Kinakira
N totokin au mwakuri bwa te Itingaun ni Mataniwi ni Kabuta, ao I a tia n nang iango raoi ao n tataro mwaaka ni kan ataia bwa tera ana rongorongo te Uea are e tangirai bwa n na tibwaia ma ngkami, tariu ao mwaneu aika tangiraki ni kabuta n te Betebeke. Te kaeka e a tia n roko n te itera are n tokin au waaki inanon au tai ni beku inanon tebwi ma uoua te ririki—nimaua n Aonon Aberika Maeao, nimaua n ana Etekuata te Ekaretia I Salt Lake City, ao ngkai kabaneana uoua n te Betebeke.
E kakabwaiaki aonon te Betebeke ma aekakin nako reeti aika kakaokoro ao kateia aika mwaiti. Aio e kakoauaki ao n nooraki bwa, Micronesian, te Melanesian, ao Polynesian reeti, ai aron naba renganana mai Europe ao Asia. Ngkai e rang mwaiti rengarengaia aomata ma kateia, iai mwakoro ake a tiku kateia ni kakaraoaki are a taekinna kain te Betebeke bwa kinakiia. E ngae n anne, man kinakiia aomata aikai, te Uea e kan ataia bwa ti na kanga ni kinaira n te maiu n Tamnei inanora ao n tamneira, ao ni kaotinakoa nakoia raora. Aio bon kinaakira, ao bon kinaakira are I tangiria ni maroro iaona.
“Te Utu—Te Katanoata nakon te Aonaaba” e taetae iaon kinaakira e taku:
NIKABANE AOMATA—mwane ao aine—a karikaki ni katotongan te Atua. N tatabemaniira bon natiia kaaro ake i karawa aika aine ao mwane… . Te riki ni mwane ke n aine bon te kanikina ae kakaawaki n tatabemaniia n te maiu imwain te maiu aei, te maiu n rabwata, ao te kinaaki ma te kantaninga ae akea tokina.
Aio bon te moan raoi kinaki irouia natin Tamara n roko iaon te aba: Tamnei nati mwane ao nati aine irouia kaaro ake i karawa. Ma a mwaiti riki.
Te Uea Beniamina e tararua iaoia ana aomata Taraemera, ake ibuakoia bon Murekaite ao Nibwaite.1 E ngae ngke iai rikiia ae a kaai n riki iai are a tia ni kanakoaki tabeua bubua n ririki n nako, inanon te tai ae uarereke a tia ni karikirakei kinaakiia ae onoti. E ngae ngke aia taetae a rikirake ni kaokoro, ni karokoa Murekaite a reireinaki n aia taetae Motiaea.2 Imwiin reireinaia aomata n ana euangkerio Iesu Kristo, te uea Beniamina e ata kainnanoia ana aomata bwa a na riai ni karekea kinakiia are e koreaki n te euangkerio are e na tiku n tainako inanoia ao e na ataaki ni kaotaaki nako, ni moanibwaia kinaakina n aonnaba ake tabeua.
Ao ngkai, ibukin te berita ae tabu are kam a tia ni karaoia, kam na aranaki bwa natin Kristo, natina mwaane, ao natina aine … bwa kam taekinna bwa a bitaki nanomi rinanon onimakinan arana; mangaia ae kam a bungiaki irouna ao kam a riki bwa natina mwaane ao aine ngkami … Bon akea te ara riki teuana are e na reke mai iai te kamaiuaki; mangaia ae I tangiringkami bwa kam na katoka i aomi aran Kristo …3
Ibukira ngaira n te Ekaretia, aio bon kinaakira ae moan te kakaawaki: Natin Kristo, ti bungiaki Irouna. Ngkana e toka kinaakira anne, aomata ao ana kantaninga te Uea e na tokanikai. Ngkana te reeti ke kinaakin te katei e taonaanako kinakin ae natin Kristo, e na kai reke te itabarara ao ana aomata te Atua a na kabua ana kakabwaia te Tamnei.
Moomon e korei bwaai aikai aika kananokawaki ake a kaoti imwain kaotin Kristo imwiin manga utina ngke aomata a kabwaka iaon kinakiia bwa nati mwane n Tamnei ao nati aine iroun te Atua ao natin Kristo.
Ao aomata a maenako imarenaia; ao a maenako imarenaia n taian baronga, ni kabane aomata n ana utu ao ana koraki ao raoraoia … bwa a bon anga ngaia nako nanoni mwaakan Tatan … Ao a bon karika te itabaraaraa ae korakora n te aba… .4
Inanon te Ekaretia ao n abanuean te Atua, ngkana kinaakin te katei ke bon te utu e taonanako ara itaritari ao ara imwamwaane n Tamnei ao riaon arora n riki bwa natin Kristo, te Tamnei e nanokawaki. N ara titeiki, mition, mwakoro, uoote, ao mwaanga, nakon are te moan bwa kain Aotiteria, Nutiran, Papua New Guinean, New Caledonian, Ni-Vanuatu, Solomon Islander, Marshallese, Kiribati, Fijian, Tongan, Samoan, French Polynesian, ke ni kinaaki riki tabeua, ti riai moa n riki bwa nati mwane ao nati aine irouia kaaro ake i karawa, tariu ao mwaneu, ao natin Kristo, ngkai ti bane ni bungiaki irouna.
I tangiri ngkami, tariu ao mwaneu aika tangiraki, ao I kaota au kakoaua bwa Iesu Kristo e maiu ao bon ara Tia Kamaiu. Ti bia kakauongo nakon ana reirei, “… katiteuanaaki; ao ngkana kam aki katiteuanaaki tiaki au bwai ngkami,”5 bwa E na kona n taekinna ibukira “Ao te Uea e araniia ana aomata bwa tion, ibukina bwa ti teuana nanoia ao teuana aia iango… .”6