Tera ae Ti Karaoia inanon te Tembora?

Tamnei

baptismal font

Te tembora bon te tabo ae tabu ike ti kona ni kaniira riki ma te Tama are i Karawa ao Iesu Kristo. Inanon te tembora, ti reiakinaki koaua aika kakawaki, n iri otenanti n te nakoanibonga (bukamaru aika tabu), ao ni karaoi berita (berita aika tabu) ma te Atua are e na katauraoira n oki nakon mweengana.

Ti kona ni karekei otenanti n tembora i bon ibukira ao ibukiia naba ara bakatibu. N aron te katoto, kairake a kona n ira te bwabetito n tei ibukiia aia bakatibu ao tabeman ake aki reke aia tai ni bwabetitoaki man te kariaia ae riai ngke a maiu. Ibukiia ikawai, tabeua otenanti n tembora n raonaki ma te entaumente ao te kabaebae (n aron te mare n te tembora).

Te Bwabetito ao te Kamatoaki ibukiia Ara Bakatibu

Te bwabetito ao te kamatoaki a kakawaki ibukin kamaiuakiia aomata ni kabane ake a maiu iaon te aonaaba (taraa Ioane 3:5). E ngae n anne, a mwaiti aomata aika a mate n aki reke aia tai n ongora te euangkerio ke ni karekei otenanti aikai. Rinanon ana akoi ma ana nanoanga Iesu Kristo e a tia ni katauraoi kawai ibukiia aomata ni kabane ni karekei kakabwaia aikai. Inanon tembora, membwa n te Ekaretia aika a tau a kona ni karaoi bwabetito n tei ibukiia naake a tia ni mate. N te aonaaba n tamnei, e tataekinaki te euangkerio (taraa R&B 138), ao naake a ongoraa a kona n rineia ni butimwaaia ao a karaoaki otenanti ibukiia.

Entaumente

Te taeka entaumente nanona te “bwaintangira.” Te entaumente n te tembora bon te bwaintangira mairoun te Atua are ngaia E anga kakabwaia aika onoti nakoimi.

Ngkana ko kaaina te Ekaretia, ko karekei uoua otenanti—te bwabetito ao te kamatoa. Te entaumente n te tembora e karekeaki naba inanon uoua itera. Te moan, ko karekea te moan otenanti, ike ko kanikinaeaki ao n “tebokaki” ni kaitiakaki ao ni karekei kakabwaia aika onoti ni kaineti ma oin rikim ae tabu ao am konabwai ae akea tokina. N te kauoua n itera, ko karekea nikiran am entaumente ngkai ko reiakina riki rongorongon te babaire ni kamaiu, n raonaki ma te Karikibwai, oin bukin rokora iaon te aba ao ana mition ao ana Mwakuri ni Kamaiu Iesu Kristo.

N tain te entaumente, ti karaoi berita aika tabu n ongotaeka iroun te Atua, n iriira Iesu Kristo, n itiaki, ao ni buoka katean uean te Atua. Ngkana ti kawakin ara berita aika tabu, ti karekea te berita bwa ti na karekei ana kakabwaia te Atua aika akea tokina.

Kabaeaki

Te Utu bon nuukan ana babaire ni kakukurei te Atua ibukira. Ikotakin te utu n akea tokina bon te bau ni kakabwaia ae tauraoi inanon te tembora rinanon te kariaiakaki n ana kabaebae te Nakoanibonga—ti te arona ma te kariaiakaki are e tua Iesu nakoia Ana Abotoro (taraa Mataio 16:19). Te kabaebae n te tembora e kariaia buumwaane ao buuaine ao naati ao kaaro n ikotaki n aki toki rinanon aia kakaonimaki nakon aia berita aika tabu.