Reirei n Ibuobuoki

Karoko Ibuobuoki inanon te Nanoanga

Ngkai ko iriira ana katoto n nanoanga te Tia Kamaiu, ko na kunea bwa ko kona ni karaoa ae kaokoro inanon mauia tabeman.

E kamarurungko Am Onimaki, iroun Jorge Cocco

Te nanoanga bon ataakin rawawataia tabeman n raonaki ma te nano ni kabebetea ke ni katokia. Te berita ae tabu n iriira te Tia Kamaiu bon te berita n nanoanga “ni katoka i aomi rawawataia raomi” (Motiaea 18:8). Te mwioko n tararuaia tabeman bon te tai ni buokiia tabeman n aron ae e karaoia te Uea: ma te “nanoanga, ni karaoa te bitaki” (Iuta 1:22). E tua te Uea, “Kaota te atataiaomata ao te nanoanga temanna nakon tarina” (Tekaria 7:9).

Ana Nanoanga te Tia Kamaiu

Te nanoanga bon te korakora ae nene n ana mwakuri te Tia Kamaiu (taraa sidebar: “Te Tia Kamaiu ae Nanoanga”). Ana nanoanga ibukiia Ana aomata e karaoia bwa E na karoko irouia naake irarikina n taai aika aki kona ni warekaki. Ataakin kainnanoia ma nanoia tabeman, E kona ni kakabwaiaiia ao n reireiniia ni kawai ake a kakawaki irouia. Nanon te Tia Kamaiu n tabekirarake riaon rawawatara e kairia nakon ana mwakuri n nanoanga: Ana Mwakuri ni Kamaiu ibukin aia bure ao korakaia aomata.

Ana konabwai ni kaekai kainnanoia aomata bon te bwai ae ti kona ni keiakinna ngkai ti beku. Ngkai ti maiuakina te raoiroi ao ni kakauongo nakon ana wirikiriki te Tamnei, a kairaki nanora bwa ti na karoko n ibuobuoki ni kawai aika a uaana.

Ara Berita aika Tabu n Nanoanga

Tamara are i Karawa e tangiriia natina bwa a na nanoanga (taraa 1 Korinto 12:25–27). N kan riki bwa reirei aika koaua, ti riai ni kaota te nanoanga nakoia tabeman, ai moararariki naake ake a kainnano (R&B 52:40).

Katokaan aran Iesu Kristo iaora rinanon ara berita n te bwabetito, ti kakoaua bwa ti tauraoi ni kamwakura te nanoanga. Beretitenti Henry B. Eyring, te Kauoman ni Kauntira n te Moan Beretitentii, e taku bwa ana bwaintituaraoi te Tamnei ae Raoiroi e buokiira ni karaoia: “Ngkami kaain te berita n ana Ekaretia Iesu Kristo. …

“Anne bukina ngkai iai am namakin ni kan buoka te aomata ae korakai ni waaki nako are e mena iaan te rawawata ao te kaangaanga. Ko berita bwa ko na buoka te Uea ni kabebetei rawawataia bwa a na mweengaraoi. Ko anganaki te mwaaka ni buokia ni kabebetei rawawata aikanne ngke ko karekea ana bwaintituaraoi te Tamnei ae Raoiroi.”¹

N aron te katoto, te aine ae kaain Russia iai aia kaangaanga ana utu are a tuukia n roroko n taromauri e riaon teuana te ririki. Te aine temanna n te mwaanga e roko n ibuobuoki ma te nanonaga ni katoa Tabati n tareboon ao n tuangnga neiei taekan taian maroro, reirei, te nako ni mitinare, ataei aika bungiaki, ao tabeua rongorongon te mwaanga. Ngke e a toki aia kaangaanga ana utu te aine ae titiku n ana auti, e namakinna ae kanga e teimatoa n riki bwa kaain te mwaanga ibukin kakaongoraeakina ni katoa wiiki n te tareboon iroun raoraona.

Bwaai aika a na taraaki

1. Henry B. Eyring, “Te Tia Karaunano,” Riaona, Meei 2015, 18.

Aua Kaotiango ibukin Karikirakean te Nanoanga

Naako ao Karaoia N Aron Naba Aei: Te Itamaria ae Moan te Raoiroi, iroun Jorge Cocco

Ngkai e rikirake te nanoanga angiin te tai imwiin are ti rinanon oin kataakira, iai tabeua bwaai aika ti kona ni karaoi n te bong aei ni karikirakea te nanoanga. Iangoi kawai ake ko kona ni maiuakin reirei aika aua aikai.

• Tataro ibukin te buoka. Ngkai ko bubuti nakon te Tama are i Karawa, E na kauka nanom, ao “ko na moanna n namakina te tabeaianga ae koaua ibukin mweeraoia ao kukureia tabeman aomata n aki toki” (Tataekina Au Euangkerio: Te Kairi nakon te Mwakuri ni Mitinare [2004], 118; taraa naba Moronaai 7:48).

• Kataneiako karaoia. Ko kona ni kaota te nanoanga ni kakauongo ao n oota. Kaakiko n aia kaangaanga ao iangoia e kanga aron aia namakin. Ngkana e riai ma te kaangaanga ao te tai, ko kona n anga am ibuobuoki ni kabebetea marakiia, korakaia, ke nanokawakiia.

• Iriira te wirikiriki. Te Uea e kona ni kaoti nakoira kawai ni kaota te nanoanga are ti na bae n aki ataia i bon iroura. Ngkana ko namakinna bwa e anaa nanom te Tamnei bwa ko na buokiia tabeman, tai rawa ni karaoia.

• Ko na riki bwa te rao ae onoti. Kaotan te nanoanga e rangi ni bebete n aron kaotan te nano ae koaua ni maiuia aomata. Reiakinna ni kakauongo raoi (taraa “Ministering Principles: Five Things Good Listeners Do,” Riaona, Tuun 2018, 6–9). Am tangira ibukiia e na rikirake, ao e na bebete n atai kawai ni kaota te tangira anne.

Te Nanoanga

1. Tataro

2. Kataneiakokaraoia

3. Taian Wirikiriki

4. Iraorao

Te Tia Kamaiu ae nanoanga

Iangoia ni kamatebwai tabeua mai buakon koroboki aika tabu n nooria bwa e kanga ana nanoanga Iesu Kristo ni kaunga bwa e na kamaiuia, kakabwaiaia, ao n reireinia naake a mena irarikina n Ana tai ni mwakuri: Mataio 9:35–38; 14:14; 18:27, 33; 20:30–34; Mareko 1:40–42; 5:19; 6:30–42; 9:22; Ruka 7:13; 10:33; 15:20.

Reirei n ibuobuoki a baireaki ni buokiira n reireiniira n tabeakiniira i bon imarenara—n aki tibwaaki kanga te rongorongo. Ngkai ti ataia naake ti beku ibukiia, e na kairiira te Tamnei ae Raoiroi n ataia tera te rongorongo are a kainnanoia n reitia ma ara tararua ao ara nanoanga.