Ineem̧m̧an im Ettā Bōro
Jān Elder David A. Bednar
Jān Doulul eo an Jon̄oulruo Rijilōk ro
Ineem̧m̧an ej juon m̧wil eaorōk an Rilo̧mo̧o̧r im ej kwaļo̧k kadkad in jān uwaak ilo jim̧we, m̧ōņōņō in ajeļo̧k, im kipel ekajoor an juon make.
Ij lan̄lōn̄ ilo iien em̧m̧an in ekwojarjar n̄an rejtake ritōl ro ad ilo Kabun̄ in, im ij lukkuun m̧ōņōņō in karuwaineneiktok Elder Gong im Elder Soares n̄an Doulul eo an Jon̄oulruo Rijilōk ro. Jerbal in karejar ko an em̧m̧aan rein retiljek renaaj kōjeraam̧m̧an kajjojo im baam̧ļe ko aolepān laļ in, im ij kijoror in jerbal im katak jān erro.
Ij jar bwe Jetōb Kwojarjar eo enaaj katakin im kōmeramļo̧k kōj ilo ad katak ippān doon kōn juon jekjek eaorōk kōn piktok kwojarjar eo an Rilo̧mo̧o̧r eo1 me kajjojo iaad aikuj kajjieon̄ in ļoore.
Inaaj kwaļo̧k jet waanjon̄ak ko me rej kalikkar m̧wil eo em̧m̧an an Kraist m̧okta jān kwaļo̧k lukkuun paotok tokālik ilo ennaan eo aō. Jouj im kanooj ron̄jake kajjojo waanjon̄ak im ļōmņak ippa uwaak ko rem̧m̧an n̄an kajjitōk ko inaaj kajjitōk.
Waanjon̄ak #1. Likao eo Em̧wie im Amulek
Ilo Kallim̧ur Ekāāl, jej katak kōn juon likao em̧wie me kar kajjjitōk ippān Jisōs, “Ri Kaki, ewi men eo em̧m̧an Inaaj kōm̧m̧ane bwe en aō mour indeeo?”2 M̧oktata Rilo̧mo̧o̧r eo eaar katakin e n̄an kōjparok kien ko. Eo tok juon M̧aajta eo eaar leļo̧k n̄an likao in bar juon men aikuji eļaptata n̄an aikuj ko im jekjek ko an.
“Jisōs e ba n̄an e, Eļan̄n̄e kwō kōņaan bwe kwōn weppān, kwōn ilo̧k im wiakaki men ko am̧, im leļo̧k n̄an ro rej jeram̧ōl, im enaaj wor m̧weiōm̧ i lan̄: im kwōn itok im ļoor eō.
“A ke likao ej ron̄ naan eo, ej būrom̧ōj im ilo̧k: bwe eļap an m̧weiie.”3
Keidi uwaak eo an likao m̧weie eo ippān en̄jake eo an Amulek, āinwōt kar kōmeļeļeik ilo Bok in Mormon. Amulek eaar juon em̧m̧aan eo ekūtarre jerbal im jeraam̧m̧an kōn elōn̄ nukun im m̧ōttan.4 Eaar kwaļo̧k kadkad in make āinwōt juon em̧m̧aan eo kar kūri elōn̄ alen bōtaab eaar jab ron̄, juon em̧m̧aan eo eaar jeļā men ko an Anij bōtaab kālet n̄an jab jeļā.5 Eļaptata juon em̧m̧aan em̧m̧an, Amulek eaar m̧ad kōn n̄ūrbōktak ko an mour in ejja āinļo̧k wōt likao eo em̧weie kōmeļeļeik ilo Kallim̧ur Ekāāl.
Men̄e eaar m̧oktaļo̧k kapen būruwōn, Amulek eaar pokake ainikien juon enjeļ, kar kadeļo̧n̄e rikanaan Alma ilo m̧weo im̧ōn, im kar najidiki. Kar im̧we e ilo jetōb ilo iien loļo̧k eo an Alma im kar kūr n̄an kwaļo̧k gospel eo. Innām Amulek eaar kaarmejjete “aolep an gold, im silver, im mennin aorōk ko an … kōn naan eo an Anij, [im kar] jab bōk e jān ro jeram̧ im barāinwōt jemān im ro nukwin.”6
Ta eo kom̧ij ļōmņak ej kōmeļeļeik oktak eo ikōtaan uwaak ko an likao eo em̧weie im Amulek?
