Te Reirei Ae I Aki Kan Ongo

Name withheld

Porto Alegre, Brazil

Ngke ngai ma kainnabau ti baireia bwa tina waakina oin ara bitineti, moan ririki ake teniua a bon matoatoa. Ti kabwaka ni karekea te mwane ae tau ao e birirake ara tarau. Ti mwakuri korakora, ma kanganga aika tiaki kaman noori e karika te tai anne bwa te kabanea ni kaangaanga ni maiura.

E a korakora riki ngke e a mate tinan kainnabau e mate tebongina imwiin te Kiritimati ao bon te wiiki are imwiina, n tairikin te Kaririki, I a taonaki n te aoraki ae moan te kakaiaki. N te tai are, akea iai ara mwane, te bangke e anaa ara kaa bukina bwa ti aki kona ni kabwaka mwane ibukina, ao ni korakorana riki, tiaki kona ni kabwaka boon ara intiuarenti ibukin ara bwainaoraki.

N tokina, e a kuneaki aekakin te kaentia ae rang korakora are e a tia n rikirake n te maan ae nimaua te ririki. E bon rang kakaiaki ao e tangira te korokoro n te tai ae waekoa. Marurungiu e a moanna ni aki raoiroi, ao akea ara mwane ibukin kabane mwane ni karekean te marurung are I kainnanoia.

Ngai ma kainnabau ti kaitibo ma ara bitiobi ao ni bubuti buokara. Ti kabwarabwara bwa te aoraki aei e bon rangin ni kakaaiaki are e kona mwiina bwa te maiu ke te mate. E tabeaianga te bitiobi, ma e tuangiira bwa e namakinna te wirikiriki bwa tina tataninga teutana riki te tai imwain karekean te ibuobuoki n nooria ngkana iai riki angana ae e na kona n reke nakoira. E kamatoa nakoira bwa ngkana e tau ara onimaki, te Uea e na katauraoa te kawai ibukiu ni karekea te ibuobuoki are I kainnanoia.

N te moan tai, ana kaeka te bitiobi e kauna nanou ao I tanginako iai. I namakinna bwa ngaia ma te Uea a katuka taekau. Ma iai au koaua n te euangkerio, ao I kakoaua bwa au bitiobi e weteaki iroun te Atua. N aki tabe ma nanokawakiu, I tataro bwa Tamau are i Karawa e na buokai bwa N na reitinako n tangira, karinea, ao ni boutoka au bitiobi. Ngke I tataro ibukin aei, ao I namakina te mweengaraoi ao te namakin bwa te Uea e na buokai ni kawai tabeua.

Ngai ma kainnabau ti waakinako ni mwakuri ma te onimaki, ao I karekea te tutuo are I kainnanoia ao au tai ni korokoro, e ngae ngke akea ara mwane. Te bongina imwain au korokoro, ti kabonakoa ara bitineti n te boo ae raoiroi, are ti a kona iai ni kabooi ni kabane kabanemwane ake I kainnanoia.

N te tai aei e a matata bukina ngkai e aki anga ana ibuobuoki te bitiobi. E a tia ni mwakuri ma te kairi mai ieta bwa I aonga ni karekea te atatai n te tamnei ae moan te kakaawaki. Te namakin anne are e reireinai bwa N na onimakin te Tia Kamaiu, riki ngkana te kawai e tara ni kaun ao ni kakamaaku. I kakaitau ibukin te reirei are I aki kan ongo mairoun au bitiobi. I ataia ngkai bwa te Atua bon Atuan te kakai ao E bon aki kona ni katikuira.