Kōketak Jerbal in Karejar
Jān Būreejtōn Henry B. Eyring
Rikakpilōklōk eo Kein Karuo ilo Būreejtōnji eo Kein Kajuon
Jej bōk Jetōb Kwojarjar eo em̧m̧anļo̧k n̄e jej mijōk wōt ad jerbal n̄an ro jet. Ej en̄iin wunin ad bōk priesthood eddo ko n̄an jerbal n̄an Rilo̧mo̧o̧r eo.
Em̧m̧aan ro aō jitōnbōro, ij lukkuun kam̧m̧oolol kōn iien in em̧m̧an bwe in kōnono n̄an kom̧ ilo bwebwenato in kweiļo̧k in eļap. Ededeļo̧k ad rejtake Būreejtōn Russell M. Nelson āinwōt Būreejtōn eo kein 17 an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Āinwōt ikar jeraam̧m̧an im kar jerbal ippān kajjojo raan, em̧ōj aō en̄jaake juon kapen an Jetōb ke Būreejtōn Nelson ej kūr jān Anij n̄an tōl Kabun̄ eo em̧ool an Irooj.
Ej barāinwōt aō kam̧ool bwe Irooj ekar kūr Elder Gerrit W. Gong im Elder Ulisses Soares n̄an jerbal āinwōt uwaan Doulul eo an Rijilōk ro Jon̄oulruo. Ij iakwe im rejtake er. Renaaj, jān jerbal in karejar aer, kōjeraamman mour ko ipeļaakin laļ in im aolep epepen ko.
Kweilo̧k in ej juon bwebwenato eļap kōn bar juon wūn. Būreejtōn Nelson ekar kwaļo̧k juon bun̄tōn ne m̧aanļo̧k ekkōbbōkakkak ilo kar karōk an Irooj n̄an Kabun̄ eo An. Karōk in ej kūtbuuj juon jōkjōk kāāl n̄an doulul ko an Priesthood ilo ward ko im stake ko bwe jen maron̄ in kakūrm̧ool eddo ko an priesthood eo ad. Eddo kein aolep an priesthood rej n̄an kōjparok ajri ro nejin Jemād.
Karōk eo an Irooj n̄an ajri kwojarjar ro Nejin ej n̄an leļo̧k iakwe in kōjparok eo ekar bōk elōn̄ jōkjōk ko ium̧win elōn̄ iiō ko. Ilo raan ko jinoin ilo Nauvoo, Rikanaan Josep Smith ekar aikuji juon karkan wāween kōjparok juon jarlepju eļap rioktak ro rej delo̧n̄tok Bukwōn in. Emān iaan jitōn bōro būbū im jim̧m̧a ro rōkar pād ilubwilijier—Eyring ro, Bennion ro, Romney ro, im Smith ro. Rikanaan eo ekar karōk kōjparok eo an Rikwojarjar ro kōn jikin ko aer. Ilo Illinois ajeej ko an bukwōn ko rekōn ņa etāer “ward ko.”
Ke Rikwojarjar ro rekōn em̧m̧akūtkūt ilo peļaak eo, kōjparok eo aer n̄an doon kōn kar karōke ilo “kom̧bani ko.” Juon iaan jitōn bōro jim̧m̧a ro aō ekar jepļaaktok jān mijen eo an ijo kiiō ej Oklahoma ke ekar iioon juon kom̧bani ilo iaļ eo an. Ekar kanooj m̧ōjņo̧ kōn nan̄inmej ke e im eo m̧ōttan rej jālleplep ilo juon dieka jidikdik.
Ritōl eo an kom̧bani eo ekar jilkinļo̧k ruo leddik jo̧dikdik n̄an jipan̄ jabdewōt ro rej pād ilo dieka eo. Juon iaer, juon sister jo̧dikdik eo ekar oktak ilo Switzerland, ekar lale juon iaan mijenede rein im en̄jaak tūriam̧o. E kar lo̧mo̧o̧ren jān kumi in kom̧bani an rikwojarjar ro. E ekar bwe en ājmour n̄an etetal ļo̧k n̄an Salt Lake Valley, ippān rilo̧mo̧o̧r em̧m̧an ded ro iturin. Rōkar kōņaan doon im kar m̧are. E ekar erom jitōn bōro eo jim̧m̧aō Henry Eyring, im kōrā eo jitōn bōro būbū Maria Bommeli Eyring.
