Menin Letok ko Raorōk jān Anij

Jān Būreejtōn M. Russell Ballard

Ripenej Jenkwan Būreejtōn eo an Doulul eo an Jon̄oulruo Rijilōk ro

Mour emaron̄ obrak kōn tōmak, lan̄lōn̄, m̧ōņōņō, kōjatdikdik, im iakwe n̄e jej kōjerbal dettan eo ediktata an lukkuun tōmak ilo Kraist.

Ro jeiū im jatū, ej kab m̧ōj ad bōk kuņaad ilo juon kweilo̧k ekwojarjar, juon iminene me maron̄ in anōk likļo̧k n̄an Baibōļ ke Israel eo etto eaar koba n̄an en̄jake pād eo an Irooj im kam̧m̧oolol kōn kōjeraam̧m̧an ko An.¹ Jej jeraam̧m̧an n̄an mour ilo juon tōre me iminene in etto in kar bar kōjepļaaktok kōn Rikanaan Josep Smith.² Ij kōketak kom̧ n̄an ļo̧o̧ke ilo jōnōl eo am̧ make ta eo kwar en̄jake kōn iien in ekanooj ekwojarjar eo kwar bōk kuņaam̧ ie.

Ejjab etto, jaar ba iak-iakwe eo ad n̄an eo m̧ōttad ejitōn bōro im rikanaan eo, Būreejtōn Thomas S. Monson. Men̄e jej aolep būrom̧ōj e, jekanooj in kam̧m̧oolol Irooj eaar kūr juon rikanaan kāāl, Būreejtōn Russell M Nelson, n̄an tōl ioon Kabun̄ eo An. Ilo kōllaajrak eo ejejjet jej kiiō jino juon tōre ekāāl ilo bwebwenato in Kabun̄ in ad. Menin ej juon menin letok aorōk jān Anij.

Ke kajjojo iaad ekar rejtake Būreejtōn Nelson kōn kotak peiid, jej jutak āinwōt rikam̧ool ro im̧aan Anij im kile bwe e eo ejim̧we ribōk jikin Būreejtōn Monson. Kōn an peid kar jutak, jaar kallim̧ur n̄an eo̧ron̄ ainikien ilo an bōk tōl jān Irooj.

Irooj eaar ba:

“Kom̧ naaj eo̧ron̄ aolep [meļeļe in Būreejtōn eo an Kabun̄ in] naan ko im kien ko an ko enaaj liwōj n̄an kom̧ āinwōt an bōki …;

“Bwe naan an kom̧ naaj bōke, āinwōt n̄e jān Lo̧n̄iiū make, ilo aolep kōmmaanwa im tōmak.”³

Ikar jeļā kajien rikanaan-būreejtōn in ekāāl ium̧win 60 iiō ko. Em̧ōj aō jerbal ippān ilo Doulul eo an Jon̄oulruo eo ium̧win 33 iiō ko, im ij juon rikam̧ool bwe pein Irooj ekar kōpooj e n̄an erom rijilōk im rikanaan eo ad ej tōl n̄an kōjerbal aolep kii ko an priesthood eo ekwojarjar ioon laļ in. Kōm̧m̧an bwe kōjwōj kajjojo en lukkuun rejtake e im rikakpilōklōk ro an im ļoor tōl eo aer. Jej barāinwōt karuwaineneik Elder Gong im Elder Soares āinwōt ro uwaan Doulul eo an Jon̄oulruo Rijilōk ro.

Ālkin jerkakpeje eo an Jisōs, juon iien jej kam̧m̧oolol ilo wiikān in Ijtō in aiboojoj, Eaar waļo̧kļo̧k n̄an rikaļoor ro An im ba, “Aenōm̧m̧an n̄an kom̧: āinwōt Jema ear jilkintok eō, āindein Ij jilkinļo̧k kom̧ āinwōt Jema ear jilkintok eō, āindein Ij jilkinļo̧k kom̧.”⁴ Lale ruo bun̄tōk ko—Anij ej jilkintok Nejin. Nejin ej jilkinļok ro Rikarejeran—m̧aan im kōrā ro rowabanban—n̄an kadedeļo̧k jerbal eo Aer.

