Doulul eo an Elder ro
Jān Elder D. Todd Christofferson
Jān Doulul eo an Jon̄oulruo Rijilōk ro
An wōr juon wōt doulul an Melkisedek Priesthood ilo juon ward ej kakobaiki rikabwijer priesthood ro n̄an kōttōbrak aolep jekjek ko an jerbal in lo̧mo̧o̧r.
Jidik iien tokālik ālkin an kar Kabun̄ in kar ejaak ilo epepen in āliktata, Irooj ekar kwaļo̧k ilo juon revelesōn, “Im jān jar an tōmak eo ami kom̧ naaj bōk kien eo Aō, bwe kom̧in maron̄ jeļā wāween tōl kabun̄ eo Aō im kōm̧m̧an bwe aolep men otemjeļo̧k ren jim̧we Im̧aō.”1 Pedped in katak in kar ļoore m̧aantak ilo Kabun̄ in—im bwe kallim̧ur in Irooj ekar kautieje—jān jinoin. Jon̄ak ko n̄an doulul eo an priesthood im jerbal in jipan̄ rekar waļo̧ktok jān iien n̄an iien, ekar ijjino ippān Rikanaan Josep Smith ke opiij ko an priesthood im doulul ko rekar jino ejaak. Oktak kein rōkabwilōn̄lōn̄ rekar waļo̧k im kar kōjerbali ilo iien jerbal ko an Būreejtōn Brigham Young, John Taylor, Spencer W. Kimball, im Ezra Taft Benson kōn kautiej n̄an Doulul eo an Jon̄oulruo ro, Jiljilimjuonn̄oul ro, im pris ro routiej, im opiija ro jet im doulul ko ilo jim̧or Melkisedek im Priesthood eo an Aron.2 Kiiō, ilo juon ennaan ekabwilōn̄lōn̄ jejjo iien ko remootļo̧k, Būreejtōn Russell M. Nelson ekar kōjjeļļāik juon oktak eaorōk.
Eļan̄n̄e imaron̄ bar āliji jet iaan ennaan ko an: “Joteen in kōm kar kōjjeļļāiki juon bar ejaak ekabwilōn̄lōn̄ an doulul ko an Melkisedek Priesthood eo n̄an kōm̧anm̧anļo̧k kōttōbrak jerbal in an Irooj. Ilo kajjojo ward, pris ro routiej im elder ro renaaj kiiō kobaik juon doulul eo an elder ro … [im] kobain doulul [pris ro routiej an stake eo] naaj pedped wōt ioon kūr ko an priesthood eo kiiō.”
Būreejtōn Nelson ekar kakobaba:
“Ukoktak kein kar katak kaki ium̧win elōn̄ allōn̄ ko. Jekar en̄jake juon menin aikuj kōm̧m̧an kiiō wōt n̄an kōkōm̧anm̧anļo̧k wāween ad kōjparok membōr ro ad. … N̄an kōm̧m̧an bwen ren em̧m̧an, jej aikuj in kōkajoorļo̧k doulul ko an priesthood ko n̄an leļo̧k eļapļo̧k tōl n̄an jerbal in karejar kōn iakwe im jipan̄ ta eo Irooj ekōņaan n̄an aolep Rikwojarjar ro An.
“Oktak kein rej im̧we jān Irooj. Ilo ad kōjerbali, jenaaj wājabdikļo̧k jān kar m̧okta.”3
Ilo tōl in an Būreejtōnji eo Kein Kajuon, Elder Ronald A. Rasband im n̄a kom̧ro naaj kobaiki jet meļeļe ko me kōmij lōki renaaj uwaak n̄an kajjitōk ko emaron̄ wōr ippemi.
Doulul ko an Elder ro im Pris ro Routiej
Kein kajuon, n̄an bar āliji, ta oktak ko n̄an doulul ko an pris ro routiej im elder ro an ward? Ilo ward ko, membōr ro an doulul ko an elder im kūrub ko an pris ro routiej renaaj kiiō kobaik juon doulul an Melkesidek Priesthood ippān juon wōt būreejtōnji. Doulul in, enej lōn̄ļo̧k oran im bōro kuk, naaj karōke “doulul eo an elder ro.” Kūrub ko an pris ro routiej renej bōjrak. Doulul eo an elder ro ekitbuuj aolep elder im em̧m̧aan ro rejjan̄in bōk Melkisedek Priesthood eo ilo ward eo barāinwōt ilo pris ro routiej ro kiiō rejjab jerbal ilo bisoprik eo, ilo stake būreejtōnji eo, ilo ko̧o̧njeļ eo eutiej, ak jerbal āinwōt petriak ro. Doulul eo an pris ro routiej ilo stake enaaj ejaak jān ro rej pris ro routiej ro rej jerbal ilo stake būreejtōnji, ilo bisoprik ko, ilo ko̧o̧njeļ eo eutiej, im jerbal āinwōt petriak ro.
