Namakinan te Aki Reitaki ma te Maiu n Tamnei? Kataia n Aki Rangin ni Kakawaekoa
“I tangira te tataninga,” Akea ae a tia n atonga. Ma tao a bon riai.
Kamataata n te Tamnei iroun Pascal Campion
Ngkana ko iangoia n tataninga n te rain ae abwabwaki bwa te bwai ae na kakamaku n aroia tibwaita ke naeta, ti tebo ngkoe ma aomata ake tabeman.
E ngae ngke ti tei n te rain, tekateka ni katobibi, ke n tarataraa te bwati, ti ribaa te tataninga.
Te tekeraoi ibukira, te tataninga kanga ti tebo ma te mii buaka: n te kaantaninga are te bwai ae ti makua, ma tiaki te bwai ae ti tataneiai ma ngaia ni katoabong. Ti maiu n te tai are ti riai n tataninga ibukin te bwai teuana. Bwaai n rabakau a kabirimwakai bwaai ni kabane n ae rangin ni korakora n te aro are ti a kona ni kabanea ara tai iaon te bwai teuana n te tai ae uarereke nakon ae kona te ika ae uarereke. (eng, e koaua aei).1 Ngkana e roko kainnanoan te tataninga, ti kataia ni katabetabea ara tai—riki man kabanean ara tai iaon te mobwaire.
Akea te bwai ae kairua ma bwainrabakau ke aika nakoraoi, ma te maiu ae baiti ao te kawai ae teimatoa e kona ni kararoaira ma bwaai aika kakawaki riki.
E Raka Riki Nakon Tangiraoin Koroboki Aika Tabu
E aki maan n nako, I namakinna ae ai bon akea namakinan te tamnei irou. I aki kona n oota iai. N na nakon te taromauri, n taekin tataro aika kimototo, ao n tarai ibukin te tai aei au boki aika tabu. I aki toki n namakina ana wirikiriki te tamnei, ma ni bon arona, I namakinna ae akea au reitaki ma te Atua.
Ngke I tuanga te Tama are i Karawa te bwai aei n te tataro ae I anga ma nanou ae korakora, a roko taeka aikai n au iango: “Tei moa, ao kam na a taai ba te Atua Ngai” (Taian Areru 46:10).
E taraa n ae ngkana te taeka e teimatoa katuruturuaki taekaia, n rainiaki aaia, ao ni karanaki.
N na bae n tia ni karaoi bwaai aika eti, ma I karaoi n te buti ae butimwaaka n aki kabanea raoi au iango nako iai. I a tia ni moanna ni maiuakina te euangkerio n aki kabanea raoi nanou nako iai.
Akea waaki ni kakukurei n te aro ae kona ni karekea nakoiu te reitaki n tamnei ma te Atua ae korakora ngkana e kawaekoa ao n akea raoi nanou nako iai. E raka riki nakon tangiraoin koroboki aika tabu. Ataakin te Atua ao n reitaki ma te atatai ae bebete, ao ni kabwarabwara te bwai ae kaona tamnein te aomata.
Irakin te wirikiriki anne e aki bebete. Ma e karika te bitaki ae korakora ni maiu.
Ti kainnanoia ni karaoia n aki katawe, n aki katabetabeira, kabebetea riki maiura, n aki rangin ni iangoia …
E reirei Nibwaai bwa ane “botumwaaka ni ukoukoria ao e na kunea; ao ana kaotaki ana bwai te Atua aika raba nakoia, ni mwaakan te Tamnei ae Raoiroi” (1 Nibwaai 10:19; e kairaki ma katuruturuana).
Ti a ukoukora te kibu aei: Reiakinan ana bwai te Atua aika raba e tangira te botumwaaka ni ukoukori. Te mwakuri ni kakukurei ae teimatoa ao ni iangoaki raoi, tiaki te kakaae n te intanete ae ti te taina. Are imwiina, aki kaoti bwaai aika a kaangaanga atakiia n te tai ae waekoa; ma a karaurau n roko nakoira. E kana te tai te kawai aei. Ao te tai anne e bon riai! Te tai ae ti anaia n iangoa ao n ukoukoria e anganiira te tai n reitaki ma te Tamnei, man mwaakan te Tamnei are e kaeka ara titiraki aika nano n te tamnei.
Beretitenti David O. McKay (1873–1970) e katanoata bwa te iango—“ae nano e reitinako, iangoakin tabeua botoniango n te aro”—bon “teuana mai ibuakon … kawai aika moan te tabu ake ti rinanoi nako matan te Uea.”2 Man kauarerekean tabera, ti kona ni karekea te kawai nakon te kaotioti. Ti kona n taraa ana kainibaire te aonnaba ae tabangaki aika aki eti ao n reitaki ma aika mairoun te Atua. Ti kainnanoa te kawai anne nakon te kaotioti. Ti kainnanoia n karaoia n aki katawe, n aki katabetabeira, kabebetea riki maiura, ao n aki rangin n iangoia.
Te Karaurau E Kainnanoa te Mwakuri
Irou, te karaurau, e irekereke ma te katorobubua ao n taetae ni kabaibati ngkana I tataro. Te tabo ae rau ao te kona n ongo taekan au tataro e buokai ni iangoia riki. Te karaurau e nanonaki ni kabonganakin booki aika a tia ni boretiaki ao tiaki aika a kabongana te iti ke iaonrain ao ni koroi taekana ma te kainikoroboki ke te bentira. E na kainnanoa te mwakuri ao te tai ae bati riki, ao keraken te mwakuri ao te tai anne bon te kawai ae tamaroa ni “kauti ao ni kamwakuri ami konabwai,” ma ni kariaia te Tamnei ao te nano ibukin te koaua bwa e na “mwakuri inanomi” ao te koraa ni kakoaua e “na karekea wakaana, man ikawai rake, ma ni kariki uaa” (Aramwa 32:27, 37).
Ti kona ni kunei aeka n rongorongo man taibinakin te taeka iaon te kiiboote ma te atatai n te tamnei ao te rairaki e kainnanoa te tai ao te botumwaaka ni mwakuri. Ko kanga ni karaurau ao ni karaoa te mwakuri ae barongaki raoi n reiakina ao ni maiuakina te euangkerio e aki kakawaki, e ti kakawaki bwa ko karaoia! Ngkana ti anganaki te rongorongo ma te mwakuri ae aki tau mairoura, ti kanakoi angiin ara reitaki n oin ara kamatebwai. Ti totokoi reken ara tai n reitaki ma te Tamnei.
Ti kona ni butimwaea te bwai n rabakau ao waaki n rabakau ake a kabebetei mwakuri ni katoabong ao ni kabonganai raoi ara tai. Ma e aki materaoi ibukira bwa ti na maeka n te katei n ana nanon temanna ao iango aika karioaki are ti a kona ni kabonganai iai bwaai n rabakau aikanne. Iraarikin are makakin kainnanoakin te tataninga, ti kona ni butimwaia bwa kanga reken te tai ni karaurau, iangoia raoi, ao ni kakorakora ara reitaki ma te Tamnei.