Kōmejajaik Jerbal in Karejar

Loļo̧k ko an em̧m̧aan im katakin an kōrā ro renaaj bōjrak aer jerbal, Būreejtōn Russell M. Nelson ekar kōjjeļļāiki ilo m̧wen̄an eo an ālkin rālep in Jabōt eo an kweilo̧k eo eļap. “Jerbal in Karejar,” juon “jerbal in pukotļo̧k ekāāl, ekwojarjarļo̧k” āinwōt Kraist n̄an kea kake ro jet, naaj leļo̧k juon kijejeto in kōpeļaak eo n̄an jipan̄ tōpar aikuj ko an membōr ro ilo jetōb im kanniōk.

Sister Jean B. Bingham, Būreejtōn eo Eutiej an Doulul eo an Kōrā ro, im Elder Jeffrey R. Holland jān Doulul eo an Jon̄oulruo Rijilōk ro rej barāinwōt kōnono kōn jerbal in pukotļo̧k in ekāāl enaaj pedped wōt ioon kijejeto ko an doulul eo an Melkisedek Priesthood eo im Doulul eo an Kōrā ro ilo jerbal in karejar āinwōt an kar Rilo̧mo̧o̧r eo kōm̧m̧ane (lale peij 101 im 104).

Laurel ro im Mia Maid ro remaron̄ jerbal āinwōt kōmpānien ro rej jerbal in karejar n̄an sister ro ilo Doulul eo an Kōrā ro. Ilo juon intōrpiu in jipan̄, rikarejar jeiū ak jatū m̧aan im rikarejar jeiū ak jatū kōrā ro renaaj ko̧o̧njeļ ippān ritōl ro kōn aikuj ko im kajoor ko an armej ro kar jitōn̄ er n̄an jerbal n̄an er. Elōn̄ intōrpiu ko an ritōl ro ilo juon kuwōta naaj wōt kōm̧m̧ane juon riboot eboļōmen. Loļo̧k ko raorōk n̄e emaron̄, ak jerbal in karejar ejjab kobaiktok juon wāween ej kōmeļeļeiki n̄an kōm̧m̧an loļo̧k kajjojo allōn̄.

“Jodikdik remaron̄ kwaļo̧k menin letok ko rejeņoļo̧k kaki im eddōkļo̧k ilo jetōb ilo aer jipan̄ ippān rūtto ro ilo jerbal in lo̧mo̧o̧r,” Sister Bingham ekar ba. Kobaiktok jodikdik ro ej barāinwōt kōļapļo̧k oran membōr ro rej kōjparok ro jet im jipan̄ jodikdik ro “em̧m̧anļo̧k aer m̧aanjabpopo n̄an kakūrm̧ool eddo ko aer āinwōt ritōl ro ilo Kabun̄ in im ilo jukjukin pād eo im āinwōt juon m̧ōttā ro rej jipan̄ ilo baam̧le ko aer.”

“Kōm̧ ilo opiij ko an Kabun̄ in jab aikuj in jeļā ewi wāween ak ia eo ak n̄āāt eo kom̧ij loļo̧k armej ro am,” Elder Holland ekar ba; “kōm̧ij aikuj in wōt jeļā im kōjparok eo me kwoj kōm̧m̧ane kōm̧m̧ane im bwe kwoj kōjeraam̧m̧an er ilo aolep wāween komaron̄e.”

Ekkar n̄an juon leta jān Būreejtōnji eo Kein Kajuon, oktak ko an jerbal in karejar emaron̄ bōk jidik iien ak ej aikuj kōm̧m̧an iien eo emaron̄. Ministering.lds.org ej letok bar jet meļeļe ko, ekoba uwaak ko n̄an kajjitōk ko emakijkij kajjitōk kaki. Pija in kōmeļeļe ko im kein jipan̄ ko jet naaj bar kobaiktok n̄an site in ilo raan kane rej itok im wiik kane tok.

Ijjino ilo Juun, Liaona enaaj koba juon kōmeļeļe ņaetan “Ministering Principles” n̄an jipan̄ membōr ro meļeļe wāween n̄an erom āinwōt Kraist ilo aer karejar n̄an doon.