Iakwe eo Erreo: Ej Kōkkaļļe eo Em̧ool an Aolep Rikaļoor ro an Jisōs Kraist
Jān Elder Massimo De Feo
Jān Jiljilimjounn̄oul eo
Gospel eo an Jisōs Kraist ej io̧lepen ilo iakwe eo an Jemed im Rilo̧mo̧o̧r n̄an kōj im ad iakwe n̄an Er im n̄an doon.
Jej iakwe im būrom̧ōje Būreejtōn Thomas S. Monson, im jej iakwe im rejetake Būreejtōn Russell M. Nelson. Būreejtōn Nelson ewōr jikin ilo būruwō.
Ke iaar juon baba eo edik, ļaddik eo nejum̧ edik, eo ekar ļalem an iiō, eaar itok n̄an m̧weeo jān jikuuļ juon raan im kajjitōk ippān jinen, “Kain rot jerbal eo Baba ej kōm̧m̧ane?” Innān eaar kwaļo̧k bwe rijikuuļ ro m̧ōttan raar leto-letak kōn jerbal ko an jemeer. Juon eaar ba bwe jemen eaar juon jeban in police ilo jikin eo, ilo an ro jet im eo juon eaar kwaļo̧k bwe jemen ekar juon jeban ilo juon kōmpani jikin jerbal eļap.
Kōn menin ke rej kajjitōk kōn jemen, ļaddik eo neju eaar ba, “Jema ej jerbal ilo juon opiij ilo juon kamputōr.” Innām, uwaak eo an eaar jab kabwilōn̄ ro m̧ōttan, eaar ba, “Akō, jema ej jeban aolepen mejatoto im laļ.”
Ij tōmak eaar jem̧ļo̧kin bwebwenato eo.
Iaar jiron̄ kōrā eo ippa, “Ej iien n̄an katakin e jet meļeļe ko kōn karōk in lo̧mo̧o̧r im wōn eo lukkuun ribōk eddoin.”
Ak ke kom̧ro ej katakin ajri ro nejum̧ro kōn karōk in lo̧mo̧o̧r eo, iakwe eo aer n̄an Jemedwōj Ilan̄ im n̄an Rilo̧mo̧o̧r eaar ļapļo̧k im ke raar ekkatak bwe ej juon karōk in iakwe. Gospel eo an Jisōs Kraist ej io̧lepen ilo iakwe eo an Jemed im Rilo̧mo̧o̧r n̄an kōj im ad iakwe n̄an Er im n̄an doon.
Elder Jeffrey R. Hollad eaar ba: kien eo m̧oktata “Kien eo ļap tata an aolep indeeo ej n̄an iakwe Anij kōn aolepān buruōd, ļōmņak, im kajoor—ej kien eo m̧oktata im ļap tata. Ak m̧ool eo eļap im m̧oktata an indeeo ej bwe Anij ej iakwe kōj kōn aoelpān Būruwōn, maron̄, ļōmņak, im kajoor. Iakwe in ej juon pedped eo epen kōn mour indeeo, im ej aikuj juon pedped in mour ko ad kajjojo raan.”1
N̄an erom̧ juon pedped eo epen kōn mour indeeo, iakwe eo erreeo ej juon menin aikuj n̄an aolep rijilōk ro rem̧ool an Jisōs Kraist.
Rikanaan Mormon eaar kwaļo̧k, “Kōn menin, ro jeiū im jatū rejitōnbōro, kom̧in jar n̄an Jemād kōn aolep kajoor in bōro, bwe kom̧in maron̄ obrak kōn iakwe eo An, eo Eaar leļo̧k ioon aolep ro rej rikaļoor ro an rem̧ool an Nejin, Jisōs Kraist.”2
Em̧ool iakwe ej kōkkaļļe eo an aolep rijilōk ro rem̧ool an Jisōs Kraist.
Rijilōk ro rem̧ool rej m̧ōņōņō in jerbal. Rejeļā bwe jerbal in jipan̄ ej kwaļo̧k juon en̄jake in iakwe em̧ool im juon bujen raar kōm̧m̧ane ilo peptaij.3 Jekdo̧o̧n kūr ko aer ilo Kabun̄ in ak jerbal eo aer ilo jukjukinpād, rej en̄jake juon kōņaan eo eļap n̄an iakwe im jerbal n̄an Irooj im n̄an doon.
