Ni Keiakin Titiraki aika Kaangaanga: 3 Reirei Ake a Kona ni Ibuobuoki

Aio aron ukoukoran taian kaeka n te anga are e na kakorakora iai am onimaki.

Ko tia ni karekea te titiraki n taekan te euangkerio ke te Ekaretia? Ko a tia n raraoma ngkana nanon am titiraki bwa e aki tau am onimaki ke am kakoaua e aki rang bati ni korakora?

E bon taneiai te aba n taian titiraki ao n riki bwa mwakoron mwanangara ae kakawaki rinanon te maiu ae mamate. A kona ni kairiko nakon te wanawana ae korakora ao te onimaki. E ngae n anne, anuam, ungan naom, ao waakin kakaean taian kaeka iai mwiina ae e na reke.

N te tieminari ko na reiakin mwaakan teniua koauan reirei aikai ake a kona ni buokiko ni kairiko nakon koaua aika akea tokina.

Mwakuri inanon te Onimaki

Ngkana iai am titiraki, ko kona ni mwakuri inanon te onimaki n rineia n onimakina te Atua ao n rairaki moa Nakoina ibukin taian kaeka. E anga taian kaeka te Atua “teutana imwiin teutana, te reirei teuana imwiin teuana” (2 Nibwaai 28:30). E bon kakawaki bwa ko na katan iaan am koaua are ko a tia ni karekea inanon taai n nanououa.

“Nanououa n am nanououa imwaain ae ko nanououa n am onimaki.”¹ —Unimwaane Dieter F. Uchtdorf

“Taui ni kamatoai bwaai ake ko a kaman atai ao n teei ni matoatoa ni karokoa a roko reitan riki rabakau.”² —Unimwaane Jeffrey R. Holland
Tuoi Kanoan Reirei ao Titiraki ma ana Taratara te Euangkerio

Ngana ko iangoia titiraki ni kanoan reirei ibukin te babaire ni kamaiu ao ana reirei te Tia Kamaiu, ko kona ni moanna n noori bwaai n te kawai are e noori iai te Atua. Aio e na buokiko ni manga tuoi riki am titiraki ni kamanenaakin ana kainibaire te Atua ibukin te koaua nakon bwain te aonaaba.

“Ngkana ko atinroona maium ma koaua ae akea tokina … e na anganiira te rau are e roko man te onimaki iroun Iesu Kristo ao te atatai are ti mena iaon te kawai nakon te maiu ae akea tokina.”³ —Beretitenti Dallin H. Oaks

“Ngkana ko kunea te bwai ae taraa n tuka te oota ao kakukurein te euangkerio inanon maium, I kaoko bwa ko na katikua iaon ana taratara te euangkerio. Taratara rinanon ana taratara te euangkerio ao n taratara raoi n aki kariai bwaai aika akea bonganaia ao n akea uaaia n te maiu bwa e na kamamaraa am taratara ae akea tokina n te babaire ni kukurei ae korakora.”⁴ —Unimwaane Gary E. Stevenson
Ukeukera Nako te Atatai rinanon Bwaai n Ibuobuoki aika Kariaiakaki mai Karawa

E a tia te Atua n anganiko bwaai n ibuobuoki aika mwaiti ngkai ko ukoukora te koaua. Aio e raonaki ma te Tamnei ae Raoiroi, booki aika tabu, am utu, taan kairiiri n te Ekaretia, ao bwaai n ibuobuoki itinanikun te Ekaretia ake a ana kakorakora am onimaki iroun Iesu Kristo. Ngkana ko kakaei taina kaeka, kakoaua raoi bwa ko na kinai imarenan bwai n ibuobuoki aika a aki onimakinaki ao aika a onimakinaki, ake a na kakorakora am onimaki ao ni kaoa te Tamnei ae Raoiroi nako nanon maium.

“Kakabwaia aika uaana … a roko man am konabwai ni kabubura, ni karababa, ao ni karikirakea am atatai ibukin te koaua. Kamanenai booki aika tabu ao aia katanoata burabeti ni karababa rabakaum.”⁵ —Unimwaane Richard G. Scott (1928–2015)

“Ti teimatoa ni ukoukora te koaua man booki ni kabane aika raraoi ao tabeua bwaai n ibuobuoki aika a uaana. ‘Ngkana iai te bwai ae tamaroa, ae kakateke, ke ae tamaroa rongorongona ke e kamoamoaaki, ti ukoukori bwaai aikai’ [Taekan te Onimaki].”⁶ —Unimwaane Dieter F. Uchtdorf

Kataia i bon ibukim!