Waanjon̄ak #2. Peoran
Ilo juon tōre in tariņae ekauwōtata kar kōm̧eļeļeik ilo Bok in Mormon, juon iien letok letak leta ko kar waļo̧k ikōtaan Moronai, kiaptin eo an jarin tariņae ko an Rinipai ro, im Peoran, riekajet eo eutiej im kabna eo an āne eo. Moronai, eo jarin tariņae eo an eaar jorrāān kōn an jabwe jipan̄ jān kien eo, kar jeje n̄an Peoran “jān iaļ in liaakeļo̧k”7 im ņa ruwōn im ritōl ro m̧ōttan kōn jab kea, jowaan, kōjerwawa, im em̧ool erom riketak ro.8
Peoran emaron̄ in kar pidodo an dike Moronai im men ko ruwōn rebōd, bōtaab eaar jab. Eaar uwaak ilo jouj im kōmeļeļeik jum̧ae eo ņae kien me Moronai eaar jab jeļā kake. Innām Peoran ekar ba:
“Lo, ij ba n̄an eok, Moronai, bwe ijjab m̧ōņōņō ilo en̄taan ko reļļap am, aaet, ekabūrom̧ōj buruō. …
“… Ilo lōta eo am̧ kwaar kōnanaik eō, a ejjeļo̧k tokjān; ijjab illu, a ij m̧ōņōņō ilo ļap in kilaam̧.”9
Ta eo kom̧ij ļōmņak ej kōmeļeļeik kōmmaanwa ilo an Peoran uwaaki men ko ruwōn Moronai?
Waanjon̄ak #3. Būreejtōn Russell M. Nelson im Būreejtōn Henry B. Eyring
Ilo kweilo̧k eo eļap jiljino allōn̄ remootļo̧k, Būreejtōn Russell M. Nelson eaar kōmeļeļeik uwaak eo an n̄an kūr eo an Būreejtōn Thomas S. Monson n̄an ekkatak, kejōkļo̧kjeņ, im kōjerbal m̧ool ko repād ilo Bok in Mormon. Eaar ba: “Ikar kajjieon̄ ļoor kapilōk in. Ibwilijn men ko jet, Iaar kōm̧m̧an laajrak ko kōn ta Bok in Mormon eo, ta eo ej kapene, ta eo ej kariabe, ta eo ej kakūrm̧oole, ta eo ej kalkkare, im ta eo kwaļo̧ke. Kalimjek Bok in Mormon eo kōn māj in riit kein ekar juon kamminene eo em̧m̧an im eim̧we! Ij elmakote n̄an kom̧ kajjojo.”10
Būreejtōn Henry B. Eyring ejja āinwōt kar kalikkar aorōk eo ilo mour eo an kōn kajjitōk eo an Būreejtōn Monson. Ekar etale:
“Iaar riiti Bok in Mormon eo aolep raan elōn̄ļo̧k jān 50 iiō ko. Kōnke em̧ōj aō kōm̧m̧ane menin imaron̄ kar ļōmņak bwe naan ko an Būreejtōn Monson rej n̄an bar jet. Aaet, āinwōt elōn̄ iaami, iaar en̄jake naan in rōjan̄ eo an rikanaan eo im an kallim̧ur n̄an kūr eō n̄an kōm̧m̧ane juon kijejeto eļapļo̧k. …
“Tōprak ekam̧ōņōņō n̄an eō, im n̄an elōn̄ iaami, ekar ta eo rikanaan eo eaar kallim̧ur kake.”11
Ta eo kom̧ij ļōmņak ej kōmeļeļeik uwaak ko rem̧ōkaj im m̧ool n̄an kūr eo an Būreejtōn Monson jān ritōl rein ruo an Kabun̄ eo an Irooj?