Rijilōk ro rem̧ool rej iakwe n̄an jeo̧rļo̧k bōd. Rejeļā bwe kōn Pinmuur eo an Rilo̧mo̧o̧r ej pinej aolep jerawiwi ko im likjab ko ad kajjojo. Rejeļā bwe kōn wōnāān eo Eaar kōļļaiki ej “wōnāān eo eļap an aolep men otemjeļo̧k.” Eowaj ko an jetōb, wōnāān, kamijen, im wōnāān ko raar jelet jerawiwi, likjab ko, ak kōm̧m̧an ko rebōd raar aolep jako. Rijilōk ro rem̧ool em̧ōkaj aer jeo̧rļo̧k bōd im em̧ōkaj aer kajjitōk n̄an jeo̧rļo̧kin bōd.
Ro jeiū im jatū, eļan̄n̄e epen am̧ pukot kajoor n̄an jeo̧rļo̧k bōd, jab ļōmņak kōn ta eo ro jet raar kōm̧m̧ane n̄an eok, ak ļōmņak kōn ta eo Rilo̧mo̧o̧r eaar kōm̧m̧an n̄an eok, im kwonaaj lo aenōm̧m̧an ilo kōjeram̧m̧an in Pinmuur eo An.
Rijilōk ro rem̧ool rej iakwe rej leļo̧k er make n̄an Irooj kōn aenōm̧m̧an ilo būruweer. Rej ro rettā im meanwōr kōnke rej iakwe E. Ewōr aer tōmak n̄an lukkuun bōk Ankilaan, ejjab wōt ilo ta eo Ej kōm̧m̧ane ak barāinwōt ilo wāween im n̄āāt. Rijilōk ro rem̧ool rejeļā bwe lukkuun kōjeram̧m̧an ko rejjab aolep iien ta eo rej kōņaan ak ta eo Irooj ekōņaan jān er.
Rijilōk ro rem̧ool rej iakwe Irooj eļapļo̧k jen laļin im rej dim im pen im jab m̧akūtkūt ilo tōmak eo aer. Rej kajoor im dim ilo juon laļ eoktak im laļ epok. Rijilōk ro rem̧ool rej iakwe ron̄jake ainikien Jetōb im rikanaan ro im rejjab pok kōn ainikien ko an laļin. Rijilōk ro rem̧ool rej m̧ōņōņō in “jutak ilo jikin ko rekwojarjar”4 im m̧ōņōņō in kōm̧m̧an bwe jikin ko rekwojarjar rej jikin ko rej jutak ie. Ijoko rej etal ie ļo̧k, rej bōkļo̧k iakwe eo an Irooj im aenōm̧m̧an n̄an būruween ro jet. Rijilōk ro rem̧ool rej m̧ōņōņō in pokake kien ko an Irooj, im rej pokake kōnke rej iakwe Irooj. Ilo aer iakwe im kōjparok bujen ko aer, būruweer rej kāāl im piktokier ej oktak.
Iakwe eo erreo ej kōkkaļļe eo em̧ool an aolep rikaļoor ro an Jisōs Kraist.
Iaar jeļā kōn iakwe eo erreeo jen jinō. Ekar jab juon membōr in Kabun̄ in ad.
Juon raan elōn̄ iiō ko rem̧ootļo̧k, Iaar loļo̧k jinō, eo eaar nan̄inmej in kāānjer. Iaar jeļā enaaj mej, ak iaar inepata kōn an en̄taan. Iaar jab ba jabdewōt, ak an jeļā kajjiō, eaar ba, “Ij lo bwe kwoj inepata.”
Innām kōn aō ilbōk, eaar kajjitōk kōn ainikien udiddiid, “Kwomaron̄ ke katakin eō kilen jar?” Ikōnaan jar kōn kwe. Ijeļā jino ilo am ba, ‘Jemedwōj Ilan̄,’ innām ta eo inaaj ba?”
Ke ij bukwelōlōk iturin peet eo an im eaar jar ippa, iaar en̄jake juon iakwe ijjan̄in kar en̄jake m̧oktaļo̧k. Eaar ļam̧ waan, m̧ool, iakwe erreo. Men̄e eaar jab jeļā kōn karōk in lo̧mo̧o̧r, eaar wōr ilo būruwōn juon karōk in iakwe, karōk in iakwe eo an juon m̧am̧a n̄an eo nejin. Eaar pād ilo metak, en̄taan eo n̄an pukot kajoor n̄an jar. Iaar maron̄ in ron̄ ainikien, ak iaar lukkuun en̄jake iakwe eo an.
