetabu mai Aferika ka lima tale sa tara tiko se sa vakaraitaki, “sa vakarautaki ira tiko na lewe i Aferika na Turaga mera ciqoma na taucoko ni Nona veivakalougatataki.”

A veisiko o Elder Gary E. Stevenson ki Vanuatu, Ositerelia, Niu Siladi, French Polynesia, kei Brigham Young Univesiti–Hawaii e Hawaii, AMERIKA. “Ni da … raica na noda ibolebole ena irairai ni kosipeli, eda na kune isaunitaro e kauta mai na marau kei na reki,” a kaya. A sotavi peresitedi kei parai minisita kei Vanuatu kei ajibisopi e Papeete, Tahiti.

A sikova o Elder Dale G. Renlund e lima na matanitu ena June: Guatemala, Costa Rica, El Salvador, Nicaragua, kei Honduras, ka tauyavutaka na imatai ni iteki vaka-Q’eqchi’ mai Guatemala ka laki vakaitavi ena dua na koniferedi ni galala vakalotu kei na dua na koniferedi ni itabagone. Ena Okosita, a vakaitavi o koya kei watina, o Sister Ruth L. Renlund, ena imatai ni Veivosaki e Matanavotu e caka tiko mai Accra, Ghana, kei na Sepiteba a vakayaloqaqataki ira na gonevuli mai Brigham Young Univesiti–Idaho mai Idaho, AMERIKA, mera ravi ga ki na vunau i Karisito.