សំឡេងពួកបរិសុទ្ធថ្ងៃចុងក្រោយ
បុណ្យគ្រីស្ទម៉ាស់តាមរយៈកែវភ្នែករបស់កូនស្រីខ្ញុំ
រចនារូបភាពដោយ អេលែន ហ្គានស៍
មានភាពស្ងប់ស្ងាត់មួយបានកើតមានចំពោះគ្រួសាររបស់ខ្ញុំ និងរូបខ្ញុំ ពេលយើងបានដើរចូលទៅក្នុងក្រោលសេះមួយដើម្បីមើលការសម្ដែងអំពីប្រសូតកម្ម ។ មានសត្វពាហនៈដាក់តម្រៀបជួរគ្នានៅក្នុងបន្ទប់នីមួយៗ ហើយមានបុរស និងស្ត្រីម្នាក់ដែលបានស្លៀកពាក់ជាយ៉ូសែប និងម៉ារា បានឈរដោយមានទារកម្នាក់ត្រូវបានរុំនឹងសំពត់នៅក្នុងដៃរបស់ស្ត្រីនោះ ។ ពួកគាត់ស្ងៀមស្ងាត់ ហើយផ្ដោតភ្នែកទៅលើទារកតូចនោះ ។ បរិយាកាសទាំងមូលមានភាពសុខសាន្តខ្លាំងណាស់ ។
កូនធំៗរបស់ខ្ញុំ ភរិយារបស់ខ្ញុំ និងខ្ញុំបានឈរ ខណៈដែលកូនស្រីពៅរបស់ខ្ញុំបានអង្គុយនៅលើគំនរចំបើងនៅពីមុខយើង ។ នាងនៅស្ងៀម ហើយកែវភ្នែករបស់នាងបានផ្ដោតលើទារកនោះ ។ ពេលដែលសមាជិកគ្រួសាររបស់ខ្ញុំបានត្រៀមខ្លួនចេញពីក្រោលសេះនោះ ខ្ញុំបានដាក់ដៃលើស្មារបស់កូនស្រីខ្ញុំ ហើយខ្សឹបប្រាប់នាងថា ដល់ពេលយើងត្រូវទៅហើយ ។ នាងបានពោលថា នាងចង់នៅជាមួយនឹងព្រះឱរសយេស៊ូវ ។ ពាក្យសម្ដីរបស់នាងបានប៉ះពាល់ដល់ដួងចិត្តរបស់ខ្ញុំ ហើយខ្ញុំបានសម្រេចចិត្តនៅជាមួយនឹងនាង ។
ពីរបីនាទីក្រោយមក ខ្ញុំបានចាប់ដៃកូនស្រីរបស់ខ្ញុំថ្មមៗ ហើយប្រាប់នាងថា យើងត្រូវតែទៅផ្ទះហើយ ។ នាងបានពោលថា នាងពុំចង់ទៅទេ ។ ខ្ញុំបានលុតជង្គង់ចុះ ហើយឱបនាង ។
មិនយូរប៉ុន្មាន ខ្ញុំមានអារម្មណ៍ហាក់ដូចជាខ្ញុំបានត្រឡប់ទៅសម័យនោះ ហើយបាននៅជាមួយនឹងម៉ារា និងយ៉ូសែប ។ បន្ទាប់មក ខ្ញុំបានយល់ពីហេតុផលដែលកូនស្រីរបស់ខ្ញុំចង់នៅបន្ត ។ ខ្ញុំបានទទួលអារម្មណ៍ថា ព្រះវិញ្ញាណបានគ្រប់ដណ្ដប់មកលើខ្ញុំ ។ នៅកន្លែងនោះ ខ្ញុំមានអារម្មណ៍ថា ខ្ញុំបានស្ថិតនៅក្នុងវត្តមានរបស់ព្រះអង្គសង្គ្រោះ ។ ទឹកភ្នែកបានហូរស្រក់ចុះមក ពេលខ្ញុំបានទទួលអារម្មណ៍ពីសេចក្ដីស្រឡាញ់របស់ទ្រង់ ។ លុះដល់ពេលដែលត្រូវចាកចេញ ខ្ញុំបានលើកបីកូនស្រីតូចរបស់ខ្ញុំ ។ ពេលខ្ញុំបែរខ្លួនងាកទៅរកច្រកចេញ ខ្ញុំបានឮនាងនិយាយលាព្រះឱរសយេស៊ូវ និងពីទំហំនៃសេចក្ដីស្រឡាញ់ដែលនាងមានចំពោះទ្រង់ ។
នៅល្ងាចនោះ ខ្ញុំបានចែកចាយបទពិសោធន៍មួយជាមួយនឹងកូនស្រីរបស់ខ្ញុំ ដែលខ្ញុំនឹងរក្សាទុកពេញមួយជីវិត ហើយខ្ញុំស្ទើរតែភ្លេចពីវា ។ នៅយប់នោះ ខ្ញុំបានទទួលនូវអំណោយមួយ ។ ខ្ញុំបានទទួលអារម្មណ៍នៅកាន់តែជិតនឹងព្រះ ហើយបានទទួលសេចក្ដីស្រឡាញ់របស់ទ្រង់ចំពោះខ្ញុំ ។ ខ្ញុំមានអំណរគុណចំពោះព្រះអង្គសង្គ្រោះ និងឱកាសដើម្បីចងចាំដល់ការប្រសូតរបស់ទ្រង់ ។ ខ្ញុំដឹងថា ព្រះជន្ម គំរូ និងដង្វាយធួនរបស់ព្រះអង្គសង្គ្រោះបង្កើតនូវអំណោយដ៏អស្ចារ្យមួយនៃសេចក្ដីស្រឡាញ់ដែលគ្មានទីបញ្ចប់មកពីព្រះទៅដល់កូនចៅរបស់ទ្រង់គ្រប់រូប ។ ខ្ញុំនឹងស្រឡាញ់អំណោយនេះជានិច្ចឲ្យអស់ពីជម្រៅដួងចិត្តរបស់ខ្ញុំ ។