Ijjab elmakote bwe uwaak ko rekajoor ilo jetōb an Amulek, Peoran, Būreejtōn Nelson, im Būreejtōn Eyring rej kōm̧eļeļeik jān wōt juon m̧wil em̧m̧an āinwōt an Kraist. Em̧ool, elōn̄ m̧wil ko reier wōt juon im en̄jake ko kar tōl n̄an ekkeke ilo jetōb kar waļo̧k ilo mour ko an ro rikarejeran rem̧m̧an. Bōtaab Rilo̧mo̧o̧r eo im rikanaan ro An kar kalikkar juon m̧wil em̧m̧an eaorōk me aolepād wōj aikuj ļapļo̧k ad meļeļe im kajjieon̄ kōm̧m̧an bwe en m̧ōttan mour ko ad.
Ineem̧m̧an
Jouj im kile bwe m̧wil ko an Irooj ekar kōjerbali n̄an kōmeļeļeik E Make ilo eoon in: “Kom̧win bōk Aō ine im likūte i aerami, im katak Ippa, bwe Ij ineem̧m̧an im ettā būruō: im kom̧ naaj lo an ami kakkije.”12
Ejipan̄ n̄an kōj bwe Rilo̧mo̧o̧r eaar kālet n̄an kalikkar ineem̧m̧an jān aolep m̧wil ko im aorōk ko E emaron̄ in kar kāleti.
Ewōr juon kōmeļeļe āinļo̧k wōt ilo juon revelesōn kar bōk jān Rikanaan Josep Smith ilo 1829 eo. Irooj eaar kean̄, “Ekkatak jān Eō, im ron̄jaki naan ko Aō; etetal ilo ettā in Jetōb eo Aō im enaaj wōr am aenōm̧m̧an ilo n̄a.”13
Ineem̧m̧an ej juon m̧wil eaorōk an Rilo̧mo̧o̧r im ej kwaļo̧k kadkad in jān uwaak ilo jim̧we, m̧ōņōņō in ajeļo̧k, im kipel ekajoor an juon make. M̧wil in ej jipan̄ kōj n̄an kadipio ad meļeļe kōn kajjojo en̄jake ko an Amulek, Peoran, Būreejtōn Nelson, im Būreejtōn Eyring.
N̄an waanjon̄ak, Būreejtōn Nelson im Būreejtōn Eyring ilo jim̧we im m̧ōkaj kar uwaake kōketak eo an Būreejtōn Monson n̄an riit in ekkatak Bok in Mormon. Men̄e em̧m̧aan rein raar jerbal ilo jerbal ko raorōk im jeļā kaki ilo Kabun̄ in im ekar aitok aer ekkatak jeje ko rekwojarjar ium̧win n̄oul iiō ko, raar kwaļo̧k ilo uwaak ko aer bwe raar jab pere ak kile er relukkuun aorōk.
Amulek eaar m̧ōņōņō in ajeļo̧k n̄an ankilan Anij, bōk kūr eo n̄an kwaļo̧k gospel eo, im likūt itulik jekjek ko an rem̧m̧an im kadkad ko an jeļā kaki. Im Peoran eaar jeram̧m̧an kōn meļeļe eo im kipel eo ekajoor an juon-make n̄an jerbal ijello̧kin kōm̧m̧an āinwōt an kar kōmeļeļeik n̄an Moronai apan̄ ko rej waļo̧k jān jum̧ae kien.
M̧wil eo em̧m̧an an ineem̧m̧an āinwōt an Kraist emakijkij likjab meļeļe kake ilo laļ in ad rainin. Ineem̧m̧an ej kajoor, jab m̧ōjņo̧; wāmourur, jab pād waan, peran, jab kor, kōtōmļap, jab waan; ettā, jab kakōl; im bwilōn̄, jab ļam waan. Juon armej eineem̧m̧an ejjab illulu, kōmjāje, ak kabbil im ilo jab pere im ej kile tōprak ko an ro jet.