Iio ko tokālik, ke armej ro rōkar kōnono kake apan̄ lapļap eo ikijjien em̧m̧akūt kijone juon laļ, kōrā eo ekar ba, “O jaab, ekar jab pen. Ke kōmij etetal, kōm kar kōnono ilo iaļ eo kake ta juon kabwilōn̄lōn̄ eo ekar bwe kōm jim̧or kar lo gospel eo em̧ool an Jisōs Kraist. Ekar juon iien ekanooj in lem̧ōņōņō imaron̄ ememeje.
Jān iien eo, Irooj ekar kōjerbal elōn̄ jōkjōk ko n̄an jipan̄ Rikwojarjar ro An maron̄ jipan̄ doon. Kiiō E ekar kōjeraam̧m̧an kōm kōn kajoor im kakobaik doulul ko ilo ward im stake ko—doulul ko rej jerbal in kōjeikik ippān aolep doulul ko ilo ward eo.
Municipal ward ko, kombani ko, im kōkajoorļo̧k doulul ko rej aikuji bōlen ruo men ko n̄an naaj anjo̧ ilo kōņaan eo Irooj ej ļōmņake n̄an kōm̧m̧an bwe aolep rikwojarjar ro ren kōjparok doon ilo wāween eo E ej kōjparok er. Rōkar eļļā ke Rikwojarjar ro rej en̄jaake iakwe eo an Irooj n̄an doon ilōn̄in kōņaan ko aer make. Jeje ko rekwojarjar rej ba “iakwe-em̧ool … ej iakwe eo erreo an Kraist” (Moronai 7:47). Im rōkar eļļā ke Jetōb Kwojarjar eo ekar tōl rikōjparok ro n̄an jeļā ta eo Irooj ejeļā ke em̧m̧an n̄an armej eo me ej kajjieon̄ in jipan̄e.
Iien ālkin iien ilo wiik kein, membōr ro an Kabun̄ eo rōkar em̧m̧akūt ilo aō pād āinwōt n̄e kōn jet un ko rōkar kōtmāne ta eo Irooj ekar tōn kōm̧m̧ane, āinwōt kar kōjjeļļā kake rainin. In kwaļo̧k baj ruo waanjon̄o̧k ko. Kein kajuon, juon kweilo̧k in kwojkwoj kōnono jān juon 14 iiō rūkaki ilo Priesthood eo an Aron eo ej meļeļe ta eo ro rej kabwijer priesthood eo remaron̄ tōpare ilo jerbal ko aer n̄an Irooj. Karuo, juon eo ej kabjer Melkisedek Priesthood eo, kōn iakwe eo an Kraist, kar kōketake n̄an jerbal n̄an juon baam̧le.
Moktata, in lewaj naan ko an likao eo ekar kōnono n̄an juon an ward kweilo̧k in kwojkwoj. Ikar pād ijo. Kajjeon̄ kememej ta eo ekar āinwōt ke kwaar 14 am̧ iiō im ron̄jake n̄an am̧ ron̄ an ba eļapļo̧k jān an juon ļaddik jo̧dikdik maron̄ in jeļā:
“Em̧ōj aō lukkuun kōņaan juon uwaan doulul eo an rūkaki ro ilo ward eo am jān ke ikar erom 14 ilo iiō eo ļo̧k. Juon rūkaki ej wōr wōt ippān aolep eddo ko an juon tikōn ekoba ko jet rōkāāl.
“Kōnke jet iaad rej rūkaki, ro jet renaaj raan kaņe tok, im kajjojo ro ilo Kabun̄ eo rej jeraam̧m̧an jān priesthood eo, kōn menin ej aorōk n̄an aolepād n̄an jeļā eļapļo̧k kake eddo ko an juon rūkaki.
“Mokta jān jabdewōt, Katak im Bujen ko 20:53 ej ba, ‘Jerbal eo an rūkaki eo ej n̄an emmejraake kabun̄ eo iien otemjej, im naaj pād ippāer im kōkajoor er.’
“Ālkin, Katak im Bujen ko 20:54–55 ej ba:
“‘Im lale bwe en ejjeļo̧k nana ilo kabun̄ eo, ak ļōkatip ippen doon, ak riab, ruruwe, ak kōnono nana;
“‘Im lale bwe kabun̄ eo en emmakijkij an kuktok ippān doon, im barāinwōt lale bwe aolep ro uwaan ren kōm̧m̧ani jerbal ko aer.’”