Katoto akana imwiina a kaotia bwa e kanga aron karaoana. Ataia bwa aikai tiaki kaeka aika bwanin, bon tii taian katoto bwa e kanga aron te ataeinimwaane ke te ataeinaine ni kataia ni kaekai titiraki aikai i bon ibukiia. Ko na tangiria n reitanako am kamatebwai ao tataroakin atuun reirei ake iai am titiraki iaoia ni kakaei taian kaeka ao ni kakorakora am koaua.

Bukin tera e kariaia te Tama are i Karawa bwa a na riki bwaai aika a buakaka?

Mwakuri inanon te Onimaki: I a namakina ana tangira te Atua ibukiu ao n ataia bwa E maiu, e ngae ngke I aki ataia bukin tera e kariaia te Tama are i Karawa bwa a na riki bwaa aika a buakaka.

Tuoa kanoan te reirei ao titiraki man ana taratara te euangkerio: Te rinerine bon te mwakoron te babaire ni kamaiu ae kakawaki. E karuoira te Atua nakon te aonaaba bwa ti na rinanon te kataaki, ni karaoi ara babaire, ao ni karekei rabwatara. Ma ni kariaia aomata bwa a na karaoi aia babaire nanona bwa n tabetai aomata a karaoi babaire aika kairua ao n rotii maiuia tabeman. Ao kataaki bon tiaki mai imwiin rinerine aika buakaka—n aron kabuanibwai aika bon riiriki, te mwauku, ao te mate—a kona ni karekei ara tai ni kakorakorai ara koaua ao n onimakina te Atua.

Ukeukera Nako te Atatai rinanon Bwaai n Ibuobuoki aika Kariaiakaki mai Karawa: Tera ae taekinaki ni booki aika a tabu ao irouia burabeti aika ngkai bukin tera ti rinanon bwaai aika a kaangaanga? “E na mena te rau n tamneim; am kaangaanga ao karawawatakim a na riki ma tii n te tai ae uarereke; ao ngkanne, ngkana ko teimatoa n rinanona n te aro ae raoiroi, te Atua e na karietako i eta; ko na tokanikai i aoia ni kabane am kariribai (R&B 121:7–8). E taku Unimwaane Jeffrey R. Holland man te Kooram n Abotoro n te Tengaun ma Uoman, “E aki kona ni katikuira te Atua n tii ngaira, ni katikuira n aki buokiira ni kaangaanga ake ti kaitarai.”⁷ I aki ataa bukin kataakiu ni kabane, ma I kakoaua bwa Iesu Kristo e karaoa te Mwakuri ni Kamaiu ibukiu ao ibukiia aomata ni kabane. I kona n rairaki Nakoina ao te Tama are i Karawa ibukin te rau, te korakora, ao te boutoka inanon kataakiu (taraa Aramwa 7:11–12).

N na kanga n ataia ngkana e taetae nakoiu te Tamnei ae Raoiroi?

Mwakuri inanon te Onimaki: E ngae ngkana n tabetai e kaangaanga irou n ataia ngkana I karekea te kairi, I ataia man ongoraau n aia koaua tabeman ao man warekin booki aika tabu bwa te Tamnei ae Raoiroi e na buokai ni kamatataai ngkana I teimatoa ni kataia n ongo Ana reirei.

Tuoi kanoan taian reirei ao titiraki man ana taratara te euangkerio: E anganiira te Atua te bwaintituaraoi ae te Tamnei ae Raoiroi bwa ti aonga ni karekea te kairi ni karaoa ae eti. Ngkana I karekea te wirikiriki ni karaoan ae tamaroa, I kona n ataia bwa mairoun te Tamnei, e ngae ngke e taraa n ae bon oin au iango.

Ukoukora te atatai rinanon bwaai n ibuobuoki aika baireaki mai i karawa: E reirei booki aika tabu: “Ko na a nanorinano; ao te Uea ae Atuam e na kairiko ni baina, ao n anganiko kaekaan am tataro” (R&B 112:10). E reirei Unimwaane David A. Bednar man te Kooram n Abotoro n te Tengaun ma Uoman bwa “te nano ae koaua ao te kororaoi e kaoa tamnein te kaotioti nakon maiura.”⁸ Ngkana I kataia n nanorinano ao ni karaoa au kabanea n tamaroa n tau ibukin te Tamnei, te Uea e na buokai ni kairai nakon taian kaeka. E na reireinai aron te Tamnei n taetae nakoiu n ae onoti.

Kabaneana

Titiraki bon tiaki te kanikinaa ibukin karakon te onimaki, angin te tai a kaota rikiraken te kakoaua. Ngkai ko mwakuri inanon te onimaki, tuoi kanoan taian reirei ao titiraki man ana taratara te euangkerio, ao ukoukora te atatai rinanon bwaai n ibuobuoki aika baireaki ma i karawa.