Doulul eo an Būreejtōnji eo an Elder
Ewi wāween an būreejtōnji eo an doulul eo an elder ro maron̄ ejaak? Stake būreejtōnji eo renaaj kōtļo̧k ritōl ro kiiō an pris ro routiej im būreejtōnji ko an doulul ko an elder ro im naaj kūr juon būreejtōn an doulul eo an elder ro im rikakpilōklōk ro ilo kajjojo ward ak branch. Būreejtōnji eo an doulul eo an elder ekāāl emaron̄ ejaak jān kobain elder ro im pris ro routiej, an iiō ko roktak im imminene ko, jerbal ippān doon ilo juon būreejtōnji an doulul. Emaron̄ juon elder ak juon pris eutiej emaron̄ jerbal āinwōt būreejtōn an doulul in ak āinwōt juon rikakpilōklōk ilo būreejtōnji eo. Menin ejjab juon “men ej bōk eddo ko” an doulul eo an elder ro jān pris ro routiej. Kōmij kōtmāne bwe elder ro im pris ro ren jerbal ippān doon ilo jabdewōt ippān doon ko ilo doulul an būreejtōnji eo im ilo jerbal in jipan̄ an doulul in. Oktak kein an doulul kein rej aikuj im kōjerbali iien eo emōkajtata im n̄e emaron̄.
Opiij ko an Priesthood ilo Doulul eo an Elder ro
Oktak in ilo ejaak in an doulul in ej ke ukōt opiij eo an priesthood eo me membōr in doulul eo rej kabwijere? Ejjab, m̧akūtkūt in ejjab ukōte jabdewōt priesthood opiij eo me jabdewōt membōr in doulul eo rekar maron̄ ekkapit n̄ane m̧oktaļo̧k. Āinwōt ami jeļā, juon em̧m̧aan emaron̄ kar ekkapit n̄an opiij ko an priesthood roktak ilo aolepān mour eo an, im ejjab luuji ak jako jabdewōt ekkapit ko rekar kōm̧m̧an m̧oktaļo̧k n̄e ej bōk juon eo ekāāl. Ilo jet jekjek juon rikabwijer priesthood eo emaron̄ jerbal ilo elōn̄ļo̧k jān juon opiij ilo juon iien, āinwōt n̄e juon pris eutiej ej barāinwōt jerbal āinwōt juon petriak ak āinwōt juon bisop, e ejjab jerbal ilo aolep an priesthood opiij ilo iien eo wōt. Bisop ro im Jiljilimjuonn̄oul ro, ilo juon wāween, rejjab jerbal ilo opiij kein eļan̄n̄e em̧ōj kōtļo̧k er ak kōm̧m̧an ak kōtļo̧k aer kakkije. En̄in, jabdewōt priesthood opiij ak opiij ko jet juon em̧m̧aan emaron̄ kabwijere, tōre eo im ej membōr in uwaan doulul eo an elder ro, ej jerbal āinwōt juon elder.
Iiō ko ļo̧k, Būreejtōn Boyd K. Packer ekar etale bwe “priesthood eo ej ļapļo̧k jān jabdewōt opiij ko an. … Priesthood eo ejjab jenolo̧k. Im juon elder ej kabwijer eļap priesthood eo āinwōt juon Rijilōk. (Lale K&B 20:38.) N̄e juon em̧m̧aan [em̧ōj kar leļo̧k n̄an priesthood eo], ej bōk aolepān. Ijoke, ewōr opiij ko ilowaan priesthood eo—jenolo̧k ko kōn maron̄ im eddo. … Jet iien kōnono kōn juon opiij āinwōt ‘eutiejļo̧k jān’ ak ‘ettāļo̧k jān’ bar juon opiij. Ijjelo̧kin ‘utiejļo̧k’ ak ‘ettāļo̧k,’ opiij ko ilo Melkisedek Priesthood rej bōk jikin jerbal ko roktak.”4 Ij lukkuun kōjatdikdik bwe jej jāmin bar kōnono kōn “kālōn̄ļo̧k” n̄an bar juon opiij ilo Melkisedek Priesthood eo.
