Kweilo̧k ko ilo Jabōt-Emān

Ilo Jabōt emān in kajjojo allōn̄, doulul ko an elder ro im Doulul ko an Kōrā ro rej ekōnono kōn juon unin kōnono kar kālete jān Būreejtōnji eo Kein Kajuon im Doulul eo an Jon̄oulruo Rijilōk ro. Unin kōnono eo an Jabōt-emān naaj bar kōkāālet ālkin aolepān kweilo̧k eo eļap. Jān kiiō m̧ae kweilo̧k eo eļap tok juon, unin kōnono eo enaaj “Jerbal in Karejar n̄an ro Jet.” Kajjojo allōn̄, ritōl ro ak rūkaki ro remaron̄ kālet n̄an tōl ekōnono ko ilo jabdewōt iaan pedped kein reiookļo̧k jerbal in karejar.

N̄an lōn̄ļo̧k in kein jipan̄ ko n̄an rie ekōnono ko kōn jerbal in karejar, lale ministering.lds.org im “Pedped ko an Jerbal in Karejar” ennaan ko ilo bok ko ilju im jekļaj an Liaona eo.

Ta meļeļe in n̄an karejar?

Ta meļeļe in jerbal in karejar n̄an membōr ro ilo ward ak branch eo am̧? N̄an jeļā, komaron̄ je Jerbal In Karejar ioon boot eo innām karuwaineneik membōr ro n̄an je naan ko ipeļaakin me rej koba ippān jerbal in karejar. Membōr ro remaron̄ pukōt naan ko ak eoon ko n̄an kobaikļo̧k n̄an laajrak eo jān jeje ko rekwojarjar āinwōt kein: Matu 25:34–40; Luk 10:25–37; 2 Nipai 25:26; Mosaia 18:8–9; 3 Nipaii 18:25; im Kaktak im Bujen ko 81:5. Ta eo jej katak jān eoon kein kōn jerbal in karejar? Komaron̄ kajjitōk ippān membōr ro n̄an kwaļo̧k waanjon̄ak ko kōn jerbal in karejar em̧ōj aer loi. Ewi wāween an jerbal in karejar eo ad maron̄ jipan̄ tōpar aikuj ko ilo jetōb im kanniōk an armej ro? Ewi wāween an maron̄ jipan̄ armej ro itok epaakeļo̧k Kraist?

Rilo̧mo̧o̧r eo ej waanjon̄ak eo ad eweppān kōn jerbal in karejar.

N̄an katak kōn ekōjkan kwaļo̧k ewejepedik, ro uwaan remaron̄ kwaļo̧k bwebwnato ko jān jeje ko rekwojarjar me Rilo̧mo̧or eo eaar kwaļo̧k n̄an ro jet—jet waanjon̄ak ko maron̄ loi ilo Jon 4–6 im Mark 2:1–12. Membōr ro remaron̄ kwaļo̧k ta eo ej kailbōk er kōn bwebwenato kein im ta pedped ko rej katak kōn jerbal in karejar. N̄an waanjon̄ak, ekōjkan an Rilo̧mo̧o̧r eo kar karōk jerbal in jipan̄ eo An n̄an ro jet? Ewi wāween An kar tōpar aikuj ko an armej ro ilo jetōb im barāinwōt ilo kanniōk? Ro uwaan kūlaj eo remaron̄ kwaļo̧k iien ko ke raar lo an armej ro kōjerbal pedped kein ilo jerbal in karejar eo aer.

Jerbal in Karejar ej kōkatūbtūbi jān iakwe eo āinwōt an Kraist.

