Mwanangan Isabelle
E maeka te tia korokaraki i Texas, USA.
E na ananau te mwananga ao ni kakamaaku, ma te nako n te tembora e bon materaoi.
Brazil, 1992
E kamakiia matana teutana Isabelle n tararake n taraa karawa ae bane buruuna. Akea te nang ae kona n nooraki. E tenatenai riana aika mautakataka.
A taetaenikawai ana karo ma Beretitenti Santiago, te beretitenti n te titeiki. E rangin kakarongoa mooton te booti are e aki kona n ongo aia maroro. Ma e ataa te bwai ae a maroroakinna. E bane te ran ni mooi.
E kataia Isabelle ni katurua ana iango iaon bukin mwanangaia. A na nako n te tembora bwa a na kabaeaki bwa te utu! E uringa ongongona n aia maroro ana karo n rongorongon tamaroan te tembora i São Paulo ngke te teinaine ngaia ae uarereke. Te roko ikekei kanga ai aron te karaki n te mii. Imwiin bwaai nako, a maeka ana utu Isabelle i Manaus, i buakonkain Amazon ae buakoako man kakarau, ao te tembora e riaon 2,000 te maaire (3,219 kiromiita) raroana.
Ngkanne Beretitenti Santiago e bairea onobong te bong ni mwananga bwa a na roko ikekei. E riaon 100 membwa ake a bairea mwanangaia. “E na riki bwa te anga karea,” Mamãe e tuanga neierei. “Ma te anga karea e uoti kakabwaia”
N te moan, e kakukurei te mwananga. A matu iaon te amwake iaon teeke iaon te booti, n anenei kuna n taromauri ao ni wareki booki aika tabu.
Ma e a bane te ran ni mooi, ao ranin te karaanga e a rangin baareka n te nimaki.
Isabelle e namakina Mamãe bwa e riinga baina. “E bobootira ni kabane Beretitenti Santiago,” e taku. “Ti na tataro ibukin te karau.”
E kaaina te kurubu Isabelle, ao e moanaki te tataro. Imwiin tokin te tataro, e namakina te eaa ni kamwaitoroa roroana. E kabirimwaaka nakon iteran te booti ao n ikerake. A nang moanna n taonaki n te nang roo. N te tai ae waekoa e moanna ni bwaka te karau! E kauka wiina n tikona timwin te karau iaon newena.
“Kawaekoa!” e tang Mamãe. “E anai taian bwaketi, taian baan—bwaai ni kabane!”
Isabelle e taua te baan ao ni katararakea. E tangiria ni kawaawaea te ran ae mwaiti. A kaai ni mwakuri aomata ni kabane, a ngarengare ao ni bukamaru. N te tai ae waekoa a bane ni mwaimwai ngke a karaoa aia katekeraoi! E toki te buaka inanon 15 te miniti. E bon tau maania ni kawaawaea aia ran are a kainnanoia. Bon te kakai.
N te tai ae waekoa ao e roko te booti n te aba. Ma ai ti 1,500 te maaire (2,414 kiromiita) riki mwanangaia. A bane n toka iaon te bwati te koraki n nikiran te mwananga are imwiina. Ibukin boong, e a mwamwaingiing te bwati iaon kawai aika aobuaka. Teuana te tai e tebeteberake n te aro are e a raeuaaki kiraatin mooa! N tabetai a buti rinanon kaawa aika kabuebue, ae a onrake kaaina. Ma tao irarikina a aki aobuaka kawaina!
A kakaitau aomata n taainako ngkana a tei n te kaawa ke n te taaun bwa a na amwarake. A amwarake n taian umwantabu ke ma membwa n te Ekaretia inanon kawaia. Te moan tairiki, a oki n te bwakanakontai are e a maaku Isabelle bwa rimwi ao akea ae e tataninga. “Tai raraoma,” Mamãe e taetae ma moangarena ae kua. “Taraia!”
Te beretitenti n te mwaanga ao membwa n te Ekaretia a kateiraain n iteran te kawai. A taua te baana are e na warekaki “Te anga karea e uoti kakabwaia.” E moangare Isabelle E eti ae taku Mamãe!
Imwiin tenibong boong aika aobuaka, n tokin te tai a roko i São Paulo. E tei Isabelle iaon ana kaintekateka bwa e aonga ni mataku raoi ngkai e buti te bwati n te kawai ae kabwao. N te tai ae waekoa a rootaki aomata n te kukurei. “O templo! O templo!” A kona n noora kain te tembora te biti are e tei ietana are e rietata riki nakon taia aroka bwaam aika waerinan.
A bane ni kua aomata ni kabane, ma akea ae e kan motirawa. A tangiria ni kan kabaeaki n te tai ae waekoa. Ngke ai ana tai ana utu ni kabaeaki, e karina raoi kunnikaina te mainaina Isabelle. Ngkai e nakonako inanon te ruu ni kabaebae, e noora tamana ni momoangare. A wawaanako ranin matan Mamãe’iaon ubuna. E ananau mwanangaia ao e kamamate naba. “Ma e materaoi te anga karea,” e iango Isabelle. E moangare ngkai e tei n ana tabo bwa e na kabaeaki ma ana utu n aki toki.