Elder Matthew L. Carpenter

Ritōl Eutiej Jiljilimjuonn̄oul an Kabun̄

Elder Matthew L. Carpenter ej keememej iien eo im̧aan tata eaar kile an en̄jake Jetōb Kwojarjar. Eaar juon ļaddik edik, emaron̄ jijlimjuon iiō dettan, jijet ilo Būraimere eo kein karuo erūtto uwaan. Juon meram eaar itok n̄an ruum̧ eo, im eaar wōr juon an en̄jake emeņeeņ eaar jan̄in kar en̄jake m̧okta.

“Iaar en̄jake m̧weiur ilo būruwō—im ejjab kōnke iaar okmeņeņ,” eaar ba. “Iaar jeļā Anij ej m̧ool in, iaar en̄jake.”

Ke eaar 11 iiō dettan, eaar etal n̄an juon m̧wen̄an an kweilo̧k eo eļap ilo Salt Lake Tabernacle eo ippān jemen. Eaar kein kajuon in an kar pād ilo ejja ruum̧ eo wōt āinwōt rikanaan eo, Būreejtōn Joseph Fielding Smith.

“Ke iaar lo e,” eaar ba, “Jetōb eo eaar kam̧ool n̄an eō bwe eaar rikanaan eo.”

Kapen kein reļam waan ilo jetōb ke eaar dik wōt kar jipan̄ e pukōt Jetōb eo āinwōt juon kareel in tōl ilo aolepān mour eo an.

“Naan in kam̧ool eo aō eaar jab juon en̄jake me ej waļo̧ktok enjeļ,” Ritōl Eutiej Jiljilimjuonn̄oul an Kabun̄ in eaar ba, eo kar rejtake ilo M̧aaj 31, 2018, “bōtaab eaar eddōkļo̧k im oktakļo̧k ium̧win iien.”

Matthew Leslie Carpenter kar ļotak ilo Salt Lake City, Utah, USA, Ilo Oktoba 21, 1959, n̄an Leone Erekson im Robert Allred Carpenter. E ej diktata eo iaan ajri ro ralitōk nejin rūtto rein, im ekar rūttoļo̧k ilo juon em̧ ippān ļalem leddik ro jein rōrūttoļo̧k jān e.

Ilo allōn̄ eo āliktata in an kar high school, eaar ioon Michelle “Shelly” Brown. Raar jino bwebwenato bōtaab rekar kabōjrak aer m̧ōttā ke eaar jerbal ilo Swiss Geneva Mission jān 1979 n̄an 1981 eo. Ālkin ro̧o̧l eo an, pea in ekar m̧are ilo Salt Lake Tampeļ ilo Juļae 9, 1982 eo. Rej jinen im jemen ļalem ajri ro.

Elder Carpenter eaar bōk bachelor degree eo an kōn finance jān Brigham Young University im master of business administration degree eo jān Harvard Business School. Ejjab to ekar managing tōrāāktōr eo an Foundation Specialty Financing Fund.

Elder Carpenter eaar jerbal āinwōt bisop, rikakpilōklōk ilo bisoprik, būreejtōn an Doulul eo an Likao ro an stake, ko̧o̧njeļ eo eutiej, stake būreejtōn, im Eria Jiljilimjuonn̄oul.