Jejjab aikuj in ilbōk n̄an jeļā bwe ro kajjojo kar kūr n̄an kōm̧m̧ane jerbal eo an Irooj rejjab weppān ilo kanem armej. Bwebwenato ko ilo jeje ko rekwojarjar rej dipdiki iien ko kōn m̧aan im kōrā ro me kar kūr jān Anij n̄an kadedeļo̧k jerbal eo eļap—ļaddik im leddik ro rem̧m̧an nejin Jemedwōj Ilan̄ kar kūr n̄an jerbal ilo ijjitōn̄ ko aer ilo Kabun̄ in, kajjieon̄ kōm̧m̧ane ijo em̧m̧an tata ippāer, bōtaab ejjeļo̧k iaer raar weppān. Em̧ool ejja āinwōt n̄an kōj rainin.

Kar letok ilo m̧ool m̧ōjņo̧ ko ad ilo kanniōk im likjab ko, ekōjkan ad bun̄ m̧aanļo̧k ilo rie im rejtake kajjojo? Ej ijjino kōn tōmak—lukkuun, m̧ool in tōmak ilo Irooj Jisōs Kraist. Tōmak ilo Rilo̧mo̧o̧r eo ej pedped eo m̧oktata an katak eo im gospel eo an Kraist.

Jet iiō ko remootļo̧k iaar lolo̧k Āne eo Ekwojarjar. Ke kōm kar ettōrļo̧k iturin juon wōjke mustard, jeban eo an BYU Jerusalem Center eo eaar kajjitōk eļan̄n̄e inan̄in kar ke lo juon ine in mustard. Ijjan̄in kar kōn menin kōm kar bōjrak. Eaar kwaļo̧k n̄an n̄a ine ko jān wōjke mustard eo. Kar kabwilōn̄lōn̄ kōn aer iddik.

Innām iaar keememej katak ko an Jisōs: “Bwe em̧ool Ij ba n̄an kom̧, eļan̄n̄e ewōr ami tōmak āinwōt juon ine in mōstad, kom̧ naaj ba n̄an toļ in, Kwōn ruwaakļo̧k n̄an ijjuweo; im enaaj ilo̧k; im ejjeļo̧k men ko kom̧ naaj bane.”⁵

Eļan̄n̄e ewōr ad tōmak an dik in wōt juon ine in mustard, Irooj emaron̄ jipan̄ kōj kōmakūt toļ ko an kabbweer im pere ilo jerbal ko im̧aad ilo ad jerbal ippān ajri ro nejin Anij, ekoba ro uwaan baam̧ļe, ro uwaan Kabun̄ in, im ro me rejjan̄in de uwaan Kabun̄ in.

Ro jeiū im jatū, mour emaron̄ obrak kōn tōmak, lan̄lōn̄, m̧ōņōņō, kōjatdikdik, im iakwe n̄e jej kōjerbal dettan eo ediktata an lukkuun tōmak ilo Kraist—jekdo̧o̧n juon ine in mustard an tōmak.

Elder George A. Smith eaar keememej jet rōjan̄ ko Rikanaan Josep Smith eaar liļo̧k n̄an e: “Eaar jiron̄ eō ijjab aikuj in ebbweer, jekdo̧o̧n ta apan̄ ko imaron̄ iooni. Eļan̄n̄e iaar wōtļo̧k ilo ro̧n̄ eo ilo Nova Scotia im aolep Rocky Mountain ko kar kalibubuik eō, ij aikuj jab ebbweer ak niknik wōt, kōjerbal tōmak, im dāpij wōt peran im ij aikuj anjo̧ ioon aolep mālijjon̄ ko otemjej.”⁶

Jej aikuj keememej kean̄ eo an Paul: “I maron̄ in kōm̧m̧an men otemjej ilo Kraist eo ej kakajoor eō.”⁷ Jeļā menin ej bar juon menin letok eaorōk jān Anij.

Ilo kakobaba n̄an menin letok ko iaar kwaļo̧ki, elōn̄, ebar lōn̄. Ij kiiō kōnono kōn jet iaer—menin letok eo an raan in Jabōt, kwojkwoj eo, jerbal jipan̄ n̄an ro jet, im menin letok ej ejjeļo̧k kōjaake jān Anij kōn ad Rilo̧mo̧o̧r.

Kajoor eo an raan in Jabōt ej n̄an en̄jake ilo m̧ōnjar eo im ilo m̧weo ej laudin̄din̄, lan̄lōn̄, im okmāņāāņ eo kōn en̄jake Jetōb eo an Irooj ilo ejjeļo̧k bar jabdewōt kain kōm̧ad.