Ij keememejļo̧k aō ļōmnak, “Elmen an juon eo ej pād kōn metak eļap jar kōn ro jet? E eo ej pād ilo aikuj.”
Innām uwaak eo eaar m̧ōkaj an alikar an itok: iakwe eo erreo. Eaar lukkuun iakwe eō jon̄an ekar meļo̧kļo̧k e make. Ilo iien ko āliktata an, eaar iakwe eō eļapļo̧k jen e make.
Kiiō, ro jeiū im jatū, ejjab ke ta eo Rilo̧mo̧o̧r eaar kōm̧m̧ane? Aaet, ilo juon erreiiļo̧k indeeo im eļap. Ak ilo io̧lepen metak eo An eļap, ilo jikin kallib eo bon̄on eo, Eaar juon eo ekar lukkun ļap an aikuji jipan̄ eo, en̄taan ilo jabdewōt wāween me jejjab maron̄ kōļmenļo̧kjeņ kake ak meļeļe. Ilo jem̧ļo̧kin, Eaar meļo̧kļo̧k Emake im kar jar kōn kōj m̧ae Eaar kōļļāiki wōnāān eo. Elmen An maron̄ kōm̧m̧ane? Kōn iakwe eo An erreeo n̄an Jemān, eo eaar jilkintok E, im n̄an kōj. Eaar iakwe Jemān im kōj eļapļo̧k jen Emake.
Eaar kōļļāiki men eo me Eaar jab kōm̧m̧ane. Eaar kōļļāiki jerawiwi ko me Eaar jab kōm̧m̧ani. Etke? iakwe eo erreo. Kōļļāik aolepen wōnāān, Eaar letok n̄an kōj kōjeraam̧m̧an ko kōn ta eo Eaar kōļļāiki eļan̄n̄e jenaaj ukwelo̧k. Etke Eaar letoke? Bar juon alen, im aolep iien, iakwe eo erreo.
Iakwe eo erreo ej kōkkaļļe eo em̧ool an aolep rikaļoor ro an Jisōs Kraist.
Būreejtōn Thomas S. Monson eaar ba: “Jen jino kiiō, menin aolep raan, n̄an kwaļo̧k iakwe n̄an aolep ajri ro nejin Anij, men̄e er rej membōr in baam̧le eo ad, ro m̧ōttad, ro jej kab ioon er, ak ruwamaijet ro. Ilo ad jerkak kajjojo jibbon̄, jen ļōmņak in uwaak kōn iakwe im jouj n̄an jabdewōt emaron̄ itok im̧aan ad iaļ.”5
Ro jeiū im jatū, gospel eo an Jisōs Kraist ej juon gospel in iakwe. Kien eo eļaptata ej kōn iakwe. N̄an n̄a ej aolepen kōn iakwe. Iakwe eo an Jemed, eo eaar keen̄taan Nejin kōn kōj. Iakwe eo an Rilo̧mo̧o̧r, eo eaar keen̄taan Nejin kōn kōj aolep. Iakwe eo an juon jinen ak juon jemān enej leļo̧k jabdewōt men n̄an ajri ro nejin ļeo ak lio. Iakwe an ro rej jerbal etanwadik im rejjab bun̄bun̄ n̄an kōj kajjojo ak rej bun̄bun̄ ilo Irooj. Iakwe an ro rej jeo̧rļo̧k an aolep bōd iien otemjej. Iakwe eo an eo ej lelo̧k eļap jen an bōke.
Ij iakwe Jemedwōj Ilan̄ Ij iakwe aō Rilo̧mo̧o̧r. Ij iakwe gospel in. Ij iakwe Kabun̄ in. Ij iakwe baam̧le eo aō. Ij iakwe mour in em̧m̧an. N̄an n̄a, ej aolepen kōn iakwe.
Kōm̧m̧an bwe raan in keememej Jerkakpeje eo an Rilo̧mo̧o̧r en juon raan in jetōbin kōkāāl n̄an kōj kajjojo. Kōm̧m̧an bwe raan in en ijjino kōn juon mour eobrak kōn iakwe, pedped eo epen in ad mour.
Kōm̧m̧an bwe būruwōd en obrak kōn iakwe em̧ool an Kraist, kōkkaļļe eo em̧ool an aolep rikaļoor ro rem̧ool an Jisōs Kraist. En̄in ej jar eo aō ilo etan Jisōs Kraist, amen.