Bonnie H. Cordon
Būreejtōn eo Eļap an Doulul eo an Jiron̄ ro
Juon eoon elukkuun em̧m̧an ippān Sister Bonnie H. Cordon ej waļo̧k ilo Katak im Bujen ko 123:17: “jen kōm̧m̧ani aolep men kein ilo m̧ōņōņō ko im rej pād ilo ad kajoor; innām jen jutak pen, kōn jeļā ekanooj dim, n̄an lo lo̧mo̧o̧r an Anij, im n̄an an kwaļo̧k Pein.”
N̄an e eoon in ej kwaļo̧k katak ko me ej aikuj in ekkatak ilo aolepān an mour. “Jemaron̄ kōm̧m̧an men ko reppen, ak jemaron̄ barāinwōt kōm̧m̧ani ilo lan̄lōn̄,” Sister Cordon ekar ba, eo me rekar rejtake ilo Maaj 31, 2018, āinwōt Būreejtōn eo Ekāāl Eutiej an Doulul eo an Jiron̄ ro.
Jeļāļo̧kjeņ in ekar pād wōt ippān ilo juon “an bwebwenato ke ej ajri” jerbal ilo juon jikin kallib ilo tuiiō turear in Idaho innām ke ekar pen an ekkatak bar juon kajin āinwōt juon kar mijenede ilo Portugal. Ekar barāinwōt juon ennaan ekar āliji n̄an mijenede ro ke ekar jerbal ippān ļeo pāleen ke ļeo ippān ej tōl Brazil Curitiba Mission. Im ej juon eo ej kiiō karōk n̄an an kwaļo̧ke ippān jiron̄ ro ipeļaakin laļ in.
Jiron̄ ro rainin, ekar ba, em̧ōj kajjitōk ippāer n̄an jutak im kōm̧akūt m̧aanļo̧k jerbal in an Irooj. “Im jemaron̄ kōm̧m̧ane,” ekar kakkobaba.
Bonnie Hillam Cordon ekar ļotak ilo Maaj 11, 1964, n̄an Harold im Carol Rasmussen Hillam ilo Idaho Falls, Idaho, USA. Ālkin mijen eo an ekar bōk juon bachelor degree kōn education ilo Brigham Young University, ijo im ekar ioon Derek Lane Cordon. Rekar m̧are ilo Eprōļ 25, 1986, ilo Salt Lake Temple. Ewōr ralitōk nejierro im emān jibūero.
Jerbal in jipan̄ eo an ilo Kabun̄ in rekoba iien eo ekar āinwōt juon ritōl an nursery im rūkaki in jemenere. Mokta jān kūr eo an ruo iiō remootļo̧k n̄an jerbal āinwōt juon rikakpilōklōk ilo Būreejtōnji eo Eļap an Būraimere, Sister Cordon ekar m̧ōņōņō ilo an kar jerbal āinwōt būreejtōn eo an Doulul eo an Jiron̄ ro ilo Stake. Mekarta em̧ōj kar kōtļo̧ke jān kūr in, “Ekar jab bōjrak aō jar kōn jiron̄ ro,” ekar ba.
Juon ennaan ej kijoror in ba n̄an jiron̄ ro ipeļaakin laļ in bwe ej iakwe er im, men eo eaorōkļo̧k, ej bwe Anij ej iakwe er.