Rinanoan te Nanokawaki n te Tabati
E maeka te tia korokaraki i Utah, USA.
I ataia I riai n tangira te Taabati, ma I aki ataia bwa N na kanga.
Kamataata n te tamnei iroun David Stoker
E taku booki aika tabu bwa te bong ae te Tabati bon te bong ae tabu, te bong ae kakimwareirei man kakukurei, te bong ni motirawa, te bong ni bukamaru.1 Ma tabeua te ririki n nako, ngke tebwitabun au ririrki, I kunea bwa te Tabati e karawawata. N oneanmwiin te rau, I namakina te kua. N oneamwiin te kimwareirei, te nanokawaki. N oneamwiin te kantaninga, te namakin ae aki kakukurei. I rinanon te nanokawaki n te Tabati ae bwanin.
Ni katoa moaningabongin te Tabati, imwiin mwaitin te tai ni karabaai iaan rabunau, n te kabane I a kariaia ae ngaia bon te Tabati ao ni karin oneau ibukin te taromauri. N te taromauri, I rinanon au wiiki ake mai imwaaina. N tain te toa, N na bae n ikoikoti kabwakau, e aki bane imwaain teiraken te moan tia taetae. Nikiran te taromauri e riki bwa bwaron ranin matau ngkai namakinan te aki kukurei e korakora ma te uringaaba ke te nakobuaka n te Tabati.
Bon ti te arona naba ma aron te tawanou. I namakina te kairua n au rinerine ake mai imwaaina, n raraoma n au rinerine n taai aika a na roko, ao n nanokawaki n aron ae ngkai. N akea te reirei ao waaki ni kakukurei ake a na katabetabeai, N na bae ni kabanea au tai iaon iango aika a tii taraa te kabwaka.
Imwiin te kakauongo nakon, te wareware, ao ngkanne manga warekan riki ana taetae Beretitenti Russell M. Nelson n te maungatabu ni kabuta n Okitobwa 2015 bwa e kanga ni kakukurei te Tabati, I tataro ibukin te rau ao tangiran te Tabati nakon te karawawata are I namakinna ngkai.2 E roko te kaeka.
Kabanea nanom iaon te Tama are i Karawa ao Iesu Kristo
I namakina kairau ni bita au taratara man aki kukurei nakon au reitaki ma te Tama ao te Tia Kamaiu. Nakon are N na kabanea nanou iaon kabwakau, I bon anaa au tai ni iangoa Aia kakamwakuri inanon maiu.
Ngkana a kaoti iango iaon tii taraakin te kabwaka, I kaokiokia ni bon nakoiu te bwai are I ataia ao ni kakoaua taekan te Atua ao Iesu Kristo: Ngai natin te Atua. E tangirai. Iesu bon Mwaaneu, ao E mate ibukiu. A tangiria bwa N na kukurei ao n oki Nakoia. Te Tabati bon te bwaintituaraoi mairoun te Atua.
I moanna ni mwakuriia au onimaki n te kakoaua aei.
Kakaonimaki ni Butimwaea te Toa
Ni bita au taratara e kairai nakon manga iangoan arou N na kanga n roko n te toa. N te tai ae maan I a tia ni karaoa te toa bwa au tai ni katuaeai. Ma tiaki anne oin bukina. Te toa bon te otenanti ae tabu ni manga kaboouana ara berita aika tabu. Bon te tai ni manga kaitiakaki riki rinanon mwaakan ana mwakuri ni kamaiu Iesu Kristo. Ni kateimatoa au iango iaon te otenanti ao te berita ae tabu ma te onimaki ao te nano n rairannano, I nooria bwa te toa e uota te rau ngkai I butimwaea te bwaintituaraoi ni kabwarabure, ni kawakin au berita, ao ni karereka Tamnein te Uea (taraa R&B 20:77, 79).
N iangoa ana Mwakuri ni Kamaiu Kristo n tain te toa e uota te bwaintituaraoi riki teuana nakon au iango. I aki tii kabwaraaki au bure, ma I kona naba ni karekei te kamarurugaki ibukina bwa e uota Iaona marakiu ma aorakiu te Tia Kamaiu (taraa Aramwa 7:11–12). Rinanon Ana Mwakuri ni Kamaiu ao te toa, I kona kunea te rau ao te korakora n te Tabati—ke n te bong teuana—nakon are te raraoma ao te nanokawaki.
Ao I kunea te rau anne. E mena au Tia Kamaiu ikekei ibukira n te Tabati ao n taainako!
Mwakuri Taotaonakinnano Onimaki
Tiaki teuana te wiiki karaoakina. E bon kakokarakai, ao e anaa te tai. “Ma ngkana ti kantaninga ae tiaki noria, ao ti tanigaia iai ni botumwaaka” (I-Rom 8:25). I teimatoa ni mwakuri iaon au taratara ao n tataro bwa N na namakina te tangira n te Tabati.
Inanon te tai, I bon kunea te rau ao te kukurei n te bong ae tabu anne, ma I aki kona ni katokia ikanne ke ni bitia nakon te mamatu n te Tabati. Ni katoa wiiki e kainnanoa te botumwaaka ni katurua ara taratara iaon te Tia Kamaiu ma oin bukin te Tabati, ma I ataia bwa te berita ibukin te rau ao te kimwareirei e bon koaua.