Ļaddik jo̧dikdik eo ekar etal wōt:
“Irooj ej jiron̄ tok kōj bwe ej ad eddo n̄an jab wōt lale Kabun̄ eo ak n̄an barāinwōt lale armej ro ilowaan Kabun̄ eo ilo jōkjōk eo Kraist enaaj kar kōnke Kabun̄ eo An in. Eļan̄n̄e jej kajjeon̄ in kōjparok wōt kien ko, kom̧in jouj n̄an doon, kom̧in m̧ool, kom̧in jem̧jerā em̧m̧an, im m̧ōņōņō ippān doon, innām jenaaj maron̄ bōk Jetōb im jeļā ta eo Jemedwōj Ilan̄ ekōņaan bwe jen kōm̧m̧ane. Eļan̄n̄e jejjab, innām jej jab maron̄ kōm̧m̧ane kūr eo ad.”
Ekar etal wōt im ba:
Ekar wōnm̧aanļo̧k wōt im ba, “Eļan̄n̄e juon rūkaki ej kālōt n̄an kōm̧m̧an waanjon̄o̧k jim̧we ilo an juon rūkaki in loļo̧k m̧ōko, karuwaineneik membōr ro ilo m̧ōn jar eo, kōpooj kwojkwoj eo, jipan̄ ilo m̧ōko, im āinwōt juon rikōm̧m̧an aenōm̧m̧an, e ej kālōt n̄an kautiej priesthood eo an im kōm̧m̧ane kūr eo an.
“N̄an juon rūkaki em̧m̧an ejjab wōt meļeļein n̄an bōk eddo n̄e jej pād ilo m̧ōnjar eo ak pād ilo m̧akūtkūt ko an Kabun̄ eo. Rijilōk Paul ekar kean̄, ‘kwōn juon jon̄ak n̄an ro rej tōmak, ilo naan, ilo kōnono, ilo iakwe, ilo jetōb, ilo tōmak, im ilo kwojarjar’ (1 Timote 4:12).”
Innām likao eo ekar ba:
“Jekdo̧o̧n ia eo jej pād ie ak ta eo jej kōm̧m̧ane, jemaron̄ in juon waanjon̄o̧k em̧m̧an in kanooj jim̧we iien otemjej im ilo jabdewōt jikin.
“Jema im n̄a kar katakin ilo m̧weo im̧ōn ro etāer Brown.1 Aolep iien kōmro ej etal n̄an m̧ween̄, ej juon iien em̧m̧an n̄an aō tōn jeļā kajjeer. Juon men ekanooj em̧m̧an ippa kake armej rein Brown ej jabdewōt iien kōmij etal n̄an m̧weo im̧weer, rej lukkuun m̧ōņōņō in ron̄jake im iien otemjej rej kwaļo̧k bwebwenato em̧m̧an n̄an kōm.
“N̄e jej kanooj jeļā kajjien armej ro ilo ward eo kōnke loļo̧k ko n̄an m̧ōko, ekapidodoik jerbal ko tok jet an juon rūkaki, im ej en̄iin karuwaineneik membōr ro ilo m̧ōn jar eo. Jipan̄ armej ekaruwainene im erejetak ilo m̧ōn jar eo ej jipan̄ aolep ro uwaan ward eo en̄jaake iakwe im pojak n̄an bōk kwojkwoj eo.
“Ālkin karuwaineneik membōr ro rej itok im jar, rukaki ro rej jipan̄ ilo kajjojo Jabōt ilo aer kōpooj kwojkwoj eo. Ilukkuun m̧ōņōņō im leto letak im kōpooj kwojkwoj eo ilo ward in kōnke aolep relukkuun kautiej. Ij iien otemjej en̄jaake Jetōb eo n̄e ij kōpooj im leto letak kwojkwoj eo. Ej juon kōjeraam̧m̧an n̄an iō bwe in maron̄ kōm̧m̧ane kajjojo Jabōt.
“Jet jerbal āinwōt leto letak kwojkwoj eo ej juon men eo armej rej loe im ļōmņak kake kōj kōn ad kōm̧m̧ane, bōtaab jerbal ko jet āinwōt kōpooj kwojkwoj eo ekkā kōm̧m̧ane ilo an ejjeļo̧k en ej kūle. Ejjab aorōk n̄e armej rej loe ad jerbal; ta eo ej aorōk ej bwe Irooj ejeļā bwe jekar jerbal n̄an E.
“Āinwōt rūkaki ro, jej aikuj kajjeon̄ n̄an kōkajoorļo̧k Kabun̄ eo, ro jerad, im baam̧le ko ad ilo ad kōm̧m̧ani priesthood eddo ko ad. Ejjab iien otemjej epododo, ijoke Irooj ej letok ejjeļo̧k kien n̄an kōj ‘eļan̄n̄e Ejjab kōpooj juon iaļ n̄an [ad] kōtōprak men eo Ej kean̄ er’ (1 Nipai 3:7).”