N̄an lo kajoor in jerbal in karejar eo kar kōkatūbtūbi jān iakwe eo āinwōt an Kraist, komaron̄ je naan kein ioon boot eo im karuwaineneik ro uwaan n̄an elmakote wāween ko n̄an kanne būļāān̄ ko: N̄e ij m̧ool in iakwe armej ro ij jerbal n̄an er, Ij . N̄e ij jerbal n̄an kōn bar jet un ko, Ij . Ta eo jemaron̄ kōm̧m̧ane n̄an lale bwe jerbal in karejar eo ad n̄an ro jet ej kōkatūbtūbi kōn iakwe eo āinwōt an Kraist? Ewi wāween ad kōļapļo̧k iakwe eo āinwōt an Kraist n̄an ro me kar jitōn̄ kōj n̄an kwaļo̧k n̄an er? (lale Moronai 7:45–48). Bōlen ro uwaan remaron̄ kwaļo̧k waanjon̄ak ko an jerbal in karejar eo me eaar im̧we jān iakwe eo āinwōt an Kraist.

Anij ekōņaan aolep ajri ro Nejin jen emejrake er im kōjparok er.

Būreejtōn Russell M. Nelson eaar ba, “Juon kōkaļļe an Kabun̄ eo em̧ool im mour an Irooj enaaj iien otemjej juon kijejeto kar kōllaajrake, kajju n̄an kwaļo̧k n̄an kajjojo ajri ro nejin Anij im baam̧le ko aer” (“Jerbal in Karejar kōn Kajoor im Maron̄ an Anij,” Liaona, Māe 2018, 69.). Ta eo Būreejtōn Nelson ekar katakin rej jet iaan wāween ko “kar kōllaajrak, kajju” me Kabun̄ in ej jipan̄ kōj kōkōm̧anm̧anļo̧k ad kōjparok kajjojo? Etke kijejeto kein rej “juon kōkaļļe an Kabun̄ eo em̧ool im mour an Irooj? (lale Mosaia 18:21–22 im Moronai 6:4–6 n̄an jet ļōmņak ko). Ta kōjeraam̧m̧an ko em̧ōj aer kar itok n̄an mour ko ad ak mour ko an ro jet kōnke armej ro raar kwaļo̧k ilo kūr ko ak ijjitōn̄ ko aer ilo Kabun̄ in?

Bwe aorōk an jetōb ko elap im̧aan mejān Anij.

En̄jake ko an ļōm̧aro nejin Mosaia ej kwaļo̧k bwe wāween eo jej lo armej ro ejelet wāween ad kwaļo̧k n̄an er. Komaron̄ je ioon boot eo Ekōjkan an Rinipai ro kalimjōk Rilaman ro im Ekōjkan an ļōm̧aro nejin Mosaia kalimjōk Rilaman ro. Innām karuwaineneik ro uwaan n̄an etale Mosaia 28:1–3 im Alma 26:23–26 n̄an pukōt naan ko an eoon ko n̄an je ium̧win kajjojo ennaan kein. Ta eo keidi in ej katakin kōj kōn ekōjkan an wāween eo jej kalimjōk armej ro jelet wāween ad kwaļo̧k n̄an er? Ekōjkan ad maron̄ katak n̄an kalimjōk armej ro eļapļo̧k āinwōt an Anij kalimjōk er? (lale K&B 18:10–16).

Rikwaļo̧k rem̧ool rej kalimjōk wōt aikuj ko an ro jet.

N̄an jipan̄ ro uwaan em̧m̧anļo̧k aer meļeļe aorōk eo an kalimjōk wōt aikuj ko an ro jet ilo aer kwaļo̧k, komaron̄ keidi jerbal in karejar n̄an menin leļo̧k ko liļo̧k im būki. Em̧ōj ke ad kar bōk juon menin letok eļap meļeļe in jān juon eaar alikkar an jeļā bwe jaar aikuji ak kōņaan? Ekōjkan an jerbal in karejar āinļo̧k wōt leļo̧k juon menin leļo̧k kar kanooj ļōmņak kake? Ļōmņak in ekōnono kōn bwebwenato ko jān kweilo̧k eo eļap ekāāl tata me rej kwaļo̧k ekōjkan an armej ro kar kwaļo̧k ekkar n̄an aikuj ko an ro jet (lale, lale n̄an waanjon̄ak, Jean B. Bingham, “Jerbal in Karejar āinwōt an Rilo̧mo̧or eo kar Kōm̧m̧ane,” Liaona, Māe 2018). Ro uwaan remaron̄ barāinwōt kwaļo̧k bwebwenato ko jet me rej kwaļo̧k pedped in.

