Bōro Wōt Juon
Jān Reyna I. Aburto
Rikakpilōklōk eo Kein Karuo ilo Doulul eo Eļap an Kōrā ro
N̄an tōpar mejān kajjik eo ad, jej aikuji doon, im jej aikuj in juon wōt.
Juon iaan menin kōm̧anm̧an ko rem̧m̧antata ioon laļ in ej babbub. Ilo juon tūreep n̄an Mexico n̄an pād ilo Kūrijm̧ōj ippān baam̧le eo an ļeo pāleeō, kōm kar loļo̧k juon jikin babbub, ijo milien babbub ko rej pād ippān doon ilo iien wintōr. Eaar menin m̧ōņōņō n̄an lo men kein im n̄an am̧ kōļmenļo̧kjeņ kōn waanjon̄ok in ippān doon im pokake n̄an kien ko rekwojarjar me Anij eaar kōm̧anm̧ani.1
Babbub ko rej rijerakrōk ro rem̧ōkade. Rej kōjerbal meram in aļ n̄an ba kajien iaļ eo aer rej etal ie ļo̧k. Kajjojo jibriin̄, rej etal taujin m̧aiļ jān Mexico n̄an Canada, im kajjojo fall, rej bar ro̧o̧l tok n̄an wōjke ko ilo Mexico.2 Rej kōm̧m̧ani menin iiō im iiō, kelo̧k kōn pā ko reddik kajjojo iien. Ilo iien aer etal, rej kuk ippān doon ilo bon̄ ioon wōjke ko n̄an kōjparok er make jān m̧ōļo̧ im jorrāān.3
Juon kurup in babbub ņaetan kaleidoscope.4 Ejjab ke juon pija em̧m̧an? Kajjojo babbub ilo juon kaleidoscope rem̧m̧an im reoktak, aaet menin kōm̧anm̧an kein an Rikōm̧anm̧an eo eļap iakwe ippān bwe ren maron̄ mour, ito-itak, tumoon im wōrļo̧k, im bōjrak aer leto-letak mour ilo aer etal jān juon wūt n̄an bar juon wūt, leto-letak mour. Im men̄e kajjojo babbub roktak, rej jerbal ippān doon n̄an kōm̧m̧an bwe laļ in en juon jikin eaiboojoj ļo̧k im jikin kalle.
Āinwōt babbub ko, jej ro̧o̧l n̄an m̧weeo im̧ōd ilan̄, ijo jenaaj juon wōt ippān ro Jined im Jemedwōj Ilan̄.5 Āinwōt babbub ko, kar letok n̄an kōj paoktok ko rekwojarjar me rekōm̧m̧an bwe jen ito-itak ilo mour in, n̄an maron̄ “[kobrak] jon̄e kōm̧anm̧an eo [ad].”6 Āinwōt er, eļan̄n̄e jej juon wōt bōro,7 Irooj enaaj kōjparok kōj “āinwōt an juon lo̧lo̧ [aiintok] bao ko nejin ium̧win pein”8 im naaj kōm̧m̧an bwe jen āinwōt juon kaleidoscope.
Leddik im ļaddik ro, jiron̄ im likao ro, sister im būratōr ro, jej juon wōt ilo iaļ in. N̄an tōpar mejān kajjik eo ad, jej aikuji doon, im jej aikuj in ippān doon. Irooj eaar ba bwe jej aikuj in, “Erom juon wōt, im eļan̄n̄e jej jab juon wōt jej jab An.”9
Jisōs Kraist ej waanjon̄ok eo ej make wōt ilo juon wōt ippān Jemān. Rej juon wōt ilo jibadbad, ilo iakwe, im ilo jerbal, “ankilaan Nejin naaj oran̄ļo̧k ilo ankilaan Jemān.”10
Elmen ad ļoor waanjon̄ok eo em̧m̧an an Irooj n̄an juon wōt ippān Jemān im juon wōt Ippāer im n̄an doon?
