Aomata aika a Tamaroa mai St. George, Utah
Claudio Gonzalez, Antofagasta, Chile
Kamataata n te tamnei iroun Allen Garns
Ngke tao ai 12 au ririki, I noora tamnein ae katauraoaki man te aro are e kaota Beretitenti Lorenzo Snow (1814–1901) n tataro ibukiia Aika Itiaki ni Boong Aika Kaitira i St. George, Utah, USA, ake a rootaki ni korakoran te bwatakataka.
“Te Uea,” e tataro Beretitenti Snow, “kakabwaiaia aomata aika tamaroa mai St. George.”
Te kibuntaeka anne, “aomata aika tamaroa mai St. George,” e katuka te ururing n au iango ngke I kairake. Bukina bwa I maeka i Chile, I kataia n iangoia bwa aekakira Aika Itiaki aika kakaonimaki “aomata aika tamaroa mai St George”. I tangiria ni kaitibo ma ngaiia.
E raka iaon 30 te ririki imwiina, inanon 2005, au utu ao ngai ti kaira natira te mwaane te kauoman nako Provo, Utah, bwa e na raona tarina, are e reirei n te Brigham Young Iuniwetiri. Te tairiki anne imwiin rokora, I taku, “I tangiria n nako n nooriia aomata aika tamaroa mai St. George.”
“Ma, Papá,” natiu te mwaane te ikawai e aki kukurei, “St. George e rang raroa nako mai Provo, Utah.”
“Taraia,” I kaeka, “Papá e kabooi tiketi n te wanikiba. Papá e kabooi amwarake. Papá e kabooa te bwaa. Papá e tangira ti te teuana te bwai ibukina. E tangiria ni kaitibo ma aomata aika tamaroa mai St. George!”
“Ngaia,” e kaeka natiu imwiin are e a ataia bwa I aki manikanare.
Te bong are imwiina ti buti n te raroa ae 260-te maire (418 km). Imwiin rokora i St. George, ti nakon te tienta ibukiia iruwa’ n te tembora ao ni mamataku n te winta ni mweengan Beretitenti Brigham Young (1801–77). Ti roko naba n te St. Goerge taebenako, are I a kaoaki iai bwa N na maroro nakoia au utu ibukin teutana te tai man te tabo n taetae are e a tia n taetae iai Beretitenti Snow nakoia “aomata aika a tamaroa mai St. George.” Ti rianna ni katobibia te kaawa, ni mamataku ao ni kaitibo ma aomata. A bon tara n aron ae a tataneiai iai, aika Itiaki ni Boong aika Kaitira aika kakaonimaki.
I kukurei bwa ti nako. Ma ngke tia oki nako Chile, I ata te bwai are I a tia n nooria “aomata aika tamaroa mai St. George” mai imwaina.
Ibukin au mwakuri ao nakoau n te Ekaretia, I a tai ni mwamwananga rinanon kawan nako Chile. I Calama, I a tia n nooria kairake n ikawai ake a kekeiaki ni kawakin tuua. I La Serena, I a tia n nooria kaaro aika a taua ma nanoia ake a moantaai n roko ma natiia ibukin kaean te bootaki n taromauri. I Antofagasta, I a tia n nooria aika Itiaki ni Boong Aika Kaitira aika a kekeiaki ni karaoa ae raoiroi ni katoabong. I Vallenar, Copiapó, Caldera, Tocopilla, ao kaawa ake tabeua, I a tia n nooria kain te aro ake a katorobubua n tataro ao imwiina a waaki nako ni karaoia riki ngkana aki bebete karaoakiia.
Ngkana I nooria Aika Itiaki ni Boong Aika Kaitira aika kakaonimaki ake a ongotaeka ao a teimatoa—n aki tabe bwa a maeka iai ke tera aia kanganga ake a kaitarai—I taku i nanou, “Aikai aomata ake a tamaroa mai St. George.”