Ilo an ļaddik jodikdik eo kōjem̧ļo̧ke, ikar jab bōjrak aō bwilōn̄ ilo an ekkeke im jeļāļo̧kjeņ. Ekar kwaļo̧k ilo tukaduin ilo an ba, “Ijeļā bwe jenaaj em̧m̧anļo̧k eļan̄n̄e jej kālōt n̄an ļoor [Jisōs Kraist].”
Juon in bar bwebwenato in jerbal in priesthood kar karon̄ juon allōn̄ emootļo̧k ilo juon ward ilo kweilo̧k in kwojkwoj eo. Bar juon alen, ikar pād ijeņ. Ilo jekjek in, rikabwijer priesthood eo an Melkisedek Priesthood ekar jab jeļā ilo an kar kōnono bwe ekar kōmeļeļeik lukkuun ta eo Irooj ej kōņaan n̄an kōm̧m̧an ikijjien kōkajoorļo̧k doulul eo an priesthood. En̄iin ej meļeļein bwebwenato eo an:
E im juon m̧ōttan rūkaki in loļo̧k m̧ōko kar leļo̧k bwe erro en jerbal ippān jiljilimjuon baam̧le. Enan̄in aolepāer rekkar jab kōņaan bwe ren loļo̧k er. Ke rūkaki in ļoļo̧k m̧ōko rōkar etal n̄an m̧ōko im̧weer, rōkar m̧akoko in uwaaki kōjām ko. Ke rōkar taļboon, ejjeļo̧k uwaak en rōkar bōke. Ke rej door juon naan, ejjeļo̧k ekar kōro̧o̧lļo̧k kūr eo. Mōttā eo erūtto iaer āliktata ekar jepļaak n̄an juon jeje leta jerbal in karejar. E ekar jino n̄an kōjerbal kilin leta ko reiaļo ilo kōjatdikdik eo bwe enaaj wōr uwaak.
Juon iaan baam̧le ko jiljilimjuon ekar juon jāniknik make iaan ļeddik eo ekar itok jān Europe. Ewōr ruo nejin ajri jiddik.
Ālkin elōn̄ kajjeon̄ ko n̄an tōpare, ļaddik eo ekar tōpar juon ennaan ilo text. Elukkuun jidimikij an leddik in kōnnaanōkļo̧k ļaddik eo bwe ekar kanooj boub n̄an iioon rūkaki in loļo̧k m̧ōko ro. Leddik in ewōr ruo an jerbal im ekar juon ritariņae barāinwōt. Jerbal eo an eļaptata ekar juon kōra in būlijmāān, im kōttōpar eo an bwe en juon detective innām jepļaak n̄an laļ eo an etal wōt kōn jerbal eo an ijeņ.
Rūkaki in loļo̧k m̧ōko eo ekar jab maron̄ loļo̧k wōt leddik in ilo m̧weo im̧ōn. E jān iien n̄an iien ekar jejeļo̧k n̄an leddik in. Kajjojo allōn̄ ekar ijjilōkļo̧k, koba ippān kaat in aļōte ko n̄an kajjojo ajri.
Ekar ejjeļo̧k uwaak. Ijoke leddik eo ekar jeļā wōn ro an rūkaki in loļo̧k m̧ōko, wāween tōpar er, im bwe renaaj kakkōt ilo jerbal in priesthood eo aer.
Innām juon raan, ekar loe juon naan eidin̄ jān leddik eo. Leddik eo ekar kanooj aikuj jipan̄. Leddik eo ekar jab jeļā wōn bisop eo, ijoke ekar jeļā wōn ro an rūkaki in loļo̧k m̧ōko.
Ilo jet raan tokālik, ledik eo ekar aikuj em̧m̧akūt jān bukwōn eo n̄an juon kāājimourur in kamminene an tariņae. Ekar jab maron̄ bōk ajri ro nejin ippān. Jinen, eo enaaj kar lale ajri ro nejin, ekar kelo̧k n̄an Europe n̄an lale ļeo ippān, eo ekar pād ilo juon taktō idin̄.
Kōrā in emake iaan im ejāniknik in ebwe an jāān n̄an wiaik juon tikōt n̄an Europe n̄an ajri diktata eo nejin bōtaab ejjab bwe n̄an ļaddik eo nejin 12 ruo an iiō, Eric.2 Ledik eo ekar kajjitōk ippān rūkaki in loļo̧k m̧ōko ro eļan̄n̄e remaron̄ pukot juon LDS baam̧le eo em̧m̧an emaron̄ bōk Eric n̄an m̧weo im̧weer ium̧win 30 raan ko rej itok!
