Na Domo ni Turaga
Mai vei Elder Neil L. Andersen
Ena Kuoramu ni iApositolo Le Tinikarua
Au vakadinadinataka ni koniferedi oqo, sa rogoci kina na domo ni Turaga. Na veivakatovolei vei keda ena vakaevei na kena bulataki.
iMatai, me dua mada na vosa vinaka vei ira na lalai. Io, oqo na iotioti ni soqoni, kau na otioti talega ni vosa.
Wale tiko ga qo, ena noqu veisiko voli ena Valetabu e Provo City Center, au a laki qoroya tu mai vakayawa e dua na droinika kena ulutaga na Matai ni Raivotu, Mai Vakayawa. Na droini e vakaraitaka tiko na rarama kei na kaukauwa mai lomalagi ni a rairai mai na Tamana kei na Luvena vei Josefa Simici.
Niu sega ni vakatauvatana na gauna tabu a tadu mai kina na Vakalesuimai, au rawa ni raitayaloyalotaka e dua na raivotu vakaoqo e vakaraitaka mai na rarama kei na kaukauwa vakayalo ni Kalou e sirova mai na koniferedi raraba oqo, ka yaco, na kaukauwa kei na rarama o ya me curumi vuravura.
Au solia na noqu ivakadinadinataka vei kemuni ni o Jisu na Karisito, ni liutaka tiko na cakacaka tabu oqo, kei na koniferedi raraba e dua na gauana dredre ka solia kina na nona ivakasala vana lotu ki vei keda yadudua talega.
Veivakavulici mai cake
Na siga a tauyavu kina na Lotu, a lesi Josefa Simici na Turaga me parofita, daurairai, ka iapositolo ni Turaga o Jisu Karisito1 ka kaya ki na Lotu:
“Ia mo dou vakabauta ka muria na ka sa tukuna, me vaka ga au sa tukuna vei kemudou.
“Ni kena vakayacori na veika oqo, ena sega kina ni rawai kemudou na matamata mai eli; … ia na Turaga na Kalou ena vakatalabusesetaka na kaukauwa ni butobuto e matamudou, ka na vakavuna me yavavala ko lomalagi ena vukumudou.”2
E muri, o ira kece na Mataveiliutaki Taumada kei na Kuoramu ni iApositolo Le Tinikarua era tokoni ka tabaki me ra parofita, daurairai, ka dauvakatakila.3
Ia oqo, ni da sa soqoni vata ena ruku ni mai vei Peresitedi Thomas S. Monson,eda namaka ni mai rogoca, “sa loma ni Turaga, … sa nanuma ni Turaga, … sa domo ni Turaga, ka sa kaukauwa ni Kalou me ia kina na veivakabulai.”4 Eda nuitaka na Nona yalayala: “se mai na domoqu ga se mai na domodra na noqu tamata, e sa tautauvata ga.”5
Ena osooso kei na veilecayaki ni noda vuravura nikua, ni da nuitaka na nodra vosa na Mataveiliutaki Taumada kei na Kuoramu ni Le Tinikarua sa ka bibi ki na noda tubu vakayalo kei na gugumatua.6
Eda sa mai soqoni ena koniferedi totoka oqo. E milioni na Yalododonu Edaidai kei na matalotu tale eso ena 200 na matanitu, ka sivia na 93 na vosa, era tiko ena veisoqoni oqo se wilika na itukutuku ni koniferedi.
Eda sa masu tiko mai ka vakavakarau. E vuqa vei keda, sa tu na nodra lomaleqa kei na lomatarotaro dina. Eda vinakatao me vakavoui na noda vakabauta na iVakabula, o Jisu Karisito, ka vaqaqacotaka noda rawa ni vorata na veitemaki ka sega ni vakataotaki. Eda gole mai meda vakavulici mai cake.
Na vakasama kei na loma ni Turaga.
Vei ira na Mataveiliutaki Taumada kei na leTinikarua, ka ra dau vosa ena vei koniferedi yadua, na kena vakaitamera na itavi ni vakarautaki ni nodra itukutuku e dua nai colacola tawacegu kei na veivakabauti tabu.
Vica na yabaki sa oti, ni bera ni mai Vakaitutu Raraba, au a tarogi Elder Dallin H. Oaks ke a duidui na vosa a vakarautaka ki na koniferedi ni iteki yadua. A kaya ni a sega ni cakava ia a kuria, “Ia e duidui na noqu vosa ni koniferedi raraba. Au dau vola e 12 ki na 15 na kena yavu me vakadeitaka mai na Turaga na ka meu kaya.”7
E yaco mai gauna cava se vakacava na veivakauqeti ni dua na vosa ni koniferedi raraba?
