Ngkana e Matoatoa te Beku
E maeka te tia korokaraki i Cagayan, Biribin.
N na kanga n tararua temanna ae buakaka anuana?
Kamataata n te tamnei iroun Chris Thornock
Teuana mai buakon bwaai ae rang kaangaanga are I a ti n tokanikai iaona bon anuau “I aki tabe iai”. Ngkana I aki nanona raoi te bwai ae N na karaoia, I a kan iraorao ao n aki taotaonakinnano ma aomata.
Aio ni kabane a bitaki teuana motirawan te reirei ngke I bubutiaki ibukin tararuaan tibu te unimwaane ae 76 ana ririki ni maiu. “Dadi,” n aron ae ti weteia iai, e rootaki n te boo, are e a karika mwaukun iteran rabwatana. Ngke a bubutiai au utu bwa N na tararuaia inanon uoua namwakaina, I aki kona n iangoia bwa e kanga arona!
I riai ni moantaai n uti ni katauraoa te kaingabong, tebokana, ao ana bwainaoraki. I buokia n nakonako ni katobibi ibukin ana kamarurung. Ngkai iai ana kaangaanga ni mwaingingi, I memena irarikina n taai nako. n raonaki ma ana tai n tebotebo ao nakona n nakotaari. Ngkai te ataeinaine ae 18 ana ririki ni maiu, aio bon te mwakoro ae matoatoa.
Irarikin aei ni kabane, e kaangaanga te memena irarikina. Tiaki te membwa n te Ekaretia ao a kakaokoro ana reirei nakoiu. Bon te mwaane ae onrake n te uringaaba—e aki toki n tatakarua, e aki moamoangare, ao n teimatoa n taku, “I a kan mate!” Ibukin te anua aei, e matoatoa ibukira n tibwaua te reitaki.
N te moan, I karaoa au kabanea ni kona n katikui tabeu, ma e aki mwakuri anne. Ngaia I a baireia bwa N na bita anuau ao n anga au konabwai ae tamaroa.
Imwiin wiikin te anua ae boou aei, te beku ibukin Dadi e kakimwareirei irou. E rikirake au taotaonaki nano, ao I moanna n ataa korakaina. Ngkai I beku ibukina, I a katoka iangoan ae titiku irarikina kanga te bwai ni karawawata ma e oneakimwiina bwa e a reke au tai ma ngaia.
E bitaki naba Dadi. Te unimwaane ae matanokunoku aei e reke bwa te tibu ae momoangare, man ni mamannei. E roko naba n ongra Moarara riki nakon aia anene Kairake!
Te tairiki teuana I a ongongo ana kaberoro, ngaia are I a taratara nako inanon ana ruu ni kakaea bwa tera ae e a bon karaoia. Ai tibwa ana moantai n tataro. E anaaki nanou n te bitaki aei.
Ngkai I a okira te kuura, ma I nanako uatai te tai n te namwakaina ni kawara Dadi ma au utu. Ti amwarake ma ngaia ao n anene ibukina. E rikirake n aki marurung, ngaia are ngkai te buoka ae te kabanea ni korakora are I kona n anganna N na tataro ibukina.
I kakaitau ibukin au tai n tararua Dadi ibukina e buokai n noora au konabwai are I kona n anganna. Te tangira bon te bwai ae rangin korakora—e kamaraua nanou ao nanon Dadi. I a reiakinaki nanon te anga karea ao te nanoanga. Ni koauana, te tangira ae kororaoi e kabebetei naano!