សំឡេងពួកបរិសុទ្ធថ្ងៃចុងក្រោយ
តើជាកញ្ចប់បុណ្យគ្រីស្ទម៉ាស់សម្រាប់ខ្ញុំមែនទេ ?
រចនារូបភាពដោយ ខារ៉ូលីន វីបប៊ើត
ខ្ញុំធ្លាប់បម្រើនៅក្នុងបេសកកម្មសាក្រាម៉ង់តូ កាលីហ្វ័រញ៉ាអំឡុងបុណ្យគ្រីស្ទម៉ាស់នាឆ្នាំ២០០៣ ។ ដៃគូរបស់ខ្ញុំ និងពួកអ្នកផ្សព្វផ្សាយសាសនាជាស៊ិស្ទើរពីរនាក់ផ្សេងទៀតដែលនៅរស់នៅក្នុងផ្ទះជាមួយគ្នាបានចាប់ផ្ដើមទទួលអំណោយ និងសំបុត្រមកពីសាច់ញាតិ និងមិត្តភក្ដិរបស់ពួកគេ ។ ខ្ញុំបានដឹងថា រឿងនោះពុំកើតឡើងចំពោះខ្ញុំឡើយ ។
គ្រួសាររបស់ខ្ញុំនៅប្រទេសអាហ្សង់ទីនមានធនធានស្ដួចស្ដើង ហើយជាធម្មតាសំបុត្ររបស់ពួកគេត្រូវបានពន្យារពេលពីរទៅបីខែ ។ ខ្ញុំនៅឆ្ងាយពីគ្រួសាររបស់ខ្ញុំ ប៉ុន្តែមានចិត្តរីករាយដើម្បីចំណាយពេលក្នុងបុណ្យគ្រីស្ទម៉ាស់នៅក្នុងកិច្ចការបម្រើរបស់ព្រះយេស៊ូវគ្រីស្ទ ។
នៅថ្ងៃឆ្លងបុណ្យគ្រីស្ទម៉ាស់ យើងបានត្រៀមខ្លួនចូលដេក មានស៊ិស្ទើរម្នាក់បានប្រាប់ខ្ញុំថា មានមនុស្សម្នាក់បានទុកកញ្ចប់មួយចំនួននៅមាត់ទ្វារដោយមានឈ្មោះរបស់ខ្ញុំនៅលើកញ្ចប់ទាំងនោះដែរ ។
« សម្រាប់ខ្ញុំមែនឬ ? វាមិនពិតឡើយ ! ខ្ញុំពោលទាំងភ្ញាក់ផ្អើល ។
មានប្រអប់ធំពីរដាក់ឈ្មោះរបស់ខ្ញុំនៅលើនោះ ប៉ុន្តែគ្មានអាស័យដ្ឋានអ្នកផ្ញើឡើយ ។ ខ្ញុំមានចិត្តរំភើប ហើយស៊ិស្ទើរផ្សេងទៀតក៏មានចិត្តរំភើបជំនួសខ្ញុំដែរ ។ ខ្ញុំបានបើកកញ្ចប់ទាំងនោះដែលមានសុទ្ធតែអំណោយ ស្ករគ្រាប់ គំនូរជាច្រើនពីកុមារ និងសម្ភារផ្សេងទៀត ! ខ្ញុំពុំអាចទប់ទឹកភ្នែកបានទេ ។
« តើនរណាទៅបានផ្ញើកញ្ចប់ទាំងនេះមកឲ្យខ្ញុំ ? » ខ្ញុំមានការងឿងឆ្ងល់ ។ យើងទាំងអស់គ្នា គ្មាននរណាម្នាក់ដឹងឡើយ ប៉ុន្តែយើងទាំងអស់មានចិត្តរីករាយ ដោយសារតែសេចក្ដីសប្បុរសនោះ ។
ក្រោយពីបុណ្យគ្រីស្ទម៉ាស់បីបួនថ្ងៃមក ខ្ញុំនៅតែចង់ដឹងថា នរណាទៅដែលបានផ្ញើកញ្ចប់ទាំងនោះមក ។ ដូច្នេះខ្ញុំបានទូរសព្ទទៅការិយាល័យបេសកកម្ម ហើយសាកសួរលេខា ប្រសិនបើគាត់អាចប្រាប់ខ្ញុំពីឈ្មោះអ្នកផ្ញើដ៏អាថ៌កំបាំងនោះ ។ គាត់បានប្រាប់ខ្ញុំថា សមាជិកនៅក្នុងវួដមួយដែលមិនចង់ឲ្យគេស្គាល់ឈ្មោះបានសម្រេចចិត្តផ្ញើកញ្ចប់មកឲ្យខ្ញុំសម្រាប់ជាអំណោយក្នុងបុណ្យគ្រីស្ទម៉ាស់ ។ ខ្ញុំតែងអរគុណជានិច្ចចំពោះសេចក្ដីសប្បុរសរបស់សមាជិកវួដនោះ ដែលបាននាំមកនូវសេចក្ដីស្រឡាញ់ជាខ្លាំងនៅថ្ងៃឆ្លងបុណ្យគ្រីស្ទម៉ាស់នោះ និងចំពោះការគាំទ្រដែលខ្ញុំបានទទួលអំឡុងបេសកកម្មរបស់ខ្ញុំ ។
ខ្ញុំបានរៀនថា សមាជិកសាសនាចក្រគ្រប់រូបអាចធ្វើឲ្យពួកអ្នកផ្សព្វផ្សាយសាសនា — ទោះជានៅឆ្ងាយពីផ្ទះក្ដី — ឲ្យមានអារម្មណ៍ដូចជាបាននៅផ្ទះតាមរយៈការលើកទឹកចិត្ត និងការបម្រើរបស់ពួកគេ ។ វាគឺជាបុណ្យគ្រីស្ទម៉ាស់មួយដ៏ល្អបំផុតក្នុងជីវិតរបស់ខ្ញុំ ។ ខ្ញុំធ្លាប់បម្រើព្រះអង្គសង្គ្រោះ ហើយបានទទួលអារម្មណ៍នូវសេចក្ដីស្រឡាញ់របស់ទ្រង់តាមរយៈសមាជិកក្នុងសាសនាចក្ររបស់ទ្រង់ ។