Ena sega ni dua na ulutaga ka lesi, eda raica na totoka kei lomalagi ka veivakarautaki na ulutaga kei na ikau ni ka dina tawamudu yadua ni koniferedi.
Dua vei ira na taciqu a kaya vei au ni nona ulutaga ni koniferedi oqo a soli vua ni oti ga nona vosa ena Epereli sa oti. E dua tale a kaya ni tolu na macawa sa oti, ni a se masulaka ka waraka tiko ga na Turaga. Ni a tarogi na balavu ni gauna me vakarautaka kina e dua na vosa bibi, e dua na veitacini a kaya mai, “Ruasagavulu ka lima na yabaki.”
Eso na gauna e dau totolo mai na kena so na vakasama, ia na lewena kei na kena matailalai e gadrevi kina na igu vakayalo vakaitamera. Na lolo kei na masu, vuli kei na vakabauta, sa tiki tudei ni kena cakacaka. E sega ni vinakata na Turaga na veidabuitaki na ivakuritaki ni nona vosa vei ira na Yalododonu.
Na veidusimaki ni dua na vosa ni koniferedi raraba. E dau yaco mai ena bogi se mataka lailai, ni yawa sara na kena vakasamataki na ulutaga ni vosa. Vakasauri ga, na vosa kei na malanivosa era sa ivakatakila dina.8
Ni ko vakarorogo, na itukutuku o ciqoma e rawa me ka dodonu se sa vakarautaki tu me nomu.
Au a vosa ena vuqa na yabaki sa oti ena koniferedi raraba, kau a kaya e dua na malanivosa a curuma na noqu vakasama niu sa vakarau tiko meu sa laki kaulotu.Na malanivosa o ya ni “O sega ni kila na ka kecega, ia sa rauta na nomu kila!”9 E dua na goneyalewa a dabe tiko ena koniferedi raraba o ya a kaya vei au ni sa masulaka tiko nona sa mai duguci me vakamau, ka vakasamataka tiko mena kila vinaka na cauravou oqo. Niu cavuta na vosa, “O sega ni kila na ka kecega, ia sa rauta na nomu kila,” a vakadeitaka vua na Yalotabu ni sa sa kilai koya vinaka na cauravou o ya. Sa mai yabaki vuqa nodrau marautaka tiko na nodrau vakamau.
Au yalataka ni ko vakarautaka na yalomu, ka kakavaka tiko mai mo rogoca na domo ni Turaga, ena yaco mai ki na nomu vakasama kei na lomamu na veika e vakarautaki tu me nomu ga. O sa vakila oti tiko ena koniferedi oqo, se ko na vakila, ni ko vulica na itukutuku ena veimacawa ka tu mai.
E na Gauna Oqo kei na Veigauna Muri Mai
E a kaya vakaoqo o Peresitedi Monson:
“Taura na gauna mo dau wilika na itukutuku ni koniferedi.”10
“Vakasamataki [ira]. … Au sa raica … niu sa kune vinaka cake mai na vunau veivakauqeti oqo niu vulica vakatitobu cake sara.”11
Na vakavuvuli ni koniferedi raraba era sa vakasama donu e na solia vei keda na Turaga ena veivula ka tu mai liu.
Na ivakatawa “sa liutaki ira [na nona sipi], a sa muri koya ko ira na sipi: ni ra sa kila na domona.”12
Sa dau, dusimaki keda na domona me veisautaka na veika ena noda bula.Sa sureti keda meda veivutuni. E sureti keda meda muri Koya.