Men̄e ettā bōro ekkā an kobaiktok pedped eo ilo Anij im aikuj eo ejjab jem̧ļo̧k n̄an An tōl im rejtak, juon piktok eo ejeno̧lo̧k an ineem̧m̧an ej juon itok limo eo eļaptata ilo jetōb n̄an katak jim̧or jān Jetōb Kwojarjar im jān armej ro me remaron̄ in dik kapel, jeļā, ak māletlet, ro me rejjab kabwijer jerbal ko raorōk, ak ro ilo juon wāween emaron̄ jab ļap jeļā ippān. Keememej ekōjkan an Naaman, kiāptin eo an jarin tariņa eo an kiin̄ in Syria eo, anjo ioon utiej bōro eo an im ineem̧m̧an kar bōk kapilōk eo an ro rikarejeran n̄an pokake Elisha rikanaan eo im kwaļ e make ilo reba Jordan jijlimjuon alen.14 Ineem̧m̧an ej pedped eo aorōk an kōjparok jān pilo an utiej bōro me emakijkij an waļo̧k jān bun̄bun̄, jerbal, kajoor, m̧weie, im nōbar jān ro jet.
Ineem̧m̧an—juon Mwil āinwōt an Kraist im juon Menin Letok ilo Jetōb
Ineem̧m̧an ej juon m̧wil ej eddōkļo̧k kōn ikdeelel, kōjerbal anemkwoj in kālet eo ejim̧we ilo mour, im kajjieon̄ aolep iien n̄an bōk jeorļo̧k in jerawiwi ko ad.15 Ej barāinwōt juon menin letok ilo jetōb me ejejjet n̄an ad kappukōte.16 Jej aikuj keememej, mekarta, jibadbad ko me kain kōjeraam̧m̧an rōt in kar letok, eo ej kōjeraam̧m̧an im jerbal n̄an ro nejin Anij.17
Ilo ad itok n̄an im ļoor Rilo̧mo̧o̧r eo, ej ļapļo̧k ad im jidik ilo juon iien maron̄ erom āinwōt E. Jej kōkajoor kōj jān Jetōb kōn katakin kipel juon-make im juon dim im paotok ejokane. Kōn menin, ineem̧m̧an ej ta eo jej erom āinwōt rikaļoor ro an M̧aajta eo im ejjab juon men jej kōm̧m̧ane.
“Moses ear katak ilo mālōtlōt otemjej an ri Ijipt, im e kajoor ilo naan im ilo jerbal ko.”18 Ijoke eaar “kanooj ineem̧m̧an jān armej otemjej rej pād ioon mejān laļ.”19 An jeļāļo̧kjeņ im ekkeke maron̄ in kar kōm̧m̧an bwe en uteij bōro. Ijello̧kin, m̧wil eo im menin letok eo ilo jetōb an ineem̧m̧an eo kar kōjeraam̧m̧ane kar kadikļo̧k kabbil eo ilo mour eo an im kōļapļo̧k an Moses juon kein jerbal n̄an kadedeļo̧k jibadbad ko an Anij.
M̧aajta eo āinwōt juon Waanjon̄ak an Ineem̧m̧an
Wōj eo eļaptata im waanjon̄ak ko eļap meļeļeier an ineem̧m̧an rej pād ilo mour eo an Rilo̧mo̧o̧r eo Make.
Ripinmuur eo Eļap, eo “ekar wanlaļtak ium̧win aolep men ko otemjeļo̧k”20 im en̄taan, to̧o̧r bōtōktōkin, im mej, “im karreo kōj jān jab wānōk otemjej21 kōn iakwe kar kwaļ neen ro Rikaļooran.22 Kain ineem̧m̧an in ej juon m̧wil ejeno̧lo̧k an Irooj āinwōt juon rijerbal im ritōl.
Jisōs ej letok waanjon̄ak ko eļaptata an uwaak ilo jim̧we im m̧ōņōņō in ajeļo̧k ke Eaar lukkuun in en̄taan eļap ilo Gethsemane.
“Im ke Ej i jikin eo, E ba n̄an [ro Rikaļooran], Kom̧win jar bwe kom̧win jab deļo̧n̄ ilo kapo.
“Im E … bukwelōlōl, im jar,
“Im ba, Jema eļān̄n̄e kwōn kōņaan, Kwōn bōkļo̧k kab in jān eō: a enjab ankil aō an am̧ wōt.”23
Ineem̧m̧an eo an Rilo̧mo̧o̧r eo ilo jeļā in aorōk indeeo im kanooj kōmettak ej kwaļo̧k n̄an kōj kajjojo aorōk eo an likūt māletlet eo an Anij ilōn̄ in māletlet eo ad make.