Jon̄ok eo eim̧we ej waļo̧k ilo Jerbal 1:14. Jej riit, “[ Em̧m̧aan ro] rej pād im bōro wōt juon ilo aer jar im kajjitōk, kobaļo̧k kōrā ro.”11
Ij ļōmņak eaorōk naan in “bōro wōt juon” ej waļo̧k elōn̄ alen ilo bok in Jerbal, ijo jej riit kōn ta eo ro rikaļooraņ Jisōs Kraist raar m̧ōkajin kōm̧m̧ane ālkin An wanlōn̄ļo̧k n̄an lan̄ āinwōt juon armej ekar jerkakpeje, barāinwōt kōn kōjeraam̧m̧an ko raar būki kōn wōt kijejeto ko aer. Ebarāinwōt aorōk bwe jej lo bar juon jon̄ok in tōmak ilubwiljin armej ro ilo Amedka kaņ ilo tōre eo Irooj eaar loļo̧k im kwaļo̧k n̄an er. “Bōro wōt juon” meļeļein errā, ilo juon wōt, im aolep ippān doon.
Jet iaan men ko me ro Rekwojarjar retiljek raar kōm̧m̧ane ilo juon wōt jim̧or jikin ko raar kam̧ool kōn Jisōs Kraist, kar ekkatak kōn naan in Anij, im kar kwaļo̧k n̄an doon kōn iakwe.12
Ro rikaļooraņ Irooj raar juon wōt ilo kōttōbar, ilo iakwe, im ilo jerbal. Raar jeļā wōn er, raar jeļā ta rej aikuj kōm̧m̧ane, im raar kōm̧m̧ane kōn iakwe n̄an Anij im n̄an doon. Raar m̧ōttan wōt kaleidoscope ilo bōro wōt juon ilo em̧akūt m̧aanļo̧k.
Jet iaan kōjeram̧m̧an ko raar būki raar obrak kōn Jetōb Kwojarjar, kabwilōn̄lōn̄ ko raar bōk jikin ilubwiljier, Kabun̄ eo eaar eddōkļo̧k, eaar ejjeļo̧k aitwerōk ilubwiljjin armej ro, im Irooj eaar kōjeraam̧m̧an er ilo aolep men otemejļo̧k.13
Jemaron̄ jeļā un eo bwe raar lukkuun juon wōt kōnke raar jeļā kajien Irooj. Raar epaake E, im raar rikam̧ool ro kōn jerbal eo An ekwojarjar, kōn kabwilōn̄lōn̄ ko Eaar kōm̧m̧ani, im kōn An Jerkakpeje. Raar loe im kar jibwe kōkkaļļe ko ilo Pein im Neen. Raar lukkuun jeļā bwe E eaar Messaia eo kar kallim̧ur kake, Ripinmuur eo an laļ. Raar jeļā bwe “E ej unjen kōmour otemjej, aenōm̧m̧an, im wōnm̧aanļok eo ejjeļok jem̧ļokin.”14
Men̄e jekar jab lo ad Rilo̧mo̧o̧r kōn māj ko mejād, jej maron̄ jeļā bwe Ej mour. Ilo ad epaake E, ilo ad kappukot n̄an bōk juon ad make kam̧ool kōn Jetōb Kwojarjar kōn jerbal eo An ekwojarjar, enaaj em̧m̧anļo̧k ad meļeļe kōn kōttōbar eo ad; iakwe eo an Anij enaaj deļo̧n̄ ilo būruwōd;15 jenaaj bōk kije n̄an erom̧ juon kaleidoscope ilo baam̧le ko ad, ward, im jukjukinpād ko; im jenaaj kwaļo̧k n̄an doon “ilo wāween ko, rekāāltata.”16
Kabwilōn̄lōn̄ ko rej waļo̧k n̄e ro nejin Anij rej jerbal ippān doon kar tōl jān Jetōb n̄an tōpar ro jet rej aikuj.
Jej ron̄ elōn̄ bwebwenato ko kōn ro riturieer kwaļo̧k iakwe ilubwiljin armej ro ke eaar ibwijleplep. N̄an waanjon̄ok, ke jikin eo ilo Houston eaar lukkuun jorrāān kōn juon ibwijleplep iiō eo ļo̧k, armej ro raar meļo̧kļo̧k aikuj ko aer make im ilo̧k im jipan̄. Juon būreejtōn an doulul eo an elder ro eaar kūr ļo̧k n̄an jipan̄ ilo jukjukinpād eo, im ekar lukkuun m̧ōkaj in aer kōpooj 77 wa ko. Rijipan̄ ro raar ilo̧k iturin m̧ōko im̧ōn armej ro im ektake aolepen baam̧le ko n̄an juon iaan im̧ōnjar ko ad, ijo raar bōk jokne im jipan̄ eļap. Membōr ro im ro rejjab membōr raar jerbal ippān doon ilo juon wōt kōttōbar.