Vakasamataka mada na itukutuku mai na koniferedi oqo:
Peresitedi Eyring: “Au wasea na noqu ivakadinadina ni bula tiko na Kalou na Tamada ka vinakati iko mo lako yani Vua ki vale. Oqo na Lotu dina ni Turaga o Jisu Karisito. E kilai iko o Koya, e lomani iko o Koya, ka dau wanonovi iko voli o Koya.”13
Peresitedi Uchtdorf: “Au vakadinadinataka ni da lakova na ilakolako se tomana tiko na ilakolako totoka ka toro voleka yani kivua na noda Kalou ena veisiga, ena vinaka cake na noda bula … ka na vakayagataki keda na Turaga ena sala mareqeti eso meda vakalougatataki ira na tanika vakayacora na Nona inaki tawamudu.”14
Peresitedi Nelson: “Au yalataka ni ko dromuci iko ena iVola i Momani, o na taqomaki mai na veika butobuto nikua, oka kina na mate veivakarusai ni iyaloyalo vakasisila kei na veivakatotoganitaki ni vakamoceri ni vakasama.”15
Elder Oaks: “Au vakadinadinataka ni ivakaro raraba ni matavuvale sa itukutuku ni dina tawamudu, ka sa loma ni Turaga vei ira na Luvena era vakasaqara na bula tawamudu.”16
Elder Ballard: “E dodonu meda karoni ira na luve ni Kalou ena yalololoma ka tagutuva na duidui, oka kina na veivakawai, tagane se yalewa, kei na vakavanua.17
Baleta ni vo tale tiko e vica na miniti, au via vakuria e dua na iyaloyalo lekaleka me baleti Elder Robert D. Hales. Na Mataveiliutaki Taumada a kaya vei Elder Hales ni rawa ni solia e dua na itukutuku lekaleka ena soqoni ena mataka ni Sigatabu ia kevaka e vakatarai koya na nona bula. Ia ni sega ni vakatarai koya na nona bula, ea vakarautaka o koya e dua na itukutuku, ea vakacavara ena macawa sa oti ka wasea vei au. Solia toka e via rauta ni tolu na auwa ena nona sa mai takali, au na wasea tolu ga na qaqa ni nona vosa.
Cavuta na vosa nei Elder Hales: “Ni da digitaka me da vakabauta, eda sa tuvakarau me da tu ena iserau ni Kalou. … Elder Hales: “Ni sa vakoti mate oti na iVakabula, a rairai vei ira eso era a ‘yalodina tiko ena nodra ivakadinadina baleti [Koya] ni ra bula tiko e vuravura.’ [V&V 138:12.] O ira ‘era cata na nodra ivakadinadina … na … parofita era [sega ni rawa] me ra raica na iserau [ni iVakabula].’ [V&V 138:21.] … Sa vakarautaki keda na noda vakabauta meda tiko ena iserau ni Turaga.”
Na yalo vinaka ni Turaga me vakauqeti Peresitedi Russell M. Nelson ena tini ni soqoni ena mataka ka me biubiu, calata na vakasigalevu, ka gole totolo yani ena yasani nona loga o Elder Hales, ka rawa ni yaco yani na peresitedi koramu, kei na nona agilosi o Mary Hales ena nona sa lai taurivola mai na bula vakayago ka gole yani o Elder Hales.
Kena saumi na na domo ni Turaga
Au vakadinadinataka ni da sa mai rogoca domo ni Turaga ena koniferedi qo.
Me da kua ni kidacala ena gauna e vosataka kina o ira na tamata ni kalou na vakasama vakavuravura, kei na so na gauna na noda vakasama. Esa dau vakatuga oqo. Keitou sa dau tekiduru vaka-Veitacini ena valetabu. Au vakadinata na vinaka ni yalodra. Sa nodra gagadre mera vakamarautaka na Turaga ka vukei ira na luveni kalou mera lesu tale kina nona iserau.
Na Vitusagavulu, na Matabisopi, na iSoqosoqo ni Veivukei, Goneyalewa, Lalai, kei na iliuliu ni mataisoqosoqo eso era sa ikuri ni veivakauqeti ena koniferedi oqo, vakakina na totoka ni vakatagi kei na masu.
E dua tiko na kato iyau ni veidusimaki vakalomalagi e waraka tu mo kunea ena veitukutuku ni koniferedi raraba. Na veivakatovolei vei keda ena vakaevei na kena bulataki na ka eda rogoca se vakila.
Meu wasea e dua na ka au sotava me baleta na noda rogoca na vosa ni parofita mai na bula nei Peresitedi Russell M. Nelson:
Ena 1979, ni vo e lima na yabaki me kacivi ki na Vakaitutu Raraba, a tiko ena dua na soqoni o Brother Nelson ni vakarau na koniferedi raraba. A “bolei ira kece na tiko o Peresitedi Spencer W. Kimball mera guvaka nodra kauta na kosipeli ki vuravura taucoko. Dua na matanitu a vakaraitaka vakadodonu o Peresitedi Kimball o ya o Jaina, ka kaya ‘Meda na laki qaravi ira yani na lewei Jaina. Meda na vulica na nodra vosa. E dodonu meda masulaki ira ka vukei ira.’”18
Ni sa yabaki 54, e vakila o Brother Nelson ena soqoni o ya ni dodonu me vulica na vosa vaka-Madarini. Dina ni osososo tu vakavuniwai, a rawata sara me dua me mai vakavulici koya.