Jab m̧ūjkōk in an Irooj m̧ōņōņō in ajeļo̧k im kipel eo an juon-make ekajoor ej jim̧or im̧we im kōmeļeļe kōjwōj aolep. Ke juon kumi in rilale tampeļ im ritariņae ro an Rom kar jikrōkļo̧k ilo Gethsemane n̄an bōk im kalbuuji Jisōs, Piter eaar kwaļo̧k jāje eo an im jōk lo̧jiln̄in anbwijmaron̄ in eo karejeran pris eo eutiej.24 Innām Rilo̧mo̧or eaar un̄ur lo̧jiln̄in rijerbal eo im kōmour e.25 Jouj im kile bwe Eaar leļo̧k pein im kar kōjeraam̧m̧an em̧m̧aan eo eaar kajieon̄ kalbuuji kōjerbal ejja kajoor in lan̄ eo me emaron̄ in kar kabōjrak aer tōn bōk im kaen̄taan E.
Ļōmņak barāinwōt kōn ekōjkan an M̧aajta eo kar ņa ruwōn im liaakeļo̧k im̧aan Paiļat n̄an debwāl.26 Jisōs eaar kean̄ ilo kinaakļo̧k eo An, “Kwōj ļōmņak bwe I jab maron̄ in kajjitōk ippān Jema, im Enaaj jilkintok n̄an ippa kiiō elōn̄ jān jon̄oul im ruo lijiōn enjeļ ke?”27 Mekarta “Rikajet Indeeo an jim̧or ro remour im ro remej”28 pen n̄an meļeļe kar ekajet im̧aan juon eo jitōn̄e kōn kien an jidik wōt iien. “Im [Jisōs] e jab uwaak e n̄an jidik; innām irooj eo e kanooj bwilōn̄ kake.”29 Ineem̧m̧an eo an Rilo̧mo̧o̧r ej kwaļo̧k jān An kauweiki E n̄an uwaak, kipel ekajoor, im jab m̧ōņōņō in kōjerbal kajoor eo An indeeo n̄an jeraam̧m̧an eo an make.
Kallim̧ur im Naan in Kam̧ool
Mormon ej kile ineem̧m̧an āinwōt pedped eo me aolep maron̄ ko im menin letok ko rej waļo̧k jāne.
“Kōn menin, eļan̄n̄e armej ewōr an tōmak eaikuj wōr an kōjatdikdik; bwe n̄e ejjeļo̧k tōmak e jamin wōr jabdewōt kōjatdikdik.
“Im bar juon alen, lo ij ba n̄an kom̧ bwe e ej jab maron̄ wōr an tōmak im kōjatdikdik, ijello̧kun n̄e enaaj ineem̧m̧an, im ettā būruōn.
“Eļan̄n̄e āindein, an tōmak im kōjatdikdik e waan, bwe ejjeļo̧k bōk e im̧aan Anij, ijello̧kun riineem̧m̧an im ettā ilo bōro; im eļan̄n̄e armej eo ej ineem̧m̧an im ettā ilo bōro, im kwaļo̧k būruōn jān kajoor eo an Jetōb Kwōjarjar bwe Jisōs ej Kraist eo, eaikuj wōr an iakwe-em̧ool; bwe eļan̄n̄e ejjeļo̧k an iakwe-em̧ool e ejjeļo̧k tokjān; kōn menin eaikuj wōr an iakwe-em̧ool.”30
Rilo̧mo̧o̧r eaar kean̄, “E m̧ōņōņō ro ettā būrueir: bwe renaaj jolōt laļ.”31 Ineem̧m̧an ej juon jekjek eaorōk an paotok kwojarjar eo im maron̄ bōke im kōļapļo̧k ilo mour ko ad kōnke im ilo Pinmuur eo an Rilo̧mo̧o̧r.
Ij kam̧ool bwe Jisōs Kraist ej ad jerkakpeje im Ripinmuur emour. Im ij kallim̧ur bwe Enaaj tōl, kōjparok im kōkajoorļo̧k kōj ilo ad etetal ilo ineem̧m̧an eo an Jetōb eo An. Ij kwaļo̧k aō kam̧ool em̧ool kōn m̧ool im kallim̧ur kein ilo etan ekwojarjar Irooj Jisōs Kraist, amen.