Ekanooj lōn̄ rej make kōtļo̧k er make n̄an joļo̧k enan̄in aolepān aer mour ilo online ippān smart device ko aer—screen ko rej kōmeram turin mejāer raan im bon̄ im kein ron̄jake ko ilo lo̧jilin̄ier pinejļo̧k ainikien eo elur im mera an Jetōb. Eļan̄n̄e jejjab lo iien eo n̄an doorļo̧k kein ron̄jake ko, jemaron̄ in jerwane iien ko rem̧m̧an n̄an ron̄ Ainikien eo eaar ba, “Kom̧win pād wōt, im jeļā bwe N̄a Anij.”⁸ Kiiō, ejjeļo̧k bōd kōn bōk em̧m̧an eo an kein kapāāl ko ilo technology ko kar im̧we jān Irooj, bōtaab jej aikuj māletlet ilo kōjerbali. Keememej menin letok eo an raan in Jabōt.

Kōjeraam̧m̧an eo jān bōk kwojkwoj eo ilo kweilo̧k in kwojkwoj eo en jab juon iien m̧akūtkūt eo kwoj ļoore ak baj juon men n̄an kōm̧m̧ane. Ej 70 wōt minit ko ilo juon wiik likio me jemaron̄ bōjrak im pukōt eļapļo̧k aenōm̧m̧an, lan̄lōn̄, im m̧ōņōņō eo ilo mour ko ad.

Bōk m̧ōttan kwojkwoj eo im bar kōkāāl bujen ko ad ej juon kōkaļļe jān kōj n̄an Irooj bwe jej iien otemjej keememej E. Pinmuur eo An ej juon menin letok etenkwadik jān Anij.

Jeraam̧m̧an eo an jerbal n̄an ajri ro nejn Jemedwōj Ilan̄ ej bar juon iien em̧m̧an n̄an ļoor waanjon̄ak eo an Nejin Jitōn bōro kōn jerbal n̄an doon.

Jet iien ko rem̧m̧an an jerbal in jipan̄ ekkā litok—ilo baam̧le eo ad, kūr ko ad ilo Kabun̄, im ad bōk kuņaad ilo doulul ko an jerbal in jipan̄ ilo jukjuk in pād eo.

Ro uwaan Kabun̄ in—m̧aan im kōrā ro jim̧or—aikuj jab āliklik, eļan̄n̄e rej ikdeelel, n̄an ettōr n̄an opiij ko an aolep ilo jabdewōt jon̄ak an kein jabdewōt jikin rej jokwe ie. Ainikier rej menin aikuj rainin im aorōk ilo jikuuļ ko ad, bukwōn ko ad, im laļ ko ad. Ijo ewōr kien anemkwoj ie, ej ad eddo āinwōt ro uwaan n̄an bouti em̧m̧aan im kōrā ro rem̧m̧an me rej kōņaan jerbal.

Elōn̄ iien ko rem̧m̧an n̄an jerbal rej kajju—ilo ejjeļo̧k ijjitōn̄—im rej itok ilo ad pukōtļo̧k ro jet jej ioon er ilo em̧m̧akūt in ad ilo mour. Keememej an kar Jisōs katakin ļoāer eo bwe jej aikuj iakwe Anij im ro rūturiid āinwōt kōj make ilo kōjerbal RiSamaia eo em̧m̧an āinwōt waanjon̄ak.⁹

Jerbal in jipan̄ ekōpeļļo̧k wintō eo me jej meļeļe kōn mour im jerbal in karejar eo an Kraist. Eaar itok n̄an jerbal, āinwōt an jeje ko rekwojarjar katakin, “āinwōt Nejin armej ear jab itok bwe armej ren jerbal n̄an e, a bwe en jerbal n̄an er, im leļo̧k an mour bwe en pinmuur n̄an ro relōn̄.”¹⁰

Piter emaron̄ in kar letok kōmeļeļe eo em̧m̧an tata an jerbal in karejar eo an Rilo̧mo̧o̧r eo ilo mour in ilo ļalem naan ko eaar kōnono kōn Jisōs, “eo ej etetal im kōm̧anm̧an em̧m̧an.”¹¹

