Tina Kanga ni Kanakoraoa Tibwauakin te Euangkerio
Ngkai ti a tibwa rairaki, kainabau ao ngai ti aki ataia raoi bwa ti na kanga ni mitinare. Ma ti katea te kouru bwa ti na tibwauaia ma aomata aika 100.
Never ao Everjoyce Chikunguwo
Kainabau, Everjoyce, ao Ngai ti roko man te taun ae uarereke ae Mutare, n tian Zimbabwe mainiku. E aki maan imwiin are ti bwabetitoaki ao ni kamatoaaki, a ingainga nanora ni kani karaoa te mwakuri ni mitinare. Ti warekia bwa “e a mainaina n tawa ngkai te nne n aroka nakon te taiaki” (R&B 33:7), ao e ngae ngke ti aki rangin n ataia bwa ti na kanga ni mitinare, ti baireia ti kainnanoia ni “karina i buakona [ara] biti ni koro wiita, ao taia [ma] marurungira, ara iango, ao korakorara ni kabane.”
Kaain ngaira te Mwaanga ae Dangamvura ae tibwa kateaki ae tei n teuana kaawan Mutare. N te tai anne, n te 1991, ao mwaitiia kaain te mwaanga bon 25. N te tai ae waekoa ti weteaki bwa ti na riki bwa mitinare n te mwaanga. Ti reiakina ae mwaiti mairouia taanga ni mitinare aika a maan aika a mwakuri n ara aono. Teuana te iango ae a karaoia bwa ti na katei ara kouru.
Ti tangiria n tibwaua te euangkerio ma aomata ni kabane, ngaia ae ti katea te kouru n tibwauaia ma 100 aomata ni moan te ririki are ti riki iai bwa mitinaren te mwaanga. Tao ti aki rangin ni mwatai, ma e taraa ni koaua nakoira. Ti kakoaua te Uea bwa e na buokiira.
Man anenean anene n taromauri n te Ekaretia, ti kunea bwa iai ara tarena n te katangitang ae tiaki ataia mai imwaina. Ti iangoia bwa ti na kabongana ara tarena, ngaia ae ti a moanna te anene ibukin—ao ma—aomata aika a kaota nanoia n te euangkerio ngkana ti na reireiniia. E raoniira te Tamnei ngke ti anenei anene aika mimitong, ao E kairoroi nanoia naake ti reireiniia. Iai naba ana kairoro te euangkerio ae kaokaki inanon nanon naoia. Ti kaungaia aomata ni kabane bwa ana kaaina ara kuaea n te mwaanga, ao a mwaiti aika a kaaina te kuaea, e ngae ngke ngaiia kaain Aika Itiaki ni Boong Aika Kaitira ke tiaki. Ngke a mwaiti riki aomata aika reiakina taekan te euangkerio, a mwaiti aika a bwabetitoaki.
Kamataata n te tamnei iroun Oriol Vidal
Ngke ti reitanako ara mwakuri ni mitinare, ti reitinako n aki mamatam ao n tataro ibukiiia utu ake a kaina te Ekaretia. Ti namakinna bwa tabeman inanon te komiunitii a kakoauai aia katooto aika raraoi utu aikai. Ti karekei kakao aika mwaiti riki bwa ti na reireiniia utu, ao taan kan reireinaki a onrake ma aika a tauraoi n riki bwa membwa.
Mai imwiin reiakinan ao maiuakinan te euangkerio, taanga aika tibwa bwabetitoaki a riki ni kaan riki ao n tangira riki. A kona kaaro ni katokii karaoan katei ake aki boraoi ma katein te euangkerio. A katoka kabonganakin te arekooro ao te bakee. A reireiniia natiia reirei aika eti. A mwaiti aika a tia ni kabanei aia tai iaon bwain te aonaaba n taai aika nako ae a kona ngkai ni butimwaei wewete n te Ekaretia. A riki bwa kakabwaia nakon aia mwaanga ao aia komiunitii. Ana kairoro te Uea e uota te bitaki ae moan te korakora nakon maiuia.
E ngae ngke e korakora te tiritiri ae riki i Mutare n te tai anne, e aki katoka rikiraken te Ekaretia. E taraa n ae ngke e rikirake te kakaitara, e rikirake naba mwaitiia aomata aika a tangiria n reirei taekan te Ekaretia. Te katooto, ngke a roko tautian te aba mwaane ni karabai ubuia bwa ana ukoukora te Ekaretia ibukin karaoan bwaai aika kairua, a ringaki nanoia n te Tamnei. A mwaiti aika bwabetitoaki imwiina ao ni katabuaki nakon te nakoanibonga.
Ma ana ibuobuoki te Uea, ti a kona n tibwaua iai te euangkerio ma aika mwaiti riki nakon ara moan kouru. Bukina bwa iai nanora ni kakaai kawai aika tina kona ni karoko iai nakoia tabeman, ti kona ni kakoaua te bitaki n nano ae korakora ni maiuia aika mwaiti n ara komiuniti ni kabane.