Elder ro renaaj wōnm̧aanļo̧k im ekkapit āinwōt pris ro routiej n̄e rej kūr er n̄an juon stake būreejtōnji, ko̧o̧njeļ eutiej, ak bisoprik—ak ilo iien ko jet ļam̧ļami jān stake būreejtōn eo jān lukkuun jar im kejōkļo̧kjeņ im im̧we. N̄e tōōm̧ in jerbal ko aer ilo stake būreejtōnji, ko̧o̧njeļ eo eutiej, ak bisoprik rejem̧ļo̧k, pris ro routiej renaaj kobaļo̧k ippān doulul eo an elder ro ilo ward eo aer.
Eddo in tōl n̄an Būreejtōn eo an Doulul eo an Elder ro
Wōn eo ej eddo in tōl jerbal eo an būreejtōn eo an elder. Stake būreejtōnji eo ej tōl Melkisedek Priesthood eo ilo stake. Kōn menin, būreejtōn eo an doulul eo an elder ej lukkuun ilo̧k eddo eo n̄an stake būreejtōn eo, eo ej leļo̧k kamminene im wāween tōl ko jān stake būreejtōnji eo im jān ko̧o̧njeļ eo eutiej. Bisop eo, āinwōt juon pris eutiej ej tōl ward eo, ej barāinwōt kweilo̧k aolep iien ippān būreejtōn eo an doulul eo an elder. Bisop eo ej ko̧o̧njeļ ippān im ej leļo̧k eddo in tōl ko rekkar rejelet wāween jerbal eo em̧m̧an n̄an jerbal im kōjeraam̧m̧an membōr ro an ward eo, jerbal ilo ineem̧m̧an ippān doulul ko an ward eo.5
Kōttōbar eo an Oktak Kein
Ta kōttōbar ko an oktak kein n̄an doulul ko an Melkisedek Priesthood? Bwen wōr wōt juon doulul eo an Melkisedek Priesthood ilowaan juon ward im ej kobaik rikabwijer priesthood ro n̄an kōttōbrak aolep wāween jerbal in lo̧mo̧o̧r ko, ekoba tampeļ im jerbal an tampeļ ko kar kōm̧m̧an m̧oktaļo̧k jān kūrub ko an pris ro routiej. Ej kōtļo̧k an membōr ro an doulul jān aolep iiō im kadkad in mour jeraam̧m̧an jān juon wāween im en̄jake jān bar juon armej im jān ro iiō ko aer roktak ilo mour. Ej barāinwōt letok iien ko rem̧m̧an n̄an rikabwijer priesthood ro reminene n̄an katakin ro jet, ekoba em̧m̧aan ro rejjan̄in bōk melkisedek priesthood eo, membōr ro rekāāl, rūm̧m̧an ded ro, im ro rej kab bar ro̧o̧ltok n̄an m̧akūtkūt ko an Kabun̄ in. Ijjab maron̄ kwaļo̧k jon̄an aō m̧ōņōņō im errā kōn ļapļo̧k in eddo in eaorōk me doulul eo an elder renaaj kōm̧m̧ane ilju im jekļaj. Māletlet, en̄jake, maron̄, im kajoor eo me renaaj waļo̧k ilo doulul kein renej kwaļo̧k juon raan ekāāl im juon jon̄ak ekāāl an jerbal in jipan̄ eo an priesthood aolepān Kabun̄ in.
Ruo iiō ko remootļo̧k ilo kweilo̧k eo eļap, ij kobaiktok juon bwebwenato kar jiron̄ jān Elder Vaugn J. Featherstone jān Jiljilimjuonn̄oul eo me ij tōmake eaorōk bwe in āliji ijin.
Ilo 1918 eo Jeid George Goates ekar juon rikallib eo ekar kallib sugar biit ilo Lehi, Utah. Ekar jino Winter im̧aan iiō eo im ekar kwōj enan̄in aolep jikin kallib biit eo an ilo bwidej. N̄an George im ļaddik eo nejin edik Francis, totaki jikin kallib eo ekar jab ļap tōbrak im pen. Ilo ejja iien in wōt, juon nan̄inmej in pļu ekar jelet elōn̄ armej. Nan̄inmej in enana ekar bōk mour ko an ļaddik eo nejin George Charles im jilu ajri ro reddik—ruo leddik jiddik im juon ļaddik. Ilo jiljino raan ko, George Goates ekar kōm̧m̧ane jilu tūreep ko rejenolo̧k n̄an Ogden, Utah, n̄an bōktok ānbwin ko n̄an kalbwini. Ilo jem̧ļo̧kin iien in enana, George im Francis kar kapenļo̧k wagon ko waer im jibadōkļo̧k jikin kallib biit eo.
