Kraist, Irooj E, Ear Jerkakbije Rainin
Jān Elder Gerrit W. Gong
Jān Doulul eo an Jon̄oulruo Rijilōk ro
En̄in ej Jabōt in Ijtō. Ilo kam̧ool im kwaļo̧k kam̧ool kōn Kraist eo emour—Eaar E eo ekar “mej, kar kallib, im kar bar jerkak ilo raan eo kein kajilu.”
Ro jeiū im jatū rejitōn bōro, ke ļaddik ro nejim raar lukkuun iddik, iaar jiron̄ er bwebwenato in kiki ko kōn beagle kidu jiddik ko im al in kiki ko in̄ūrn̄ur kaki, ekoba “Christ the Lord is Risen Today!”1 Jet iien ikar ikkure im ukōt naan ko: Kiiō ej iien etal in kiki, alleluia. Ekkā an ļaddik ro nejim m̧ōkaj aer emadidiļo̧k; ak raar jeļā eļan̄n̄e ij ļōmņak raar tōn in kiki, ekōn bōjrak aō al.
Naan ko—naan ko aō—rejjab maron̄ kwaļo̧k en̄jake in eļap jān ke Būreejtōn Russell M. Nelson ilo iakwe jibwe peiū ilo pein, Susan aō jitōn bōro iturejetū, im kar letok kūr kwojarjar in jān Irooj me ekar bōkļo̧k kūtuwō im kōm̧m̧an bwe in jan̄ elōn̄ alen ilo raan ko rej jem̧ļo̧kļo̧k.
Jabōt in Ijtō in, ij lan̄lōn̄ ilo al, “Aleluia.” Al eo kōn iakwe in pinmuur eo an ad jerkakpeje Rilo̧mo̧o̧r ej2 kam̧m̧oolol kōn jokkuun eo an bujen ko (bwe ekkejel eo ad n̄an Anij im n̄an katakin doon) im Pinmuur eo an Jisōs Kraist (me ejipan̄ kōj joļo̧k lukkuun piktok in m̧aan im kōrā ro im kōtļo̧k er n̄an karrelel ko an Jetōb Kwojarjar3).
Ippān doon, bujen ko ad im Pinmuur eo an ad Rilo̧mo̧o̧r eo rej kōmaron̄ im utiej. Ippān doon, rejipan̄ kōj erom tiljek im joļo̧k jerawiwi ko. Ippān doon, rem̧m̧an, kōjparoki, kōkwojarjari, lo̧mo̧o̧reni.
Rikanaan Josep Smith eaar ba: “E maron̄ āinwōt n̄an jet bwe ej juon katak ekanooj bōllel im jej ekkōnono kake—juon kajoor eo ej ļo̧o̧ke ak liāpe ioon laļ im liāpe ilo lan̄. Mekarta, ilo aolep dettan ko an laļ, jabdewōt iien ke Irooj eaar leļo̧k juon tōre in bōk eddo an priesthood eo n̄an jabdewōt em̧m̧aan jān lukkuun revelesōn, ak jabdewōt kumi in em̧m̧aan, kajoor in ekar leļo̧ke iien otemjej.”4
Im ejja āinwōt rainin. Bujen ko im kain̄i ko rekwojarjar, rejjab waļo̧k jabdewōt bar jikin, rej būki ilo 159 m̧ōko rekwojarjar im̧ōn Irooj ilo 43 laļ ko. Kōjeram̧m̧an ko kar kallim̧ur kaki rej itok kōn kii ko an priesthood eo kar kōjepļaakitok, katak im mālim, kwaļo̧k ad tōmak, pokake, im kallim̧ur ko an Jetōb Kwojarjar eo An n̄an kōj ilo epepen ko ad, ilo iien im indeeo.
Ro jeiū im jatū jitōn bōro ilo aolep laļ, armej, im lo, aolepān Kabun̄ in ad aolepān laļ in, kom̧ em̧m̧ool kōn ami mour kōn ami tōmak, kōjatdikdik, im iakwe-erreo ilo aolep bun̄tōn nee. Kom̧ em̧m̧ool n̄an erom m̧ōttan kuktok eo edipio an en̄jake an gospel eo kar kōjepļaaktok im naan in kam̧ool.
Ro jeiū im jatū, jej jokkuun wōt juon n̄an doon. Jemaron̄ “ekkejel n̄an doon ilo juon wōt im ilo iakwe,5 ilo aolep men ko ilo aolep jikin ko.6 Ilo an Irooj Jisōs Kraist karuwaineneiktok kōj kajjojo, jekdo̧o̧n ia eo jej pād ie, jekdo̧o̧n jekjek rot ko ad, jouj “itok im lo.”7
Ilo ranin ij etta ilo kallim̧ur kōn aolepān kajoor im ekeke ko aō,8 jekdo̧o̧n ta remaron̄ in erom, n̄an aō Rilo̧mo̧o̧r, n̄an aō jitōnbōro Susan im baam̧le eo am, n̄an Ritōl ro aō, im n̄an kōj kajjojo, ro jeiū im jatū jitōnbōro.
Aolep men ko eļap tokjāer im indeeo ej kaorōk ilo m̧ool in Anij eo emour Jemed Indeeo eo em̧m̧an, im Nejin, Jisōs Kraist, im Pinmuur eo An, kar kam̧ool jān Jetōb Kwojarjar.9 En̄in ej Jabōt in Ijtō. Ilo kam̧ool im kwaļo̧k kam̧ool kōn Kraist eo emour—Eaar eo ekar “mej, kar kallib, im kar bar jerkak ilo raan eo kein kajilu, im walōn̄ļo̧k n̄an lan̄.”10 E ej Jino im Jem̧ļo̧kin11—ippād ilo jinoin, Ej pād ippād n̄an jem̧ļo̧kin.
Ij kam̧ool kōn rikanana ro ilo raan ko āliktata, jān Rikanaan Josep Smith n̄an ad jitōn bōro Būreejtōn Russell M. Nelson, eo jej lan̄lōn̄ iin rejtake. Āinwōt an ajri ro nejid ilo Būraimere al, “Ļoor rikanaan eo; ejeļā iaļ eo.12 Ij kam̧ool bwe, āinwōt kar kanaan kake ilo jeje ko rekwojarjar, ekoba Bok in Mormon; Bar juon Kam̧ool an Jisōs Kraist, “kōn aelōn̄ in kiin̄ eo an Irooj ej barjuon alen jutak ioon laļ in, m̧aanjappopo n̄an Itok eo Kein Karuo an Messiah eo.”13 Ilo kwojarjar im āt eo ekwojarjar etan Jisōs Kraist, amen.