Irooj Jisōs Kraist ej menin letok eo ad eaorōk tata iaan aolep menin letok ko jān Anij. Jisōs eaar ba, “N̄a iaļ, im m̧ool, im mour: ejjeļo̧k armej ej itok n̄an Jema, eļan̄n̄e jab kōn eō.”¹²

Nipai eaar kwaļo̧k aorōk eo an ad Rilo̧mo̧o̧r ke eaar kean̄, “Jej kōnono kōn Kraist, jej m̧ōņōņō ilo Kraist, jej kwaļo̧k kōn Kraist, jej kanaan kōn Kraist, im jej jeje ekkar n̄an kanaan ko ad, bwe ro nejid ren maron̄ jeļā n̄an ia rej maron̄ reilo̧k n̄an jeorļo̧k jero̧wiwi ko aer.”¹³ Jej aikuj dāpij wōt Kraist bwe en unjān mour ko ad aolep iien im ilo aolep jikin.

Jej aikuj keememej bwe ej kōn āt eo Etan me ej waļo̧k ilo jikin kabun̄-jar ko ad; jej peptaij ilo Etan; im jekar kapen, kar ekkapit, im kar bōk menin letok kwojarjar, im kar liāp ilo m̧are ilo Etan. Jej bōk mōttan kwojkwoj eo im kallim̧ūr n̄a bōk iood make Etan—im erom Rikirijin ro rem̧ool. Āliktata, jej kajjitōk ilo jar in kwojkwoj eo n̄an “keememej e iien otemjej.”¹⁴

Ilo ad m̧aanjappopo n̄an Jabōt in Ijtō ilju, jān keememej bwe Kraist ej uteij bōtata. E ej riekajet ewānōk, ad Rijojomar etiljek, Ripinmuur kar kōjeraam̧m̧an, Jabōt eo Em̧m̧an, Messaia eo kar kallim̧ur kake, M̧ōttad em̧ool, im eļap, eļapļo̧k jān jabdewōt. E ej ilo m̧ool juon menin letok ekanooj aorōk n̄an kōj jān Jemed.

Ilo ad kaļoor, elōn̄ ad kajjitōk ko, n̄ūrbōktak ko, im ijjitōn̄ ko. Mekarta, jet m̧akūtkūt ko raikuj iien otemjej pedped ioon ad uwaan Kabun̄ in. “Kōn menin,” Irooj ej kean̄, “kwōn niknik; jutak ilo opij eo me Iaar jitōn̄ n̄an eok; rie ro reban, kotak lōn̄ļo̧k pā ko rej allitoto, im kōkajoor bukwe ko rem̧ōjņo̧.”¹⁵

En̄in ej jerbal eo an Kabun̄ in! En̄in ej kabun̄ eo erreo! En̄in ej gospel eo ilo nememe eo an em̧ool n̄e jej jipan̄, ļōn̄aj, im kōkajoorļo̧k ro aikuj ilo jetōb im kanniōk! Kōm̧m̧ane menin ej aikuj bwe jān loļo̧k er im n̄an jipan̄ er,¹⁶ bwe naan in kam̧ool ko aer kōn tōmak ilo Jemedwōj Ilan̄ im Jisōs Kraist im Pinmuur eo An renaaj dim ilo būruwier.

Irooj en jipan̄ im kōjeraam̧m̧an kōj n̄an kaorōk menin letok ko ad raiboojoj jān Anij ekoba ad uwaan ilo Kabun̄ eo An kar kōjepļaaktok. Ij jar jenaaj obrak kōn iakwe n̄an ajri ro nejin Jemedwōj Ilan̄ im maron̄ in lo aikuj ko aer im kōņaan uwaak kajjitōk ko aer im n̄ūrbōktak ko kōn gospel eo ilo alikkar im wāween ko rejouj me renaaj kōļapļo̧k meļeļe eo im kam̧m̧oolol eo n̄an doon.

Ij kam̧ool bwe Jisōs Kraist ej ad Rilo̧mo̧o̧r. Ta eo naaj katakin kōj ilo kweilo̧k in eļap rej itok n̄an kōj kōn im̧we jān rijilōk ro im rikanaan ro, jān Ritōl ro Routiej an Kabun̄, im kōrā ritōl ro me rej Opija ro Reļļap an Kabun̄ in. Lan̄lōn̄ im aenōm̧m̧an an Irooj en pād ippāmi kajjojo ej aō jar ettā ilo etan Irooj Jisōs Kraist, amen