Ilo Santiago, Chile, juon būreejtōn an Doulul eo an Kōrā ro eaar wōr an ikdeelel n̄an jipan̄ rito-itak ro ilo jukjukinpād eo an ro raar itok jen Haiti. Jen kapilōk ippān doon ippān ritōl ro an priesthood, e im ritōl ro jet raar itok kōn juon pepe n̄an kōm̧m̧an kūlaaj in kajin Spanish n̄an rito-ritak ro, jipan̄ er kōn m̧oko rekāāl m̧weer. Kajjojo jibbon̄ in Jadede, mijenede ro rej kuk ippān doon ippān rikatak ro aer. Raar juon wōt ilo m̧weeo ilo juon waanjon̄ok eo eim̧we in armej ro jān kajjojo kadkad ilo jerbal in bōro wōt juon.
Ilo Mexico, bukwi membōr ro raar ito-itak iumwin elōn̄ awa ko n̄an jipan̄ ro raar lanwōtwōt jān ruo m̧akūtkūt in laļ ko rekajoor. Raar itok kōn kein jerbal, mijiin, im iakwe n̄an ro riturieer. Ke baļentier ro raar kuk ippān doon ilo juon iaan im̧ōnjar ko ad kōttar kōmeļeļe ko, mayor eo an jikin eo ilo Ixhuatán eaar dānin kōmjaļaaļ ke ej lojuon kam̧m̧ool kōn “iakwe eo em̧ool an Kraist.”17
Irooj ej kiiō letok n̄an kōj jerbal in n̄an kapilōk doon kajjojo allōn̄ ilo doulul ko an priesthood im Doulul eo an Kōrā ro, bwe en ļapļo̧k ad bōk kūņaad ilo ward im branch kaleidoscope ko ad—juon jikin ijo jemaron̄ aolep koņ ie im ijo jej aolep aikuji.
Kajjojo iaļ ko ad reoktak, aaet jej etetal ippān doon. Iaļ eo ad ejjab kōn ta eo jaar kōm̧m̧ane ak ia eo jaar pād ie; ej kōn ia eo jej etal ie im ta eo jej erom̧, ilo ad ippān doon. N̄e jej kapilōk doon kōn tōl an Jetōb Kwojarjar, jej maron̄ lo jepād ia im jepād ia lo aikuj. Jetōb Kwojarjar ej letok n̄an kōj juon visōn bwe māj ko mājed ilo kanniōk reban loe, kōnke “revelesōn ej pād ilubwiljid,”18 im n̄e jej likūt revelesōn ippān doon, jej maron̄ loe eļapļo̧k.
Ilo ad jerbal ilo juon wōt, kōttōbar eo ad eaikuj in kappukote im kōm̧m̧ane ilo ankilaan Irooj; kitōltōl eo ad eaikuj in ilo iakwe eo jej en̄jake n̄an Anij im n̄an ro rituriid;19 im ikdeelel eo ad eļap eaikuj n̄an “jerbal ilo tiljek,”20 bwe jen maron̄ kepooj iaļ eo n̄an jepļaaktok eo aiboojoj an ad Rilo̧mo̧o̧r. Iaļ eo wōt jenaaj maron̄ in kōm̧m̧ane ej “bōro wōt juon.”
Āinwōt babbub ko, jen etal wōt ilo iaļ in ippān doon ilo kōttōbar, kajjojo iaad kōn paoktokiid im wūjļepļo̧k ko ad make, jerbale n̄an kōm̧m̧an eļapļo̧k aiboojoj ilo laļ in—jidik kōn jidik n̄an iakwe kien ko an Anij.
Ad Irooj Jisōs Kraist eaar kallim̧uri kōj bwe n̄e jej kuk ippān doon ilo Etan, E ej pād ilubwiljiid.21 Ij kam̧ool bwe Ej mour im bwe Eaar jerkakpeje ilo jibbon̄ eo aiboojoj āinwōt rainin. E ej Monarch ilōn̄in aolep monarch, “Kiin̄ ioon kiin̄ raņ, im Irooj [ioon] irooj raņ.”22
Jen juon wōt ilo Jemān im ilo Nejin Emake Wōt, ilo ad tōl kōn Jetōb Kwojarjar, ej aō jar ettā ilo etan Jisōs Kraist, amen.