Jen Wōnm̧aanļo̧k Wōt
Jān Būreejtōn Russell M. Nelson
Ami ikdeleel n̄an pokake enaaj kōkōm̧anm̧anļo̧k kom̧ ilo ami keememej im kejōkļo̧kjeņ kōn ta ko kom̧ kar en̄jake ilo raan kein ruo rej mootļo̧k.
Ro jeiū im jatū, ilo ad itok n̄an ad kiil kweilo̧k in ekabwilōn̄lōn̄, ij kobawaj ippemi im kam̧m̧oolol Irooj kōn tōl eo An im im̧we eo an ekajoor. Al ko rekar aiboojoj im kōbōkakkak. Kōnono ko rekar jab wōt kōketak kōj, ak rekar barāinwōt ukōt mour!
Jekar rejtake Būreejtōnji eo Ekāāl ilo iien rejtake eo an ritōl ro ad ilo koba in ekwojarjar. Ruo em̧m̧aan kijon̄jon̄ kar maron̄ kobaiktok ilo Doulul eo an Jon̄oulruo Rijilōk ro. Im ralitōk Ritōl ro Routiej ilo Jiljilimjuonn̄oul ro rekāāl kar kūr er.
Kiiō juon al em̧m̧an ej kōmeļeļeiki ilo tukaduin karōk ekāāl, apan̄ eo ad, im eddo eo ad kiiō im wōnm̧aanļo̧k.
Jen aolep wōnm̧aanļo̧k ilo jerbal eo an Irooj.
Bwe n̄e mour in ej jem̧ļo̧k jemaron̄ bōk juon jineekjej;
Ilo tariņae in kōn jim̧we jen kōkajoorļo̧k juon jāje,
Jāje eo ekajoor an m̧ool eo.
Jab mijak men̄e rikajdat eo ej kajirere;
Peran, bwe Irooj ej pād ippād.
Jej jāmin eo̧ron̄ ta eo enana emaron̄ ba,
Ak Irooj wōt jenaaj pokake E.1
Ij rōjan̄ kom̧ n̄an ekkatak jān ekōnono kein an kweilo̧k in ilo emakijkij—aaet bar āliji—ilowaan jiljiino allōn̄ kein rej pedtok. Kajjieon̄ kōm̧m̧an kijejeto n̄an pukot wāween ko n̄an kōjerbal kōnono kein ilo nokon in jota eo an baam̧le ko ami, ami katakin gospel eo, ami kōnono ippān baam̧le ko im ro m̧ōttami, im aaet ami bwebwenato ippān ro rejjab jān tōmak in ad. Elōn̄ armej ro rem̧m̧an renaaj uwaak n̄an m̧ool ko katakin ilo kweilo̧k in n̄e jej leļo̧k ilo iakwe. Ami ikdeleel n̄an pokake enaaj kōkōm̧anm̧anļo̧k kom̧ ilo ami keememej im kejōkļo̧kjeņ kōn ta ko kom̧ kar en̄jake ilo raan kein ruo rej mootļo̧k.
Kweilo̧k eo eļap ej kōkkaļļeiki juon ijjino ekāāl an jerbal in karejar. Irooj ekar kōm̧m̧an oktak ko ilo wāween eo jej kea kōn doon. Ro jeiū im jatū—rūtto im ro reddik—jenaaj jerbal n̄an doon ilo juon wāween, ekwojarjarļo̧k. Doulul ko an em̧m̧aan ro renaaj kōkajoorļo̧k im kōjeraam̧m̧an mour ko an em̧m̧aan ro, kōrā ro, im ajri ro ipeļaakin laļ in. Kōrā ro jeid im jatid ilo Doulul eo an Kōrā renaaj wōnm̧aanļo̧k im karejar ilo wāween eo aer em̧m̧an im iakwe, leļo̧k iien em̧m̧an n̄an jiron̄ ro n̄an koba ippāer āinwōt jejjet kar jitōn̄ er.
Ennaan eo ad n̄an laļ in eļam̧ waan im em̧ool: jej karuwaineneik aolep ajri ro nejin Anij rej pād jim̧or turājet ko ilo rōn̄ōļ n̄an itok n̄an Rilo̧mo̧o̧r eo aer, bōk kōjeraam̧m̧an ko an tampeļ eo ekwojarjar, bōk lan̄lōn̄ in kijenmej, im bōnjān ko rem̧m̧an an mour indeeo.2
Wanlōn̄ļo̧k eo ālik im āliktata ej aikuji ad lukkuun tiljek kiiō n̄an bujen ko jej kōm̧m̧ani im kain̄i ko jej būki ilo m̧weo im̧ōn Irooj. Ilo iien in, ewōr 159 tampeļ ko ad rej jerbal, im ebar wōr rej pād wōt ilo aer ekkal. Jekōņaan kepaakwaj tampeļ ko ilo an debakbakļo̧k im lōn̄ļo̧k ro uwaan Kabun̄ in. Kōn menin jej kiiō jouj im kōjjeļļāiki karōk in ekkal ko n̄an kalōl bar jiljilimjuon tampeļ. Tampeļ kein renaaj pād ilo jikin kein rej ellaajrak: Salta, Argentina; Bengaluru, India; Managua, Nicaragua; Cagayan de Oro, Phillippines; Layton, Utah; Richmond, Virginia; im juon jikin eļap nej kalikkar ilo Russia.
Ro jeiū im jatū, ekkal an tampeļ kein remaron̄ jab ukōt mour eo ami, bōtaab iien eo ami ilo tampeļ ko em̧ool renaaj. Ilo jetōb in, ij kōjeraam̧m̧an kom̧ n̄an lali men ko komaron̄ likūti iturājet bwe kom̧in maron̄ joļo̧k eļapļo̧k iien ilo tampeļ eo. Ij kōjeraam̧m̧an kom̧ kōn eļapļo̧k aenōm̧m̧an im iakwe ilo m̧weo im̧ōmi im kōn juon ikdeleel em̧wilaļ n̄an kōjparok kōta ko kōtaan baam̧le ko ami n̄an indeeo. Ij kōjeraam̧m̧an kom̧ kōn eļapļo̧k tōmak ilo Irooj Jisōs Kraist im juon maron̄ eļapļo̧k n̄an ļoor E āinwōt rijilōk ro An rem̧ool.
Ij kōjeraam̧m̧an ko n̄an kotak ainikien naan in kam̧ool eo ami, āinwōt aō kiiō kōm̧m̧ane, bwe jej pād ilo jerbal eo an Anij Ekajoor Pōtata! Jisōs ej RiKraist eo. En̄in ej Kabun̄ eo An, eo Ej tōl jān rikarejar ro An em̧ōj kapit er. Āindein ij kam̧ool, kōn naan in iakwe n̄an kom̧ kajjojo, ilo et eo ekwojarjar etan Jisōs Kraist, amen.