Ekōjkan ad maron̄ katak ta aikuj ko an ro jet? Karuwaineneik kajjojo ro uwaan n̄an kōm̧m̧ane juon laajrak in jet iaan armej ro me rekōņaan kwaļo̧k n̄an er. Iturin tok kajjojo āt remaron̄ je juon uwaak n̄an kajjitōk eo “Ta eo armej in ej aikuji n̄an itok epaakeļo̧k Kraist?” N̄e ekkar, kōketak ro uwaan n̄an kobaik kain̄i ko kajjojo armej emaron̄ aikuj n̄an būki. Karuwaineneik ro uwaan n̄an wōnm̧aanļo̧k wōt n̄an ļōmņak kōn kajjitōk im pukōt im̧we eo n̄an jipan̄ er tōpar aikuj ko an ro jet.

Irooj ekōņaan bwe jān bōk jerbal in karejar eo jān ro jet.

Elder Robert D. Hales eaar ba: “Karōk an gospel eo ej aikuji leļo̧k im bōk. … Kajjojo ro ilo apan̄ emakijkij aer ba: “Inaaj kōm̧m̧ane makeļo̧k,’ … ‘Imaron̄ lale eō make.’ Em̧ōj kar ba bwe ejjeļo̧k juon ebwe an jeram̧m̧an bwe ejjab aikuj jipan̄ eo an ro jet, ejjeļo̧k juon ekanooj in jerata me jon̄an armej ejjab maron̄ jipan̄ ilo jet wāween ko n̄an ro m̧ōttan. M̧ūtōn eo n̄an kajjitōk jipan̄ jān ro jet kōn lōke, im n̄an leļo̧ke kōn jouj, aikuj in erom m̧ōttan lukkuun piktok eo ad” (“We Can’t Do It Alone,” Ensign, Nov. 1975, 91, 93). Etke jet iien jej āliklik n̄an bōk jipan̄ jān ro jet? Ekōjkan an kōņaan eo ad n̄an bōk jipan̄ kōjeram̧m̧an ro me rej jerbal n̄an kōj? Leļo̧k n̄an ro uwaan jet iien ko n̄an kejekļo̧kjeņ kōn wāween ko remaron̄ in ļapļo̧k aer peļļo̧k n̄an bōk jerbal in karejar eo jān ro jet. Ta eo 1 Korint 12:13–21 ej elmakote kōn etke jej aikuji doon.

Elōn̄ wāween ko jemaron̄ kwaļo̧k n̄an ro jet.

N̄an jipan̄ ro uwaan ļōmņak kōn elōn̄ wāween ko jemaron̄ kwaļo̧k n̄an doon, komaron̄ karuwaineneik er n̄an etale ennaan eo an Elder Jeffrey R. Holland “Pād Ippāer im Kōkajoor Er” (Liaona, Māe 2018, 101–3; lale bar Pedped ko an Jerbal in Karejar ilo bok ko rej itok wōt an Liaona eo). Ro uwaan remaron̄ ajej n̄an kumi jiddik ko, im kajjojo kumi emaron̄ ļōmņak kōn jet jekjek ko me juon armej emaron̄ aikuj jipan̄. Innām remaron̄ dipidiki elōn̄ wāween ko me armej ro remaron̄ kwaļo̧k n̄an aikuj ko ilo jetōb im kanniōk an kajjojo ilo jekjek ko. Kajjitōk ippān kumi ko n̄an kwaļo̧k ļōmņak ko aer im kejekļo̧kjeņ eļan̄n̄e jabdewōt iaan ļōmņak ko kar ekōnono kaki maron̄ jipan̄ armej ro me rej kwaļo̧k n̄an er.