Rūkaki in loļo̧k m̧weo eo ekar uwaakļo̧k bwe enaaj kōm̧m̧ane jon̄on wōt an maron̄. Innām laddik eo ekar karon̄ priesthood ritōl ro an. Bisop eo, eo ekar pris eo eutiej ej tōl, ekar errā ippān bwe en jelm̧ae ro uwaan ward ko̧o̧njeļ eo, ekoba būreejtōn eo an Doulul eo an Kōrā ro.
Būreejtōn eo an Doulul eo an Kōrā ro eo iien eo wōt ekar loe emān LDS baam̧le em̧m̧an, ewōr nejier ajri dettāer wōt Eric, eo emaron̄ bōke n̄an m̧weo im̧weer ilo juon wiik juon illo̧k juon. Lukwōļpān allōn̄ eo tok juon, baam̧le kein rōkar naajdik Eric, ellolo ruum̧ ilo m̧ōko im̧weer ededeļo̧k kadede aer obrak ak m̧ōko reddik, kōn bōke ilo m̧akūtkūt in baam̧le jom̧ar ko aer kar karōki, bōktok n̄an jar, kobaiki ilo nokon in jota ko aer, im ko jet.
Baam̧le ko ewōr nejier ajri iiō eo an Eric ekoba e ilo kweilo̧k in doulul in tikōn ko aer im m̧akūtkūt ko. Ilowaan 30 raan in, Eric ekar jar aolep Jabōt ejkab juon kattōn ilo mour eo an.
Ālkin an jinen jepļaak tok jān jikin kamminene eo an, Eric ekar etal wōt n̄an jar, ekkā wōt ippān juon iaan ro emān baļantier LDS baam̧le ko ak ro jet rōkar m̧ōttāiki, ekoba rūkaki in loļo̧k m̧ōko ro an jinen. Ilo tōrein, ekar ekkapit n̄an juon tikōn im jino leto letak kwojkwoj eo aolep jabōt.
Jen kalimjōke mour in an Eric ilju im jekļaj. Jejāmin naaj ilbōk n̄e e enaaj erom juon ritōl ilo Kabun̄ in ilo laļ eo an jinen n̄e baam̧le eo an renaaj jepļaakļo̧k n̄an ijeņ—aolep kōnke Armej ro Rekwojarjar rej jerbal ippān doon ilo juon korak, ium̧win tōl eo an juon Bisop, n̄an jerbal jān iakwe eo em̧ool ilo būruweer im jān kajoor eo an Jetōb Kwojarjar.
Jejeļā bwe iakwe eļap an aorōk n̄an kōj n̄an naaj bōk lo̧mo̧o̧r ilo aelōn̄ in kiin̄ an Anij. Moronai eaar je, “Im eļan̄n̄e ejjeļo̧k ami iakwe-em̧ool kom̧ ilo ejjeļo̧k jabdewōt wāween maron̄ mour ilo aelōn̄ in Anij” (Moronai 10:21; lale barāinwōt Ether 12:34).
Jej barāinwōt jeļā bwe iakwe ej juon menin letok kōpālpel kōj kake ālkin aolep men ko jemaron̄ kōm̧m̧ani. Jej aikuj “jar n̄an Jemād kōn aolep kajoor in bōro, bwe [jen] maron̄ obrak kōn iakwe eo An, eo Eaar leļo̧k ioon aolep ro rej rikaļoor ro an rem̧ool an Nejin, Jisōs Kraist” (Moronai 7:48).
Ej alikkar n̄an eō bwe jej bōk Jetōb Kwojarjar eo em̧m̧anļo̧k eļan̄n̄e jej leļo̧k ad im jerbal n̄an ro jet. Ej en̄iin wunin ad bōk priesthood eddo ko n̄an jerbal n̄an Rilo̧mo̧o̧r eo. Eļan̄n̄e jej poub ilo jerbal n̄an ro jet, edikļo̧k ad ļōmņak kake kōj make innām Jetōb Kwojarjar emaron̄ kanooj pojak im itok n̄an ippād im jipan̄ kōj ilo iaļen mour aetok in ad n̄an bōk menin letok eo an iakwe kar letok iood.
Ij kwaļo̧k aō kam̧ool bwe Irooj ededeļo̧k an jino juon bun̄tōn eļap m̧aanļo̧k ilo karōk eo An n̄an kōj n̄an erom eļapļo̧k ketak im kōļapļo̧k iakwe ilo jerbal im kwaļo̧k an priesthood kein ad. Ij kam̧oolol kōn iakwe in An, eo E eaar jouj im letok n̄an kōj. Ij kam̧ool ilo etan ekwojarjar Jisōs Kraist, amen.