Moan Kainakin te Ekaretia
Daniel R. Thompson, California, USA
Kamataata n te tamnei iroun Allen Garns
N te bong teuana, ngke I kakaea au tabo ni biri, I iangoia ni biri irarikin te tabo ni bwaake irarikin te umwantabu irarikira. I tangiria bukina bwa iai taura ake a ka ootaa n te tairiki ao e kabiraki ma te timanti ke te koorotaa. I kunea bwa te biri ni katobibiia te kateitei 10 nakon 15 te miniti e na kakoroa au teniua-ni maire (4.8 km) n ekitietiaiti.
Biriu n te tabo ni bwaake e reitinako, n tabetai e tokitoki, ibukin teniua te ririki. Ma n te tai teuana nakon teuana, n na noriia aomata n te tabo ni bwaake bukina bwa n tabetai n na biri n tain te bootaki n Taromauri ao waaki ni kaukurei riki tabeua.
N taai tabetai, iai nanou ni kan taetae ma temanna ibukin te Ekaretia, ma I aki ataia bwa n na kanga ni karaoia. Ni kawaiu n okira mweengau n te tairiki teuana, I baireia bwa n na rirarikin te umwantabu ao n noria ngkana I kona ni kunea temanna ikekei. Ngke I nakonako nakon ana kateitei te ekaretia, I kuneia mitinare imwiin banen aia intawiu ma aia beretitenti n te mition. I kabwarabwaraai nakoia ngke ti tekateka n te tabo n tataninga. Anne te tabo are a reireinai iai au moan n reirei n te euangkerio.
Inanon tabeua wiiki ake imwiina, I reitinako ni kaitibo ma mitinare. Ngke I ira te bootaki n toa, membwa n te uoote a kaota nakoiu aia tabira, ao te butimwaeaki, te iraorao, ao te kaunganano. Ngke I tabe n iangoa te bwai ae I a tia n reiakinna, I kunea bwa nanou ni kan ataa te Ekaretia e rikirake nakon kainnanoana n iangoia bwa n na bwabetitoaki. I namakinna bwa I a tia n tuangaki iroun te Tamnei ni karaoa te bwai ae tangiria Tamau are i Karawa bwa n na karaoia, ma I teimatoa n aki koaua ma te babaire. N tokina, I bwabetitoaki n Nobembwa 2001, ngke 36 au ririki.
Au iango are n na biri n ana tabo ni bwaake te Ekaretia e taraa n aki kakawaki n te tai anne. Ma e kairai nakon au kakabwaia aika korakora: kainakin te Ekaretia irou, kaitibo ma kainabau ae moan te tikiraoi, Jennefer; ao ni kabaeaki mangaia ibukin ngkai ao akea tokina n te San Diego California Tembora.
Ngaia are, ngkana ko kuba n noora te aomata n eketiatiati n te tabo ni bwaale n am autinibootaki, kabwarabwarako nakoina! Ko aki kona n ataia—teuanne ke neienne e na kona n riki bwa te kabanea ni boou ni kaain am uoote!