Ni sa tekivu vakalailai na nona vuli, a tiko o Dr. Nelson ena dua na soqo e sega ni namaka nona a laki dabe tikiva e dua na “vuniwai ni veisele rogolevu mai Jaina, o Dr. Wu Yingkai. … Baleta ga ni sa vulica tiko o [Brother Nelson] na vosa vaka-Madarini, a tekivuna [e dua] na veivosaki kei [Dr. Wu].”19
Na gagadre nei Dr. Nelson me muria na parofita sa laki sikovi Salt Lake City kina o Dr. Wu ka gole o Dr. Nelson ki Jaina me laki veivakavulici ka veisele.
E torocake na nona lomani ira na lewei Jaina, ka torocake na nodra lomana ka dokai koya.
Ena Feperueri 1985, ni oti e tini na vula nona kacivi ki na Kuoramu ni Le Tinikarua, a taura o Elder Nelson e dua na qiri mai Jaina, ka kerei tiko kina o Dr. Nelson me gole i Jaina me laki veisele vua e dua na daulagasere rogolevu e Jaina. Ena veivakauqeti nei Peresitedi Hinckley, a lesu tale i Jaina o Elder Nelson.Na iotioti duadua ni nona veisele a vakayacora mai na Matanitu o Jaina.
Ena rua ga na yabaki sa oti, ena Okotova ni 2015, a dolei tale o Peresitedi Russell M. Nelson ena ivakaro vakamatanitu, me sa “iTokani Makawa kei Jaina.”
Ia ena yakavi e na noa, eda a rogoca mai vei Peresitedi Russell M. Nelson ka sa yabaki 93 ni sa kerea tiko oPeresitedi Thomas S. Monson “meda [ena koniferedi ni Epereli] dui vulica ena masumasu na iVola i Momani ena veisiga.”
Me vaka ga nona a osooso tu ena veisele, ena nona sauma e dua na qasenivuli ni Madarini, a muria vakakina o Peresitedi Nelson na ivakasala nei Peresitedi Monson ka sa bulataka sara. Sega walega ni wiliwili, a kaya “a vola na veika e baleta na iVola i Momani ni, na ka e vakadeitaka, na ka e cata, na ka e vakavotukanataka, na ka e vakamatatataki, kei na ka e vakatakilai.”20
E lasa, me vaka na ikarua ni ivakadinadina, Peresitedi Henry B. Eyring a vosa talega na mataka qo ena nona rogoca na ivakasala nei Peresitedi Monson. O ni nanuma na vosa oqo? Me vaka e vuqa vei kemuni, au rogoca na vosa ni parofita me domo ni Turaga vei au. Vakakina, me vaka talega e vuqa vei kemuni, au sa vakatulewataka meu muria na veimalanivosa oya.”21
Meda raica oqo me ivakaraitaki ena noda bula.
Na Yalayala kei na kalougata
Ia au yalataka ni ko rogoca na domona na Turaga vei iko ena veivakavulici ena koniferedi raraba oqo, ka cakava na veivakauqeti oqori, o na vakila na liga i lomalagi, ka na vakalougatataki na nomu bula kei na nodra bula era tiko voliti iko.22
Ena koniferedi qo, eda vakasamataka noda parofita lomani. Keimami lomani kemuni, Peresitedi Monson. Meu tinia ena veivakalougatataki a kaya o Peresitedi Monson ena itutu oqo. Au vakabauta ni sa dua na veivakalougatataki e via solia vei keda yadua nikua, kevaka e tiko rawa vata kei keda o koya. A kaya “Ni da biuta yani na koniferedi oqo, au sa vakatikora na veivakalougatataki mai lomalagi me nomuni yadua. … Sa noqu masu mena vakalougatataki kemuni kei na matavuvale na Tamada Vakalomalagi. Me vakaraitaki ena veika kece eda cakava na itukutuku kei na yalo ni koniferedi oqo—ena noda veivale, ena cakacaka, ena bose ka, kei na veiitavi se ogaoga eda vakaitavitaki keda kina.”
A tinia: “Au lomani kemuni. Au masulaki kemuni. Me vakalougatataki kemuni na Kalou. Me tiko kei kemuni na Nona vakacegu yalataki nikua kei na veigauna.”23
Ena yacai Jisu Karisito, emeni.