Dua na Lotu baleti Zulma
Rairai e vinakata na Kalou me kila o Zulma e levu na ka.
“Mo ni kerekere, ka na soli vei kemuni” (3 Nifai 14:7).
A dabe toka o Zulma ena dua na idabedabe ni lotu ka vakamalumutaka na liku ni nona isulu ni vuli. A cilava curuma na katuba iloilo na cina duiroka, ka duri tu e dua na kauveilatai ena muailiu ni valenilotu. A vuli tiko o Zulma ena dua na koronivuli lotu, ka lako vata kei na so tale na gonevuli ki na soqoni ni sokalou vakarua ena dua na siga. A taleitaka o Zulma na nona lotu. A lomani Jisu o koya ka taleitaka ni vulica na veika e baleti koya.
A dabe galugalu o koya ni sa tekivu vosa na bete. Ia nikua sa duatani na ke e vakilai Vakasauri ga na basika ni dua na vakanananu vou ki na nona vakasama kei na yalona: E sa tiko e levu tale na dina.
A vakadreta o Zulma na vacuvacu ni matana. Vuqa tale na dina? Na cava e kena ibalebale oya?
A basika tale na vakanananu oya. Sa tiko e levu tale na ka e dina.
A bobo o Zulma ka vakasamataka na ka a vakila voli. E sa vulica o koya e levu na ka vinaka e valenilotu. Ia oqo sa vakananuma tu o koya ke yali tiko e dua na ka. Rairai e vinakata na Kalou me kila o koya e levu na ka. Ia vakacava me kunea mada?
A mani vosa o koya vei ganena qase, o Alberto, me baleta na nona nanuma.
“O nanuma li ni sa tiko e levu tale na dina?” A taroga o Alberto.
E deguvacu o Zulma. “Au via vulica na veika e baleta na lotu tale eso,” a kaya o koya.
“Sa donu,” e sauma o Alberto. “Au na lako vata kei iko!”
A sikova o Zulma kei Alberto na lotu duidui eso me vica na yabaki. Ni oti e dua na soqoni ni lotu, a kaya o Alberto, “Na lotu oya e vakavulica na veika vinaka.”
A vakadonuya o Zulma, ia rau a vakila ga ni vaka me yali tiko e dua na ka, ka rau vaqaqara tikoga.
Dua na siga a ciciva cake o Alberto na ikabakaba ni nodrau vale. “Au sa raica na lotu daru vaqara tiko!” A kaya o Alberto. A mokoti Zulma vinaka sara o koya.
A raba mai na matai Zulma. “Evei? Caka vakacava?”
“A sotava na noqu itokani eso na daukaulotu mai Na Lotu i Jisu Karisito ni Yalododonu Edaidai,” a kaya o Alberto. “Au a vakarorogo vei ira, ka’u sa vakadinata na ka era vakavulica!”
Sa marau sara ga o Zulma kei Alberto ka rau danisi wavokita kece na vale. Ia a qai ciqoma o Zulma eso na itukutuku ca. A sega ni vinakata o tinana me sotavi rau na daukaulotu. “O se qai 12 ga,” a kaya o tinana. “O sa rui gone.”
Me vaka ni qase toka o Alberto, a vakatarai o koya me sotavi rau tiko na daukaulotu. Vica na macawa ka tarava, sa papitaiso o koya.
A kerei tinana veitaravi voli ga o Zulma ke rawa ni vakavulici koya o rau na daukaulotu. Kena itinitini, sa vakaio o tinana.
Ni rau sa vakavulici Zulma na daukaulotu, a vakila o koya na vakacegu ni yalona. A dredre toka ki na dua na kaulotu me vosa vaka-Sipeni, ia e sega ni manata. Na ka ga e manata oya na loma vinaka i Zulma. Ni sa vulica o koya me baleti Josefa Simici kei na iVola i Momani, sa kila o koya ni sa kunea na dina a vaqara voli tu!
Sa vinakata o Zulma me papitaiso. Ia na cava ena kaya o tinana? A marau vakalevu o Zulma ni sa vakaio o tinana! Ena siga ni nona papitaiso, sa vulavula kece tu na isulu i Zulma. E kila tu ni sa lomani koya na Kalou. E kila tu ni sa kilai koya [na Kalou]. Ka kila tu ni sa vukei koya [na Kalou] ni kunea na Nona Lotu vakalesui mai! ●
Oqo e Zulma ena gauna koya se goneyalewa lailai kina. Ena imatau e dua na kena itaba ena gauna oqo vata kei na watni, o Elder Walter F. González ni 70.
Droini mai vei Scott Wakefield