“[Ilo iaļ eo an] rekar etal eļļāļo̧k jān wagon im bar wagon robrak kōn biit kar ektakiļo̧k n̄an bāāktōre im rikallib ro riturin rekar ektakiļo̧k. Ilo aer eļļā jān wagon ko, kajjojo rikattōr rekar kotak peier jeaļļe: ‘Iakwe eok, Uncle George,’ ‘Lukkuun joļo̧k bōd, George,’ ‘Ejjab lukkuun em̧m̧an, George,’ ‘Ebooļ ro m̧ōttam̧, George.’
“Ioon wagon eo āliktata ekar … Jasper Rolfe eo elibjinjin turin mejān. Ekar jeaļļe kōn m̧ōņōņō im kar ikkūrļo̧k: ‘Erkein rej aolepāer, Ulepa George.’
“[Jeiū Goates] oktakļo̧k n̄an Francis im ba: ‘Ikōņaan bwen kar ad aolepāer.’
“Ke rekar itaakļo̧k ilo kōjem̧ in jikin kallib eo, Francis ekar kelaļļo̧k jān wagon būrōrō in biit eo im kōppeļo̧k kōjem̧ eo ke [jemān] ekar kattōrļo̧k n̄an jikin kallib eo. [George] ekar kabōjrak kidia ko, kabōjraki, … etale jikin kallib ņe. … Ekar ejjeļo̧k juon widin sugar biit ilo aolepān jikin kallib eo. Innām ej kile ta eo Jasper Rolfe ekar ba ke ekar lam̧ōjļo̧k: ‘Erkein rej’ aolepāer, Ulepa George!’
“[George] ekar tulaļļo̧k jān wagon eo, bōk jidik in bwidej eo em̧m̧an, ebūrawin eļap an iakwe, innām … juon biit, im ekar ļōmņak kōn juon iien ilo kōkkaļļe kein jān jerbal ko an, āinwōt ekar jab maron̄ tōmak kōn mejān.
“Innām [e] ekar jijet laļļo̧k ioon juon pinju in biit—em̧m̧aan in eo ekar bōktok ro rejitōn bōro ippān bwen kalbwin er ilowaan wōt jiljino raan ko; ekar kōm̧m̧an bo̧o̧k in rimej ko, kūbwij rōn̄ in rimej ro, im aaet jipan̄ kōn nuknuk in kallib ko—em̧m̧aan in ekabwilōn̄lōn̄ eo ejjan̄in kar wōtlo̧k, barāinwōt metak, barāinwōt n̄ūrbōktak ilo aolepān iien en̄taan in—ekar jijet laļļo̧k ioon juon pinju in biit ko im m̧ōtato āinwōt juon ajri.
“Innām ekar jerkak, ir turin mejān, … reilōn̄ļo̧k n̄an lan̄ imejatoto, im ba: “Kom̧m̧ool Baba, kōn Elder ro an ward eo am̧.’”6
Aaet, kam̧m̧oolol Anij kōn em̧m̧aan ro an priesthood eo im kōn jerbal in jipan̄ eo renaaj kiiō kōm̧m̧ane ilo kotak kajjojo armej im baam̧le ko im ejaake Zaion.
Būreejtōnji eo Kein Kajuon, Doulul eo an Jon̄oulruo Rijilōk ro, im Būreejtōnji eo an Jiljilimjuonn̄oul eo rekar ļōmņak kōn oktak kein ium̧win juon tōre. Kōn eļap jar, tiljek in ekkatak jān pedped ko an doulul ko an priesthood, im kapene bwe en̄in ej ankilaan Irooj, jenaaj wōnm̧aanļo̧k kōn koņ an aolep ilo ta em̧ool ej bar juon bun̄tōn ilo kaddōkļo̧k Jepļaaktok eo. Eddo in tōl eo an Irooj ej waļo̧k, im ij lan̄lōn̄ ilo menin, āinwōt aō kwaļo̧k kam̧ool eo aō kōn E, priesthood eo An, im ekkapit ko ami ilo priesthood in, ilo etan Jisōs Kraist, amen.