7 Kawai n Anga te Marooro
E maeka te tia korokaraki i Utah, USA.
Ko na marooro inanon te bootaki n toa n te tai ae waekoa? Katai anga aikai.
I aki kinako, ma ngke I tuangaki bwa n na marooro n te bootaki n toa, I namakinna ae e nako nanou—tiaki ibukin koreakin taekan au marooro ma ni koauana kanakoan te marooro. I raraoma n tainako, “Tera ngkana I rangin ni kabotu? Tera ngkana I mwaninga n taekina te bwai teuana? Tera ngkana e bure taekinakin te taeka?”
Ko a tia n namakina te aeka ni kaangaanga aei? (Au kantaninga bwa tiaki ti ngai.) Ngkana ngaia anne, tiaki te bwai ae rangin ni kaangaanga! Katai kawai aika itiua aikai ni kanakoraoa aron am taetae ao n anga te marooro ae kakaongora.
Katauraoan te Marooro
-
Kabonganai booki aika tabu ao aia reirei burabeti n taai aikai (taraa R&B 52:9). Aio raoi boton am marooro. Ni bon arona, anne raoi bukina teuana ae ti nakon te taromauri—n reirei ao ni kamatebwaia ana euangkerio Iesu Kristo. Ko kona ni kamatebwaia atuun te reirei ma ana ibuobuoki te Boki ni Kairi nakon Koroboki Aika Tabu (n te scriptures.lds.org) ao marooro man te maungatabu (ukeuke man atuun rongorongo n te gc.lds.org). Kakoua bwa ko oota n nanon koroboki aika tabu ao taeka aika ko na kabongnai n am marooro. Ngkana ko kainnanoa te ibuobuoki, tuangiia am karo ke taan kairiiri n te Ekaretia.
-
Kaoa te Tamnei. Bon te iango ae tamaroa n tataro ao ni katauraoi imwain taina ni karekea te Tamnei iroum ngkana ko marooro. E aki ti karekea te rau ibukin raun te Tamnei, ma E kakoaua naba ibukin te koaua (taraa R&B 42:14). Kaoa te Tamnei nakon am bootaki n toa man kaotan am koaua n te bwai ae ko kakoaua bwa e boni koaua.
-
Iangoa am karaki. Teuana te kabanea n tamaroa ni kawai n reitaki ma aomata tabeman bon rinanon karaki. Ti tangiria n ongo aia taneiai tabeman ao tera aekakin maiuia. Ngaia kataia n iangoa te taneiai ae kangare, e onoti, ke e kakaewenako ae ko a tia ni karekea ae kaineti ma reirein te euangkerio are ko a tia n anganaki bwa ko na marooro iaona. Tera ae ko reiakinna man te taneiai anne? E kanga ni buokiko? Aio te kawai ae moan te tamaroa ni kaukan am marooro ngkana akea am iango bwa ko na kanga ni moana am marooro.
-
Kataneiai, kataneiai, kataneiai! Imwiin ae ko a tia ni korea am marooro, ko na bae n tangiria ni kataneiako n tataekinna bon iroum, ao imataia kaain am utu ke raoraom. Ko kona ni kunea ngkana am marooro e bane n te tai are e katauaki ao ngkana iai mwakorona aika ko riai ni kamatatai. Ngkana e nakoraoi ma am bitiobi, ko kona ni kataia n nakon te umwantabu ni kataneiako n anga am marooro imwain taina n te tabo n taetae!
Anga te Marooro
-
Totokoa moanakin am taeka n taekinna bwa ko bon aki tangiria n taetae. E kona te kaukuki n am taetae aei n anai kawai aika kakaokoro, ma angiia taan ongora a kinaa ngkekei naba. Ti tebo ma te bwai aei, “Ngke e weteai te Bitiobi n tuangai bwa n na anga au marooro, I kataia n iangoi tabeua au kaangaanga n totokoa karaoana.” Angiia kaain te Ekaretia a kona n oota n aron te aki mwengaraoi ngkana ko anganaki bwa ko na marooro, ma ngkana ko taekinna, “I aki tangiria ni mena ikai,” aomata a kona n raira anne ni kangai “Taiaoka tai ongora irou.” E raoiroi riki ngkana ko totokoa aron moanakin am marooro n te kawai aei—kaota nanom ae ingainga nakon atuun am marooro!
-
Kamataata raoi am marooro. E aki tataneiai te aba iai n taetae ni waekoakoa ke n rangin ni karaurau ibukin te nakonnano. I aki kona n ataia bwa tera te bwai anne! Ma e kakawaki bwa ko na kamataata am taetae ngkana ko anga am marooro bwa aonga kaain te taromaruri n oota n te bwai ae ko taekinna. Karaoa raoi te mwakuri ni koaua ma te karaurau, taekin raoi am taeka, ao taetae n te bwanaa ae riai (eng, riki ma te bwai n taetae, ko kona n taetae ni karaurau). Aomata a tangiria n ongo te bwai ae ko na taekinna!
-
Teimatoa n taraa eta. Taraakin matan te aomata bon mwakoron te reitaki ae moan te raoiroi. E kaotia ae ko bon ongora raoi ao n iai nanom nako iai. Ngkai, ko aki kainnanoia bwa ko na tarai mataia kaain te taromauri ngkana ko taetae, ma riki ngkana ko teimatoa n taraa buukin ke moan te ruu, ko na rangin ni kukurei riki ngkana ko taetae. Totokoa taraakin ti am taeka n am beeba ao akea riki! Taan ongora a tangiria n noriko ni moangare, tiaki taubukin atuum.
E ngae ma kawai aika itiua aikai, ko kona naba ni karaoa te kairua ke n noora temanna ni matu n te kateniua n rinan. Ma e nanonna n anne bwa te tia taetae ngkoe ae ko aki raoiroi? Ni bon arona tiaki!
Ngkana ti karaoa te bwai ae kanga e aki kamwengaraoi, ko na namakina te nakonnano ke ni karaoi kairua aika uarereke. Ma ngkana ko karaoa am kabanea n tamaroa ao ni kaoa te Tamnei, akea te kaangaanga ngkana iai kairuan am taetae ke ni mwaninga n taekina te bwai teuana. Ko karaoa ana mwakuri te Atua e na buokiia Natina n reiakina riki taekan te euangkerio!
Ngkana ko reirei ao n anga am koaua n te bwai ae ko kakoaua, ana bane n nakoraoi bwaai ni kabane.