N Tokin te tai Te Utu ae Akea Tokina
E maeka te tia korokaraki i Colorado, USA.
“Ao te bwai are ko kabaea iaon te aba e na kabaeaki i karawa” (Ereman 10:7).
Tera ae e nanonaki ‘Te Utu Akea Tokina’?” E titiraki Mia. E kabuta waana iaon te baba n takakaro. Neiei ma raraona Zoey, a takakaro n ana ruu ni katangaina Zoey. Iaon te oo bon te tamnei are e taku, “Te Utu Akea Tokina.” Mia e tangira te iango anne.
“Nanona bwa e ngae ngke ko a tia ni mate, bon ngkoe naba kain te utu,” Zoey e kabwarabwara. E katuka ana kaati ao e kabuta waana.
Mia e tarataranako inanon te ruu. E tara ni bon tei n arona. Iai kaintekateka, taibora, uninga ao te TV. Ma ana auti Zoey iai te namakin ae kaokoro iai. “Iai am utu ae akea tokina?” E titiraki Mia.
Zoey e taratarake man ana takakaro ma te moangare. “Eng! Tinau ao tamau a mareaki n te tembora. Ngare are ti kona ni manga ikotaki n aki toki.”
“Anne bukina ngkai e rang kaokoro te namakin n am auti?” E titiraki Mia.
E taraa ni mimi Zoey. “E kaokoro?”
Mia e a kabi ni kabwarabwara te namakin n ana auti Zoey. E kakukurei ao e rau. Ma kaanga e bon kamanga taekinana. “Tai tabe iai,” e taku. “Tia a reitanako ara takakaro.”
Te tairiki anne Mia e aki kona ni katoka iangoaia ana utu Zoey ae akea tokina. E tangira te namakin n ana auti Zoey. Ana utu Mia a na mwaing nako Ontario, Canada, inanon tabeua te bong. E iangoia bwa ana aekakira ana namakin n ana auti ae boou.
“Tinau, ana auti Zoey I namakina iai te kukurei,” e taku Mia ngke e kawenea n ana kainiwene. “I tangira ara auti ae boou bwa N na namakina iai aekakin arei.” Mia e iangoa ana tangira nakon Tinana, Tamana, ao mwanena aika a uarereke. “I tangira naba ara utu ae akea tokina.”
Tinana e ongora ao e aki kakarongoa. Imwiina ao e taku, “Ngai naba.”
Te bong are imwiina, Tinana e tabeboniia tinan Zoey. E kunea bwa ana utu Zoey a kaina Ana Ekaretia Iesu Kristo Ibukiia Aika a Itiaki ni Boong Aika Kaitira.
“I kan kaina naba te ekaretia anne,” Mia e tuangiia ana karo ngke a barongai aia bwai. Aia auti e a kan bane bwaina n te tai aei.
“Tinan Zoey e taku bwa e kona ni buokiira ni kakaea ana kateitei te ekaretia,” e taetae Tamana ngkai e kaina te bwaoki.
Mia e moangare ao e namakina ae nanobwi. Tao ngkannae aia auti ae boou e na kona iai n namakina te tangira ao te kukurei n aekan ana auti Zoey!
N te tai are a roko iai ni mweengaia ae boou, ana utu Mia a waaki n nanako n taromauri. Aomata ikekei a rang n tikiraoi. Nikabane a weteia bwa “Tariu” ao “Mwaneu.” Mia e kaea te Moanrinan ma mwanena ake a uarereke. E tatangiria n anenei kuuna ao ni wareki koroboki aika a tabu.
N te tai ae uarereke uoman aine a kawara ana auti Mia. Araia bon Titita Justing ao Titita Ramos, ao bon mitinare naakai. A tuangiia ana utu Mia taekan Tamara are i Karawa, Iesu, ao Ana Boki Moomon. Mia e tatangira taekan te euangkerio. Riki mwanena a tekateka n aki karongoa ao n ongora!
Mia e tuanga Titita Ramos ao Titita Justing taekan ana auti Zoey. “I tangira te utu ae akea tokina n aekan Zoey.”
“Tamara are i Karawa e tangiriia ni kabane ngaira bwa tina karekea ara utu ae akea tokina,” e taku Titita Ramos ma moangarena ae bubura. “E tangirira bwa ti na kukurei.”
N te tai ae waekoa ana utu Mia a baireia bwa a na bwabetitoaki.
Zoey ao ana utu a buti nako Ontario bwa a na bwabetitoaki. Te ririki are imwiina, a manga oki naba. N te tai aei ibukina bwa Mia ma ana utu a nang kabaeaki n te tembora!
Te bong ni kabaebae, Mia e tei itinanikun te tembora ma ana utu, ma kunikaia ae mainaina. A bane ni moangare imarenaia. Sofía e namakina te tangira ao te rau inanona. “Ngkai tia riki bwa te utu ae akea tokina!” e taekinna ma te kukurei.
“E koaua anne,” e taku Tamau. “Ngaira te utu ae akea tokina.”